نوتة موسيقية

[MooNy87]

أنا قرأت القصة دى على النت وكانت من غير اسم

فالعنوان ده من اختيارى

_ايه يا بنتي مسربعاني من الصبح في ايه .
_في انك كل مره بتأخرينا علي معاد الكورس، نفسي مره واحده نروح بدري يا غاده .
_ خلاص كلها خمس دقايق بس ونوصل ان شاء الله .
دخلنا القاعه الخاصه بالكورس ، هي صغيره صحيح بس بحس فيها براحه غريبه ، كأنها جزء مني حبيتها من اول يوم جيت في هنا ، بعد شويه لقيته دخل ، بنفس الطله بتاعت كل مره ، طلته اللي بتخطف قلبي معاها ، انا مش عارفه ايه بيحصلي غمضت عيني وكأني بحاول اوقف افكاري ، بس فجأه سمعت صوته بينادي عليا .
فتحت عيني بسرعه وبصيت ليه لقيته بيسألني .
_انتي كويسه ؟؟
_هزيت راسي بسرعه ، وانا بقوله اه اه انا كويسه .
بصلي بنظره غريبه مفهمتهاش ، حسيت وقتها أنه قرأ أفكاري معقول يكون حس بحاجه لأ اكيد لأ .
بدأنا الدرس الجديد وكالعاده جه عليا الدور مسكت الكمان وبدأت اعزف وانا مغمضه عيني ، دي مش شطاره مني ، انا بعمل كده علشان ميبصليش لاني اكيد هتلغبط وابوظ كل حاجه ، انا حافظه كل وتر وكل نغمه ايدي بتمشي عليه كأنها محفوره جوايا خلصت وفتحت عيني لقيته بيبصلي بتركيز وهو بيقول .
_ احنا خلاص خلصنا ، تقدروا تتفضلوا .
قومت من مكاني ولسه هتحرك لقيته بيقولي استني لحظه .
حسيت وقتها اني هيغمي عليا بس وقفت ثابته برغم اللي جوايا واتكلمت بثبات معرفش جبته منين .
_ خير .
ابتسم وقالي .
_ شكلك بتحبيه اوي ..!
_لأ كده كتير يارب ايه ده مسكت في الشنطه وكأني بحاول أخد ثباتي منها .
وجاوبت بهدوء :
_ هو مين ؟؟
ابتسامته زادت وهو بيقول
_ الكمان .
_اووووووف الحمد لله وقعت قلبي يا شيخ ايه ده
_ اكيد بحبه والا مكنتش هتعلمه ، بس هو ليه حضرتك بتقول كده دلوقتي وليا انا بالذات .
_ بقولك كده علشان انتي الوحيده اللي بتغمضي عنيكي وانتي بعزفي صوابعك بتمشي علي الاوتار وكأنها حافظه مكانها علي الرغم من اننا بنكون لسه واخدين اللحن جديد الا انك بتعزفيه بمتهي السلاسه والثبات ودلوقتي بالذات علشان دي مش اول مره تعملي كده ، علشان كده بقولك شكلك بتحبيه اوي .
_ طب ارد اقول ايه دلوقتي ، انا بغمض علشان متلغبطش بسببك انت والله ، ياربي انا ليه بيحصلي كده .
_فضلت ساكته ، لقيته بيبص في ساعته وبيقول ، معلش عندي معاد ، بعد اذنك .
خرج ولسه جايه اخرج لقيت دفتر صغير واقع علي الارض ، ياه دي النوتس بتاعته .
خدتها وخرجت وراه بسرعه علشان اديهاله بس كان مشي خدتها معايا ، علشان ابقي اديهاله .
غاده فضلت تتكلم طول الطريق وانا مش حاسه بحاجه حواليا خالص ، حتي مكنتش سامعه هي بتقول ايه.
_ انتي يا بنتي .
_ هه في ايه ؟؟
_ في ايه انتي ، انتي مش معايا خالص ، هو عمر كان عايزك في ايه ؟؟
_ كان بيقولي ملاحظات كده .
_ وجاي يقولها دلوقتي ، واحنا بنودع .
_ بنودع .
_ اه المره الجايه اخر يوم انتي متعرفيش ولا ايه الكورس هيخلص الاسبوع الجاي .
_مين قالك كده ؟؟
_ما خلاص ال3شهور خلصوا ولا احنا هنفضل العمر كله ناخد في ام الكورس اللي طلع عيني ده .
روحت البيت وانا مخنوقه معرفش ليه كل ده ، طب انا ليه بحس بكده وليه مضايقه كده معقول ، معقول اكون حبيته ، طب امتي وازاي ؟؟
اكيد لأ انا بيتهيألي ، واكيد لما نخلص هنساه قلبي وجعني اوي لما افتكرت انها هتكون اخر مره اشوفه فيها ، ده انا كنت بستني اليوم ده كل اسبوع ، اوووف ايه الصداع ده كمان .
_ يا ماما ، ماما .
_ايه في ايه ؟؟؟
_ايه الصداع ده ؟؟ دماغي اتخرمت .
_دي الشقه اللي قدامنا سكنت جديد ، والدق ده شغال من الصبح .
_اووووف هي كانت ناقصه الصداع ده كمان .
طلعت الكمان ووقفت جمب الشباك وبدات اعزف اللحن الجديد علشان اخرج نفسي من كل الأفكار دي .
عدي الاسبوع وجه معاد الكورس ، خلاص ده اخر يوم واخر مره هشوفه فيها ، دخلت وقعدت مكاني بس من غير حماس كأني بحاول اعود نفسي علي عدم وجوده انا حتي مكنتش عايزه انزل لولا زن غاده عليا ، مبصتش ناحيته خالص انا اصلا دايما بتجنب اني ابص ناحيته علشان بتوتر اوي بس المره دي مختلفه تماما لاني خلاص مش هشوفه تاني .
لحد اما خلصنا وجه وقال ان انهارده اخر يوم ، لأ وكمان هيسافر ، الخبر نزل علي دماغي زي الصاعقه غمضت عيني مش عايزه حد يشوفني ولا اشوف حد ، حاسه انه لو بص في وشي في اللحظه دي هيعرف كل حاجه حتي من غير ما اتكلم .
بعد ما خلص كلامه خرجت بسرعه وروحت البيت جري حتي مستنتش غاده ، دخلت اوضتي وفضلت اعيط كتير اوي انا مش عارفه انا بعيط ليه كده يارب ساعدني يارب ميسافرش معقول مش هشوفه تاني .
نمت من كتر العياط وصحيت بالليل قررت ابعد بأفكاري عنه خلاص هو مش هيكون موجود تاني ، لازم تنسيه بقي .
طلعت الكمان وبدات اعزف مش عارفه انا بعزف ايه ولمين ، لحد ما لقيت رساله علي الفون .
_ خدي نفس قبل ما تبداي واقفلي الشباك .
_ايه ده ، ايه ده مين ؟؟
جريت علي الشباك بصيت لقيته هو قدامي ، للحظه حسيت اني بحلم فتحت عيني وغمضتها لأ لأ دي حقيقه مش حلم ، هو والله هو واقف قدامي انا شيفاه اهو ، بس ازاي ؟؟
_عمر الساكن الجديد ، وبقاله اسبوع كمان يختااااااي لأ لأ اكيد في حاجه غلط .
قفلت الشباك بسرعه وانا لسه تحت تأثير الصدمه .
_معقول ، يكون القدر في صفي اوي كده ، ده انا لو حد حكالي ان ده هيحصل مكنتش هصدقه .
عمر جاري وبيني وبينه كام خطوه ، بس حتي لو جاري كده كده هو هيسافر خلاص بقي متعشميش نفسك ، اهو علي الاقل هتشوفيه قبل ما يسافر وهتبقي المره الاخيره .
فضلت في البيت 3ايام مش بخرج ولا بفتح الشباك ، بس بعزف كل يوم لحن جديد انا عارفه انه سامعني وده كفايه .
لحد ما جه معاد السفر خلاص هو كده هيسافر بكره ، خلاص مبقاش في امل لاهو هيغير رايه ولا انا هقدر اقول اللي جوايا ناحيته .
في اليوم ده انا معزفتش بس فتحت اغنيه لشيرين وفتحت الشباك اول مره افتحه من وقت ما عرفت انه جاري .
عارفه انه سامعها يمكن اكون مش عارفه اقول اللي جوايا بس الاكيد ان الاغنيه دي كفايه ، انا مش عارفه انا بعمل كده ليه اصلا ، بس حتي لو احتمال انه ميسافرش كان واحد في الميه انا هتمسك بالاحتمال ده .
_ كل حاجه ناقصه حاجه وانت مش جمبي حبيبي ، نفسي اعمل اي حاجه بس ترجعلي حبيبي .
وفجأة لقيت نور اوضته اتفتح وقبل ما يفتح شباك اوضته كنت قافله شباكي بسرعه ، اكتر من كده مش هقدر اعمل حاجه .
طفيت نور اوضتي ورحت علشان انام وانا عارفه اني مش هعرف ، بس بحاول ما خلاص مبقاش في ايدي حاجه اعملها .
_ياخبر الدفتر
طلعت الدفتر من الدرج .
_ انا ازاي نسيته ؟؟
_لازم اديهوله قبل ما يسافر بس ده طيارته الساعه 7 الصبح .
_ فضلت ماسكه الدفتر في ايدي وكأن حد هياخده مني ، وفتحت اخر صفحه فيه وكتبت جمله ، وقفلته تاني بسرعه ، بحارب فضولي فإني افتحه واعرف ايه اللي جواه .
فضلت صاحيه لحد الصبح معرفتش انام ، قمت غيرت هدومي وجهزت وخدت الدفتر معايا ونزلت بس لقيته مشي ، ركبت بسرعه علشان الحقه بس لما وصلت كانت خلاص الطياره طلعت .
حسيت وقتها كأن الدنيا وقفت حواليا مش شايفه ولا سامعه حاجه .
_ ما انتي كنتي عارفه انه مسافر ، وقولتي خلاص .
_ايوه بس كان جوايا احساس انه هيفضل ، انا حاسه بيه حواليا ومعايا والله حاسه انه لسه موجود .
فجأه سمعت صوت جاي من ورايا .
_ بتدوري علي حد ؟
صوته هو ، صوت عمر لفيت بسرعه مش مصدقه انه لسه موجود .
عايزه اتكلم بس مش عارفه ، يمكن مصدومه او فرحانه يمكن متفاجاه حقيقي مش عارفه مالي .
فضلت بصاله كتير بحاول استوعب اللي حصل هو فعلاً مسافرش ولا دي تهيوات ؟؟
_ انتي سمعناي .
_ هه ، اه اه سمعاك ، اه ، لأ ، قصدي بدور عليك .
_ بتدوري عليا !!
_ قصدي انه كان في حاجه ليك معايا ، كانت وقعت منك ، وانا خدتها ونسيت اديهالك ، طلعت الدفتر من الشنطه وادتهوله .
بصلي بابتسامه
_ متشكر اوي .
_بس هو ، هو انت مسافرتش ليه ؟؟
_علشان في حاجه مهمه ، مش هقدر اسافر من غيرها .
هزيت راسي ومشيت بسرعه ، روحت البيت وانا مش عارفه في ايه بس انا مبسوطه ، علي الاقل هو رجع ، بس كلامه بيقول أنه هيسافر تاني .
اووووووف بقي انا زهقت ، خلاص مش مهم بقي اللي يحصل يحصل .
اليوم عدي وتاني يوم لقيت ماما جايه تصحيني وبتقولي .
_ اصحي بقي يلا ، علشان جايلنا ضيوف انهارده .
_ يعني هما الضيوف هيجوا من الصبح.
_ طب قومي وبطلي لماضه .
_لسه بدري يا ماما خلاص بقي سبيني انام .
_ قولت اصحي خلاص مفيش نوم.
_ليه ليه مفيش نوم الساعه لسه 8 ضيوف ايه دلوقتي .
_يدوب تلحقي تجهزي .
_يدوب واجهز ، ماما هو في ايه بالظبط ، اوعي يكون اللي في بالي .
_اقسم بالله لو عملتي حركات كل مره دي لهتشوفي انتي سامعه ، قابلي الناس كويس وبطلي لويه بوز .
_لويه بوز يبقي عريس ، وانا مش موافقه .
_مش لما تشوفيه الاول !!
_من غير ما اشوف حد ، مش موافقه.
_ ابوكي ادلهم معاد الساعه 7 وهتقابليهم .
_يا مام..
_ بس مش عايزه اسمع كلمه زياده ، يلا قومي ورانا شغل كتير .
_ها خلصتي ؟؟
_اه يا ماما .
_طب يلا وافردي وشك قولت .
_حاضر .
سمعت صوت من بره بيكلم بابا .
الصوت ده مش غريب عليا ده ، ده هو .
هو عمر .
_ايه مالك في ايه ؟؟
_ماما هو ده العريس ؟؟
_ اه هو ، خدي الصنيه دي دخليها وحسك عينك تدلقيها زي كل مره ، ابوكي جايب اخره منك .
_انا ممكن ادلقها عليا انا شخصياً والله .
_بتقولي ايه ؟؟
_مفيش حاجه .
_طب يلا ، وامشي براحه .
دخلت وانا مش شايفه قدامي صوته موترني الكوبيات بتتهز مني والله هتع انا حاسه ، لأ لأ مش المره دي ان شاء الله مش هتقع ، قدمت العصير وجه عليه الدور ولسه جايه اقدمه بمجرد ما بصيت عليه دلقت الصنيه كلها .
يختاااااااي طبعاً انا لو حلفتلك انها من فرحتي مش هتصدق انا عارفه .
_ايه ده ؟؟
_حصل خير ياعمي مفيش مشكله ؟؟
_بيقول عمي ، ده انت اللي عمي وعم الناس كلها والله .
_انا انا اسفه ، اسفه والله مكنش قصدي .
_اهدي اهدي مفيش حاجه ، مانجه ده ؟؟
_ ها ؟
_ انا بقول نسيبهم مع بعض شويه ، ولا ايه يا جماعه .
_تسيبو ايه مع مين ؟؟ يختاااااااي ده انا ممكن اعمل مصيبه دلوقتي ، انا متوتره خلقه اصلا.
_ يلا بينا .
خرجوا كلهم وفضلنا انا وعمر ، فضلت بصه للارض مش قادره ابصله وابصله ازاي اصلا وانا بتلغبط كده .
_هتفضلي بصه للارض كده كتير .
_ لأ ، ابدا .
ابتسم وقالي
_ انا عارف انك متفاجأه ومتلغبطه ، بس تعرفي شكلك بيكون حلو اوي وانتي كده .
_اسكت بقي والله هيغمي عليا منك دلوقتي ، يارب اعمل ايه دلوقتي .
_انا مش فاهمه حاجه .
_ طيب تحبي نبدا منين .
_قول انت عايز تبدا منين ؟؟
سكت شويه وبدا يتكلم وقال
_ من اول يوم شوفتك فيه حسيت بحاجه غريبه ناحيتك ، مش عارف اذا كنتي هتصدقي كلامي ده ولا لأ بس انا حسيت كأنك نصي التاني ، فيكي حاجه كنت بدور عليها من زمان ، يمكن علشان كده اول ما قابلتك اتشديت ليكي ، انا شوفت فيكي نفسي ، كل مره كنتي بتغمضي عينك فيها وانتي بتعزفي كنت ببقي فرحان علشان عارف اني لما هبصلك مش هتكوني شيفاني ، ولما جيت اتنقلت هنا كان علشانك انتي ، كنت عايز اكون جمبك اكبر فتره ممكنه قبل ما اسافر ، معرفش انا ليه كنت بعمل كل ده ، انا حتي مكنتش بفكر ولما جه معاد السفر حسيت حاجه منعاني وكانها اشاره من ربنا ، لاني عارف ومتأكد اني مش هعرف اكمل وابعد وانتي مش معايا ، حتي لما سيبت النوتس بتعاتي كنت عارف انك هتلاقيها وهتعينيها معاكي بس اللي مكنتش متوقعه انك متفتحيهاش ، يمكن وقتها كنتي عرفتي كل حاجه .
_ كل حاجه ..!
_كنت بكتب فيها كل التفاصيل الصغيره اللي تخصك ، جمعت كل حاجه ليكي فيها ، وتحت كل صفحه كنت بكتب اسمك عليها علشان تفضل بصمه معايا ليكي علي طول .
وبردوا مش عارف انا كنت بعمل كل ده ازاي بردوا .
لانك وبكل بساطه جيتي خدتي كل الحب اللي جوايا ، حتي حبي لنفسي .
_بصيت ليه وانا مش عارفه اتكلم مش قادره اصدق اني بسمع الكلام ده منه ، مش عارفه اوصف شعوري دلوقتي بس كل اللي انا عرفاه ومتأكده منه اني بحبه ، وبحبه اوي كمان .
_بس انا فتحتها .
_ يعني كنتي عارفه ؟؟
_ لأ ، انا فتحتها علشان اكتب فيها مش أقرأها .
_وكتبتي ايه ؟؟
_ افتح آخر صفحه فيها وأنت هتعرف .
طلعها من جيبه وفتح اخر صفحه وقراها وابتسم وقالي.
_ بحبك اوي .
(وحين ألتقيت بك أدركت أن جميع ما مررت به ؛ ما كان سوي إنتظاراً لرؤياك )


بقلم

أشرقت أحمد

[serenade]

♫ ♫ روووعة ♫ ♫

[SHELL]

وحين ألتقيت بك أدركت أن جميع ما مررت به ؛ ما كان سوي إنتظاراً لرؤياك

[ميساء بيتي]

وحين ألتقيت بك أدركت أن جميع ما مررت به ؛ ما كان سوي إنتظاراً لرؤياك

الله الله

ابسط الاشياء تصنع قصص لا تنسى ❤❤

مشكوووووورة والله يعطيك الف عافيه يا حلوه