آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
17-09-19, 09:53 PM
| #51 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #قضية_لم_الشمل_ج٢ #البارت_عشرين #الكاتبة_نهى_الحسون نور كلت لمهيمن عن سالفة الجهاز ومن شفت ردة فعله حبست بقية الكلام واتوقفت مكدرت اكول لمهيمن بخصوص اتصالات جلال و كلامه المريب خفت لا يتعاركون بينهم ما اتحمل اشوفهم يتعادون بينهم مجرد تخيل منظرهم وهمة يتعاركون يرتعد گلبي مهيمن .. نور انتي متأكدة من كلامج يعني شفتي الجهاز بعينج .. اي والله مهيمن شفته قبل فترة كان فوك السطح مغلف بغطى هو نفسه الجهاز الي كان يشتغل عليه جلال وكال عنه راح يشترونه منه شركة سيارات بالخارج ماكو غيره اباوع لمهيمن سحب نقاله واتصل على جلال وسأله عن مكانه وطلب منه يرجع للبيت بسرعة انهى الاتصال ولزم راسه مثل الي راح ينفجر وكال .. استغفر الله هذا جلال ما اعرف شيحس كل يوم طالعلي بسالفة جديدة بالله هسة هاي شنو سالفة الجهاز جان يحجي وسمعنا صوت الجرس هذا اكيد جلال وفعلاً لحظات ولكينة جلال واكف يم الباب سلم علينا ونظرات الشك والحذر تتنقل بيني وبين مهيمن انتبهت لمهيمن كام من مكانه وراح وكف كدام جلال وسأله مباشرةً بدون لف ودوران .. جلال ممكن تفهمني شنو سالفة الجهاز الي سويته وكلت راح اسافر علمود اتعاقد وية شركة سيارات شيسوي هنا بالبيت اباوع لمعاني وجه جلال بقت هادئة وما بين عليه اي ردة فعل او ارتباك بخصوص كذبه بسالفة الجهاز باوع علية ورجع باوع لمهيمن و كال .. طبعاً انا حاولت ان ابقي موضوع الجهاز بطي الكتمان وبعيد عنكم ما حبيت اخبركم بس بما ان انتوا عرفتوا فصار لازم احجيلكم الي صار وياية بالحقيقة انا ما اتعاقدت وية شركة السيارات بخصوص الجهاز صحيح انا سافرت للخارج والتقيت بيهم لكن تفاجأت بشروطهم كانوا يطلبون مني اوقع على تنازل لهم بحقوقي بالجهاز يعني بين قوسين رادوا يشترونه مني. بمبلغ مادي ويصدر الجهاز باسم الشركة حتى بدون ذكر اسمي على الاختراع وبالتالي هذا الانجاز يصير بأسمهم وانا رفضت. هالشي جاوبه مهيمن وهو منفعل .. زين سويت خلي يولون هذا تعبك حرامات يستغلونه بس ما كلتلي اذا كان مشروع الجهاز اصلاً ما اتنفذ زين ليش اتأخرت كل هاي المدة بالخارج .. الحقيقة همة مو اول ماوصلت كالولي بهذا الشي بعد مشديت الجهاز على السيارة وعرفوا قيمته وراها كالولي واني اخوك اعجبك ماطلتهم شوية مو راسا رفضت واستغليت الفرصة حاولت من خلال تواجدي بهيج دولة اجمع معلومات عن الاجهزة وامكانيات تطويرها لحد ما كدرت اجمع لي كم قطعة مهمة من الاليات الي احتاجها وعلى اساسهم قررت افتحلي مشروع خاص بية متشوفني اول ما رجعت صرت ادور على محل او ورشة بالصناعية. .. اي اتذكر انت تريد تفتحلك مشروع خاص بيك جانوا جلال ومهيمن يحجون واني لكيت نفسي تلقائياً اشاركهم بالكلام وسألت جلال .. زين ليش ما كلتلنا من الاول ان المشروع ماصار. وانت رفضت يعني الموضوع بسيط ميحتاج تضمه عنا باوع علية وكال .. كنت خجلان من فشلي واستحيت احجيلكم وبالوقت الي كان مهيمن يفتخر بية وبموضوع الجهاز كدام الناس شفتها صعبة ولا حلوة بحقه اخذله واسلب منه فرحته بأنجازي مثلما تعرفون الفشل مو موضوع حلو الواحد يحب يحجي بي كدام الناس جاوبه مهيمن .. اي بس احنا مو اي ناس احنا اخوانك لا تتوقع نتشمت بفشلك وراح تبقى اخونا سواء نجحت او فشلت ما راح يقدم او يأخر عدنا شي جلال باوع علينا ونظرات الاسف والاعتذار بانت بعيونه وكال .. اسف هالشي مو بيدي غصب عني كبريائي ما سمحلي احجيلكم عن فشل المشروع مرات تحصل امور وظروف اقوى من عدنا تجبرنا نخفي على بعضنا ما اعرف ليش للحظة حسيت بجلال مكان يقصد الجهاز باعتذاره عبالك يحاول يعتذر عن خطأ ثاني ارتكبه بحقنا وهالشي زاد بحيرتي مهيمن .. تعرف شنو عيبك جلال كل تصرفاتك متناقضة تخليني واكف محتار من باب انت شخص مكافح ودؤوب. ومن باب انت مرافقلي ابو طبرة وسمعته الزفت على كل السان متكلي شنو سالفتك معقولة يكون عندك انفصام بالشخصية وانا ما عندي علم ابتسم جلال وكله ..الحمدلله بعدني محافظ على تماسك عقلي بس تعال كلي على طاري ابو طبرة تصدك انا مصدوم بيكم ما اتوقعت يوصل بيكم الامر انت وذاك عناد التيس تقدمون على هيج خطوة وتروحون تخطفون الرجال مهيمن جاوبه بكل ثقة .. هاي شنو الظاهر الخروف رايح مشتكيلك علينا .. ترة تصرفكم اجرامي لا ونوب مو بس خاطفين الزلمة وحابسينه بمزرعة جمالة كاعدين يعذبون بي عايشين الدور بس خلي يصبرلي ذاك عناد حسابي وياه بعدين زين ما خفتوا يروح يشتكي عليكم للشرطة ويشمروكم بالسجن على هاي السواية .. يعني افتهم من كلامك ان ابو طبره بعده ما صارلته عبرة وبعده يرافقك شكله محتاج اعيد كرصة اذنه بيج قصص عراقيه حقيقيه من واقعنا.روعه الطائي جلال بسرعة جاوبه وكال .. اوكف لحظة ترة انا الي رحت لأبو طبرة وسألته بعدما شفته كام يتهرب مني ويبتعد عني كلما يشوفني عبالك شايف جني لزمته وسألته عن سبب صده الي ورفضة الكلام وياي وصدمني من كلي عمي روح عني وخليني بحالي انا ما ناقص مشاكل هذا اخوك وصاحبك زوعوني العافية. بعد لا تجيني ولا اجيك ولا اعرفك ولا تعرفني جاوبه مهيمن .. وهو المطلوب جلال حجة بنترة .. لا مهيمن لهنا وحدك انا رجال وحر بتصرفاتي احجي ويامن ارافق منو هالشي راجعلي. اترجاك بطل حشرية لا تحطني بموقف وتحشرني بزاوية وتجبرني اتعداك انا ما ارضى على هالشي مهيمن جاوبه .. وعنك لا رضيت شوكت ما تمشي عدل مثل الاوادم انا راح ابطل احشر نفسي بحياتك الخاصة واحمد ربك وشكره الامور عدت على خير وكانت بس خطف المرة الجاية اتوقع كلشي مني جلال باوع لمهيمن بقلة صبر وكال .. ما راح اجاوبك خليك اتصرف براحتك مثلما تحب. تريد تسحل ابو طبرة. تعلك دوحي بالبنكة هالشي ما راح يأثر علية بس انا خايف عليكم تورطون نفسكم بمشاكل انتوا مو حملها تركنا وطلع وهو معصب وانقلبت الادوار من مهيمن المعصب الى جلال المعطب. هسة شسوي مهيمن بقى يباوع خلف جلال ورجع التفت علية وفتح ايديه بتعب وكال .. خو شفتي هذا كدامج شلون يحجي وكلامه يدق والله العظيم تعبت واحتاريت شتصرف وياه خايف لا يجي اليوم وصبري ينفذ وينهدم كل الي بنيته كلبي انقبض من كلام مهيمن حجيت .. لا عفية مهيمن لتكول هيج اني املي بيك عرفتك قوي ما راح تترك اخوك لان اذا جلال طلع من حياتنا انا اضيع صرت مثل شجرة تحاول تجمع اغصانها بهبة ريح ما تريد تفرط بواحد بيهم لان اغصانها هي سبب قوتها اي انا هذا حالي وياهم وية مهيمن وجلال وريم مهيمن باوع علية واستغفر وكال .. نور لاتخافين مستحيل اعوفه وراح ابقى وراه اريد اشوفه وين يريد يوصل كنا نحجي وفجاءة انفتح باب الغرفة على وسعة ودخلت علينا ريم وهي وشعرها المهوس القصير وخشمها وخدودها حمر مهيمن شافها وحجة بصوت ناصي .. ياستار اليوم شكله ما ناوي يعدي على خير كل ساعة واحد ناط بيهم اخلص من جلال تطلعلنا بنت عمج مبينة من شكلها جايتنا هدادة ابتسمت على كلام مهيمن وباوعت لريم الي كانت عمية من الغضب باوع لريم وسألها .. خيرج يا ريم البلا داخلة علينا والشر مبين بعيونج .. خير اجتي ووكفت كدام مهيمن ورفعت نقالها كبال عيونه. كانت شاشة النقال بيها محادثة بالواتساب وكالت بعصبية .. هاك شوف اقرة صديقتي شنو تكول نقل نظراته منها للشاشة وصار يقرة المحادثة بعدها باوع عليها وكال بكل برود .. اي وشنو يعني انتي كليلها خطيبي وجاي يأدبني انتوا شلكم غرض ريم بغيض .. مهيمن انت خليت الكل يحجي بية وبموقفك شفت شسويت .. ماسويت شي غلط وهم نفسهم الي جاي ينتقدون تصرفي لو كانوا بمكاني هم راح يسون مثلي ويمكن يزيدون بعد حمدي ربج الموضوع انتهى بس على سحلج من الكلية مو زين ما سويتلج مشكلة هناك على فكرة وكلي لصاحبتج مهيمن يكول خلي اسمع واحد فاتح حلكه ويجيب طاريج بكلمة والله العظيم ازوعه حليب امه جاوبته .. وانت شنو سالفتك كل شي عندك عركة وتهديد وصوت عالي تعرف شنو اتمنى كتف ذراعه وكال .. اي ست ريم بالله كليلي شنو تتمنين بلكي اكدر احقق امنياتج .. اتمنى يجي اليوم واشوفك توكع بيد واحد. حامض بوز مثلك ويكسرك تكسر ويسحلك كدامي بساعتها يرتاح گلبي من اشوف غرورك ينسحل مهيمن نصة صوته وكال.. اريد احلفج بالله اذا اتحققت امنيتج معقولة راح تبقين بس تعاينين عليهم وهم يسحلوني على كولتج جان يحجيها بستهزاء جاوبته بغيض وكالت .. اي راح اكتفي بالمشاهدة ومن يخلصون منك انا عود اخذك لاقرب مستشفى واشمرك بيها حتى يعالجونك لان ما يهلي اشوف حزن امك وخواتك عليك على العموم انا ما اجيت حتى تحلل ردود افعالي اني اجيتك حتى احطلك حد مهيمن ترة اني تعبت منك جانت تحجي بضعف مبين عليها كلش مريضة لزمت كصتها تمسد عليها وكالت .. انت ليش دائما تحاول تحاربني احس بيك كاعدلي عالزلة غمضت عيونها الذبلانة بتعب مهيمن اتغيرت معاني وجهه من البرود للاهتمام و انهى كلامه وياها وكال.. ما راح اجاوبج هذا الكلام مو وكته انتي مبين عليج كلش مريضة اتوقع حتى ما تعرفين شنو تحجين ولا راح تعرفين توزنين كلامج رحت عليها ولزمتها وكلتلها .. ريم حبيبتي مو وكته هذا الحجي انتي كلش تعبانة لا تتخربطين علينا ريم باوعت علية مثل الطفلة تكابر .. اني ما بية شي بس تصرفات اخوج هي الي متعبتني باوعت عليه وكالت.. مهيمن هاي اخر مرة اسمحلك تتجاوزني ترة للصبر حدود اتمنى تفهمني نهت كلامها ودارت وجهة وطلعت من الغرفة مثلما دخلتلها بغضب خلت الباب وراها يتأرجح راح كعد بالكاع واتكأ على الحايط باوع علية وكال .. يالله هاج استلمي واحد يرفع والثاني يكبس ما اعرف منين اتلكاها من اخوي مدري من بنت عمج الي كل يوم تصدمني بشي جديد. هاي البنية متجددة كل يوم طالعتلي بسالفة تصدمني احس تصرفاتها تهديد الي حتى لا يوم افكر واغفل عنها كسر خاطري حال مهيمن رحت كعدت يمه وكلتله.. ريم موضوعها ما يحتاجله تفكير هاي شخصيتها وكلنا نعرف هي كانت عايشة وية عمها وبالخارج وعمها هو نفسه الشخص الي يصير ابونا ما كدر يحتوي اولاده الثلاثة ويجمعهم ويحرص عليهم فشي اكيد هيج شخص ما راح يكون حريص على التزام ريم بحجابها او صلاتها او يراقب تصرفاتها اتوقع ابونا كان فاهم الموضوع غلط عباله الاهتمام فقط بتوفير الحماية لريم وتدليلها راح يعوضها عن كلشي بس مع الاسف مات وما عرف ان اهتمامه كان بمثابة اهمال وريم ضحية جاي تحصد هالشي رفع راسه وكال.. زين شنو الحل شنو احطلها وتطيب والله حيرتني واحتاريت وياها ما اعرف الصوج منين مدري انا صعب وما جاي تتحملني مدري هي تصرفاتها غريبة وماجاي اكدر اتغاضاها .. مهيمن خصم الحجي الموضوع كله راجعلك هاي ريم وهاي تصرفاتها يا اما تحبها وتريدها على ما هي عليه بحلوها وبمرها. او تتركها وتخلي حال سبيلها وتخليها تشوف حياتها وانت هم تروح تشوف حياتك جر حسرة وسألني .. تتوقعين راح يحلالي العيش بحياتي بدونها ؟؟؟ لا ما اتصور يكون عندي شي اسمه حياة اصلاً جلال جنت البس بملابسي وايدية ما تعيني من كد الخبصة اجاني اتصال من الصبح من ابو ذياب يردني التقي بيهم حتى يسلموني جزء من المبلغ وهذا الشي اجراء روتيني عادي بس الي رعبني وصدمني سؤال ابو ذياب عن اسم عناد كلي.. انت تعرف واحد بهذا الاسم احس گلبي وكع بين رجلية لا يا ربي دخيلك هذولي شوصلهم لعناد جاوبته وانا ادعي البرود .. لا ما اعرف واحد بهذا الاسم شنو كلت اسمه .. اي اسمه عناد بعدين تداركت كلامي كلت لنفسي اكيد يعرفون يشتغل ويانا .. ولا مار علية بحياتي واحد بهذا الاسم هو حتى اسم عناد غريب بس لحظة لحظة هذا اعتقد ابن شريك اخوية بالمعمل بس ليش تسأل عنه شبي كلي.. من تجي يمنا نگلك شنو سالفته .. تٌـٌـمــام انا بمسافة الطريق يمكم. جنت احجي وياه وكوة لازم روحي والف حسبة اجتي براسي شنو شبي عناد وهذولي من وين يعرفونه اتحرك بالغرفة وابدل بملابسي بدون وعي فاجئتني نور بدخولها للغرفة ونظرات الشك بعيونها كالت .. جلال حضرتلك الريوك تعال اكل قبل لا يبرد بيج قصص عراقيه حقيقيه من واقعنا.روعه الطائي ..انا طالع عندي شغل مستعجل ما الحك اكل اتوجهت للباب اريد اطلع حتى بدون ما امشط شعري ما اعرف شلون بدلت اصلاً استوقفني صوت نور قبل لا اطلع من الغرفة وسألتني .. جلال انت ليش كنت تنكر معرفتك بعناد قبل شوية من كنت تحجي بالنقال. شنو شكاعد يصير وياك جلال غمضت عيوني بنفاذ صبر وانا منطيها ظهري على اساس انا عايز شد اعصاب ونور كملتها طلعت سامعة المكالمة جاوبتها .. نور انا وعناد مو على توافق بينا مشاكل وزعلان من عنده لذلك انا حجيت هيج وية الولد ما انطيتها مجال تحجي مباشرةً طلعت من البيت متوجه للجماعة ابو ذياب وابو جراس ينتظروني. انطيت الاشارة المتعارفة بيني وبين الجهات المسؤولة ورحت على المكان لكيتهم ينتظروني وبيدهم علاكة ماركة بيها الفلوس كانت كلها بالدولار سلمت عليهم بلهفة اتقمصت دور الفرحان الي مامصدك روحه راح يصير عنده فلوس وبعدما حسبت الفلوس كدامهم كنت اتصرف بشراهة سألتهم .. انتوا شلون جايبين هيج مبلغ ضخم بهاي العلاكة ما تخافون احد يتعرضلكم وياخذها منكم والله انا مجرد ما اباوع عليهن گلبي يوكع من الخوف عليهن ابتسم ابو ذياب وكال.. بعدك ما شايف من الخير شي هذا بس نص المبلغ والنص الثاني من تلتحق ويانة وتبدي تنفذ وعدك النا وتصنع عدة اجهزة من نفس نوع جهازك وتشدها بمحركات سياراتنا لمعت عيوني وكلت .. احلف كول والله يعني راح تنطوني بكد هذني الفلوس لالا ما اصدك خاف انا جاي احلم واحد بيكم خلي يطمني ويكلي هذا مو حلم ابو جراس طبطب على كتفي وهو يبتسم بفخر .. والله انك فقير وعلى نياتك شوف وليدي الي يحط ايده بيدنا امه داعيتله ويعتبر نفسه ابواب النعيم انفتحت بوجهه لفيت علاكة الفلوس وفتحت دكم القميص وخبيتها جوة وجاوبتها .. الله يبشرك يا ابو جراس صدك انتوا ملائكة ونزلتوا من السما واجيتوا بوكتكم بعدها انتقل ابو ذياب بكلامه للجد وصار ينطيني الارشادات وسألني .. كلي شنو الادوات الي تحتاج نوفرها الك هناك بورشة المعسكر مالتنة حتى من توصل يكون مجهزين لك كلشي وتباشر بسرعة بشغلك كان يقصد بالمعسكر على مكان الوكر مالتهم يسمونه المعسكر او القاعدة انطيته مجموعة اسماء لادوات وآليات احتاجهم بصنع الاجهزة لان هم طلبوا اسويلهم مجموعة اجهزة كان ابو ذياب يحجي وانا عقلي قافل على شغلة وحدة شنو سالفة عناد بعدما خلص كلامه. وذكرته .. اي صدك ما كلتلي شنو سالفة هذا الي اسمه عناد شبي ليش سألتني عنه جاوبني بلا مبالاة .. هذا واحد سوسة وصلتنا معلومات عن واحد اسمه عناد جاي يسأل عنا وينبش ورانا وهالشي ادخل الشك والحذر بگلوبنا. والي عرفناه هالشخص ساكن بالبصرة فسألتك لان كلت احتمال تعرفه لان انت بصرة وهو بصرة هيج ربطت من هذا الباب جان ابو ذياب يحجي وانا احس النار كامت تفور بصدري على عناد ااااااااخ والله لو الزمه الا امسح بي الكاع هذا السكط ماناوي يتوب الا اخليله عاهة بجسمه بس بسيطة انا اعلمه وين يروح مني ريم بقيت يومين بالبيت ما داومت لان كنت كلش مريضة ما ادري بالدنيا طشت لو رشت سكنت الفراش واليوم كعدت من النوم احس بصحتي صارت اليوم احسن حسيت بشفايفي توجعني متشققة وطالع. بيها حبوب شافتني حور وكالت متفاجئة .. يبوووي كناري شصاير بيج شفتج مورمة طلعتلج حرارة من ورة الحمى اتلمست شفايفي اتحسسها ورحت وكفت كدام المرايا حصرتني البجية .. لااااا هاي شنو شفايفي راح تتدمر حور جاوبتني .. خرب والله عليج حظ اليوم من دون الايام طلعتلج حرارة بشفايفج باوعت عليها وسألتها.. ليش شكو اليوم شنو عندنا .. شنو نسيتي اليوم حنة رغد صديقة نور بنت الحجي ابو حيدر ضربت على كصتي وانا اتذكر بذاك الاسبوع نور كالت عن رغد صديقتي عازمتني على حنتها راح تسويها بالقاعة ومهيمن من عرف كال لأمه تاخذنا وتروح تقوم بالواجب جاوبت حوروكلتلها.. ولج اي شلون انسى وانا ونور قبل يومين طلعنا اشترينا هدية لرغد اووووف شلون ورطة هاي والله راح ابجي رجعت اتفحص شكلي بالمرايا دخلت نور للغرفة وشافتنا وكالت .. اي واخيراً كعدت الاميرة النائمة من سباتها العميق رفعت حاجبي وكلت.. انتي متأكدة فرحانة رجعت صحصحت علمودي لو علمود اسويلج ميك اب ابتسمت وكالت .. تكدرين تكولين نص من هاي ونص من ذيج انت بالحالتين فرحانتلج طلعت من الغرفة ورحت للمطبخ همزين اليوم جمعة عطلة ما يحتاج اروح للدوام بهذا شكلي لكيت مهيمن وجلال جاي يتريكون سمعت جلال كان يسأل مهيمن عن عناد وجاوبه كله صارله يومين مسافر واليوم رجع من السفر ليش تسأل عنه .. لا هيج بس انتبهت لشغل المعمل صاير مخربط فسألتك عن عناد لان هو المسؤل عن الشغل هناك. انتبهت لمهيمن كان يحجي وية جلال وعيونه علية تراقبني وثبتت نظراته على شفايفي هزيت شعري بحركتي المعروفة وردت وجهي عنه شافتني ام مهيمن وكالت .. ياااا خالة هاي طالعتلج لطمة حمى من ورة الصخونة بالله شو تعالي كعدي خلي احطلج مرهم من عندي سألتها وانا اباوع عليها طلعت علبة من الكاونتر بيها دهن مدري كريم واقتربت مني ولفحتني ريحته الكريهة عفست خشمي وكلت .. خالة هذا شنو رحيته مو حلوة جاوبتني .. ولج خالة هذا مرهم مال اعشاب بس ادهن مكان الحمى بسرعة يمتص الحرارة كلها. من شفايفج جانت ام مهيمن تحجي وسمعت واحد غص بأكله وكام يكح التفتت ولكيت مهيمن يكح وجلال انطاه ماي وكال .. شكلها امك نبع الحنان انتقللها فايروس باربي ابو الصراحة المشفرة وصار السانها مزروف باوع عليه مهيمن وكال بغيض .. ما تاكل تبن وتكرمنا بسكوتك احلى شي ام مهيمن كعدت تدهن شفتي وبعدها منطلقة بالكلام بالها مو يمهم .. خايبة لو تدرين انا خلطاتي شلون يدورون عليها دوارة جان ما كعدتي تتدلعين براسي حسيت بلسعة حرارة قوية بشفايفي من ورة الدهن وسألته بخوف .. خالة هاي شنو انتي مو كلتي الدهن راح يمتص الحرار من شفايفي اشو شفايفي زادت حرارتهم ما حسيت الا الكرسي انركع بالكاع ومهيمن عاط بينا اني وامه .. خيييييير سالمين شجاكم كمتوا علينا من الصبح تحجون كله مشفرات كولوا هنا رياجيل جاي ياكلون تبن ويسمعونكم ومسموط ابو ابوهم من وراكم امه نترت بي .. ما تاكل ياهو يمك ماتكلي شمالك گمت علينا عبالك عجوز بس تدردم من صباحيات الله غمض عيونه وكال .. انا خلي اطلع من البيت واروح اشوف شغلي احسنلي قبل لا ابتلي على عمري طلع من البيت وترك وراه. هدوء متكهرب سألت مستغربة .. هذا شبي مهيمن مو طبيعي صاير وضعه ما ينحمل فجاءة يعصب على اتفه الاشياء جلال جاوبني .. همزين راح المسكين وما لحك يسمع كلامج جان انجلط بجلطة ثلاثية الابعاد عقدت حواجبي مستغربة كلام هذا الثاني فتحت حلكي اريد احجي ما اشوف الا جلال طفر من مكانه وكال .. لا على بختج كل شي لا تحجين. انتظريني اطلع وغردي براحتج انت وعمتج جان يباوع على ام مهيمن الي طلعت من المطبخ وعافتنا. ابتسم وكال .. مو انتي وعمتج ما خليتوا للنية الصافية مجال نزلتوا علينا اكس ومربع كله. طوووووط برطمت شفايفي بزعل وكلت .. عابتلك جلال شنو صرتلي مهيمن الثاني تفسر كلامي على حسب نيتكم السيئة نور هدأت اجواء البيت بفترة الصبح واتحولت من بعد الظهر لاجواء الحماس والترقب والتحضيرات حضرنا نفسنا وكشخنا على اخر حباية. اني والبنات لان اليوم معزومين بحنة رغد خطية اتصلت واكدت علية بألحاح. حتى احضر فرحتها اني والبنات. وام مهيمن ام مهيمن بس سمعت برغد انخطبت كامت كل شوية تباوع علية وتگلي خالة لا تضوجين ان شاء الله تجي قسمتج وربي يرزقج بأبن الحلال الي يسعدج ويحافظ عليج ابتسمت وكلتلها .. منو گلج انا زعلانة. بالعكس خالة اني كلش فرحانة لرغد ربي يسعدها ويتمم عليها صدگني ترة اخر همي الزواج اهم شي بحياتي اخواني وريم وانتي وحور انتوا عندي بالدنيا انا حتى بعدني مشبعانة من حنانكم وامانكم جاوبتني وكالت .. ياخالة الله يكملج بعقلج وكون حويرة تصير مثلج هيج رزنة. جان انا بخير اجة جلال بسيارة مهيمن وكال مهيمن دزني حتى اوصلكم للقاعة جان طول الطريق جلال مشغل اغاني عن الحب ويستغل اي لحظة تغفل عنه ام مهيمن حتى يسترق النظرات لحور مثل الحرامي ما اعرف اضحك عليه مدري انقهر علموده شنو ينتظر اذا جان يحبها لحوراء ليش ما يتقدملها شنو الي مانعه اوووف منك جلال باوعت لريم او بالاحرى باربي جانت بغير وادي شالها على راسها لابسته هيج مجرد شكل مغطي شعرها حتى بدون ما تحكمه وام مهيمن كل شوية تعدله الها وتنبهة عليه لا يسرح من شعرها وهي تسمع كلامها فقط من باب الاحترام وصلنا للقاعة واستقبلتنا مرت الحجي ابو حيدر وجناينها وبنتها الصغيرة سلمت على البنات وام مهيمن ومن وصلني السلام گلبت وجهه وسلمت علية من ورة خشمها وكامت تحجي وياي بتكبر هي وبنتها اما زوجة حيدر فكانت حبابة وياي. والغريب بالامر من تحجي وية ام مهيمن كانت عادية وبسيطة زين شمعنا اني اخذتنا وكعدتنا على ميز يصير قريب على كوشة رغد كانت رغد بعدها ما واصلة. زوجة حيدر كالت .. اتفضلوا كعدوا هنا رغد كالت اريد نور تكعد قريبة علية. ام مهيمن ضحكت وكالت .. اي غير صاحبتها وكلمن يطرب لحله جانت ام مهيمن تحجي ومرت الحجي ابو حيدر تخزرني رمشت عيوني مستغربة تصرفها وياي حور حجت بصوت ناصي .. ونوب هاي شبيها منو دايس على ذيلها ليش سلمت عليج من ورة خشمها وتباوعلج عبالك كاطعة عليها ليلة عرسها باوعت لحور واني الدمعة بطرف عيني بالحقيقة ما متعودة شخص يعاملني بتكبر ومن ورة خشمه هالشي جديد علية همست بصوت يرجف .. اني عمري ما اذيت احد او خشنت خاطر احد اني حتى ما اتذكر حاجية وياها ريم قربت راسها يمنا وكالت وهي تباوع لام حيدر .. شنو شبيج نور نسيتي ترة انتي رفضتي تتزوجين ابنها الامير عناد وهالشي اكيد راح يخلق العداوة بينج وبينها واكيد حالها راح يكون مثل حال اي ام عندها ابنها شي نادر وماكو منه اثنين وما ينرفض فلا تتوقعين تاخذج بالاحضان بقيت مصفصفة على كلام ريم وبنفس الوقت مصدومة .. بس هالموضوع مر عليه سنة وشوية يعني معقولة هي لحد هسة شايلة بگلبها علية جنا نحجي ومنظمة الديجي علنت عن دخول رغد وخطيبها وفعلا انطفت الاضواء ودخلت رغد والضحكة مالية وجها كدرت رغد بنظرها وفرحتها تنسيني موضوع امها وتصرفها وصلت يم الميز مالتنا وشافتني واتسعت ابتسامتها وسلمت علية من بعيد وكملت مشيتها وية خطيبها للكوشة بعدها انشغلنا بأجواء الحفلة كانت كلش حلوة انتبهت لعيون حور وريم كل وحدة بيهم سرحانة بوادي اكيد جاي يتخيلون نفسهم بمكانها هههههه ريم همست بصوت ناعم .. اووووف شوكت يجي اليوم الي نركص اني مهيمن مثلهم سلو اباوع لحور غصت بالعصير بيج قصص عراقيه حقيقيه من واقعنا.روعه الطائي واني كوة لامة حلكي حتى ما اضحك كدامها ما اعرف ليش ما اكدر اتخيل مهيمن يركص سلو وية ريم هههههه بالله جلال عادي اتوقعه بس مهيمن منين ما اجيبه ما جاي ترهم حتى الخيال رافض يخضع للصورة يكول مكان هذا الشخص غلط خلصت فقرة الرقصة الخاصة وبعدها علنت منظمة الديجي عن دخول اخوة العروسة حتى يلبسونها هديتها ما اعرف ليش گلبي ارتعد ولكيت نفسي بلا شعور درت راسي للخلف حتى اشوفه. حالي حال كل البنات الي كانت نظراتهم على عناد واخوه الجبير حيدر كان لابس قاط سبورت واخوه قاط رسمي السترة كانت حاضنة كتفه بتحدي سمعت وحدة من البنات حجت بدلع وكالت .. جلعني سترتك واحضن اكتافك ااووف صديقتها جاوبتها .. هو هذا عناد الي جنت احجيلكم عنه قبل شوية وذيج امه هم يحجون هيج وانا گلبي گام يكمز من مكانه ما ادري شصار بحالي انخبصت عبالك واحد يريد يسرق مني شي ثمين ملكي احتاريت شسوي ما بيدي شي غير بس نظرات عيوني كانت ترافقه بكل خطواته مثل حارس شخصي خايفة لا يحلى بعيون باقي البنات انا حتى متفاجئة من نفسي وردت فعلي ومن المشاعر القوية الي هجمت علية معقولة اني احب عناد وما ادري بروحي اي اكيد انا واكعة بحبه بس من غير ما احس على روحي او يمكن جنت عمية اااي اكيد عميية اباوع عليه شلون اتقدم على اخته وهي كامت من مكانها دنك عليها وباسها من راسها سوى مثلما سوى اخوه حيدر وبعدها لبسوها هديتها كدام زوجها واخذوا وياها صور وبعدها اتغيرت الاغنية كل هذا الصار وانا عيوني ما عافته ولا لحظة صرت اتمعن بكل حركة تصدر منه اراقب ابتسامته نظراته وشخصيته اغلب كلامه وابتساماته كانت لامه واخوه واخته الصغيرة الي كانت تركص يمه وهو كل شوية يلزمها حتى تتوقف عن الرقص شكله ما يقبل تركص وهي اقتربت منه وشاورته بعدها رفع راسه وجان توكع عينه بعيني صادني واني اتمعن بي. حسيت بأحراج ما نزل عيونه من علية اشر بعيونه على راسي رفعت ايدي واتلمست راسي لكيت شالي شوية نازل عدلته وضميت شعري بعدها كافئني بأبتسامة رضى هاي من شوكت انا نور ابحث عن ابتسامة رضى من عناد شكاعد يصير وياي اكيد اني انضربت بعقلي لكيت روحي تلقائياً ابادله الابتسامة حسيت على لكزة بخاصرتي التفتت وشفت حور كالت.. خية نور ستري علينا ونزلي عيونج لا تصيدج زهرة ترة صايرة هالايام. مثل ضابط استخبارات تحلل النظرات وتفسرها وهي طايرة ريم بضحكة ..اي والله نور ديري بالج خالة خطيرة بهيج سوالف رمشت عيوني مرتبكة .. ششنو تقصدون ما جاي افهم عليكم واني شنو سويت حتى خالة تحجي علية حوراء رفعت حاجبها وكالت.. شنو علينا سيدي ترة السالفة واضحة خية نور نظرات عيونج فاضحتج شوفي غيرنا وقشمريه بهذا كلامج مديت ايدي على العصير الي كدامي وانتبهت لام عناد لزمته من زنده وكالت .. تعال يمة عناد شفتلك بنية تجنن تكول للگمر كوم وانا بمكانك الله عليك تعال شوفها. جانت تحجي وعناد عيونه بعدها علية ما اعرف شصار بية من سمعت كلامها اتخردلت وانگلب العصير من ايدي وتلف الميز وملابسي وصرت امسح بالكلينكس مخبوصة والدمعة بطرف عيني بيج قصص عراقيه حقيقيه من واقعنا.روعه الطائي كانت عين عليهم وعين على ملابسي بعدها بفترة اجتي اخته الصغير من وراي ودنكت وشاورتني وكالت .. حٍٍِْــًبٌٍـــِٓېٍٓ امي تكول اذا متصير زحمة ممكن توخرين من كدام عناد ترة صارت نظراتكم ماصخة وبلا ملح اتسعت عيوني متفاجئة بكلامها وجمدت بمكاني همست .. اااااني ما سويت شي .. لا تكعدين تتمسكنين وجاية بدور البريئة. ترة صارت قديمة جاي تشوفين اخوية عيونه معلكة عليج وانتي ما مقصرة بنظراتج جاية بكل صلافة بعدما رفضتي كاعدة تلعبين عليه شنو فحسي على دمج وابتعدي من كدامه وخلي امي تفرح بأبنها وتشوفله بنت حلال تستاهله كملت كلامها وانسحبت من يمي مثل الحية بحيث حتى البنات حور وريم ما حسوا على سمومها الي نفثتهم يمي وراحت نهضت من مكاني ودموعي غوشت عيوني سألتني ريم .. شنو نور وين رايحة حاولت اداري بدموعي ما اريد احد يشوفني .. رايحة للحمام انظف فستاني من العصير تركتها ورحت من غير ما انطيها مجال تحجي طلعت من القاعة وصوت الديجي العالي بدأ يخفت كنت ادور على الحمامات او اي مكان اختل بي قبل لا انهار مثل الطفل المهضوم فجاءة وحسيت على شخص قطع علية الطريق رفعت راسي وكان اشوف عناد واكف كدامي عاقد حواجبه سألني .. شنو نور ليش تبجين منو زعلج احجي جاوبته .. عفية عناد بعد عن طريقي لا تجي امك وتشوفك واكف يمي وتكعد تسمعني كلام يسم البدن .. نور احجي امي شنو كلتلج وانتي هيج مهضومة .. امك تتهمني بسبب رفضك للزواجوانه اني جاي العب عليك واشاغلك بنظراتي بس هي فاهمة الموضوع غلط انا عاذرتها من حقها تريد تفرح بيك حتى تشوف حياتك قطع كلامي وسألني بصوت هاديء وكال .. زين وانتي شنو رأيج بهذا كله ترديني ابتعد عنج واروح اشوف حياتي كلامه سحب البساط من تحت رجلي وسلب مني الكلام وانا هذا طبعي من اخاف افقد الكلام اي اني خايفة لا عناد يروح مني دب الخوف بأوصالي سمعت صوت ريم من وراي حسيت بي الانقاذ التفتت مرتبكة ورجعت باوعت لعناد الي كان واكف ينتظر جوابي على سؤاله بس وين هيهات انا نور الجبانة صاحبة اللسان المعقود دنكت راسي وتركته ورحت لريم الي كانت واكفة بنهاية الممر تباوع علية. اقتربت منها وسألتني .. شنو شبيج صاير شي جانت تحجي وتباوع وراي على عناد ما جاوبتها تركتها ورحت كملت طريقي وكعدت يم ام مهيمن الي بس شافتني ابتسمت وحجت وية المرية الي كانت كاعدة بصفها .. شوفي حبيبة هاي بنتي نور الي جنت احجيلج عنها قبل شوية حور ابتسمت وكالت .. لحكي نور زهرة شافتلج عريس ههههه ما تضيع فرصة ما بادلتها الابتسامة وريم اشرتلها حتى تسكت وحوراء التزمت الصمت لفت انتباهي صوت ام عناد كالت .. شنو عناد وين اختفيت انت ليش تحاول تحرجني كدام الناس عناد سألها .. شكو يمة شصاير .. ما صاير شي بس مو قبل شوية طلبت منك تجي تشوف هاي البنية الي كلتلك عليها جاوبها .. يمة مو وكته هذا الحجي عندي شغل مهم ولازم اطلع جاوبته وهي ضايجة.. انت الى متى اظل تتهرب .. اخوية حيدر وين .. اخوك طلع .. يالله انا رايح عيب وكفتي هنا بين النسوان تركها تدردم وراه بغيض جلال صارلي يومين اريد اوكع بهذا التيس عناد ماكو طلع الاخ مسافر واليوم يالله لفى للبصرة بس صبرك علية خليني اشوفه اااااخ مسحت على وجهي وانا احس بروحي مخنوك عناد ومهيمن جاي يضايقون علية الخناق وخايف عليهم وزاد. خوفي من وصل الموضوع يم داعش يعني اذا لمحوا اي حركة من حركات عناد الطايشة ساعتها ما يترددون لحظة وحدة بقتله ويمكن مهيمن هم يروح بيها اعرفهم ما عندهم رحمة بهيج امور دك نقالي وكان المتصل مهيمن .. جلال تعال للكوفي .. ليش شكو .. ماكو شي بس عناد يريد يحجي ويانا بموضوع مهم رفعت حاجبي وجاوبته .. خلي ينتظرني انا جاي انهيت الاتصال بأبتسامة نصر اجيت والله جابك جايني برجليك يا عناد يتبع...... | ||||
|  |
|
17-09-19, 09:58 PM
| #52 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل_ج٢ #الكاتبة_نهى_الحسون #البارت ٢١ مهيمن كاعد بالكوفي وعناد اتصل علية كال يريدني بموضوع انا وجلال وبعدها وصل وصرنا نسولف بيناتنا بمواضيع عادية شكل عناد منتظر جلال يوصل ما يريد يفتح الموضوع الا بوجوده وانا خليته براحته سألني .. شنو گلك جلال يتأخر لو يجي من وكت .. لا كال انتظروني انا جاي بالطريق تصدك عناد اذا اكلك بديت اخاف من جلال وتصرفاته يا اخي بعد ما اتخلصت من ابو طبرة وتركه الكاه يوم ثاني مرافقلي جماعة اتعس من ابو طبرة شكولهم مگلبة غريبة عجيبة ما اعرف وين يلگاهم ويلتم عليهم باوع علية وكال .. لاتخاف مهيمن انا كلفت واحد يسمونه رادار هو راح يجيبلي معلومات موثوقة عن ابو ذياب والبقية وداعتك مثلما زحلگت ابو طبرة قبلهم بأذن الله هذولي هم راح ازحلگهم عن طريقه بس اصبر علية. وخلينا هاي المرة ما نلفت انتباهه ونشتغل عالصامت ومحد عنده علم بالموضوع غير بس انا وانت جاوبته بحرص.. هذا هو اعتبر سرك ببير ابتسم عناد وكال .. اها مادام صار سري ببير معناها اشتهرنا لان البير ياهو اليجي يشرب من مايه ابتسمت على كلامه وجاوبته .. وداعتك انا البير عندي مهجور وعطلان حتى ما بي قطرة جلال وصلت للكوفي الي كال عنه مهيمن ودخلت وجان اشوف مهيمن وعناد كاعدين سوية ومنطلقين بالسوالف والضحك هاي شنو شكاعد يصير ضيقت عيوني بحذر واتجهت على مكانهم امشي بهدوء بعدهم مامنتبهين لوجودي اشم ريحة مؤامرة من يازمان صاروا توم وجيري اصدقاء معقولة الدنيا تريد تنكلب لو شنو الموضوع وصلت يمهم والقيت السلام وهم سلموا باوعت لمهيمن وسألته .. شنو ابو الهمة هاي من شوكت حلتلك رفقة عناد شغيرك من تالي صرت تحب گعدته مهيمن خزرني وجاوبني .. شكو جلال المن هذا الحجي وشنو الداعي خير ترة انا وعناد ما بينا عداوة. ولا متعاركين قبل شنو الي يخليك مستغرب رفقتي وياه على فكرة ترة عناد خوش عناد واتشرف بصحبته جاوبه عناد وكال .. والنعم منك ابو الهمة هذا من طيب اصلك رفع راسه وباوع علية وكمل كلامه .. عذره لأخوك شكله ما يعرف يثمن كلامه ولا يعرف يميز بين الصديق من العدو هو شعرفه بالصحبة الزينة من ابو طبرة وامثاله وشيل ايدك بعد شتترجى منه كعدت كدامه وانا ابتسم بأستهزاء جنت متعمد استفزه اريد عناد يطلع عن طوره اريد الكالي حجة حتى اقطع جميع الجسور بيني وبينه وابعده عني وعن حياتي ويبطل يورط روحه بحشريته وتصرفاته الرعنة رديت على كلامه .. خليت الزينين الك حجي عناد مهيمن غير الموضوع وهو يباوع علية بتأنيب .. بالله شو غيروا الموضوع دار علية وكال .. وانت جلال انتبه لروحك وبطل سوالف المراهقين رفعت ايدية بأستسلام وكلت .. لاتزعل ابو الهمة هاي لخاطرك راح اسكت جنت كوة لازم روحي ما انزل على عناد بالحجي واخرب الاول والتالي وياه لان اعرف مهيمن ما راح يخليني اتعدى حدودي واكيد راح يوكف بوجهي. ومو بعيد حتى يتعارك وياية بسببه رجعت للخلف بالكرسي اتكأت عليه وبسطت ايدية كدامي على الميز وسألتهم .. ممكن اعرف. على شنو جايبنا هنا استاذ عناد وشنو الموضوع المهم الي رايدنا بي جنت احجي وعيوني تراقب معالم وجه عناد اباوع عليه كان ضايج من طريقة كلامي وياه. وهو المطلوب مهيمن كمل على كلامي .. والله من وراك نسينا حتى السالفة التفت على عناد وكال .. كول عناد شنو الموضوع هذا جلال هنا اباوع عليه عدل كعدته وجلى صوته عبالك واحد راح يلقي خطبة مهمة وكال .. بالحقيقة انا جبتكم لهنا حتى احجي وياكم بموضوع مهم واخذ منكم كلمة او بالاحرى اخذ رأيكم قبل ما اخطي اي خطوة وحتى قبل لا ابلغ اهلي ردت اعرف ردكم قبل كل شي حتى ما تصير احراجات بينا سكت وسحب نفس عميق ومهيمن حثه حتى يكمل كلامه مهيمن .. كول عناد بشنو نكدر نساعدك .. ابو الهمة كلك خير وبركة بس انا جاي وطالب منكم القرب بأختكم نور كلام عناد اجة مثل الصفعة على وجهي فاجئني او بالاحرى فاجئنا لان الظاهر مهيمن هم مثل حالي.مصدوم جانت نظرات عناد المترقبة تتنقل بيني وبين مهيمن من شاف ماكو رد كمل كلامه .. انا اعرف انتوا متحسسين من هذا الموضوع لان الماضي ما يشفعلي بس هسة انتوا تعرفون منو عناد وانا جايكم شاري. على حب الله اوووووف هنا حسيت بالراحة انطاني السبب حتى اهجم عليه عيد وجابه العباس النا ما انطيته فرصة ينهي كلامه كبل نهضت من مكاني بغضب وعطت بي .. عناااااااد لهنا وحدك. شنو هالصلافة البيك من كل عقلك انا ازوج اختي لواحد حشري وارعن مثلك. الا انا اتخبلت فقدت عقلي نهض عناد منتفض ولحكه مهيمن عناد .. جلال حاسب على كلامك وثمنه قبل لا تكعد تجفص جاوبته .. انا ما جاي اجفص اختي وانا حر بيها ازوجها للي يعجبني مهيمن زمخ بية وقاطع كلامي وكال .. جلال خير سالمين اشو كعدت من يمك تگمز ترة هالشي ما راجع الك مو انت الي تقرر عنها والقرار راجع لصاحبة الشأن هي الي توافق او ترفض جاوبته بتحدي اريد الهي مهيمن شوية عن المناقشة .. ما تكول لروحك هذا الحجي من كعدت تطرد خواطيب بنت عمك. وتقرر عنها بكيفك شو ماكلت لروحك هي صاحبة الشأن والقرار خليت مهيمن شوية يتراجع والتفت بسرعة لعناد وكلتله بتحذير .. شوف ولك عناد لو تبقى اخر رجال بالعالم ما ازوجك اختي مهيمن دفعني وكال .. جلال صدك مصختها ترة والله وصل حدي وياك انتبه لروحك عناد كله .. لا مهيمن عوفه خلي اشوفه وين يريد يوصل بهذا كلامه جاوبته .. ما يحتاج تنتظر وتشوف ترة كلامي واضح ما الك مرة يمنا للزواج مهيمن رجع دفعني يريد يهد علية.. جلال اكل تبن وسد حلگگ لا والله العظيم اخليك تتفل سنون جاوبته وانا اتنحى عن طريقه وكلت .. انا ارفض ازوج اختي لواحد ثقيل على المعدة وحاشر روحه بكل شي هو انا من غير كل شي ما جاي اطيقك مو فوكاها جايني تطلب ايد اختي شنو هالثقة الزايدة العندك عاد هنا وبهذا كلامي كدرت اطلع عناد عن طوره ما حسيت الا عناد زانگني من ياخة قميصي وقرب وجهه على وجهي الا شوية يرفعني من الكاع كال بصوت يهدر .. شوف ولك عار انا كوة لازم روحي عنك حتى ما اسحلك مو لخاطر احد لخاطر مهيمن انا عايفك لوحدك تمسلت بس اسمعني زين حجاية گلتها قبل وراح ارجع اكولها وما خايف منك اي انا طالب ايد اختك بالحلال وراح ارجع اطلبها منكم مرة ومرتين وثلاثة لحد ما تملون وانتوا بيدكم تزوجوني اختكم. نترت ايده ودفعته عني وكلت .. هذا عشم بليس بالجنة صير رجال وخلي عندك شوية كرامة وكافي لا تلح شنو انت ما عندك احساس ما حسيت الا ومهيمن انطاني لطمة على وجهي اختل توازني واتعثرت للخلف باوعت عليه مهيمن .. صار لازم واحد يحطلك حد لان كلش اتجاوزت حدودك راد يرجع يكمل ضربه الي لكن عناد اتدخل ورده حجة بصوت هاديء بي برود العالم كله وكال .. لا مهيمن عوفه. لا تتعب نفسك وياه جلال ظهر على حقيقته باوع علية وكمل كلامه .. هاي هي جلال يجرالك الي تريده اوعدك ووعد الحر دين بعد ما تشوف رگعة وجهي للموت ولا اقترب منك ولا احشر روحي يحياتك واوعدك بعد ما تسمع مني كلمة قرب منكم ومن اختكم هاي هي النفس طابت منك ولكل شي اله حد ونهاية وانا هذا حدي وياكم بعدها دار وجهه وطلع زعلان وهالمرة زعل عناد ثكيل يختلف عن كل مرة هالمرة الدم كان يرعد بعروگ عناد وهو يتوعد يبتعد عني وهو المطلوب هاي كانت غايتي من هذا كله خلي اتحمل جهنم فراگه ولا لوعة موته على ايد داعش نور اباوع لام مهيمن شلون تحجي وية مرت اخوها حسن بالنقال وتسولفلها على حفلة الحنة مال رغد ام مهيمن .. ياخية لو تشوفين بناتهم شلون محتارات بنفسهن ما مبقيات شي ما حاطينه بوجهن واللبس تكولين عندهن سباق بالشخلع .. تصدكين اذا اكلج هناك ما تميزين المتزوجة عن البنية كلهن على فرد حفافة ومكياج كنت استمع لكلامها وابتسم وبنفس الوكت عقلي كل شوية يغافلني ويكعد يعيد ويصقل بكل الي صار بحنة رغد اكيد هسة عناد فهم هروبي منه رفض ويمكن راح يطلب من امه تخطبله اوووف هسة اني شبية دك الجرس وراحت حور تفتح الباب هنااااك وجان اسمع اصوات مهيمن وجلال دخلوا مثل الزوبعة اثنينهم ينافخون سلموا علينا ومهيمن كمل كلامه وية جلال .. انت صاير واحد ارعن ما تعرف تتصرف جلال جاوبه وهو ضايج .. انا هذا الي عندي ..على فكرة ارجع واكلك مو انت ولا انا الي نقرر بهيج موضوع هي صاحبت الشأن تقرر ولو بعد ما يفيد الحجي بعد طيرته للرجال جلال رفع حاجبه وكال ..وشنو يعني الي خلقه خلق غيره اختي مو بحاجته مو انت نفسك الي رفضته بالمرة الاولى لان شفته ما يصلحلها مهيمن زمخ بي وهد عليه وام مهيمن صاحت بيهم اجوي البنات على صوت صياحهم ريم سألتني .. شنو الموضوع مهيمن وجلال شبيهم ليش صوتهم عالي جاوبتها واني اباوع عليهم شلون يتحاجون كل واحد عبالك نار تطلع من عيونه .. والله ما اعرف شبيهم علمي من علمج اشو اول ما دخلوا للبيت وهم على هالحال واحد يصيح بالثاني ام مهيمن .. ولكم يمة شجاكم كل يومية صوتكم طالع للجوارين فهمونا شصاير جلال باوع عليه ومسح وجهه وكال .. خالة ما صاير شي بس هو مهيمن يسوي من الحبة گبة لازم يكبر الامور مهيمن عاط بي وقطع كلامه .. ولك غبي كل هذا السويته وتكول ما صاير شي انت تعرف شنو سويت .. ما سويت شي .. ولك انت خسرت صديق ذهب عناد ما يتعوض لو تدري بمعزتك بگلبه شكبرها جان ما اتجرأت وفتحت حلكك وياه وسمعته هالحجي المسموم وخشنت خاطره .. لا تخاف عليه هذا جلده خشن يومين وتلكاه مزروع يمنا وكاعد يحشر روحه بشي ما يخصه هي هاي هوايته مهيمن بعصبية .. لا جلال هالمرة ما اظن عناد راح يرجعلك هالمرة انت اتعديت حدودك وياه ودست بمصارينه وانا لو بمكانه لو يصيغونك ذهب ما ارجعلك. لو تصير على كطع رگبتي ام مهيمن نترت بيهم .. ولكم شنو الصاير هسة غير يفهمونا خلصوها علينا صياح مهيمن دار وجهه عليها وكال .. يمة هذا التيس الواگف كدامج اتعارك وية عناد لان طلب ايد نور من عدنا ورفضه من يمه حتى ما سوى احترام الي او لرأي اخته گلبي ارتعدت من سمعت بعناد خاطبني من اخواني جلال قطع كلام مهيمن وكال .. مهيمن كلشي بالقسمة والنصيب وعناد ماله نصيب يمنا. حاول تتقبل الموضوع ولو انت متعود مو جديدة عليك تطرد خواطيب فأعتبر عناد واحد من الي غلست عليهم ورفضتهم مهيمن زنگه من قميصه وكله.. انتبه لكلامك انا مو مثلك ارعن وارفض الناس بدون سبب انا عندي حجة عليهم وارفضهم بس انت ماعندك اي سبب يخليك ترفض عناد گلي شنو عيبه .. عيبه ارعن ويدخل نفسه بأمور ما تخصه وحاشر نفسه بخصوصيات غيره بأختصار بكل عزة لاطم هاي من غير ثلثين مشاكلي بسببه .. هاي وهو بس صديقي هيج يسوي زين من يصير نسيبي شيصخم يمكن الكاه حتى يزوجني بكيفه ومو بعيد الكاه واكفلي ورة الباب بليلة عرسي من زود الحشرية مالته بعد كل الي صار جلال طلع من الهول وترك مهيمن يرعد بغيضه ام مهيمن باوعت علية وكالت بحسرة .. مكرودة يانويرة ما تكليلي حظج وين نايم. بيا خرابة جانت ام مهيمن تحجي وانا گلبي صار يشتعل بناره وينطفي من الكلام الي سمعته. مهيمن جاوبها وكال .. والله يمة جلال حرجني كدام عناد وخلاني بموقف لعدوي ما اتمناه. اتهجم على الولد وزعله ام مهيمن .. زين يمة ما عرفت جلال شبي ناشب وية عناد شمسويله حتى هيج يعاديه ويتهجم عليه مهيمن.. يمة غير انا ما احجي خليها سكتة. الا اكلج اخوي واحد مرعبل وارعن وصاير ما ينطاق وسوالفه كلها غمة ومن واحد يراويه خطأه يگوم يعاديه وينشب وياه وهذا حال عناد وية جلال لان ينصحه صار مكروه ريم كالت معترضة.. جلال مو من حقه يرفضه والله لان متعارك وياه. وعلى اي اساس يقرر عن نور من يمه ليش هي وين راحت طبعاً انت السبب برفض جلال كله من جوة ايدك ولوما انت جان جلال ما اتجرأ يتجاسر ويتعدة حدوده مهيمن عاط بيها وكال .. خير سالمين اشو كمتي علينا وانا شكو علگتي برگبتي غلط جلال .. اي لان اخوك لو ما يشوفك كدامه شلون تغلس عالخطابة وترفضهم وتطردهم وتقرر من يمك جان ما اتجرأ وسوى هيج. بس انت الي سبقته وعلمته بعدم احترام رأي البنية. عاط بيها وكال .. ولج غضب شجاب الراشدي عالجلاق اشو كمتي تخوطين بصف الاستكان. ولج ريم تبعدين من كدامي لا اطلع جناني عليج واطفي حركة گلبي بيج. انا ما ناقص وحدة تكعد تنگ على راسي. كافي علية مصايب جلال. جايتني البطرانة تتهم مو على اساس الخواطيب الي اجولج جان براسهم خير وانا رفضتهم اشو واحدهم من اول نفخة يطير بعد عليمن كاعدة تتحسرين عليهم وتلمحين. .. اني ما جاي اتحسر عليهم انا جاي اكلك شوف نتيجة افعالك وين وصلتك .. ولج بابا عناد غير يختلف عن الكل عناد مشتري وطالب القرب واكثر من مرة اجانا وخطب واتعرض للرفض ورغم كل هذا هم رجع يطلب ايدها وهذا يدل على طيب اصله ومعدنه الصافي بس تعال ياهو هسه يقنع الاثول جلال الي خرب الاول والتالي حتى ماخلى خط رجعة او منفذ علمود اتلافى بي الموقف واصلح الامور سد الباب بوجهنا برطمت شفايفها ورفعت راسها وكالت .. اليجي من ايده عسى الله يزيده راحت وعافتنا وطلعت ومهيمن بقى يباوع وراها ويهز بيده وكال .. والله احلف عليها هاي البنية شاخطة وكل كارثة بالعالم كون تلوفها وتربطها بحظي الاغبر ام مهيمن بتفكير . . اكلك يمة. بالله بلكي بيها مجال تروح تحجي وياه. هو صاحبك وانت تمون عليه وفهمه بالسالفة بهداوة بلكي يرجع ويطيب خاطره .. يعني شنو ترديني اروح للولد واكله تعال ارجع اخطب اختي ما عليك باخوي مخبل يمة صحيح هو صاحبي وامون عليه بس اكو امور حساسة اذا اتعديتها يروح ماي وجهي وكلامي وية عناد علمود يرجع يخطب اختي ومايدير بال لاخوية وحدة من الامور الي يروح بيها ماي الوجه ما كدرت اتحمل اكثر نهضت من مكاني وطلعت ورحت للغرفة صرت الوب واتلوى من القهر كوة لازمة روحي لا انفجر وابجي ما اعرف اعتب عليمن اعتب على حظي لو اعتب على جلال الي طلعلي بالجديد ما ادري ليش وشنو السبب رفض عناد والمشكلة مو بس رفضه لا واتعارك وياه حتى ما ترك خط رجعة ريم كانت تباوع علية وكالت .. ادري بيج مقهورة لان جلال رفض عناد وهسة اكيد گلبج مشتعل نار جاوبتها بدون خجل وكلت.. احس بروحي عطبت من كد القهر كليلي شسوي هذا اخوي. وذاك الي حبه گلبي .. ماكو حيرة انتي مو تحبينه خلاص سهلة اتصلي عليه وكليله اني موافقة وخلي يجي يطلبج من مهيمن شكله هو موافق هاي المرة على عليه عكس جلال جانت حور هم مقهورة على حالي وكالت .. رحمة على اهلج ست كناري احتفظي بأفكارج الجهنمية لنفسج خلي القنابل بس لأخوي مهيمن المكرود وعوفي نور .. شنو ليش يعني عاجبج وضعها لاهي طايلة سما ولا طايلة ارض .. خايبة كناري عيب ما يصير تروح تتصل عليه من ورة اخوانها وين كاعدين هذا الشي عيب جاوبتهم .. مستحيل اسوي هيج شي لو على كص رگبتي باوعتلي ريم وكالت .. زين تردين انا اتصل عليه ترة عادي احنا ما مسوين شي غلط. انتي تردينه وهو يريدج وبالحلال بس تحتاجون احد يسعى حور .. وانتي تالي وياج ناوية تصيرين دلالة من تالي وكت وتجمعين راسين بالحلال عمي كعدي وسكتي ريم جاوبتها معترضة .. انتي شنو سالفتج اليوم واكفتلي مثل العظم بالبلعوم جنج جلال كله تمشون بالاتجاه المعاكس حور .. لا بالعكس انا هم مثلكم مقهورة على نور واريدها تصير لعناد بس الحلول الي انتي جاي تقترحيها ما يشيلها العقل لازم كل شي يمشي ويتم حسب الاصول. وهذا جلال حسابي وياه بعدين اريد اراويه شلون تكون لوعة المحبوب من يبعدونه عن حبيبه. .. شنو راح تسوين .. انتظري وشوفي بعيونج شراح اسوي جانوا البنات يحجون وانا عقلي كاعد يتخبط بظلامه حجيت وية البنات حتى اسكتهم لان كلامهم يزيد بشد اعصابي وكلتلهم .. عفية بنات كافي سدوا الموضوع وكل شي لا تسوون بعد ما يفيد الحجي شكله عناد راح وبعد ما يرجع وما مقسوملي اصير من نصيبه هذا حظي وانا راضية بي الحمدلله على كل حال ما عندي اعتراض على حكمه مهيمن ملتهي بالشغل وية العمال والمشترية دك نقالي وكان المتصل الحجي ابو حيدر غمضت عيوني والله حتى مالي عين احجي وياهم لا هو ولا حيدر رديت واجاني صوت الحجي بنبرت عتاب .. هَـا بوية مهيمن الكلب العضك كتلناه شبيك عمي ليش ما تشيل نقالك وتكول خلي اتصل على عمي ابو حيدر صارلك اسبوع لو انا الي اتصل لوماكو شنو سامع شي احد مزعلك خجلني اكثر بكلامه شكول عليك يا جلال .. عمي ماعاش الي يزعلك ويكطع وياك الوصل بس وداعتك ملتهي بالشغل صاير هاي الايام ضغط علية وجلال مثلما تعرف عاف المعمل وبلش بمشروعه الجديدة وعايفني لوحدي جاوبني الحجي .. اي انتهبت كلي حيدر. ونوب حتى عناد التيس هذا الثاني مطنكر ما يرضى يروح للمعمل خلة حيدر يروح بمكانه وهو اخذ مكان حيدر بالعلوى وذاك حيدر بعده جديد على شغل المعمل فتشوف كل شوية ومتصل على عناد علمود يفهمه على شغلة طبعاً عناد من الصار بعد ما شفناه ولا وصل للمعمل وحيدر اخذ مكانه وهالشي حيل شان بخاطري بس حقه جلال ماخلى شي ماكاله بحق عناد جاوبت الحجي .. اي والله انا هم جاي اروح للمعمل وية حيدر كلما افرغ ويصير عندي وكت .. شوف مهيمن طبعاً انا ما اتصلت عليك علمود المعمل والشغل بالحقيقة اتصالي وياك علمود اريد اعرف ابني عناد شبي هاي الايام الزلمة مو على بعضه معتكف بالبيت حرت اسأل منو عليه واتذكرتك انت وجلال اقرب اثنين عليه كلت اسألكم بلكي تعرفون شنو علته لصاحبكم كلام الحجي زاد بتأنيب ضميري وحرجني بالزايد احتاريت شجاوبه .. والله حجي ما اعرف شنو اكلك. .. شكو صاير شي بينكم .. قبل اسبوع عناد اتعارك وية جلال بخصوص موضوع ومن يومها جلال وعناد ما شفتهم حتى انا ابتعدوا عني بالرغم انا مالي ذنب بالصار بينهم الحجي كال يطمني .. لا تضوج يابعد عمك هذولي دومهم يتعاركون هسة تشوفهم بعد كم يوم تلكاهم راحعين متصافين سوية خليهم براحتهم هم لوحدهم يرجعون جلال دخلت للبيت ميت تعب منا بناء البيت ومنا مشروع الورشة كلفت واحد يشوفلي مكان زين بالصناعية وفوك هذا كله ابو ذياب وابو جراس الي كل فترة يحومون فوك راسي يردوني اسافر وياهم وانا لحد الان منتظر اتصال الضابط علي حتى يأذنلي بالسفر ومباشرة تنفيذ الخطة. دخلت للمطبخ لكيت نور وام مهيمن موجودات سلمت عليهم وردوا السلام بس بصوت ثكيل لاحظت صارلهم فترة احس بيهم متغيرين علية نا اعرف ليش مرت من يمي حور وهاي الثانية هم خزرتني ورفعت خشمها ودارت وجهها عني شكو خير شصاير اشو حتى غزال البصرة صرنا ما نكدر نشوفه. ولا يقبل يحاجينا نور سإلتني .. اصبلك غدا جاوبتها بتعب .. لا ما اريد كل شي ما اشتهي اكل نفسي مسدودة جاوبتني .. براحتك بقيت صافن عليها كل مرة من اكوللها ما اكل تضل تلح علية وتفتر وراي علمود اكل اشو هسة عايفتني براحتي ما مهتمة عقدت حواجبي مستغرب نور شبيها شنو صاير اشو البيت كلهم كالبين علية تركتها ورحت دخلت للغرفة حتى اروح اسبح ورة ربع ساعة طلعت من الحمام ولكيتهم كلهم كاعدين بالهول جاي يشربون جاي حتى مهيمن كاعد وياهم. رحت دخلت سلمت على مهيمن رد علية السلام من ورة خشمه ورجع يكمل شرب جايه رحت كعدت گدامه ما ادري ليش احس بيهم صايرين كلهم علية حزب بالله مهيمن مطنگر علية من يوم عركتي وية عناد زين هذولي البقية منو دايس على ذيلهم صرت اتنقل بنظراتي على وجوهم نور صافنة بغير وادي وحور صدت عيونها بزعل عني وام مهيمن تدردم بينها وبين نفسها وتباوع علية وتكولي .. الله يهديك ويكملك بعقلك جاوبتها مستغرب.. اي والله خالة ادعيلي بلكي يكمل عقلي وابطل البس دشداشة كصيرة والزم وعصى واركض ورى الجهال بالشارع جاوبتني وهي كوة لازمة روحها ما تريد تضحك .. اي هو انت هذا الي فالح بي بس تكعد تتمضحك جاوبها مهيمن .. يمة عوفي لا تعبين نفسج وياه هذا احلف عليه بي انفصام بالشخصية. وايراته طابگة ما جاوبته وكلت لام مهيمن .. عفية خالة استكان جاي من ايدج الطيبة صبتلي وكالت .. وين جان هذا السانك الحلو من اتعاركت وية صويحبك غمضت عيوني وسحبت نفس عميق واخذت الجاي منها .. ساعة شيطان الواحد كلشي يحجي درت وجهي عنها اتهرب منها وجان توكع عيني على باربي ابتسمت بوجهي وحركت بعيونها منا ومنا يعني داروا عليك واخيراً لگيت حليف وياي بالله هاي شلون احجي وياها اذا كلها يمنا انتبهت لكيت نقال باربي يمها لزمت نقالي وراسلتها عالواتساب كتبتلها .. اكول باربي شنو القضية شبيها نور وام مهيمن وغزال البصرة كايمين علية. صاير شي وانا ما ادري رسلت الرسالة وسمعت صوت تبيه الرسائل وفتحت النقال وقرت الرسالة ورفعت راسها تضحك وكعدت تكتبلي صرنا نسولف بينا عن طريق الرسايل احس بروحي كاعد بمهمة سرية جاوبتني .. شفت استاذ جلال محد الك غيري حتى مرة ثانية ما تفرط بية وتزعلني. وتكعد تحجي علية وتشحن جعفوري علية .. يابة حقج علينا وتوبة بعد ما ازعلج بس كليلي شنو الموضوع ترة طگت روحي رفعت راسها وابتسمتلي وهزته بغرور ورجعت تكتب ضحكت على خبالاتها جاوبتني .. اول شي خالة ام مهيمن زعلانة لان طيرت من ايدها عريس لگوة وهي ما تعول تلكة عريس لاختك اما نور فعادية ما بيها شي بس تلكاها ضايجة علمود خالتها مريضة ومتعاركة وية رجل خالتها صابر .. تٌـٌـمـام زين وغزال البصرة ليش غايب عنه صارله كم يوم ما اشوفه .. والله يا اخي انت تعرف بخالة زهرة مسوية على غزالتك حضر تجوال من يوم الي صادتكم سوية .. زين ليش كلما تشوفني تدور وجهة زعلانة صاير شي جاوبتني .. بالحقيقة حور ضاجت منك لان وكفت قسمة اختك وهي نور مسكينة. مكابلة البيت وكاعدة. وحالها حال اي بنية بهيج عمر تحب تتزوج وتكون عائلة وبيت خاص بيها .. اهوووو هاي كلها الدنيا مگلوبة علمود رفضنا استاذ عناد وانا صفيت قطاع الارزاق الشرير بينكم .. بالحقيقة كلنا مصدومين من ردة فعلك وية عناد الولد حباب وماكو سبب يخليك ترفضه غمضت عيوني بصبر وجاوبتها .. باربي مرات يحطنا القدر امام خيارين واحد امر وادهى من الثاني ولازم نختار بينهم وطبعاً بالخيارين انا الخسران بس خسارة عن خسارة تفرق جاوبتني .. اكول استاذ جلال كل شي ما افتهمت من كلامك شنو هذا خاطرة لو بيت شعر صارلك ساعة تحجيلي بالالغاز ابسمت ورفعت راسي ولگيت حور تباوع علية وعيونها تتطاير شرار منها. لان كاعد اتراسل بالنقال واوزع ابتسامات دنكت عالنقال وكتبت .. ولج باربي خرب يومج غزال البصرة راح تگوم علية وتسحلني شوفيها شلون تباوع علية .. حل تستاهل انت واخوك مال حرگ .. اكول عفية باربي دبرينا اريد اشوف حور واحجي وياها حتى افهمها موقفي خو ما تظل زعلانة هيج تاكل بروحها رفعت راسها وجرت حسرة وباوعت لمهيمن ورجعت باوعت علية وكعدت تكتب .. اكول بالله ما تاخذ اخوك التيس وتدخله دورة تقوية لكيفية معاملة الانثى والتودد اليها قريت الرسالة وطكيتها ضحكة .. الله ياخذج باربي دشوفي التيس شلون يباوع عليج وعيونه تريد تطلع من مكانها الفضول يقرة عنده الف يريد يعرف ويامن تحجين وتتمضحكين رفعت راسها بسرعة وباوعت لمهيمن وابتسمت بأنتصار .. اي احسن خلي يحترك بناره خلي استغل وجودك .. اكلج باربي لا تضيعين السالفة كلنالج نريد تدبرينا حتى نشوف حور ونحجي وياها جاوبتني.. مستحيل طلبك صعب تحقيقه ام مهيمن ونظراتها الخارقة مثل الحارس الشخصي على حور حسرة عليها تتحرك اذا ما سألتها وين مولية كعدت افكر شلون حلها هاي وبعدها ابتسمت وكتبت لريم .. لج باربي لگيتها انا اعرف شلون راح التقي بحور واكعد وياها واحجي بعد .. شلون بالله تكدر وام مهيمن منا فوك راسكم .. عفو عليج انا جلال قربان ضابط استخبارات اكدر على ام مهيمن وعلى عشرة مثلها طكتها ضحكة وكتبت .. شكلك حميت والنقال راح ينطفي من حرارة حماوتك .. ما عليج بس اريدج تكولين لحور باجر جلال راح يمر عليج بالكلية وكليلها لا تتغدى انا راح اجيب وياي لفات وبيبسي ابتسمت ما حسينا الا على مهيمن انفجر بينا وصاح وهو يطفي النقطة مالت الراوتر باوع على ريم وكال .. انتي شنو سالفتج كاعدة تتمضحكين ودار علية وانت الثاني شبيك تريد تدخل بالنقال فاتح حلكك الاعوج صدك مصختوها. كامت علينا باربي بس لا تلوص السالفة جاوبته .. شنو مهيمن شبيك كنت اتراسل وية جلال بالواتساب كان عدنا كلام خاص بينا ما يحتاج كل هالعصبية والصوت العالي لا بالحمزة خربت باربي انفجرت وانا الضحية دار علية وهدر بية .. ولك انت شنو يعني حتى الاصول لازم اكعد اعلمها الك ريم راحت وكفت كدامه وكالت بتحدي .. على شنو كبرت الموضوع شنو دخل الاصول بَـهذا جلال ابن عمي وصديقي ومن حقي احجي وياه .. يا خاتونة الاصول تكول من تكونون كاعدين بين طراطير المفروض تحترمون وتعوفون نقالاتكم بس وين انا جاي اححي وية منو شلون اثنين جلال وبنت عمه واحد اضرب من الثاني اثنينكم مال حرك انهى كلامه طلع من البيت بكبره اسمع امه صاحت وراه تسأله وين رايح جاوبها .. رايح شوية يم بيت خالي حسن دك نقالي وكان المتصل ابو ذياب معناها عندي شغل يطول باوعت لنور وكلتلها اليوم احتمال اتأخر لا تنتظريني مهيمن الي حسن سألني سبب غيبتي وجاوبته .. والله خالي حقك علية انا هواي مقصر وياك بس اكيد تعرف من الوالدة انا حتى البيت ما جاي ارجعله من وكت كله بالشغل بعدها صرنا نسولف انا وخوالي واولادهم عن الوضع بالعراق والموصل وخالي كال .. تدرون سمعت من صاحبي يكول اذا ظلت الموصل هشكل احتمال المرجعية تعلن الجهاد جاوبه خالي منذر وكال.. والله ياريت وانا وولدي اول من يروح لهناك شنهي قابل هي الموصل تايهتلهم خلي يعرفون الموصل وراها زلم مو لوحدها وانتبهت طول ما انا كاعد عيون سجاد تنظرلي بستهزاء ويحجي وية الي بصفه ويتبسم سألته بصوت مسموع كدام الكل .. خير سجاد اشو كاعد توزع ابتسامات جنك ضبع متنكر كول شعندك احجي جاوبني .. ماعندي شي انا رجال علم كلها تعرفني ماعندي شي استحي منه واضمه بدال ما جاي تسألني بالله روح اسأل اخوك الحوك الي سويته براسنا سبع السباع تالي طلع بوخة .. سجاد ثمن كلامك واحترم نفسك لا تخلي اكوم اعلمك شلون تحجي وية تاج راسك خالي حسن اشرلي حتى اسكت وباوع لسجاد وسأله .. شبيك ولك سويجد احجي عدل لا تكعد تمسلت واحترم خطاري جاوبه سجاد .. والله عمي انا محترم نفسي بس انا حازة بخاطري تصرف مهيمن ويانا بيوم اتعارك وياي وخرب وية خواله علمود اخوه جلال وهم ياريت يستاهل يتعارك علموده زمخت بي ردت اكوم اهد عليه وخالي لزمني من زندي كلتله .. جلال يشرفك ويشرف اكبر واحد على الاقل زلمة ما طلعت منه العيبة. مثل بعض الناس جاوبني سجاد بكل ثقة وكال.. انا لو منك ما احجي هذا الكلام روح شوف اخوك الحوك مرافگله وين ما واحد زايعته الگاع وسمعتهم على كل لسان ناس تكول هذولي ارهابيين وناس تكول هذولي حرامية واخوك وصحبته وياهم للعظم هز ايده وكال .. ما يسوى خربت وية خالك وابنه علموده حرامات طلع ما يستاهل ما اتحملت ابقى كاعد وهديت عليه رغم انا اعرف بكلام سجاد صحيح ما كذب بس صعبة يجي واحد مثل سجاد ويعيرني بأخوي انطيته ضربة على راسه وكومته بالگاع وخوالي واولادهم التموا علينا ما انطيتهم مجال يحجون گبل طلعت من الديوان راجع للبيت اجر وراي اذيال الخيبة من ورة اخوي وينه هو كون الزمه بالقران انسيه اسم امه انا تاليتي اتعير ومن منو من اتفه الناس صرت علج بحلگ اليسوى والمايسوى جلال كعدت يوم ثاني الصبح لكيت روحي نايم بشقة ابو طبرة البارحة كلش اتأخر الوقت وما كدرت ارجع لان الضابط علي اتصل علية وكال جهز نفسك وخلص امورك وانطي خبر للجماعة بعد يومين تسافر للموصل وتباشر المهمة ومن بعد اتصاله اتواصلت مع ابو ذياب حتى ابلغه واكله انا جاهز خلصت اموري وهو جاوبني بنصر وكال هاي هي لعد حضر نفسك عگب باجر نسافر هو جان يحجي وانا بدأ الدم يهدر بعروگي وصارت صدك ياجلال وراح تروح برجليك لداعش للي سلبوا ارواح بيت خالك للي طفوا شمعة عرس اسراء وبتروا ورود رنين ورند وبعد جلال شنو سلبو منك سلبوني الصديق الوفي الي عشت وياه بالحلوى والمرة وما كفاهم الي اخذوه تالي اخذوا ارضي و يدمروها غمضت عيوني واتوجهت لكلية حور اتصلت عليها كنت مواعدها ولازم احجيلها عن الصار وابلغها بسفري للموصل حور الشخص الوحيد الي اكدر اامنه واحجيله كل اوجاعي دخلت للكلية وشافتني كانت تنتظرني بنفس المكان بالبداية كانت تبيع الثگل وتباوعلي من جوة لجوة بس اول ما شافت بنيتين اقتربوا مني يسألوني عن اسمي واذا كنت طالب جديد هنا جاوبتهم وكلتلهم وانا اباوع لحور .. لا انا ضابط اجيت هنا بمهمة خاصة ما اشوف الا وحور قطعت الحديث ووكفت كدامي وانطتني ظهرها ووجهة عالبنات وحجت وياهم بكل رقة .. اتفضلي حبيبتي محتاجة شي اذا عندج سؤال اني اجاوبج عنه ميحتاج تحرجون الرجال جاوبت من وراها .. لا بالعكس ماكو اي احراج ما احس الا ورجلي انداست وكتمت صرخة الوجع حشى مو رجل جاكوج بنت الذين جاوبتها البنية من بغيض وكالت .. تسلمين حبيبتي كلج ذوق واتوقع الولد عنده لسان ويكدر يجاوب رفعت ايدية بأستسلام واشرت على حور الي كانت واكفة تباوع عليهن بتحدي اشرت على رگبتي بحركة الذبح وهن ابتسمن وابتعدن من يمنا اسمعهن يكولن .. يمة الله يساعده عليها جنها عريف شكله المكرود متورط على عمره وياها حور شهكت والتفتت وفاتحة عيونها على وسعهن .. هذني عليمن جاي يحجن لايكون علية وانا ما ادري .. لا لا لا حشاج مو عليج هذني تلكيهن من حركت گلبهم يحجن هيج يغارون من غزال البصرة شلون گدرت تحصل على گلب جلال قربان وتخلي اعمى ما يشوف غيرها گلبت عيونها بزعل وراحت گعت على مصطبة .. ما تقسمرني بهاي سوالفك انا زعلانة عليك .. اي غير اعرف انا شيويت حتى تزعلين علية .. لا تسوي نفسك ما تعرف مو ريم كلتلك على سبب زعلي .. قصدج على سالفة رفضي لعناد بيج قصص عراقيه حقيقيه من واقعنا.روعه الطائي .. اريد اعرف ليش رفضت عناد وكسرت بقسمة اختك مو خطية وهي لاحول ولا قوة لا طالعة ولا ماشية وساكنة هالبيت كلية ومخلصة وعمرها جاي يمشي وانت البطران كاعد تطرد العرسان مو عيب عليك جنت اباوع عليها وانتظرها تخلص كلامها وكلت .. هسة خلصتي كلامج .. اي .. لعد سمعيني للاخير وخليني افهمج شنو سبب رفضي لان انا هم مليت من صدج الي ما اتحمل ارجع للبيت وما اشوف لهفة عيونج تتلكاني حتى لو من بعيد يرتاح گلبي باوعتلي بحنان وكالت.. احجي اسمعك .. ماعندي غيرج يسمعني حور انتي تعرفين بشغلي شلون معقد صرت احجي لحور عن ابو ذياب ومواقف عناد ومهيمن وتدخلاتهم وكلمت كلامي .. حور ما تعرفين شصار بية من سمعتهم يحجون بأسم عناد اجيت اموت وهم داعش معروفين ما عندهم رحمة كبل ايدهم والذبح كنت لازم ابعده عني حتى لو هالشي يأذيني ويأذيه ميخالف اهم شي عندي اامن على حياته اما على صداقتنا فعادي تتعوض ماكو شي ما يتعوض الا فقد الاحباب ما يعوضه شي لو بكنوز الدنيا فما كان گدامي غير خيارين اما اخذل اختي واكسر فرحتها او اخسر صاحبي وافقده للابد وهالشي اذا صار فراح يكون بسببي بساعتها اعتبريني انا انتهيت حور جرت حسرة وكالت .. حرااام عليك ياجلال انت مجرد الدواعش ذكروا اسم صاحبك على لسانهم انت انخبصت وخربت الاول والتالي وما اتحملت تفكر مجرد تفكير يصير عليه شي زين ما فكرت بية اني شلون بحالي من يروح حبيب الگلب بكبره بين ايدين الدواعش غمضت عيوني وكلتلها اااااخ ولج حور لو روحتي لداعش تخليج تكولين كلمة حبيبي مثل هالمرة لعد كل يوم اروح اسير عليهم حتى اسمعها منج ابتسمت والدموع تلالي بعيونها كلتلها .. عيدي خلي اسمع ..عفية جلال لا تستغل زلة الساني صير حباب والزم حدودك .. اووووف حور تدرين انا اليوم اجيت حتى ابلغج انا عگب باجر اسافر للموصل والتحق بين صفوف داعش شهكت ضربت صدرها وكالت .. لاااااا عفية جلال لا تكولها طلعت من الكلية وانا گلبي صاير مثل الجمر على حال حور عفتها تبجي وراي مثل الطفلة خايف عليها لا تضعف صعدت سيارتي و رحت لمهيمن بالمحل حتى اسلمه دفتر البنگ ونتفق على سالفة بناء البيت شلون يكون سحب المبلغ لگيت اكو رجال جبير كاعد يمه عالمكتب وجاي يسولف وياه سلمت عليهم وكعدت يمهم انتظر الرجال يخلص كلامه حتى اسلم مهيمن الغراض الرجال كال .. شوف بعد عمك انا طالبك وكول تم مهيمن جاوبه وهو محرج وكله .. عمي ابو چاسب انت تأمرني امر ما تطلب .. تسلم ابن اجاويد بس انا عندي عتب وياك ابن اخوي قبل فترة طلب ايد كريمتك وانت رديته وهالشي شان يخاطري منك يتبع | ||||
|
| |
|
21-09-19, 05:40 PM
| #53 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل #البارت_اثنين_وعشرين_ج2 جلال كلام الحجي ابو چاسب نزل على راسي مثل الصاعقة انتبهت لمهيمن جلة صوته يريد يجاوب رفعت راسي وانا حابس انفاسي منتظره يعلن لحظة وفاتي .. والله يا ابو چاسب جيتك على العين والراس ما اكدر اردلك طلب وانا لو علية موافق واگلك من هسة گبع واخذ بس يبقى الشرع يأكد علية اخذ شور البنية لان هي الي راح تتزوج فلازم ارجعلها اكيد انت تعرف هذا الشي مو بيدي ابو چاسب جاوبه وهو مصر .. هي ما دامها اختك معناها تعرف الاصول وانا متأكد ما راح تردنا وترجعنا خايبين هاي المرة مهيمن مسح على وجهه بأحراج وكال .. ما على الرسول الا البلاغ المبين انا راح اكول للاهل واكيد راح اسعى بهذا الشي واحاول اقنعها والبي خير يقدمه رب العالمين حسيت البساط انسحب من جواي وكل الي بنيته اتهدم على راسي بلحظة. صرت احوم ما اعرف شنو اسوي اتمنى اصيح بصوت عالي واكول اريدها ياناس هاي البنية الي بس غصب عني لازم اكعد واسكت واتصرف حسب الاصول بس الاصول بحاجة صبر واني منين اجيب الصبر يعني لازم انتظر الحجي يخلص كلامه وياخذ حجاية من مهيمن ومو بعيد حتى ياخذ منه الوعد بالموافقة احس بروحي تريد تتسلب مني شمعنا انا اشرب من نفس هذا الكاس المر مرتين واتلوع اجة على بالي عناد المسكين هم هيج تعذب مثلي اكول لنفسي هاي حوبته بس ارجع اطرد افكاري حوبته شنو اني رفضته حتى انقذه ... اخلصه من الموت ومن داعش صرت احوم لاهي ساعة ولادة وتمر علية وتنتهي ولاهي ضربة سجين وتتخيط هذا شعور بالالم غريب خبيث يتوغل للگلب ويبدي يمزق بجدرانه مثل الم سادي يتونس على اوجاعي بين ما خلصوا كلامهم ونهض الرجال من مكانه وسلم على مهيمن كنت انا حافر حافة المكتب بأظافري من غير ما احس على روحي نهض وياه مهيمن وسلم عليه وبعدها ظل واكف ينتظر الرجال يطلع ومن طلع بعدها باوع علية وتحولت معاني وجهه للبرود رجع كعد بمكانه ورة المكتب وسألني وهو ضايج .. البارحة وين جنت بقيت الليل كله انتظرك ليش حضرتك ما رجعت للبيت انت حتى ما كلفت نفسك تتصل وتطمنا ولا فاتح نقالك حتى احنا نتصل ونشوفك وين مولي .. البارحة بتت عند صاحبي كان عندي شغل وطولت يمه وانا بالاساس انطيت خبر لنور وگلتلها احتمال اتأخر ما انطيته مجال يكمل سلسلة اسئلته دخلت بالموضوع وكلت .. مهيمن انا سمعت الحجي ابو چاسب يريد يخطب حور .. اي رجع مرة ثانية يطلبها لابن اخوه .. مهيمن انا اعرف مو وكته ولا هذا المكان الي ردت افتح وياك هذا الموضوع بس كلام الحجي قلب كل الموازيين عندي .. ما افتهمت عليك شنو ربط موضوع ابو جاسب وية الموضوع الي رايدني بي .. مو الحجي طلب ايد اختك حور وانا جنت رايد اخطبها منك بس كنت منتظر اسافر ومن ارجع كلت اجيب ناسي واخطبها منك اترجاك ما اريدك تزوجها لابن اخو الحجي مهيمن عقد حواجبه متفاجيء بطلبي كملت كلامي قبل لا تخوني قوتي .. صحيح انا ما عندي اهل حتى اخذهم لبيتك مشاية واخطبها لأختك كدام الناس بس صدگني عندي ناس وربع هيبة وفخر وينرفع بيهم الراس يجون وياي مشاية واجي لبيتك وانا شاري اختك واريدك تشرفني بموافقتك باوع علية مثل الي يريد يدرس كلامه قبل لا يكوله وهذا الشي زاد خوفي كعد يمسح على لحيته وهاي الحركة بالذات تعني الهدوء الذي يسبق العاصفة زاد خوفي من نظرته الضيقة جلى صوته وكال بهدوء .. امممم كلتلي تريدني ازوجك اختي مو ؟؟ .. اي نعم .. تمام زين خلينا قبل لا احجي اي شي بهذا الموضوع اريد اسألك واريدك تجاوبني بعيداً عن سالفة الخطوبة بلعت ريگي احس بروحي وواگع بشدة عبالك عندي امتحان وانا ما دارس جاوبته .. كول اسأل ؟؟ .. بالله متگلي منو هذا صاحبك الي بتت عنده البارحة شنو اسمه عقدت حواجبي سويت روحي مستغرب سؤاله وشنو غايته من هذا السؤال وشنو دخله بموضوع طلبي لأخته جاوبته وانا احاول اتهرب كلش مو وكته هاي الاسئلة .. ليش تسأل يعني واحد من جماعتي متعرفه رفع حاجبه وكال .. منو بيهم من جماعتك ابو ذياب لو ابو جراس لو خاف رجعت تلتقي وية ابو طبرة بهت لوني ودك الجرس عندي انحصرت بخانة اليك جاوبته .. هسة عرفت شنو غايتك من هالاسئلة ما راح اكول شي ولا راح ادافع عن نفسي في غض النظر عن الاشخاص الي مرافقهم وسمعتهم الموزينه اعرف هذا راح يشكل حاجز بيني وبين ارتباطي بأختك وطبعا انت حقك بس اريدك تعرف شغلة وحدة ثق بالله انا صحبتي وياهم الي بيها غاية وهدف اريد احققه وكل الي جاي تشوفه گدامك مو مثلما انت متخيل رفع حاجبه بعدم اقتناع وسألني .. بالله متگلي شنو هاي الغاية الي تخليك تمشي وية ارذل الناس وسمعتهم الشينة على كل السان لدرجة وصل بية الحال يعيروني بيك وبجماعتك. .. ما اكدر احجيلك اسبابي لان صعب بس كل الي اريده منك تصبر علية وما تستعجل وتصدر حكمك بحقي اريدك تعرف انا مستحيل افكر بيوم اتخلى عن اخلاقي ومبادئي ولا تتوقع بيوم من الايام اسوي شي يرخص من كرامتي وينزل راسك كدام الناس اطلب منك توثق بية جاوبني مهيمن وكال بصوت مثل صليل السيف .. لطالما انت رافض تحجي وبعدك غامض وباقي متحفظ على تصرفاتك المحيرة والمشكلة ما عندك اي مبرر لكل هاي تصرفاتك المشبوهة فلا تترجى مني اوثق بيك ولا تتوقع راح اوافق ازوجك اختي .. مهيمن اترجاك لمرة وحدة بحياتك ثق بية وافهمني كلتلك انا عندي اسبابي صدگني غصب عني الي گاعد يصير لا تظلمني نهض من مكانه وضرب ميز المكتب وزمخ بية بغضب .. انطيني سبب واحد يخليني اصدكك ويشفعلك حتى اوافق عليك وما اظلمك شلون ترضاها ازوج اختي لواحد خريج سجون كل يوم الكاه مورط روحه بمصيبة لو يوم الزمه ببيت دعارة لو الگاه مرافقلي واحد مهربجي ونوب اخر شي طلعت مصاحبلي عصابة مدري ارهابيين گلي شنو الي يشفعلك من هذني كلهن رفعت راسي وجاوبته .. ماعندي شي يشفعلي يمك غير بس خوتنا هدر بية وعلى صوته .. لا جلال دير بالك تستخدم هيج شي طاهر مثل خوتنا وتخليه غطى لافعالك خليك شريف واتقبل الرفض مثل عناد بيوم رفضته مع العلم رفضك كان ماله مبرر حتى ما عندك سبب مقنع على الاقل انا رفضي الك بمحله وعندي الف سبب وسبب يدينك ارتعد گلبي بين ظلوعي منتفض وكمت من مكاني معترض .. مهيمن لا تغلق باب رحمة الله بوجهي ماعندي غيرك لا تردني كلتها وانا لاؤل مرة بحياتي احس بالكسر جاوبني .. لا تتوقع مني اخلي ايدي بأيدك ولو جنت اخر رجال بالعالم ما ازوجك اختي . .................................................. ............ جلال انا ابن الحدبا انا ابن موصل ..... الموصل حمامة سلام تلكاني مو صل ..... ابن الجية انا لاهلي وربعي دوم موصل ..... متواصل واهلي وناسي تشهد علية مهيمن انا ابن بصرة الحيفا انا معروف ..... شخص معروف اوكف لربعي بلا منة ولا معروف..... فضل او جميل اخيطله جرحه للي نخاني معروف ..... (مع روف) الريافة الخياطه لاخفاء الشقوق ولا اخلي بيوم العيبة بية هدى سعد .................................................. ...... كلامه وياي مثل الضربة عالراس رفعت راسي وانا اكابر احاول اعض على جروحي ولا ابين له شكد موجوع بهاي اللحظة بالذات .. براحتك ابو الهمة ما راح اكدر اجبرك تزوجني اختك لان ما بيدي شي اسوي حتى يشفعلي عندك ويحنن گلبك علية اصلاً انا ليش مستغرب اشو الدنيا علمتني على النوايب ما يوم نصفت وياي دنياي ولا بيوم حنت علية لامن جنت صغير كسرت خاطرها لأمي ولامن شبيت لكيت ابو يحتويني هي قابل ظلت عليك حتى انتظر منك تعطف علية عادي ادفعني عنك ولا تتقبلني لا اخ ولا نسيب اصلاً اتعودت انا من يوم يومي اسمي جلال قربان تعرف ليش هيج سموني ربعي وخلاني لان امي وابوي الي هم اقرب ناس الي باعوني مثل الكبش المنذور هيج شكلي زايد عندهم فدى ضحية مثل القربان واني هم قررت اكون قربان لان ماكو شي يربطني بالدنيا كلها مسحت وجهي وحسيت بحرارة جفوني وكلت خصم الكلام .. على العموم انا رايح عكب باجر اسافر واحتمال هاي المرة سفري يطول وما اعرف ارجع منه لو لا اتحرك من مكانه واهتز الجبل الي يحاول يكابر وكال بصوت ملهوف .. جلال لحظة انتظر شنو وين تريد تسافر درت وجهي وانطيته ظهري وانا طالع وجاوبته.. .. راح اسافر لجهنم الحمرة سمعت صوته من وراي وهو يلعن ويسب بغضب تركته واخذت سيارتي ورحت كعدت على الشط ما اريد اروح للبيت وانا معصب وروحي شايطة رحت گعدت عالشط اريد اكعد اتعاتب وياه اريد ارمي بهمومي على جرفه بلكي اكسر خاطره حرت المن اروح وعند منو اشكي حالي ريم مريت على حور بالكلية بطريق الرجعة للبيت انتبهت عليها صافنة ونظراتها تعاين كدام مبين عليها ضايجة وعيونها ذبلانة يمكن كانت تبجي سألتها مستغربة .. شنو شبيج حور ما جاوبتني شكلها بعدها بغير وادي اتذكرت اليوم جلال مر عليها للكلية رجعت سألتها.. شبيج ضايجة شنو اتعاركتي انتي وجلال وزعلج دارت وجهة علية وكأنه اسم جلال كلمة السر للدخول لعالمها الي فاصلة بي وكالت وهي تبجي .. لا بالعكس اصلاً ما طلع من الكلية الا وهو مراضيني .. اهااا وانتي شكلج مو وجه نعمة ما متعلمة على واحد يعاملج برقة وحنان طبعاً حقج متعودة على نعال ماما وصوت زمخة اخوج وصلنا للبيت ولكينا بس نور موجودة لوحدها بالبيت وام مهيمن طالعة كالعادة اما تسير على بيت اخوانها او طالعة للسوك حور تركتنا وراحت للغرفة تبدل واني رحت اقتربت يم نور ولكيتها جاي تسوي كيك دارت وجهة علية وكالت .. اصبلكم غدا جاوبتها .. والله ياريت لان كلش جوعانة ابتسمت وكالت .. لعد يالله استعجلي حتى ناكل سوية اني هم ما متغدية جنت انتظركم سمعت صوت تنبيه رسالة وصلتني عالواتساب جاوبت نور وانا اطلع نقالي من جنطتي وفتحت النقال وانا اشوف الرسالة وحجيت وية نور .. صار هسة اغير ملابسي بسرعة واج...... قطعت كلامي فجأة واتسمرت بمكاني وانا عيوني على شاشة النقال اقرة بالرسالة كانت رسالة من جلال كاتبلي بيها باربي اتمنى توصلين رسالتي لحور وتكليلها جلال سوى الي عليه اليوم وطلب ايدج من اخوج مهيمن بس مع الاسف مهيمن رفضني كليلها اريدها تصير قوية لخاطري وتحارب ما اريدها تضعف كدامه نفضت راسي معترضة وانا اعيد بالكلام نور انتبهت على هدوئي الغريب. اجتي اقتربت مني وسألتني .. شنو شبيج واكفة تباوعين بالنقال مصدومة جاوبتها وانا اعيدلها بكلام جلال نور شهكت وكالت .. لاااا عفية لا تكوليها. شنو. ليش مهيمن يرفض جلال جاوبتها وانا بالي مشدوه .. والله ما اعرف شنو السبب كلشي ما مفتهمة طلعت من الواتساب عالسريع لان ما اكتفيت برسالة جلال رحت اجريت اتصال عليه اريد افتهم منه الموضوع كله شنو. شوكت راح طلب ايد حور اشو احنا ما عدنا علم وليش مهيمن رفضه. دكيت ورن عليه مرة ومرتين وبالثالثة يالله جاوبني بصوت تعبان سألته بدون لا سلام ولا كلام .. جلال عفية كولي فهمني شنو هاي الرسالة شبي مهيمن تخبل ليش يرفضك وانت شوكت رحتله جاوبني جلال وصار يحجيلي كل الي دار بينه وبين مهيمن وكعد يوصيني على حور حتى افهمها موقفه وكمل كلامه وكال .. ريم كوليلها جلال حارب علمودج والحرب بعدها ما انتهت حالف ما اطلع منها الا وانا منتصر بس اريد منها تشد حيلها وتصبر علية وتدعمني بتمسكها بية لاتضعف وتوافق على الناس الي جايين يخطبونها هو جان يحجي وانا ميتة من القهر عليه احس النار كامت تطلع من صدري ونور جانت تحوم فوك راسي وتفرك بيدها وكل شوية تسألني هَـا شنو شيكول جلال. فهميني شبيج معصبة اشرتلها حتى تصبرلي علمود افتهم من جلال بس مع الاسف كل الي افتهمته من الدار بينه وبين مهيمن ما يبشر بخير بعدها جلال سلم علية وانهى الاتصال لان عنده شغل مهم مستعجل ونور سألتني .. هَـا شنو كال جلال درت وجهي عليها وكلتلها كل الي كاله جلال نور بقت مصفصفة محتارة وكالت .. ياربي شلون مشكلة هاي ما اعرف شنو اكول منا جلال وغموضه وسكوته المعذبني ومنا مهيمن واسبابه وشكوكه الي محد يلومه عليها والله حيرة. ما اعرف المن اركن و منو بيهم على حق جاوبتها واني افكر بكلام جلال وموقف مهيمن .. انا راح اوكف وية جلال في غض النظر عن غموضه وتصرفاته الغريبة بس يبقى شي واحد انا متأكدة منه ان جلال يموت بحب حور وهالشي يشفعله ومهيمن ماله حق يعترض ويقرر من يمه جاوبتني.. انتي صدرتي حكم مبني على الحدس وهالشي مو كافي يعني انتي واثقة من جلال يحب حور وعلى اساس هذا الشي تردين من مهيمن يوافق بس نسيتي شغلة مهمة ان مهيمن ما يعرف ولا عنده علم بحب جلال وحور وضيفي فوك هذا كله تصرفات جلال وحياته الغامضة .. حتى لو نور هالشي مو من حق مهيمن يقرر من يمه عن حور هي بكيفها ليش هو مو قبل كم يوم كام يحجي على جلال لان رفض عناد قبل لا ياخذ رأيج اشو هو هسة رفض بدون ما يسأل حور وسوى نفس سواية جلال دخلت حور على صوتي اني و نور وسألتنا وعيونها تتنقل علينا اني ونور .. شنو شبيكم بنات جاي تتعاركون نور باوعتلي مترددة تحجي لو لا اني جاوبتها وكلتلها .. حور تعالي كعدي عندي حجي وياج لازم تعرفينه رحت عليها واخذتها من ايدها وكعدتها على كرسي ميز الطعام وكعدت كدامها ولزمت ايدها اثنيهن مثل الي يحاول يمدها بالطاقة او يمكن ردت اواسيها قبل لا تعرف بالصار سحبت نفس عميق وبديت احجيلها عن كلام جلال وية اخوها ورفض اخوها وموقفه من جلال هنا حور من عرفت برد اخوها نهضت من مكانها منتفضة وعيونها نار هزت راسها برفض وكالت .. لا لا مستحيل ما اصدك مهيمن ما يسويها ويكسر بأخوه جاوبتها .. مع الاسف مهيمن مو بس كسر اخوه برفضه وكسرج وياه. من غير ما يرفله جفن حور كامت تحوم بالمطبخ وتضرب على رجليها من حركة گلبها واني راها اريد اهديها كالت.. ولج ريم انتي ما تعرفين مهيمن شسوى ولج هو مو بس رفض جلال هو جرم بحقه وبحقي نور جاوبتها.. بنات ترة مهيمن معذور بالسواه انتوا ما تعرفون شنو الموضوع اكو مواقف صارت تدين جلال ماعندكم علم بيها وبس انا ومهيمن نعرف بيها لان اخونا ما نكدر نحجي بيها وهاي المواقف هي الي خلت مهيمن يرفضه صديگيني حور اذا عرفتي بالي عرفناه عن جلال راح تعذرين مهيمن واصلاً يمكن راح تفكرين الف مرة قبل لا تحبين جلال وتوافقين عليه حور دارت عليها معترضة ونترت بنور واشرت على حلگها بقهر علامة السكوت .. اشششش ولاكلمة ولج نور كلشي لا تحجين محد بيكم يعرف بجلال شنو انتوا كلكم جاي تظلمون جلال اني اكثر وحدة بيكم اعرف جلال گعدت بالكاع تبجي بقلة حيلة وكالت .. صدگوني راح يجي اليوم الي تعضون ايديكم من الندم بسبب صدكم وظلمكم لجلال ما اعرف ليش حسيت بحور تعرف شي عن جلال احنا كلنا ما عدنا علم بي باوعت لنور الي كانت واكفة بالمطبخ عاجزة وبنفس الوقت شكلها مقتنعة بقرار مهيمن وهم هاي الثانية تعرف اشياء عن جلال ما نعرفها احنا بالله هسة هاي شحطلها وتطيب ياربي شكاعد يصير بس انا رغم هذا الي دار والي سمعته عندي قناعة وايمان ان حور وجلال على حق سمعنا صوت الباب يندك نور التفتت على باب المطبخ وكالت .. يمكن هاي خالة زهرة اجتي لان هذا وكت جيتها باوعت لحور نهضت من مكانها مخبوصة ومسحت دموعها وباوعت علية نور كالت .. انا رايحة افتح الباب حور كلتلها .. عفية نور لا تجيبين سيرة لأمي بموضوع جلال خلي هو مهيمن يكللها حتى ما تسألنا منين عرفنا بالموضوع وتسويها سالفة انا اعرف بأمي هي من غير كلشي تسويلي سالفة وتدور وراي نور جاوبتها وكالت.. لا تخافين ما راح احجي اني كلتلها .. شنو ليش ما نكللها خليها تعرف ترة انتي وجلال ما مسوين شي غلط بالعكس احتمال خالة زهرة تساعدكم وتوكف وياكم لان هي تحب جلال نور راحت برة حتى تفتح الباب وكالت .. انا رايحة افتح الباب لخالة. اجلي هالكلام لبعدين هسة مو وكته هذا الحجي اباوع لحور اجتي علية ولزمتني من ايدي وسحبتني وراها ودخلتني للغرفة وسدت الباب قبل لا تدخل امها وتشوفنا حور بصوت ناصي .. ريم ما ينفع نكول لامي عن كلام جلال اذا كانت امي راح تعرف بسالفة خطوبة جلال فلازم تسمعها من مهيمن بنفسه مو من عدنا حتى اذا اجة مهيمن يسألني عن رأيي بالناس الي جاي يخطبوني بساعتها اني اكدر ارفض بكل سهولة محد راح يشك او يربط بسبب رفضي بسالفة. جلال حتى ما تصير مشكلة بقيت افكر بكلام حور اباوع عليها جانت تبجي تحجي وياي بصوت ناصي اقتربت منها ولميتها لحظني صدك انقهرت عليها وكلتلها .. لا تخافين مستحيل اسوي شي يأذيح انتظرت حور تهدأ بعدها سمعنا ام مهيمن تسأل نور عن حور وعني كلت لحور اني راح اطلع وانتي روحي غسلي وجهج وتعالي وراي رحت دخلت للمطبخ وسلمت على ام مهيمن وهم هي الثانية وجهة مگلوب وبس تنافخ نور باوعتلي وسألتها .. خالة شبيج سامعة شي جاوبت نور وهي تباوع علية .. سكتي اليوم انا شبعت بجي على ضيمي وضم امة محمد واجيت دخلت حور وسلمت على امها وسألتها .. شنو اسم الله ليش تبجين .. والله يا خالة اليوم بيت جوارين اخوي وصلهم خبر استشهاد ابنهم الشاب يمة لو تشوفينه يصير بعمر مهيمن اسم الله على مهيمن فرت روحي من القهر على امه ومرته وجهاله اثاري الدنيا ما منها امان ما يعرف الواحد شوكت يومه على الاقل هذا الشاب من مات ترك وراه واحد يخلفه ويشيل اسمه من بعده يعني ما انمحى ذكره ولا انكطع نسله وهسة انا رجعت من بيت المرية وانا قافلة بعد مستحيل اسكت على الي كاعد يصير غمضت عيوني اهوووو هسة ام مهيمن راح تربط السالفة بزواج مهيمن اشو دارت علية وكالت .. شوفي خالة ريم سمعيني زين ان جان حبيبك حلو لا تاكله كله ترة انا وصل حدي انا ام حسوا بية كولوا هاي المكرودة جزعت تريد تشوف عرس ابنها هسة ما تكليلي شنو المانعج وكاعد تتعززين على وليدي كليلي شنهو الي تردينه وانا اسوي بس فضينا ووافقي. ترة طك الشيب بالراس وما ظل بالعمر شي باوعت عليها وانا متفاجئة من هجومها يعني كلش مو وكته هالموضوع ابد. منا سالفة جلال وحور ونوب ام مهيمن كامت تعزف عالوتر الحساس هاي هي لاصت حور جاوبتها .. يمة هي البنية شلها غرض وانتي جاية عليها ما ترحين لابنج وتكليله خلي يعدل نفسه ام مهيمن عاطت بيها .. خايبة حويرة احجي عدل لا اكوم ادير حلكج واعلمج شلون تحجين منو الي يعدل روحه هَـا ولج بقينا اني ونور متفاجئات بكلام حور وية امها وهاي اول مرة تسويها حتى اني ريم بذات نفسي جنت مقررة اغلس على كلام ام مهيمن هالمرة وما احجي لان وراها سالفة جلال وحور والوضع ما يتحمل اكثر بس شكلهم وشهد شاهد من اهلها حور كملت كلامها وية امها .. يمة انتي ليش تزعلين من كلمة الحق انا ما جذبت اي صدك ابنج ما ينحمل اشو كاطع الماي والهوى على البنية ويريدها تجي بنفسها وتكله سمعاً وطاعة انا من ايدك هاي لأيدك هاي شتفصل انا البس وين كاعدين حتى الله ما يرضاها هي هم بنية حالها حال البنات تريد رجال يهتم بيها يسمعها حجاية حلوة خلي ابنج ينزل من برجه العالي كليله كافي ترة بنات الناس مو لعبة عنده ام مهيمن مصدومة ما مصدكة لطمت على حضنها وهي كاعدة بالكاع .. ياااا !!! .. يااا !!!! صخام بوجهج ولج حويرة. هاي عليمن هذا الحجي كله .. هذا الحجي على ابنج اذا تردين تزوجين اخوي فانصحج ما تورطين بنات العالم احسنلج روحي خطبيله وحدة خرسة طرشة طينة. لا تهش ولا تنش واهلها بايعينها. يالله تكدر تعيش وياه وهاي انا اخته وجاي اكلج بعيوب اخوي ما حسينا الا على ام مهيمن كامت على حيلها وشالت النعال وشمرته على حور و انا ونور كمزنا من مكاناً كامت علينا خالة زهرة صاحت بحور بصوت يرعد .. ولج من ترحين فدوة لتراب رجلين اخوج خايبة العوبة اشو طالعلج السان وصايرة تراددين منو هذا الي ترديني اخطبله وحدة خرسة طرشة نور واحت على حور دفعتها حتى تطلعها من المطبخ نور.. حور عفية طلعي كلش مو وكتج مو جاي تشوفين امج شلون معصبة لا يرتفع ضغطها ونبتلي طلعت حور وصعدت فوك لان ام مهيمن كامت تعد وتصف على حور بنص البيت .. ولج اذا ما عدت تربيتج من جديد ما اكون زهرة ولج العوبة بعدج ما كبرتي وما صرتي دكتورة وكمتي علينا جا من تصيرين دكتورة شتسوين يمكن حتى سلام ما تسلمين رحت يمها وكلتها بصوت ناصي حتى اهديها لان نور عجزت تسكتها تعبت من وراها كلتلها.. عفية خالة كافي مو زين عليج تعصبين عوفيها حور ما كانت تقصد شي بكلامها دارت وجهة علية وباوعتلي وكالت .. بعد شحجي مالي عين احجي وياج اذا بتي هيج تحاجيني بعد ما اعتب على بنات الناس ما الومج يا خالة بس انا ام ومحد جاي يحس بية نور جاوبتها .. خالة خلي عينج بعين الكريم هو احن والطف منج على ابنج خليها على الله .. والنعم بالله. ما عندي غيره جانت تحجي هالمرة بصوت واهن كسرت خاطري شنو ذنبها عندها ولد راسه يابس مثل التيس صار الليل ورجع مهيمن من الشغل جان كلش ضايج واول ما دخل سأل نور .. اكول نور اليوم جلال اجة للبيت لو لا جاوبته وهي تباوع عليه بحذر دخيل الله هاي البنية شكد شفافة .. لا ما اجة اليوم عالبيت .. زين اليوم ما اتصل عليج .. لا ما اتصل علية ليش تسأل جاوبها وهي يجر حسرة .. لا هيج ماكو شي حجت وياه نور وكالت قبل لا يدخل جوة للبيت .. مهيمن اليوم امك معصبة دير بالك مو تعصبها بالزايد خفف عليها .. ليش شبيها اني شمسوي بعد وهي ضايجة .. انت من تكعد وياها وتشوفها هي راح تكلك احسن شي اعرف بنفسك ابتسم بتعب وعافنا وراح يم امه خطية حور بعدها معلگة فوك ما تقبل تنزل. من ورة امها وانا ونور صفينا لوحدنا وحدة مكابلة وجه الثانية جنا كلنا كاعدين بالهول اني كنت ادرس عندي امتحان ونور كاعدة يمهم تكلب بنقالها تراسل بخالتها ومهيمن جان كاعد بصف امه يسولفون وهي ما تضيع وكت شلون تخلي هيج فرصة تفوتها وكعدت تحجيله عن سالفة الشهيد واهله وشكله افتهم مقصدها گبل غير الموضوع وكال حتى يشغلها .. اهوووو ذكرتيني صدك وينها حور جاوبته .. اختك المگموعة ام السانين فوگ .. افااا ليش هيج تحجين عليها .. خلي تولي تريدني اخطبلك وحدة طينة خرسة طرشة لا تهش ولا تنش تكلي ياالله تكدر تعيش وياك وتتحملك عليك الله اكو وحدة تحجي على اخوها هيج رفع راسه واجتي عينه بعيني كال .. لا يابوي شنو اتزوج وحدة طينة حتى ما اطك واموت هو حلات الزواج من اتزوجلي وحدة. تكعد تتناگر وياي واتناگر وياها. ساعة اسحلها واعلگها بالبنكة وساعة تسحلني بدلعها ولسانها المزروف رمشت بعيوني هزيت شعري بغرور بحركتي المعروفة غمض عيونه بصبر وعض شفته وكال يحجي وية امه .. جا هي غير تكعد راحة وما تدخل بخطيتنا بهاي سوالفها والله تالي تعم على روحها امه دارت عليه وكالت .. هي منهي الي داخلة بخطيتك انت ويامن تحجي باوع لأمه بسرعة وكال .. عفية يمة لا تنسيني بالله ما تصيحولي حور نور كامت من مكانها وراحت تصيح لحور دقايق ودخلت حور وهي مترددة ومدنكة منا خايفة من امها لا تكوم عليها ومنا اكيد عقلها يودي ويجيب مهيمن شنو يريد منها كعدت يم اخوها وام مهيمن بس شافتها كلبت عيونها وصدت بوجهة عن حور المسكينة .. شوفي حور اريدج تسمعيني زين اليوم عم الولد الي اتقدملج قبل فترة اجاني للمحل ام مهيمن دارت بسرعة وكدر كلام مهيمن ان يلفت كل انتباهة سألته .. شعنده عمه جايك للمحل جاوبها مهيمن .. اجاني يعتب علية شلون رفضنا ابن اخوه وكال اريدها منك لا اروح ولا اجي ووكع بركبتي وكال احنا لوما نعزكم ونودكم ما نطلبها منكم ودار وجهه على حور وكمل كلامه .. وانا كلتله انتظرني اخذ شور اختي هَـا شگلتي حور جاوبته ام مهيمن بدون نقاش .. اكيد موافقة مايحتاجلها تفكير رفع راسه وباوع لامه وكال .. يمة خليها هي تحجي اريد اسمع الموافقة من عندها هم يحجون واني ونور وحدة تباوع للثانية حجيت بصوت ناصي .. زين ما دامه هو هيج يعرف حق الله ليش ما جاب سيرة بموضوع جلال. هو هم خطب حور ليش ما يسألها رأيها مثل ما جاي يسألها بهذولي الناس نور جاوبتني .. هو متأكد من سمعة هذولي الناس وشكله مقتنع بيهم بس جلال اخوي لا ما مرتاحله ولا متأكد منه كلشي ضده اووووووف والله گلبي يريد يتكطع على جلال هو حتى ما اجة للبيت كامت نور من مكانها وسألتها .. هَـا وين كايمة .. اريد اتصل على جلال اشوفه وين اراضيه ليش ما رجع للبيت طلعت نور من الهول وانا بقيت استمع منتظرة جواب حور كانت تستمع لكلام امها كانت ام مهيمن تحاول تقنعها بالطيب وتعددلها مواصفات الولد واخلاقه واخير شي مهيمن كال .. هَـا هسة شنو كلتي حور دنكت وجاوبته بصوت ناصي. .. مهيمن اسفة اني ما اريد اتزوج انتوا ليش تحسسوني عبالك انا حمل على گلبكم وتردون تزوجوني وترتاحون مني بعدها انفجرت بالبجي جانت تبجي بحرگة گلب مال وحدة محملة وكاتمة بگلبها بحيث ام مهيمن بكبرها اتفاجئت بحالة بنتها ومهيمن اخذها لحضنه وكال وهو يمسح بدموعها .. ااشششششششش المن البجي ما تكليلي هسة قابل انا شايل عليج سيف ترة محد يكدر يجبرج ولا تخافين من امي ترة هي تحجي لمصلحتج وصدگي وامني بالله انا لو بيدي اخليج العمر كله تعيشين بحضني وبدلالي بس هي سنة الحياة هيج ..لا بد وان يجي اليوم والبنية تتزوج وتفتح بيت وتكون حياتها جاوبته حور بصوت مكتوم وهي بحضنه .. اي بس مو انا بعدني حتى ما جاي اتخيل روحي ابتعد عنكم .. هاي هي كافي لا تبجين عمي اذا ما تردين زواج اذن ماكو زواج وخلي ابو جاسب يروح يدورله على بنت حلال بغير مكان امه كالت بصوت مصدوم .. ياااا !!!! خايب صدك تحجي لو جذب يتبع احداث البارت القادم نور شنو كاعد يصير بينا ياربي اباوع لريم تحجي بالنقال وهي معصبة ريم .. عمو ابو سيف اتصل على عمة اسيا وسوي الي كلتلك عليها اني جاهزة للسفر خليها تجي علية او انت تجي تاخذني اني انتظرك اتمنى لكم قراءة ممتعة اختكم نهى الحسون | ||||
|
| |
|
21-09-19, 05:44 PM
| #54 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_ثلاثة_وعشرين_ج2 #الكاتبة_نهى_الحسون نور اتصلت على جلال حتى اشوف وين اراضيه كلبي ممرود عليه ما بيدي شي اسوي حتى اغير من نصيبه شكله حظه اضرب من حظي منين ما يجيبها مسدودة بوجهه بس الفرق بيني وبين جلال كل شي جاي يصير وياه بسببه كله من ايده يعني مجرد تصرفات رعنة من جلال خلت مهيمن مباشرةً يرفض يزوجه حور بدون ما يتردد لحظة وحدة زين لو يعرف الي انا عرفته عن جلال شيسوي اعتقد احتمال يحرگه ارتعد جسمي وانا اتذكر مكالمات جلال المشبوهة. غمضت عيوني بحيرة بس والله راح اتخبل من اشوف تصرفات جلال واخلاقه ويانة متناقضة وية المصيبة الي سواها ما اعرف شحكم عليه يعني لوما سامعة بأذني مكالمته وية الرجال والحديث الي دار بينه وبينهم جان گلت مستحيل جلال يسوي مثل هيج شي بس المشكلة انا سمعت بأذني بأكثر من مرة وكل مرة يسجل لان انتبهت بوقتها جلال كان فاتح حاكية وجاي يسجل المكالمة ما اعرف شنو السبب من هذا كله بقيت محافظة على سر جلال بگلبي بس حمله ثكيل جاي ياكل بروحي من يوم الي عرفته وانا على هذا الحال من التفكير لا انا طايلة سما ولا انا طايلة ارض لا انا الي رحت وواجهت جلال بمعرفتي بتصرفاته ولا انا الي كدرت الجيء لمهيمن واكوله عن الي سمعته صعبة ما اكدر اروح واكول لمهيمن ان جلال باع جهازه لداعش وهو جاي يتعامل وياهم وياخذ منهم فلوس بالحرام هزيت راسي برفض لا لا مستحيل احجي و افرط بأخواني الي هم سبب اماني لان اعرف كلش زين اذا خبرت مهيمن بسواية جلال تصير كارثة واكيد مهيمن راح ينبذ جلال ويطرده من البيت ومن حياتنا بكبرها وساعتها يتحقق اسوء كوابيسي ويتشتت شملنا اني واخواني وانا ما عولت الكة عائلة واخوان يحموني واحس وياهم بالامان انا ما جاي اتخيل حياتي بدونهم خايفة ارجع اعيش بخوف مثل قبل واذا صار هالشي انا اضيع واروح بالرجلين تحت رحمة صابر والله راح يمرضني التفكير انتبهت على صوت جلال كان يرد على اتصالي سألته .. جلال اشو كلش اتأخرت وين صرت ليش لحد هسة ما راجع للبيت بالي يمك جاوبني .. نور لا تنتظريني انا بعد الي صار بيني وبين مهيمن بعد مستحيل ارجع للبيت ارتعد گلبي من ورة كلامه وصار الي اني خايفة منه حجيت وياه بتوسل .. لا عفية جلال لاتخلي رفض مهيمن سبب يخليك تطلع من حياتنا وتبتعد عنا جاوبني .. ما اكدر نور طلبج كولش صعب ما ينفع بعد الي صار ابقى انا وحور بنفس البيت هالشي راح يسبب احراج الي ولمهيمن وحتى كرامتي ما تسمحلي بعد ابقى ببيته .. ترة الصار مو نهاية العالم ومهيمن اخوك مو واحد غريب وتحسس منه والاخوان ما بينهم كرامة وكبرياء انت لازم شوية تتنازل وتبطل تصير اناني واكعد شوية وية نفسك وراجع روحك شوف انت شنو الي سويته وخلى مهيمن يرفضك جاوبني .. انا متأكد من نفسي ما مسوي اي شي وصفحتي بيضة عطت بي بقهر جوابه كان مثل الضربة الي صحتني من غفلتي وكلتله وانا ارجف ..لك جلال هذا كله الي سويته وتكول انا ما مسوي شي لعد والشرب وبيت الدعارة والسجن واصدقائك المشبوهين ولا ونوب عليهن كلهن سالفة الجهاز الي بعته لداعش كل هاي المصايب وتكول انا ما مسوي عوف عنك شغل الحرام سألني بصوت مصدم .. نور انتي شلون عرفتي بقصة الجهاز .. مرة سمعتك وانت تحجي وياهم بالنقال .. مهيمن عنده علم بالموضوع لو لا .. لا ماعنده سحب نفس عميق وكال .. الحمدلله والله اذا عرف مهيمن انا اضيع وينهدم كل الي بنيته .. لا تخاف اني ماكلت لاحد عن سرك كل الي اريده منك تعوف هذا شغلك وترجع النة مثل قبل حسيت بالضعف وبجيت وانا احجي وياه كملت كلامي .. جلال انت ما محتاج تمد ايدك للحرام الحمدلله عندك حصتك وتكدر تشتغل بفلوسك انت تدري الي يتعامل وية هيج انجاس يسمونه خاين وفعلتك هاي تعتبر خيانة لوطنك ولأهل بلدك جلال اترجاك لخاطر خوتنا تترك سالفة الجهاز والشغل وية داعش عفية عوفهم لا تضيع نفسك وتعال ويانا وافتح صفحة جديدة من حياتك وانا اوعدك ما اجيب سيرة. لكائن من كان بسالفة الجهاز وداعش راح يبقى سرك محفوظ لاخر يوم بعمري ويندفن وياي بگبري جاوبني بأعتراض .. ولج نور انتي فاهمة الموضوع غلط انا مو مثلما انتي متصورة كل الي سمعتيه والي عرفتي كان مجرد حيلة سويتها حتى اوكع داعش بيها سكت وسحب نفس عميق وكال بكل هدوء .. نور انا ضابط استخبارات وهذا شغلي ولازم التزم بي واحتاج السرية بعملي وانا اتحمل تبعية شغلي ومرافقتي لهذولي جاوبته واني مصدومة بجلال .. ولك جلال مع الاسف عليك هي هاي تاليتك وصلت بيك المواصيل تستعبيني وتكذب علية هيج كذبة علمود تغطي على افعالك وتبرر تصرفاتك الظاهر انت هواي مستهين بية بس احب اكولك انا مو غبية مستحيل اخلي مثل هيج كذبة تعبر علية هزيت راسي بعدم تصديق وكلت ونوب يردني اصدك كذبته ان هو ضابط الاستخبارات اريد افتهم انت ليوين تريد توصل بهذا كذبك وخداعك وحيلك فهمني اشو كلما اجالك اوضاعك تتدهور كل فترة طالع بسالفة غلط مرة الشرب والسكر والعربدة واتحولت لبيوت الدعارة والرفقة الشينة ودخلت للسجن وهسه داعش كلي شنو عاجبك بهاي الحياة السودة انتبهت عليه لطالما انا احجي هو ساكت هاديء سحب نفس عميق وجاوبني وكال .. كلامج صحيح وانا اسف لان كذبت عليج جنت احاول اهديج واخفف عصبيتج علية واوعدج راح احاول هالمرة اتصرف صح بس كل الي اريده منج ان تكتمين سري بسالفة الجهاز وداعش جاوبته وانا مقهورة من نبرت صوته الحزين .. اوعدني بالاول راح تتغير وتترك الطريق الاعوج جاوبني بصوت مخذول .. اوعدج راح اتغير وان شاء الله تشوفين بعينج وتسمعين بأذنج سلم علية وانهى اتصاله وبقيت واكفة اباوع عالنقال حضنته لصدري ورفعت راسي للسما ادعي الله يهديه لطريق الرشاد ويرجعلنا ذاك جلال الاولي حسيت على ايد تربت على كتفي التفتت لكيت حور واكفة يمي بالطارمة. كانت عيونها بعدها حمر من البجي الله يساعدها كالت .. نور مهيمن صعد فوك وكال صيحلي نور اريد احجي وياها ريم حجت من ورانا كانت واكفة ومكتفة ايديها وكالت .. اليوم شنو سالفة اخوكم خلصها علينا اجتماعات اتوجهت لداخل البيت وكلت لريم .. عفية ريمة هدي اللعب ترة الوضع ما يتحمل موناوشات. على الاقل خلي احنا البنات نصفي الگلوب بينهم مو نأزم الوضع ريم .. اي هو اخوج غير ينطينا فرصة للتصفية اشو محتكر الملعب كله اله. هو الي يحجي ويعترض و يقرر و يصدر الحكم واحنا علينا بس ننفذ دخلت جوة وكلت لحور قبل لا ادخل .. حور ما اوصيج لزمي بت عمي ترة حمت. لاتكوم علينا وتفجر قنبلة من قنابلها تركتهم وصعدت لمهيمن حتى اشوفه شنو يريد مني دخلت عليه وسألته .. حور كالت انت تريد تحجي وياي بموضوع مهم عدل كعدته وسند ظهره عالحايط الوراه باوع علية وكال تعاي كعدي رحت كعدت يمه وباوعت عليه جانت بعيونه نظرة حيرة جلى صوته وكال .. تدرين اليوم جلال طلب ايد حور مني حجة كلامه وهو يباوع علية ينتظر يشوف ردة فعلي المتفاجئة على كلامه جاوبته .. اعرف جلال كالي انت رفضته جان كلش ضايج ومقهور وحتى ما رجع للبيت من ورة هالموضوع انقلبت الادوار وصار مهيمن هو الي يباوعلي مصدوم بعدها نفض راسه وكال .. يعني بربج اسألج بالله. لو جنتي بمكاني شنو راح تسوين .. لا تطلب من اخت تصدر حكمها بتجاه اخوها هالشي صعب العواطف هي الي راح تقرر واكيد راح اختار الموافقة لجلال لان هو اخوي واتمناله الخير جاوبتي .. بس انا الموقف وياي مختلف انا هم اخوه لكن الي يريد يخطبها تصير اختي والله انطاني عقل حتى اشوف بعيني واوزن الامور بعقلي ويگلج واحد زائد واحد متقبل غلط يساوي اثنين وتصرفات جلال وحياته كلها على بعضها غلط بغلط وشي اكيد انا راح ارفضه مستحيل افرط بأختي هاي امانة برگبتي الا انا غبي ازوجها لواحد مثل جلال جاوبته .. ما اعرف شنو اكلك. انا هم مثلك محتارة مهيمن انت ليش ما تحاول تكعد وية جلال ليش ما تتنازل شوية لخاطر اخوك وتوافق تزوجه حور بلكي من يرتبط يصير يحس بالمسؤولية من يشوف نفسه صار عنده بيت وعائلة .. نور الي جاي تكولينه صعب شلون ترديني ازوج اختي الي ربيتها على ايدية ازوجها لواحد تعبان وادري بكل سوالفه التعبانة حور امانة برگبي وواجبي احميها واصونها .. هو صحيح تصرفات جلال متناقضة بس اخلاقه وتعامله ويانة ما عليهم غبار ما يوم سمعنا كلمة تغث او اتجاوز على واحد منا ..دائما يحترمك وياخذ بكلامك خلي هالشي يشفعله عندك واتقبله مثلما هو يعني ماكو بشر كامل ويبقى هو اخوك .. هو انا هذا الي محيرني ويخليني اكل تبن بثنين ايدية هي تصرفاته المتناقضة الي مخليتني قلق هو جان حباب بس فجاءة تصرفاته بدت تتغير خصوصاً بالفترة الاخيرة وهالشي الي يخليني احط عليه الف علامة استفهام واراقبه وادور وراه جان عناد ساتر علية الله يذكره بالخير يجيبلي معلومات عن تحركات جلال وجماعته اول بأول ولوما هو جان ما كدرت ابعد عن طريقه ابو طبرة الوسخ ومن ورة رعونية اخونا خلاني افلس من عناد حتى استحي استعين بي هم الولد مل وجزع من عنده. كل مرة يهد عليه ويهينه وهسة انا محتار اروح المن واكلف منو اريد واحد يتحرى عن هذولي الجماعة الي مرافقهم هم طلعولي من جديد عالساحة مهيمن يحجي وانا اجى على بالي هذولي الي باعلهم الجهاز معقولة هم نفسهم الي جاي يحجي عنهم مهيمن بس شلون اعرف هم لو لا جاوبته .. ما بيها شي لو تتصل على عناد وتطلب منه ترة هو صاحبك وما يكول شي وهو متعارك وية جلال مو وياك .. اكلج هو حتى غالق نقالاته. حتى ابو واخوه محتارين بي ما يعرفون شبي ونوب الامور طلعت من ايدي لان عناد ماكو والرجال الي مكلفه ما اعرف شلون اوصله جان عناد يتواصل وياه ويكلي وهسة انا اريد اوصل لهذا الي اسمه رادار والله ورطة .. مهيمن هدي بالك وكول يالله انا عندي ايمان ان جلال راح يتغير ويرجع لصوابه بس يحتاج منا ننطيه فرصة جاوبني وكال .. الله كريم شوف شلون وين تصفى تاليها جلال اليوم اول يوم بحياتي الجديدة اليوم راح اسافر للموصل اتوادعت وية ابو طبرة ودوحي من عاشرتهم شفت طيبتهم ومعدنهم الذهب وخبرتهم بالحياة خلتني اتعلم منهم هواي دورس بالحياة قبل العمل ابوطبرة حضني وكال .. الله وياك يا بطل. وادعيلي بلكي يطلع اسمي ويسفروني وراك للموصل انا قدمت طلبي .. ان شاء الله يوافقون ادري بيك ما تكدر تعيش اذا ماكو مغامرات واكشن وهناك كلها اكشن دحام جاوبني وهو يحضني .. ان شاء الله ترجع النا بالسلامة وجايب وياك بشارة النصر .. الله يسمع منك اطلب من العلوية امك خليها تدعيلي .. ان شاء الله من غير ما تكول امي صارت عدها عادة كل وقت مغربية تكشف راسها وتدعيلنا بالنصر دك نقالي وكان المتصل ابو ذياب عازمني على الغدا جاوبته وكلت. .. انتظروني عالساعة ب٣ الظهر اجي اتغدى وياكم بالمطعم ومناك نتوكل نسافر انهيت الاتصال وسألني همام .. هَـا شيريد .. عازمني على وليمة ابو لهب .. هم يالله تروح تودع اهلك. ترة ما ظل عندك وكت الساعة بالخمسة السفر باوعت للساعة كانت بالوحدة .. يالله انا اسلم عليكم بعد عفتهم ورحت متوجه لبيت مهيمن غمضت عيوني بتعب البارحة الليل كله ما نمته من اي لصار بيني وبين اخواني كانت صدمتي قوية بالثنين مهيمن برفضه لطلبي ونور بعدم تصديقها لكلامي اثنينهم كانوا ما يثقون بية وهالشي خلاني اموت الف مرة المفروض الاخوان يتبادلون الثقة بالفطرة بس شكل الحياة حرمتنا حتى من هالشي بسبب ابونا متوجه على بيت مهيمن هم يالله اروح هسة هذا الوقت المناسب الي اكدر اروح للبيت ومهيمن مو هناك والبنات حور وريم اكيد هسة على جية من الكلية اريد اروح اجمع غراضي واودع نور والبنات واشبع شوف من غزال البصرة اريد اطبع صورهم بذاكرتي ريم وصلنا للبيت ولكينا الباب مفتوح ودخلنا اني وحور وسمعنا صوت بجي نور وتوسلاتها باوعت لحور بتسائل .. هذا مو صوت نور جاوبتني وهي تروح بتجاه الصوت .. لج اي هاي نور جاي تبجي رحنا دخلنا وجان اشوف جلال جاي يجمع بملابسه بالجنطة وام مهيمن واكفة يمهم تباوعلهم بحيرة. اول ما دخلنا رفع راسه وصارت عينه بعين حور كانت عيونه حمر انكسر كلبي على حاله لفت انتباهي توسلات نور الي كانت تطلع بغراض جلال من الجنطة وهو يرجعهم ويكللها .. نور اترجاج فهميني انا لازم اسافر لا تعرضيلي ام مهيمن .. خالة نور استهدي برحمانج و لا تعرضين بسفر اخوج هذا فال مو زين هو كلج مسافر عنده شغل نور بتوسل .. لا عفية جلال لا تعوفنا وتروح الله يخليك والله بعد ما اطالبك تتغير كلشي ما اريد منك بس ابقى ادري بيك تتخذ من السفر حجة حتى ما تشوفنا وتبتعد عنا لان اتعاركنا وياك انا ومهيمن بس احنا اخوانك لاتنسى هذا الشي جلال انت ليش گلبك هيج قاسي شلون ينطيك گلبك تهجرنا انتبهت لحوراء تباوع على منظرهم وتبجي وجلال صار يهدي بخوف نور ويطمنها .. نور الله يخليج لا تزيدين همي بدموعج انا لازم اسافر عندي شغل مهم واوعدج ارجع اذا الله راد لزمت ايديه بثنين ايدها بخوف وكالت .. احلفلي ترجع انطيني وعد وكولي بس تخلص شغلك ترجعلنا .. اوعدج كون الله يكتبلي عمر اوعدج ارجع بس انتي لا تبجين ام مهيمن سالته .. زين خالة كللنا وين هذا شغلك بيا مكان .. انا مسافر للخارج. واجيت حتى اسلم عليكم واروح .. يايمة عليمن هالاستعجال انتظر اخوك يجي انا اتصلت عليه حتى يجي ويسلم عليك قبل لا تسافر جاوبها .. خالة ما يحتاج انا البارحة ودعته وهسة راح اطلع. ما ظل وكت سمعنا شهكت بجي حور الي كانت تباوع لجلال وتبجي وهو كان يسترق النظرات منها لان ام مهيمن موجودة جمع غراضه بالجنطة انتبهت عليه شد علگ اخضر على ايده سواه مثل السوار وباوع لحور مسح على راس نور وكللها .. صيري قوية. وادعيلي بعدها شال جنطته واقترب مني جنت واكفة يم حور هم مسح على راسي وعيونه لمعت بحنان وكال .. باربي ما اوصيج ديري بالج على نور وهمس وعلى غزال البصرة وكمل كلامه بشكل عادي وهلله هلله بأخوي ما اوصيج عليه اريد كون اروح وارجع الكاه مجلوط بوحدة من عبواتج الناسفة ابتسمت ودموعي نزلت غصب عني ما اعرف ليش عندي احساس ان وداع جلال هالمرة يختلف عن كل مرة. ادخل الخوف بگلبي جاوبته .. لاتوصي حريص احطهم بعيوني بس انت دير بالك على نفسك باوع لحور وسلم عليها بشكل عابر ما يريد يلفت انتباه ام مهيمن احس بي كوة عليه ابتعد من يمها وراح على ام مهيمن باسها من راسها وكللها .. خالة محتاج دعواتج لاتنسيني ام مهيمن .. يا خالة ربي يمهد طريقك ويبعد عنك اولاد الحرام وان شاء الله توصل بالسلامة عفية ما اوصيك وليدي عود من توصل اتصل على مهيمن حتى تطمنا طلع جلال من البيت. وام مهيمن شمرت الماي وراه ونور دخلت لغرفتها منهارة بالبجي رحت دخلت وراها حتى اواسيها. نور .. ولج ريم عافنا وراح وشكله ما ناوي يرجع .. لا نور شنو هالكلام لاتخوفيني. جلال راح بشغل انتي ليش تعقدين الامور .. انا ومهيمن ما عرفنا نجني اخونا وشكله سافر وهو زعلان وهاي المرة زعله ثكيل شاف روحه ماله مكان هنا هو البارحة كال ما ينفع بعد اعيش بنفس البيت انا وحور هالشي راح يسبب احراجات لمهيمن وكال مستحيل ارجع اعيش ببيته كرامتي ما تسمحلي جان يحجي وهو مكسور .. يعني انتي تقصدين ان جلال سافر حتى يبتعد لان مهيمن رفضه .. اي ومو بس هيج وانا الغبية كملت كسرته اتهمته وكلتله مهيمن عنده حق وهددته علمود يترك شغله الاعوج ويرجعلنا بس شكله جلال طفح بيه الكيل من ورة ضغطنا عليه وعافنا وسافر ما اعرف شصار بية من سمعت كلام نور احس الحرارة صعدت راسي صرت اتذكر بشكل جلال ونظرات الخذلان بعيونه. يعني راح وهو مكسور خاطره اباوع لنور شلون كاعدة تندب حظها وتاكل بروحها سمعت صوت مهيمن يسأل امه شنو وينه جلال ام مهيمن جاوبته.. خطية سافر ما لحك ينتظرك كال انا ودعت مهيمن البارحة جانت ام مهيمن تحجي وياه. وانا اباوع لدموع حور ونور ونظرة جلال الحزينة من كان يباوع لحور كنت اباوع لمهيمن واراقب معاني وجهه وهو يستمع لامه كانت كلها برود ما اتحرك ساكن وكأن موضوع سفر جلال عند غير مهم. حسيت بغيض من تصرفه اللا مبالي رحت وكفت كدامه بكل غضب وكلتله .. هسة ارتاحيت استاذ مهيمن من خليت اخوك يعوف البيت ويسافر من وراك باوع علية بخزرة ام مهيمن حجت مستغربة تهجمي على ابنها .. يا يمة شبيج ومهيمن شله دخل بسفر اخوه غير هو عنده شغل وسافر باوعت عليها وكلتلها .. لا خالة جلال ما يسافر لوما اتعرض للرفض والاهانة من مهيمن. .. ولج شجاي تحجين شنو الصاير باوعت على ابنها وكالت .. ولك يمة مهيمن انت جاي تسمع بتت عمك شكاعد تحجي فهمني شنو الموضوع ما انطيته فرصة للجواب حتى يحجي ويكعد يبرر تصرفه حسب ما يعجبه كلتلها .. لا خالة ما راح يكدر يجاوبج ماله عين انا اكلج جلال البارحة طلب ايد حور ومهيمن رفضه وكله لو تبقى اخر رجال بالعالم ما ازوجك اختي انت واحد ما يشرفني احط ايدي بيدك بعد هذا الكلام شنو تتوقعين من جلال يسوي بعدما مهيمن كسره برفضه مهيمن زمخ بية وكال .. ولج غضب لا تكعدين تحجين بشي ما تعرفينه. ام مهيمن تباوع علية وعلى مهيمن .. ولكم خايبين صدك تحجون لو تجذبون جاوبها مهيمن .. يمة طلبها من عندي وانا رفضته لان انا اعرف بحور ما تفكر بالزواج حالياً قاطعته .. لا مهيمن مو هيج الحجي لاتظلم حظك وبختك خلي الله بين عيونك. درت وجهي على ام مهيمن حتى افهمها .. خالة جلال يحبها لحور امنيته من الدنيا ان حور تصير من نصيبه بنى بيته وجاي يأسس مشروعه وهو يحلم بحور تشاركه حياته بس مع الاسف غرور مهيمن وتكبره يمنعه ان يوافق على جلال والله ليش لان جلال عنده تصرفات تدينه. ومو كفو يصير زوج لاخته. بس احلفك بالله هو اكو انسان كامل بالدنيا ليش مو هذا انت اشو كلك عيوب من ساسك لراسك وعادي عندك ترديني اتقبلك زين شمعنا جلال ليش تحلل لروحك وتحرم على اخوك ليش هو الاخو مو لازم يصير ستر وغطى لأخوه اشو انت ما شفت منك هالشي بتجاه جلال صاح بية بصوت يرعد وكال .. ولج ريم انتي شعرفج بالجاي احس بي انا بهاي اللحظة. وكاعدة تحكمين بكيفج وتمسلتين بالكلام انا من رفضت جلال عندي اسبابي الي تخليني ارفضه ما اكدر احجيها ومو لازم انتي تعرفيها مثلما كلتي الاخ لازم يكون ستر وغطى لأخوه بس انا اذا سترت على اخوي مو معناها. انا راضي بتصرفاته و افعاله وضيفي فوك هذا كله انا اعرف بأختي رافضة فكرة الزواج .. انت شوكت سألتها عن جلال اشو البارحة انت سألتها عن واحد ثاني هي من قبل رافضته انت مو كلت اراعي حق الله بيها ولازم اسألها زين ليش سألتها عن ذاك وما سألتها عن جلال ليش هالتفرقة .. ما يحتاج اسألها لان انا اعرف ردها .. يعني ما تجوز من طبعك وتقرر من يمك .. وليش اقرر من يمي هاي هي موجودة وهسة راح اسألها كدامج علمود تسمعين بنفسج التفت على حور وسألها بصوت خشن وكال .. حوراء كوليلها رأيج للست انتي مو رافضة فكرة الزواج انتبهت لحور دنگت والتزمت الصمت وجوابها كان دموعها .. شلون تريدها تجاوبك وانت انطيتها الرفض بسؤالك يعني شنو تريدها تكلك اكيد راح تستحي تعارض رأيك الي انطيته الها بصيغة سؤال رحت يمها وكلتلها .. ولج حور ليش تبجين رفعي راسج ولا تسكتين كليله انتي تحبين جلال دافعي عن حبج . لو بس جلال الي يحارب لوحده زمخ بية وكال .. ريم انتبهي على لسانج ولا تكعدين تبثين سمومج بعقل اختي قاطع كلامنا صوت حور المعترض وكالت .. لا مهيمن لاتحجي على ريم وتحط الصوج بيها فعلاً انا احب جلال وانا لغير جلال ما اصير مرة لاي واحد من بعده حتى لو اعرف ابقى طول عمري بدون زواج ما حسينا الا وحور انضربت راشدي وگعها بالكاع لزمت خدها ورفعت راسها تباوع لأمها .. ياخسارة تربيتي وتعب مهيمن بيج ما عرفت اربيج عدل ولج هاي تاليتج توكفين بوجه اخوج بكل كواة عين وتتحدينه وما تحشمينه كون الموت لفاني ولا اشوف هذا اليوم كنت واكفة مصدومة من تصرف ام مهيمن لكن فجاءة ما حسيت الا على ايد سحبتي من زندي فجاءة بحيث ايدي انخلعت رفعت راسي وشفت مهيمن وعيونه تجدح نار قرب وجهه علية وكال .. هذا الي جنت خايف منه شفتي لوين وصلنا كلامج كعدتي تشجعين اختي وتعلميها وتفتحين عيونها على امور هي ما تعرفها شوفي ولج اياني وياج تتجرأين تعممين تصرفاتج الرعنة الي جايبتها وياج من برة بداخل ببيتي انا ارفض تفسدين اخلاق اختي . هنا البيت انا المسؤول عنه وانا القانون بي ولازم الكل يحترم نفسه ويتبعني نترت ايده وابتعدت عنه وجسمي كله يرتعد تهجمه علية وكلامه وياي كان مثل طعنة سكين حادة رفعت راسي بكبرياء وجاوبته .. يعني انت هسة جاي تكلي اني خربت اخلاق اختك وتخاف على اهل بيتك من عندي خاف افسد مفاهيمهم زين ما دام اني هشكل انسانة منحطة لعد ليش تريد ترتبط بية وتتزوجني ما تخاف اجيبلك العار والسمعة السيئة الي جايبتها وياي من برة. نور اقتربت مني وكالت .. ريم كافي ترة مهيمن ماكان يقصد شي وكلامه كله كان بساعة عصبية عذريه لان اخته انضربت كدامه وهاي اول مرة توكف بوجهه ابتعدت عن نور قبل لا تلزمني وكلت .. لا نور مهيمن كان قاصد كل كلمة ولحظة العصبية ظهرت حقيقة مهيمن وبينت نظرته الي ماخذها عني وهو ما يحجي هيج كلام. اذا ماكان بالاصل هذا الكلام راسخ بعقله ويشوفني وحدة مو كفو اقترب واحجي وية اخته باوعت عليه وانا اكابر ما اريد انهار كدامهم وابين كسرتي .. الظاهر انا شخص غير مرغوب بي بينكم وسبق وان بينت هالشي بأكثر من موقف بس انا العمية الي اصريت اتغاضى عن هذا الشي بسبب حٍٍِْــًبٌٍـــِٓېٍٓ الك وتعلقي بيكم على فكرة لاتغتر بروجك هواية انا مو بس حبيتك الك انا حبيت الحياة الي داير مدايرك امك اختك ونور وجلال حنانك كل هذا حبيته. تكدر تكول صرت طماعة وردت هذا يصير كله ملكي يمكن هالحياة هواي علية وصار لازم ارجع لمكاني الاصلي بالخارج هناك اعيش وية ناس يتقبلوني مثلما انا ما يكعدون يحطون خطين تحت كل تصرف يبدر مني بتلقائية ويكعدون يحللونه بكيفهم بالي يعجبهم سحبت نفس عميق وكلت اكمل كلامي .. هاي هي مهيمن مادام انا بنظرك بنية بلا اخلاق وتخاف على اختك مني خلاص انا راح اخلصك مني ومن شري واطلع من حياتكم انا هذا حدي وياك اخذت نقالي واتصلت على عمو ابو سيف كدامهم نور .. شنو ريم شراح تسوين مهيمن بصوت غاضب .. ريم بطلي رعونية انا الف مرة اكلج من تشوفيني عصبي اتجنبيني لا توكفين بوجهي وشفتي شنو الي صار نتبيجة عنادج نور شنو كاعد يصير بينا ياربي ليش هيج انگلبت احوالنة. وكل واحد بينا صفى بعالم لوحده مهيمن معصب صاير بركان من الغضب والف حسبة براسه بهاي اللحظة منا صدمته بجلال وحور وسفر جلال وكملتها ريم عليه احس بي يريد ينفجر ما يثق بنفسه يحجي اي شي وية ريم لان خايف يزيد الطين بلة اباوع لريم تحجي بالنقال وهي معصبة ريم .. عمو ابو سيف اتصل على عمة اسيا وسوي الي طلبته منك قبل وبعدين تراجعت هالمرة مابيها تراجع اعرض عليها المبلغ الي اتفقنا عليه اني جاهزة للسفر خليها تجي علية حتى تاخذني جانت تحجي وصوتها بدة يرجف جاوبت ابو سيف.. لا عمو ما صاير شي بس ياريت انت تجي علية باجر وتاخذني انهت الاتصال والعيون بدت تلالي ياربي معقولة ريم تريد تسافر وتعوفنا هي الثانية درت وجهي لمهيمن وحجيت بصوت ناصي .. مهيمن احجيلك كلمة مو حلو كلامك بحقها انت هضمتها مهيمن نتر بصوت حاد وكال .. لا نور خليها تروح ريم اذا رادت تروح انا ما اكدر الزمها مو كل مرة تكعد تهدد وتتوعد تعوفنا عبالك مسوية منية علية وباقي هنا يمنا. راح وكف كدام ريم وكللها .. ريم بعد لاتجيبين طاري الحب على السانج وتكولين احبك انتي عمرج ما حبيتي مهيمن انتي شفتي بية صورة عمج واتعلقتي بية بس هذا كلما في الموضوع لان الي يحب يابت عمي يخاف على محبوبه ويحاول يتوالم وياه ويتحمله بحلوه وبمره. ما يكعد يتعزز عليه جان يباوع بوجهها وعيونه بيهم الف كلمة وكلمة .. ولو بعد ما يفيد الحجي راح وتركنا وصعد فوك مثل العاصفة صوت خطواته عالدرج ترعد ام مهيمن جانت كاعد بالكاع وحور الي وجهة مخطوف لونه. ماخذة زاوية تباوع بس بعيونها بخوف وترقب اما ريم فراحت تنفذ تهديدها. دخلت للغرفة وراها ولكيتها جاي تسحب جنطة كبيرة وهي تبجي بدت تجمع بأشياءها واني كنت افتر وراها احاول اخليها تغير رأيها وهي رفضت وكالت بعد مايفيد الكلام ولا يصلح اي شي بعد الي كاله مهيمن .......................................... السكتة ياناس ماهي ابد من طبعي مايومن نمت والعتب بكليبي يرعي هذا انا واليحبني يجي لعندي يسعي تراني الي رفعته وسميته بيوم سبعي يوم الي افارك صدكني هو خسران عشرتي ربح من الله كولوله للبطران يجيله وكت يعض بي اصبعه ندم بين اهلي وربعي اني كلبي معروف ابيض مثل الكطن الي توة مندوف مابي دغش ولا مخلوط بي صوف والحمد لله اعرف مقامي ووضعي لاتظن من جرحك وغدرك راح انكسر البسلك الاسود حزن وأخب بذيالي اجر انا ادوس على جرح الروح وامرها امر خلي الكلب ينزف ولا تشوف بيوم دمعي هدى سعد #هدى .................................................. ............................ وبهاي الاثناء سمعنا صوت صياح مهيمن المخبوص وهو ينزل عالدرج طلعت مفزوعة على صوته فات من يمي وهو يركض مستعجل اسمعه يحجي بالنقال امه تصيح وراه واني بقيت جامدة بمكاني وحور نست خوفها واجتي علية تسأل مهيمن ليش طلع يركض ام مهيمن صاحت.. ولجن ركضن جيبن عباتي خلي اشوف اخوجن شبي وين اخذ سيارته وراح وهو مفزوع يتبع | ||||
|
| |
|
26-09-19, 08:39 AM
| #55 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل_ج٢ #البارت_اربعة_وعشرين #الكاتبة_نهى_الحسون نور ركضة مهيمن وصوته المفزوع وهو يحجي بالنقال دخلتنا بحالة خوف وترقب والكل يكول شنو الي صار ام مهيمن لبست عبايها وطلعت ورة مهيمن الي اخذ سيارته وراح من غير ما يلتفت علينا ويكوللنا شنو الموضوع وحور راحت لزمت نقالها وكعدت تتصل على خالها حسن تسأله شنو صاير خالو اشو مهيمن طلع يركض مخبوص واخذ سيارته وراح اني عبالي انتوا بيكم شي. لعد شنو الموضوع تركت حور تحجي بالنقال ولاكتني ريم طلعت من الغرفة جايبها الفضول وبعيونها نظرات التساؤل وعيونها وخشمها بعدهم حمر والدمعه معلكة برموشها .. نور شنو شصاير اتوجهت لنقالي بالعجل واني اجاوبها .. والله ما اعرف على غفلة مهيمن نزل مخبوص يركض كلشي ما افتهمنا منه انهيت كلامي وية ريم واجريت اتصال على مهيمن بس يدك عليه يطلعلي المشترك مشغول حالياً بمكالمة اخرى بقينا على هذا الحال ننتظر احد يتصل علينا او يدك بابنا ويكللنا الصار كاعدات مصفصفات وحدة تباوع بوجه الثانية البيت هدوء ما نحجي اي شي كل وحدة بينا تحمل تحت هدوئها عاصفة من الافكار للحظة حسيت احنا معزولين عن العالم استغفر الله حتى من ورة الخبصة نسيت اتصل على جلال واتطمن عليه اشوفه هو وين الي عرفته طيارته الساعة بالخمسة باوعت للساعة. جانت بالستة ونص تقريباً. سودة علية هسة يظل بباله لان ما اتصلت عليه هو منا اكيد زعلان وفوكاها انا الثولة عقلي انخبص بمهيمن ونسيته ااوووووف سمعنا صوت الجرس اندك. بس بألحاح بحيث شكل الي ضاغط عليه مارفع ايده عنه شكله مستعجل هواية نهضنا انا والبنات بلهفة وركضنا للباب حطيت شالي على راسي حور كالت .. اكيد هذا مهيمن ماكو غيره يدك الجرس هيج من يكون مستعجل على واحد يفتحله الباب جانت تحجي وانا سابقتها رايحة افتح الباب لكن وانا جاي افتح الباب لفت انتباهي اصوات رياجيل متجمهرة يتحاجون بصوت عالي مرعب بعدني ما فاتحة الباب وجان اسمع صوت عناد جان يحجي بصوت هلع اسمعه يكول لخوال مهيمن واتبعها صوت صرخة ام مهيمن بحيث فتحت الباب على وسعه اجة الباب ينخلع عطت ورة صيحة ام مهيمن وانا ادور بعيوني على الوجوه وعلى صاحبة الصوت وينها سالت .. شكووووو شنو شصار. وجان توكع عيني على ام مهيمن الي خارت قوتها ووكعدت بالكاع وصارت تلطم على على حظنها انتبهت لاخوانها هذا الي يهديها وذاك الي يحاول يكومها واللاخ لازم نقاله يتصل بي ويحجي شكله يريد يوصل خبر كنت اعاين بالوجه حسيت على صرخة حور الي عبرتني وراحت كعدت يم امها تصيح بصوت عالي .. لج يمة احجي شنو صار ليش تلطمين خالها يحجي وية ام مهيمن .. ولج خوية زهرة كولي يا الله موزين الي كاعد تسوينه جانت ريم واكفة يمي وعلامات التعجب على وجهها اسمع صوت عناد يحجي بنقاله. ويصيح ويتعارك ما اعرف وية منو الكل يصيح والكل مخبوص بس اسمع اسم مهيمن بالموضوع مهيمن صعدت فوك لغرفتي وتركت وراي خواطر مكسورة من جلال وحور وامي ونور وريم يتوقعون انا حجر گلبي ميت و مجرد من المشاعر الكل حاطيني شماعة يعلكون عليها خيبات املهم واخطائهم نور تلومني وتلوم نفسها تكول ما عرفنا نجني اخونا وريم تتهمني بسفر جلال وطلعته من البيت بسببي لان رفضته اما حور فهاي كانت صدمتي الاخيرة الي كسرت ظهري بيها وعليهم كلهم جلال أآآآآآخ يا جلال هذا الي كلت عليه صار عندي اخو وسميته ذراعي اليمين جريت حسرة بگلبي مكتومة هذا الشخص من يوم الي وگعت عيني عليه وانا ما جاي اكدر احزره. بحياتي ما صعب علية فهم شخص الا جلال كلما اكول بديت افهمه واعرف شخصيته يكوم يطلعلي بشخصية غامضة اغرب من الي قبلها اغلب حياته غموض كل شي .. ماضيه.. شغله .. غمضت عيوني هجمت علية افكاري بصورها سفر جلال المكسور و دموع نور وصورة خذلان حور وغضب ريم وصدمة امي خلتني اكره نفسي حسيت بضغط وتعب وكأن المشاكل خلصت اجتني ريم تديني واصيح بوجهي وتريدني اتفهمها صعبة بلحظة غضب تطلب من شخص يداري او يسيطر على اعصابه بأنفجارها بوجهي حسيت بيها جاي تمتحن صبري عليها هي ما تدري للصبر حدود ونهاية مااعرف شلون جاوبتها هذا الجواب الي فعلا حسيته قطع كل شي بيني وبينها بعد كلامي اعرف ماخليت اي مجال حتى نرجع مثل كل مرة من نتعارك اني وياها مااعرف شلون راح اشوفها باجر وهي طالعة من بيتي واني طبعا مااكدر اعترض او اكول كلمة وحدة لان الي حجيته هسة بلحظة عصبيتي مابي اي مجال للكلام والتفاهم دك نقالي تركته ما جاوبت لا وحتى كلفت نفسي افتح عيوني واشوف منو المتصل بس النقال استمر يدك لحدما طكت روحي وسحبته وقررت احوله صامت بس استوقفني اسم عناد يتصل عقدت حواجبي مستغرب عناد!! شمدريك اني محتاجك بهاي اللحظه اكثر من اي وقت رديت بسرعة بس اجاني صوته مستعجل اكثر مني راسا وبدون سلام ولاكلام كال .. مهيمن انت وين .. هلا عناد انا بالبيت كول محتاج شي .. مهيمن صحيح انا حلفت بعد ما اقترب لاخوك ولا اسأل عليه ولا اريد اعرف الله وين خالقه بس انا بيوم الي عفته واتخذت القرار نسيت سالفة رادار نسيت الغي اتفاقي وياه واكوله كافي بطل ما يحتاج تراقب جلال اليوم هسة بالتحدبد رادار فاجئني من اتصل علية وكالي كدرت اجيب معلومات مهمة عن هذولي الي يرافقهم جلال عدلت كعدتي وانتباهي كله مشدود وية عناد .. شنو عرف عنهم .. يكول بقيت اراقبهم بس ما كدرت اوكع على شي شكلهم اصلاً حتى مو من البصرة ولا الهم صلة بأحد من اهلها هسة بالصدفة كدرت احصل منهم معلومة كلش مهمة ولازم تعرفها كال قبل ساعة شفتهم دخلوا لمطعم ورحت دخلت وراهم وحجزت الميز الي وراهم وكال سمعتهم يتبادلون بالكلام بصورة غامضة بس الي لفت انتباهي كلمة امير. وبعدها شفت جلال دخل للمطعم وكعد وياهم وجان اسمع ابو ذياب كله هسه جنت احجي وية الامير وكال وصل رسالتي لجلال قربان وكله الامير يبلغك السلام ويكلك مرحباً بك في دولتنا بين صفوف اخوانك المجاهدين نحن بأشد الشوق لوصوله جلال جاوبهم وكللهم .. مو اشوق مني تدري اتمنى روحي كون طير واروح يمهم هناك ماتعرف شكد اعد الساعات حتى اوصللهم ورادار يكول كان مبين من شكلهم وراهم سفر لان سمعتهم يحجون عن نيتهم بالسفر عناد ختم كلامه وكال .. بالحقيقة انا شفت هذا الموضوع ما ينسكت عليه الافضل تكعد وية اخوك وتسأله وتفتهم منه شنو القصة من الواضح هذولة دواعش نهضت من مكاني مفزوع من جاب سيرة السفر والدواعش حسيت بالنار بدت تتوغل بشرايني تسعر بدمي .. عناد انت شكاعد تحجي شنو داعش شنومصيبة سودة ولك جلال اخذ جنطته وطلع من البيت حتى يسافر عناد كمل كلامي.. لاتكولها يعني افتهم من كلامك جلال رايح وياهم لداعش ما انطيت مجال لعناد حتى يكمل اخذت محفظتي والسويج ونزلت بسرعة مثل الاعصار وانا احجي وية عناد اطلب منه الفزعة .. عناد انا بعازتك الاخ وكت الشدة ينراد وانا وجلال بشدة الحك على اخوتك عناد باهتمام .. كول مهيمن ركبتي الك سدادة .. لازم نلحك على جلال قبل لا يسافر وياهم مستحيل اخليه يسوي الي بباله .. امرني وانا تلكاني عند يمناك . اريدك تنطيني موقوعهم هسة بهاي اللحظة ومواصفات سيارتهم وارقامها بسرعة جاوبني بسرعة .. هسة اتصل على رادار واخذ منه المعلومات طلعت من البيت وصعدت بسيارتي وانطلقت بدون ما التفت لصياح امي وخبصة اخواتي احس بروحي فصلت عن العالم بالي مو يمهم لان ماكو وكت اريد الحك على جلال قبل لا يضيع نفسه ويسافر دقيقة واجاني اتصال عناد وانطاني المعلومات عن مكان السيارة ومواصفاتها عناد كمل كلامه .. مهيمن رادار يكول انا هذا حدي وياهم عفتهم لزموا الطريق السريع جان عناد يحجي وينطيني المعلومات وانا دست سرعة زايد متوجه مباشرةً. على طريق السريع. كان مو بعيد علية عناد سألني .. مهيمن شنو راح تسوي جاوبته .. اكيد رايح وراهم حتى اوقفهم وواجيب العار اخوي لو اعرف ارجعه سحل للبيت جاوبني وهو مخبوص سمعت صوت تشغيل سيارته .. مهيمن انتظرني انا بالطريق جاي وراك دير بالك تحاول توقفهم لوحدك مادام هذولي وية داعش معناها كل شي اتوقع منهم جاوبته وانا اتسابق وية السيارات وادك هورن واحاول اختار الطريق المختصر .. عناد ما اكدر انتظرك هسة بالاول خلي اطيح بيهم والكاهم والله كريم بقى عناد وياي على اتصال احس اعصابي تلفت وعيوني تبحث فجاءة صحت وانا اتذكر كلام جلال بخصوص داعش وضرب الستيرن وصرت اغلط والعن .. انا شلون فاتتني وغفلت عنه المفروض ما انسى هيج موضوع خطر صرت احجي وية روحي مثل المخبل عناد .. شنو مهيمن شبيك اشو صرت تحجي وية نفسك شنو هو الي نسيته كول .. ولك عناد. هو جلال بذات نفسه كالي مرة داعش خطفوه وعذبوه لان هو رفض يتعاون وياهم و يشتغل عدهم بتحوير السيارات طبعاً بوكتها انا ضغطت عليه بالاسئلة يالله هو نطق لان صادف جان يحجي وية خاله بالنقال وهو كاله اكو ناس يدورون عليك خاف نفسهم الي خطفوك ومنها اني عرفت عناد متفاجيء .. هذا الحجي شوكت صار وهمة شوكت خطفوه .. قبل لا اعرفه وصدك من التقيت بي اول مرة جانت حالته حالة بوقتها كال متعرض لحادث سيارة عناد جاوبني مصدوم.. لاتكولها مهيمن يعني هذولي هم نفسهم الي خطفوه ورجع يشتغل وياهم جاوبته بيأس .. ااااي همة ما تقبل غلط يجوز ضغطوا عليه اااااخ ربي دخيلك. راسي راح يوكف من التفكير جنت احجي وية عناد وانا اتذكر الكلام الي دار بيني وبين جلال بذيج الليلة وشلون حجالي عن هذولي الي خطفوه اتذكر بالاول حاول يتهرب مني بس انا حاصرته بالكلام وخليته يحجي بيومها انا كلتله .. جلال احجيلي اذا عندك شي ضامه عني خليني اعرفه منك احسن ما بعدين اعرفه من غيرك. وتالي يصير ما لا يحمد عقباه هو جاوبني .. مهيمن. اطمئن من ناحيتي بيمن احلفلك ما عندي شي وياهم انا جلال قربان اخوك واضنك صرت تعرف اخلاقي بيومها حذرته .. الله كريم خلي الايام تجاوبني على سؤالي بس اتمنى ما يجي اليوم الي تخذلني بي ساعتها صدكني راح تنفتح عليك ابواب جهنم وراح تشوف وجه مهيمن الثاني ضربت الستيرن المقود بكف ايدي بكل قوتي وصحت بصوت عالي .. الله يلعنك ياجلال الله يلعنك ليش ماكلتلي رجعوا عليك اسمع عناد يكلي.. مهيمن اتمالك اعصابك وخليك قوي ان شاء الله كل شي ينحل ماكوشي ماله حل لاول مرة بحياتي احس بالكسرة. صعبه ياناس صعبة هذا الي جنت اكول عنه اخوي مثل ظلعي من اكون بعازته بوكت الشدة يفزعلي. اخسره بلحظه ولحد هسة مااعرف هو برئ وهمة ضغطوا عليه وهددوا وخاف وراح وياهم لو ثعبان تسعي للخراب وانا جنت بالنسبة له محطة استراحة او يمكن وسيلة علمود يتمم اموره. ومن حانت ساعة الصفر ظهر على حقيقته مو معقولة ممكن اكتشف جلال كدر يخدعني ببرائة وجهه ونظرات عيونه غمضت عيوني احس جفوني صارت حارة فتحتها بسرعة اذا صحيح ياجلال طلعت خاينماراح اسمح لروحي اضعف وانكسر واحزن عليك جلال اذا فعلا هيج سوة وراح وية داعش بأرادته مو مغصوب معناها باعني برخص. واستخدم خوتنا ضدي وعرف يلعبها صح ااااااخ ليش ربي ليييييييش ربي شمعنا انا تمتحني بأخوية عناد كال بصوت هاديء شكله هو مثلي مخذول ومصدوم بصاحبه الي اعتبره مثل اخوه المرحوم .. مهيمن كول يا الله. واستغفر ربك احنا مانعرف شصاير وية جلال وليش خضعلهم وراح وياهم بعدها غير الموضوع كعد يسألني عن مكاني وانا انطيته معلومات عن مكاني الي انا بي تقريبا عناد كال.. اتصلت على صاحبي الضابط وانطيته رقم السيارة ومواصفاتها حتى بلكي يبلغ السيطرات ويوقفونهم بالطريق .. عفية زين تسوي جنت احجي و انتبهت لروحي دايس عالبانزين وجاي اسوق بسرعة جنونية لدرجة احس السيارة تريد تطير من سرعتها عبالك داخل سباق سيارات كلت لعناد .. عناد هذا انا لزمت طريق السريع عناد كال.. انا وراك. بالشارع التجاري. بيني وبينك عشر دقايق بس كون ما يلزمني ازدحام ويأخرني جنا انا وعناد ننطي اماكن تواجدنا مرت ساعة تقريباً وانا لازلت على طريق السريع الي يوصل لبغداد الطريق كان هيمة فارغ السماء والطارق خالي بس من كم سيارة طبعا طول هاي المدة الفاتت انا وعناد باقين على اتصال اتصل وسألني للمرة المليون .. هَـا ما شفت سيارة بنفس مواصفات السيارة الي كلتلك عليها .. لا والله ماكو ماصادفتني سيارة بهيج مواصفات جنت احجي وياه وهناااااااك وجان المح السيارة الي وصفها الي عناد وصحت بصوت عالي .. عنااااااد هذولي هم طحت بيهم هاي هي سيارتهم كدامي بيني وبينهم مسافة بسيطة كال .. مهيمن انتظرني انا وراك مسافة الطريق مو تتصرف لوحدك دير بالك .. خايب شنتظر انا ما صدكت وكعت بيهم ولكيتهم هسة. راح اناورهم حتى يوكفون جنت احجي وية عناد ورمشتلهم باللايت عالي وناصي .. من خرب مرضعكم هسة غير ينطوني مجال اولاد الكلب ارتفع صوت محرك السيارة معلن عن سرعته الجنونية حركت التايرات حرك حتى ريحة الاسفلت طلعت عناد بعده على الخط كال .. ولك مهيمن انتظرني جلال حانت ساعة الصفر وبانت بوادر الرحيل وهذا انا شديت الرحال وعقدت النية. للسفر للموصل هناك لمدينتي رايح اعتذر منها واقوم بواجبي وياها. عندها يمي دين بركبتي ولازم اوفي صعدت وياهم بسيارتهم. كعدت بالخلف وابو ذياب يسوق وابو سراج بصفه متوجهين للموصل ودعت اهلي واحبابي ورايح ومقرر المصير كانت السيارة تمشي بطريق السريع كنت اراجع بنقاط الخطة الي لازم تتم بيها المهمة انتبهت لابو ذياب وابو سراج يحجون بينهم ابو ذياب كال .. هاي سيارة ورانا جاي تناور يريد يطلعنا وترمشلنا هذا شنو يريد جان يباوع بالمراية الامامية جاوبه ابو سراج بشك وكله .. اي صح انا انتبهت عليها جانت ورانا هذا يمكن يريدنا نوكفله شنو قصته هم يحجون وانا كاعد ومسيطر لان واثق ان الطريق مأمن ومحد راح يلزمنا او يوكف بطريقنا حتى السيطرات تم الاتفاق وياها من قبل الجهات المسؤولة ان ما تفتش هاي السيارة بالذات حتى ما تصير عرقلة بالمهمة او معاكسات يجوز هذا خطية محتاج مساعدة بس ميدري المسكين وية منو وكع ابو ذياب كال بحذر .. انا ما مرتاح لألحاحه شنو يريد من عدنا طبعاً انا اتعودت على حذرهم وحرصهم وتشككهم بكل الي حواليهم لدرجة يحسبون ان كل صيحة عليهم هم من ورة هذا حذرهم الزايد كدروا يعرفون بشغلة سؤال عناد عنهم بس الحمدلله. طلعته من الموضوع قبل لا يتورط وياهم انتبهت لابو جراس اشر لابو ذياب وكال .. شوف خلي الشارع يفرغ من السيارت. واوكف بمكان هيمة على صفحة خلي نشوف هذا الاثول شيريد منا وشعنده لاحگنة باوعت عليهم كل واحد سحب سلاحه من تحت مقعده متأهبين الجماعة حجيت بكلبي اريد اعرف هذا الطرن الي بايع روحه منو شورطه وياهم جنت كاعد متكيء مسترخي وفجاءة. اجتازتنا السيارة الي جانت ورانا ووكفت كدامنا وقطعت علينا الطريق بحيث ابو ذياب گبل داس بريك. واتوقفت السيارة بسرعة لدرجة انا اندفعت للامام اجيت اكعد بحضن ابو جراس رفعت راسي حتى اشوف الخبل او الانتحاري الي اتجرأ وسوة هيج. هناااااااا وجان انصدم صدمة عمري. اتسعت عيوني وگلبي وكع بين رجلية باوعت لابو ذياب سحب اقسام وهم يريد ينزل من السيارة. هي لحظات يا ناس لحظات مو اكثر لكيت نفسي فاتح باب السيارة قبلهم وطفرت منها بسرعة مثل خفة الفهد وركضت بأتجاه مهيمن مستغل ضخامة وبطىء حركة ابو ذياب وابو جراس وصلت لسيارة مهيمن وهو هم لكيته جاي يهم بالنزول شافني وهد علية باوعت لابو ذياب نزل وبيده سلاحه بسرعة ركضت خلف السيارة جانت غايتي اخلي السيارة حاجز بين مهيمن وبينهم ميكدرون يرمونه ومهيمن ركض وراي يريد يلزمني اتوقفت والتفتت عليه وصحت بصوت يلهث .. مهيمن اشرد ما لحكت اكمل الكلمة كانت ايد مهيمن اسرع من لساني زنگني من ياخة القميص بدون مقدمات وانطاني كلة براسي ولطشني على باب السيارة وصاح بية .. جلااااااااااال العار وين تروح مني كلتلك وراك وراك لو تروح للموت تلكاني كدامك. نهضت بسرعة بكل خفة وصرت كدامه وحجيت بجزع خايف عليه. .. ولك مهيمن شجابك ما تكلي روح اشرد لا تبقى هنا راح يقتلو....... رجع انطاني لطمة على حلگي . . اكل تبن ياعااار ولك حالف ما ارجع الا ارجعك وياي سحل للبصرة جنا انا ومهيمن واكفين تحديداً خلف السيارة. بالجانب الثاني للسيارة انتهت عليهم جايين بأتجاهنا ذبيت روحي بالكاع حتى مهيمن يضطر يدنك علية ما اريدهم يتمكنون منه صرت اراوغ لاخر نقطة دهاء دنك علية وجرني من ياخة القميص يسحلني يريد يدخلني للسيارة هنا وجان اشوف ابو جراس وابو ذياب صاروا فوك روسنا يا الله دخيلك حرت شلون اضم اخوي عنهم مهيمن جان ملتهي بية وما منتبه عليهم لكيت روحي من شفتهم بسرعة لويت ايد مهيمن ووكعته بالكاع على وجهه واعتليت ظهره جنت كلش ممنون بهاي اللحظة لتدريب المعسكر لويت ذراعه خلف ظهره. جان يتلاوه ويقاوم جوة ايدي ويغلط بنفس الوقت ابو ذياب اقترب وانطاه دفرة على وجهه صار الدم يجري من حلكه وخشمه احس اندليت مكاني گلبي بهاي اللحظة بالذات عرفت شعور الي ينازع بروحه هذا انا حالي ابو جراس صاح .. جلال بعد عنه خليني ارمي هذا الكلب صحت بيهم اثنينهم. وانا بعدني ضاغط راس مهيمن عالكاع ما انطيه مجال يتحرك. او يحجي كلت بسرعة .. لا لا لا اوكفوا. شباب لحد يقتله هذا خلوه عليه دواه عندي. هو لاحكني الي ابو ذياب ضيق عيونه وباوع علية بحذر .. شنو انت تعرفه لهذا الكلب جان مهيمن بعده يقاوم ويتلاوة جوة ايدي ويغلط ويسب جاوبت ابو ذياب بصوت عالي حتى الفت انتباهم واغطي على صوت مهيمن المكتوم الي كان غير مفهوم .. هذا بيني وبينه ثار وجاي وراي يريد يصفيه ابوذياب .. ما تگولي شنو هذا الثار الي يخليه يجي وراك يطاردك جاوبته .. هذا العار قبل كم يوم طلبت منه ايد اخته ورفض يزوجها الي لان ما يشوفني كفو لاخته وانا انتقاماً منه سرقت منه مبلغ ضخم يكسر الظهر متشوفه اجة وراية يلهث مثل الكلب صاح مهيمن من جواي وهو يتلاوة .. ولك عار لاتجيب سيرة اختي على السانك لوتبقى اخر رجال بالعالم ما ازوجها الك ابو سراج انطاه دفرة بخاصرته وكال.. اسكت قندرة يشرفك ويشرف عشيرتك ابو ذياب .. لعد ابتعد عنه خلي افرغ السلاح براسه كالها وهو يهم لتنفيذ كلامه صحت بي استوقفه .. لالالا لحظة لاترمي هذا اريده افوخ گلبي بي قبل لا اموته رفعت راسي وباوعت لابو ذياب وكلتله .. انتو مو عندكم جواري وعبيد هناك مكافئة للمجاهدين جاوبني .. اي صحيح .. لعد انا اريد اخذ هذا وياي واسويه جوة ايدي عبد اريد اشوفه الذل شلون يصير ابو سراج ابتسم بمرح وكال.. يجرالك جلولي شكلنا راح نتونس هواي بي لسانه حاد وصاحب كبرياء راح اكون بقمة السعادة وانا اشوف كرامته شلون تمسح بيها الگاع اتقدموا ابو ذياب وابو سراج دنگوا على مهيمن وجتفوه مهيمن صاح بغضب يرعد وهو يحجي على ابو ذياب وكال .. ولك ابن الزانية لو عندك ذرة رجولة هسة اكتلني الموت اهون علية الف مرة من ابقى عايش جوة ايد هذا الخنيث لان اذا بقيتوني عايش اوعدكم بأول فرصة تسمحلي اقتللكم هذا الجرو. مالتكم جلال ثعبان ابو سراج انطاه ضربة وكله .. اسكت لك قشمر غصباً ما على خشمك تبقى جوة ايده مثل الكلب وهسة اقتنعت اكثر بقرار جلولي ناخذك عبد عنده دار وجهه علية وكمل كلامه وكال .. انت اذا هيج رايد اخته كوللنا هسة الك سبية. جوة رجليك هو يحجي ومهيمن كام يگمز احس بي فرت روحه مثل الطير المذبوح. صار يغلط ويسب وانطوه ضربة على معدته رفع راسه وباوع علية وصاح مثل الاسد المنكوب .. لااااا جلاااااااااااااال الا عرضي اياني وياك تفكر مجرد تفكير تحاول تقترب منهم. ماخلوه يكمل كلامه انطوه ضربة على راسه بكعب المسدس ووكع مغمي عليه احس بگلبي من گد الخوف ضخ طن دم جليت صوتي وسألتهم .. انتوا صدك ناوين تنفذون تهديدكم بسالفة اخته باوعلي ابو سراج وكال .. لا بوية كان هذا تهديد حتى اذل بيه هذا العار احنا ما عدنا صلاحية بهاي مناطق لان مو من ضمن نطاقنا بس اذا رايدها نجيبها الك نخطفها اتنفست براحة ومسحت وجهي بكفوف ايدية وانا اباوع لمهيمن شلون يقيدونه بالحبل وكمموا حلكه اباوع لوجهه المدمي جاوبتهم لا خليها تولي بعد ما اريدها مادام اخوها صار عبد عني ما اتشرف انا بيها بعدها شالوه لمهيمن وحطوه يصندوك السيارة .. يااااا الله دخيلك هسة هذا شلون راح اخلصه منهم اخوي اتورط بسببي وين جانتلي هاي المصيبة مشت السيارة بينا ومثلما اتفقنا ماكو اي سيطرة وكفتنا للتفتيش بعدها بمسافة اتوقفنا بمحطة تعبئة الوقود حتى نفول بانزين استأذنت منهم. حتى اروح للحمامات الموجودة هناك وهم بقوا ما تركوا السيارة. حاولت بكل طريقة انتظرهم يغفلون عن السيارة حتى بسرعة اشرده بس ما بيها مجال انتبهت لرجال شايب عنده نقال قديم طلبت منه النقال بحجة نقالي خلص شحن وامي مدخليها للعمليات نقالي مراقب ما اكدر استخدمه شكلي كسرت خاطرة لان فعلاً كانت معالم القلق مبينة على وجهي ما تترك مجال للشك كنت خايف على مهيمن رسلت رسالة لابو طبرة كان مضمونها اخوي مهيمن يمي لزموا داعش كان ملاحقني وضفت شفرة كانت علامة تدل على ظهور عراقيل بالخطة مسحت الرسالة ورجعت التلفون للرجال ورحت اكمل طريق قدري اني واخوية ريم نزلت علينا النوايب نزلة وحدة مثل غيمة سودة وخيمت على الدار التمت علينا الناس والوجوه كانت مليانة خوف وفزع وام مهيمن ساءت حالتها الصحية وارتفع ضغطها وخشمها بس ينزف دم وگوة دخلوها للبيت وحور تبجي وكاعدة لوحدها منزوية ومنهارة ما تقبل تحجي وية احد اما نور فكانت واكفة جامدة بمكانها وعيونها تعاين على الناس بنظرات فزع وحيرة مثل طفلة ضيعت اهلها بنص الطريق وزحمة الناس اني واكفة جامدة بمكاني اباوع على وضعهم ونسيت نفسي كنت حابسة انفاسي وانا اعاين بالوجوه. ما اريد اصدگ الي سمعته خوال مهيمن خبصوا الدنيا وعناد واهله اجوي للبيت نسوان الجوارين اجوي يسألون وحدة من الجارات دخلت وهي تولول وتصيح يبوووووي على حظج يزهرة وكابلت ام مهيمن وصاروا يبجون سوية بعدها سالتها .. خية كليلي صدك هذا الحجي الي سمعته اجاني ابني يركض كالي يمة لحكي بيت مهيمن ملتمة عليهم الوادم خية انا سمعت هيج وانا رجلية بادت اريد اندل عباتي ماكو فهمني شوكت صار هذا الشي كله ام مهيمن كانت كاعدة بالكاع متربعة وتلطم على رجليها حجت وهي تبجي .. خية ياعلم الاسود يمة وليدي منين اجيبنك ياربي ردته منك ما ردت لا جاه ولا مال ردت الي يابعد هلي تجية للحمل اذا مال ردته نظر للعين وفرحة الدنية وا مال ليش خذيته ياربي من بين ايدية .. خية مو زين عليه هذا الفال كولي يا الله جانت النسوا ونسوان اخوان ام مهيمن كاعدات داير مدايرها يواسنها دارت جارتها على مرت حسن خالهم وسألتها .. خية منو جابلكم الخبر وشلون عرفتوا وجاوبتها وكالت .. خية قبل ساعة اجة واحد اسمه عناد يصير صاحب مهيمن اجة يصيح مفزوع واجة حسن وحمويني كلهم يركضون عالصوت شافهم وكللهم .. لحكوني مهيمن راح من ايدي جانت زوجة خالهم تحجي وانا كلبي ينتفض وية كل كلمة غمضت عيوني وانا اتذكر وجه عناد المخطوف لونه شلون يحجي لخوال مهيمن عن الموقف الي صار وياه هو ومهيمن وخواله كل شوية واحد يسأل شلون وليش وشوكت عناد يكمل كلامه .. جنت وياه على الخط باللحظة الي عرض طريقهم ووكف سيارتهم جنت اصيح عليه واترجاه ينتظرني بس هو حتى ما سمعني وتركني عالخط. وسمعت باب السيارة انفتح وصار صياح واصوات رياجيل غير صوت جلال وبعدها كل شي ما سمعت لان الخط انكطع يمي جنت مستمر اسوق بكل سرعتي على طريق السريع منا علما وصلت بحدود الربع ساعة. لكيت سيارة مهيمن واكفة ومفتوحة. وواكفة يمها سيارتين. نوع اوباما نزلت اركض وهم التفتوا علية يباوعون علية بحذر وفضول نزلت مثل المخبل اباوع بداخل السيارة واصيح مهيمن وين ولكم احجوا مهيمن وين واحد منهم سألني وكال .. مهيمن منو. .. مهيمن صاحبي ابو السيارة يصير دخيلكم ما شفتوه ً واحد منهم جاوبني وكال .. خوية احنا نشتغل سواق خط بغداد- بصرة ولكينا هاي السيارة ابوابها مفتوحة وهذا النقال واكع بالكاع واجة گلبي يوكف من كال هيج بس واحد جان واكف بالجانب الثاني من السيارة وصاحلي .. خوية تعال شوف الظاهر عضيدك متعرض للتسليب رحت لمكان الولد وجان اشوف اثار دم بالكاع وعلى باب السيارة كملت مرت خالهم لجارتهم .. خية وهسة شبابنا وزلمنا كلهم طلعوا نفير عام يدورون على مهيمن وهذا صاحبه اتصل على كل الدوريات والسيطرات الي بالطريق حتى يوكفون السيارة ومنتظرين الجارة .. زين ومهيمن عايش لو بعدكم ما تعرفون عنه ام مهيمن صاحت بصوت مفزوع .. يمة اسم الله على اسمك يمة وليدي بية ولا بيك استفزني سؤال جارتهم ورحت يم خالة زهرة وعطت بالمرية .. خالة رجاءاً احتفظي بأسئلتج لبعدين لان كلش مو وكتها ما جاي تشوفين امه شلون مفرفحة رحت صحت لحور حتى تجيب دوا الضغط بس ام مهيمن رفضت وكالت من اكون اشرب سم ولكم تردوني اشرب دواي وابني ما اعرف وين صفى بي الدهر مدري عايش مدري ميت ونزلت بالبجي المفزوع والخوف من المصير المنتظر ابنها اول مرة بحياتي اخاف على حياة شخص حتى عمو مؤيد كنت عارفة مرض السرطان خطير بحيث من مات كانت النتيجة المتوقعة ما خفت عليه بكد خوفي على مهيمن بهاي اللحظة صارت اعز امنياتي بهاي اللحظة رجوع مهيمن سالم لبيته كنت كل شوية اروح اوكف ورة باب الشارع حتى اسمعهم بلكي اسمع خبر عن مهيمن رغم الي عرفته عن جلال عقلي وگلبي رافضين يصدگون ان جلال ممكن يمشي بهذا الطريق ومستحيل يأذي مهيمن اكيد اكو سوء فهم بالموضوع سمعت صوت عناد كان يحجي بالنقال بغضب اسمعه بكول .. يعني معقولة ولا سيطرة لحد الان كدرت تلزم سيارة بهيج مواصفات يعني شنو وين اخفتوا طاروا خو ما طاروا والله هاي شغلة توكف العقل سكت يستمع للطرف الثاني وبعدها جاوبه .. اي هو اسمه جلال مؤيد ورسلتلك صورته ليش لحد الان ماكو كان يحجي بعصبية واولاد خوال مهيمن كانوا واكفين يم الباب سمعت هذا الحقير سجاد يكول .. تتذكر عمي من كلت لمهيمن عن سوالف اخوه خو شفته بعينك بوكتها مهيمن زعل واتعارك وياي بس ربك ظهر الحق وانفضح اخوه الاعوج وسوالفه العوجة وعمت على اخوه. والله حتى ما استبعد حتى يقتل اخوه نتر بيه عناد وكله.. رجاءاً لاتكعد تصرح من يمك وتحجي بشي انت ما تعرفه. احنا لحد هسة ما عدنا اي خبر او معلومات تدين جلال جان عناد بحالة عدم تصديق الي كاعد يصير بجلال ومهيمن واحد من خوال مهيمن جاوبه وكله .. بوية ما يحتاجلها علم ومعرفة مهيمن راح ورة اخوه حتى يرده وبعدها اختفى شنو معناها الي افتهمته من خلال الكلام ان خوال مهيمن والناس الي داير مادايرنا حملوا جلال المسؤولية واتهموه بخطف مهيمن طبعاً نصهم يكولون قتل اخوه والنص الاخر يكولون خطفه عناد جاوبهم .. مستحيل ماكو هيج شي لان لو مهيمن ميت جان تركوه بنفس مكانه شعندهم ياخذونه وياهم بس على الاكيد مهيمن متصوب واخذوه وياهم مصيبة مهيمن وجلال دخلتنا كلنا بداخل دوامة عميقة سحبتنا كلنا بداخلها بقينا على هالحال يومين لا ليلنا ليل ولا نهارنا نهار ولحد الان ماكو اي خبر عن مهيمن ولا عن جلال واني وحور ما دوامنا بهاي اليومين يوم ثاني عمو ابو سيف اتصل علية حتى يأكد علية بموعد قدومه للبصرة حتى ياخذني مثلما اتفقت وياه وكلي .. انا اتصلت على عمتج اسيا وقدمتلها العرض الي كلتي عليه اجريلها راتب بالمقابل تسافرين هناك للخارج وتكملين دراستج وتجي تكعد يمج بالشقة الي راح اتأجرينها طبعاً على حسابج اني جاوبته وكلتله .. عمو اجل موضوع السفر ما راح اسافر سألني .. ليش عمو شنو الموضوع تصالحتوا .. لا عمو ما تصالحنا بس مهيمن اختفى وصارت مشاكل وما اكدر اعوفهم ادير وجهي واروح واترك خاله زهرة والبنات بوكت الشدة .. الله يبارك بيج هو الاصيل يبين معدنه بساعة الشدة وصرت احجي لعمو ابو سيف عن الصار .. والله يا عمو ريم فاجئتيني وصدمتيني شعجب جلال جان شاب طيب وخلوق ولا مبين عليه ممكن ينضم لداعش ولو هي المشكلة هم الدواعش متبعين سياسة ومنهج الاغراءات الي يقدموها للشباب حتى يضمنون ولائهم واتباع افكارهم الهمجية .. ما اعرف عمو اني محتارة وخايفة على اولاد عمو مؤيد .. لا تخافين عمو انا راح اتصل بمعارف عمج مؤيد. اكو كم واحد منهم عنده علاقة بالحكومة اكيد راح يكدرون يقدمون مساعدتهم .. والله ياريت عمو الكل جاي يسعى مر اليوم والي بعده نفس ماهو عليه الحال نور وحور وامه غركوا بحزنهم واني وحور ما داومنا لكن الي لفت انتباهي منظر حور ورعبها وصارت تحوم مثل الطير المذبوح لفت انتباهي كلمات صدرت منها بلحظة الفزع كالت مهيمن ما يموت جلال مستحيل يسمح يصير شي على اخوه وبعدها حور التزمت الصمت والتضرع لله بالدعاء اما نور وما ادراك ما نور فهاي حالتها حالة. رجعت انطوت على نفسها التزمت بحالة الصمت المرعب. وبهاي اليومين اخذت على عاتقي مسؤلية خالة زهرة وعلاجها وحور وخوفها ونور وسكوتها المخيف الي كانت تتحرك مثل الروبورت مالها قرار بس تباوع بعيونها والدموع عاندت وياها مثلما عاندت وياي بس انا كانت الي غاية ان ما اسمح للضعف يتمكن مني لان خالة والبنات بحاجة واحد قوي يطمنهم ويوكف بجانبهم رغم خوفي على اولاد عمو مؤيد بس فضلت اكتم حزني اتصل خالهم حسن وكال لام مهيمن حضروا نفسكم وجهزوا البيت اكو ضباط اجوي يسألون عن بيت مهيمن وجلال ويردون يكعدون وياكم حتى يستفسرون منكم بخصوص شغل اجلال ومهيمن ام مهيمن .. يمة صخام الصخمني صارت بيها ضباط وحكومة رحت يمها وصرت اهديها .. خالة عفية اريدج تاخذين علاجج ترة مهيمن بحاجة دعائج لازم تصيرين قوية انتي عامود البيت اذا تمرضتي ووكعتي معناها البيت كله يتهمدم انتي من راح تاخذين علاجج اتخيلي مهيمن يرتاح براحتج باوعتلي وكالت بقلة حيلة مثل الي يتعلق بأمل حتى لو كان واهن .. جيبي يخالة خليني اخذ علاجي امري لله انيطتها علاجها اندك الباب وراحت ام مهيمن لبست عبايتها وفتحتلهم الباب واني رحت وياها ما اريد اتركها لوحدها وهي بهاي الحالة كنت واكفة وراها باوعتلي وكالت خالة دخلي جوة كلهم زلم جاوبتها بأصرار .. لا خالة لا تحاولين ما اكدر اعوفج لوحدج وانتي بهاي الحالة وضيفي فوك هذا كله الي جايين علمودهم اولاد عمي واريد اعرف شنو الي جاي يصير بيهم ما جاوبتني وعافتني شكلها هي هم ما بيها حيل تحجي دخلوا للاستقبال كانوا خوال مهيمن حسن وواحد ثاني واثنين ضباط ووياهم. سجاد ومؤمل وعناد صديق مهيمن وجلال خطية هذا الولد طول اليومين ما تركنا حتى اهله اجونا امه وخواته يواسون ام مهيمن جنت كاعد واسمعهم يحجون وية خوال مهيمن ويسألون الضابط التفت على ام مهيمن يعرفها عن نفسه وكال .. خالة انا الضابط همام وهذا زميلي الضابط دحام جاوبتهم .. هلة بيكم خالة عناد كان مضيق عينه عليهم وسأل الضابط وكله .. انا شايفكم وملتقي بيكم بس ذاكرتي ما جاي تسعفني ما اعرف وين شايفكم يتبع ريم انت مو صابر وهذا منو وياك انتو شلون تسمحون لنفسكم تدخلون للبيت وتكعدون ومابي رجال اتمنى لكم قراءة ممتعه اختكم نهى الحسون #روووعه | ||||
|
| |
|
26-09-19, 08:42 AM
| #56 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل_ج٢ #البارت_خمسة_وعشرين #الكاتبة_نهى_الحسون ريم انتبهت لعناد كان مضيق عينه عليهم وسأل الضابط وكله .. انا شايفكم وملتقي بيكم بس ذاكرتي ما جاي تسعفني ما اعرف وين شايفكم الضابط الي كان اسمه همام جاوبه وهو يباوع عليه بنظرة تحدي وكال .. اذا كنت صاحب مشاكل ورجلك ماخذة على مراكز الشرطة فأكيد تشوفنا كان الضابط يحجي وعناد اتسعت عيونه على غفلة وجاوبه من باب الاحترام للضابط وكله .. لا مو بالمركز شايفك هسة على كلٍ عوفك مني ما اريد اعطلك اكيد انت جاي بمهمة بعدها عناد التزم السكوت ونظرات المعرفة كانت باينة على وجهه الضابط كله .. يخلق من الشبه اربعين وانت الظاهر شفت اثنين من هذولي الاربعين انهى كلامه والتفت على ام مهيمن وكللها .. خالة وصلتنا معلومات تفيد ان ابنج مهيمن عايش وصحته زينة واحنا جاي نسوي كل الي يطلع بيدنا حتى نوصله خالة زهرة جاوبته بلهفة وامل وكالت .. يايمة الله يبشرك بالخير ويطمنك ربي الحمدلله والشكر على رحمتك الواسعة هم يحجون وانا دموعي نزلت تطالبني بالافراج عنها بعدما كانت معاندة وياي خوال مهيمن واولادهم كعدوا يسألونهم عن مكان مهيمن وشكد المدة الي ينتظروها وشلون عرفتوا بمهيمن ومنو جابلكم المعلومات كانت اسئلتهم متلاحقة وكان الضباط يردون عليها بكل بساطة وكانت اجوبتهم منطقية ومقنعة لكن عناد باغتهم بسؤال .. وجلال ؟؟؟؟ اشو محد منكم كال عنه شي ليش هو مو مثل مهيمن الخطر ملاحقه وابنهم حاله حال مهيمن وهم خايفيين عليه اشو ماجبتوا طاريه الضابط غمض عيونه بصبر وكله .. بالحقيقة. احنا جايين علمود موضوع جلال مخصوص هي هاي اهم نقطة بالموضوع سجاد سأله .. شبي البلاء الاسود بالله رحمة على والديكم ما تكولولنا شنو سالفته هالجلال هو جان يحجي على جلال وانا گلبي يفور عليه جاوبته وانا مقهورة .. احترم نفسك واحجي عدل ترة جلال مو يمك ما اسمحلك تحجي على ابن عمي وهو غايب بيك خير انتظرهم يجون واحجي بحضورهم هذا الكلام وجه بوجه سجاد .. هاي شعندها داخلة يم الزلم جاوبته بغيض .. هاي عندها اسم انا اسمي ريم بنت عم مهيمن وجلال خاف ما تعرف وانت كاعد ببيتهم لا تنسى و حتى بغيابهم بيتهم اله حرمة ومن تحجي وياي احجي بأدب يا ابن الاصول ما اتوقع ديوانكم علمك هيج تحجي وية بنية عناد ابتسم بتشفي وسجاد فتح حلكه وخالهم حسن لزمه وكله .. كافي وبلا مرادد وحشمني واحترم وجودي البنية حقها واحترم المكان الي انت كاعد بي والضباط منا عندهم واجب لا تكعد تحجي حجي زايد احنا ما ناقصين سجاد كام يباوع علية ويخزرني عباله يخوفني هو ما يدري هو حتى ما يخوف حتى جلبي. عمى حتى عمة وعناد حث الضابط وكله اتفضل كمل كلامك سيدي الضابط كمل كلامه وكال .. موضوع جلال هو الي جابنا لعندكم احنا من خلال البلاغ والمعلومات الي وصلتنا كدرنا نعرف ونتأكد ان جلال الملقب بجلال قربان متعاون وية داعش يعني صار مطلوب للعدالة سجاد سأله وهو يباوع علية بتشفي ويتشمت كله .. يعني قصدك جلال صار ارهابي الضابط باوعله بطرف عينه .. كلمة ارهابي تطلق على شخص ارتكب اكثر من عملية اجرامية مثل خطف رهائن تهديد او قتل متعمد لمجموعة ناس وغيرها من الامور المرتبطة بالعمليات الارهابية. اما جلال احنا لحد هسة عندنا سجله خالي من الجرائم والشي الوحيد الي يدينه. عمله وية داعش وهالشي نطلق عليه عمالة ضد للوطن ام مهيمن كامت تلطم وكالت.. يمة الولد ماعنده هاي السوالف الي ذكرتها جاوبها اخوها وكللها .. هو شعم عليج غير هاي طيبة گلبج طلعتي ملفية ارهابي لبيتج وما تدرين جاوبته ما اكدر اتحمل احد يحجي على ابن عمي .. شنو عمو انت ما سمعت الضابط شنو كال قبل شوية جاي يكلك مو ارهابي لو انتوا عاجبكم تلطشون اللقب على جلال خالهم حسن التفت لابو سجاد وكله .. عيب ياخوي ما يجوز هذا الكلام من غير ما نتأكد هذا جلال يبقى وليدنا وعاش بيناتنا واكل وشرب يم كل واحد بينا. خلي الضابط يكمل كلامه وفهم الموضوع التفت الضابط على ام مهيمن وسألها .. احنا نريد نسألج عن كم معلومة بخصوص جلال باوع علية وابتسم بود وكال وطبعاً هذا السؤال موجه الج وهم نريد تحضر اخته. ونسألها يمكن يكون عندها معلومات تفيدنا استأذنت منهم حتى اروح اصيح لنور ولو هي ما راح تفيدهم بشي لان ما تكدر تحجي طلعت لكيت حور واكفة ورة الباب تستمع باوعت علية ونظرت امل موجودة بعيونها وسألتني .. اكول ريم. شنو اسم الضابط ما سمعته زين جاوبتها وكلت.. اسمه همام جاوبتني وزادت عندها نظرت التفائل وكالت .. الف الحمدلله ربي هاي بادرة خير عقدت حواجبي ما فهمت عليها بس ما سألتها لان مو وكتها لازم اروح اجيب نور رحت عليها وجانت كاعدة على نفس مكانها وصافنة وسكتة متحجي حجيت وياها .. نور حبيبتي لازم تجين وياي تدخلين للاستقبال الضابط يريد يستفسر منج بخصوص جلال يريد يتحقق من كم شغلة باوعت علية بدون حتى ما تحجي رحت جبت شالها وحطيته على راسها وعدلته وكومتها وهي كل شي ما حجت. ما تكدر حتى تقرر كامت وياي اخذتها للاستقبال وكلتلها نور الضابط كال مهيمن بخير والحمد لله حسيت بكف ايدها ضغط على ايدي وهاي كانت ردة فعلها الوحيدة على كلامي يا ربي شوكت تطلع من حالتها دخلنا للاستقبال وهي ما حجت شي كانوا منتظرين منها تسلم اباوع لعيون عناد تباوع عليها من جوة لجوة. كان ضايج من الضابط الي ابتسم لنور ونهض من مكانه وكلها انت اخت جلال جاوبته انا بدالها.. اي هي اخت جلال الصغيرة. واسمها نور الضابط يباوع عليها وجاوبني .. عاشت الاسامي اتفضلي اختي كعدي رحت اخذتها وكعدنا يم ام مهيمن وصار الضابط يسأل بنور ويسألني ويسأل ام مهيمن والاسئلة كانت روتينية مثل وين يروح وويامن يطلع شنو شغله اوقات رجوعه للبيت وغيرها من الاسئلة الي تفيدهم وويامن يلتقي وباوع على البقية كان السؤال موجه للكل نور ماجاوبته والضابط حجة وياها حتى يطمنها .. اختي لاتخافين احنا بس نريد نسألج على كم شغلة بلكي تفيدنا حتى نكدر نوصل لمهيمن وجلال ام مهيمن جاوبته.. ياخالة البنية مصدومة من يوم الي اختفوا بي اخوانها وهي على هذا الحال ما تحجي من خوفها كملت على كلامها.. نور اذا تخاف تلتزم الصمت وتبقى بالايام متحجي جنت احجي والضابط باوعلها بنظرات عطف وهذا عناد ورث مثل الجيكارة عيونه على الضابط عبالك يريد ياكله والضابط لطش كل شوية يسأل ويباوع لنور عاد عناد طكت روحه وكله .. سيدي مو كلولك البنية ما تكدر تحجي لاتكعد تحرجه كل شوية تسألها اخذ كلاص الماي وجاوب عناد .. انا سؤالي كان موجه للكل مو بس للاخت كان سؤال الضابط عن جلال وية منو يطلع احياناً عناد جاوبه .. جلال بالايام الاخيرة جان مرافق واحد زايعته الدنيا اسمه ابو طبرة. الضابط شرگ بالماي وكام يكح عناد كمل كلامه وكال .. اذا تحب ادليك على مكانه الضابط همام جاوبه وكله .. تمام اذا كانت عندك معلومات بخصوص هذا الي اسمه ابو طبرة تفيدنا افضل تجي ويانا للمركز حتى ناخذ ايفادتك وبعدما كمل الضابط تحقيقه واخذ المعلومات نهض من مكانه وسلم على ام مهيمن وصار يطمنها وبعدها طلعوا والخوال وعناد طلعوا وراهم اسمع الضابط كال لعناد تكدر تتفضل تجي ويانا ناخذ من وقتك جاوبه اي ميخالف اجي وياكم دخلنا جوة البيت وسمعنا صوت نقال نور يدك رحت شفت نقالها لكيت خالتها تتصل عليها اهوووو هاي هم لحت بالاتصالات رديت عليها سألتني .. ادري شنو السالفة ليش كلما اتصل على نور انتي تطلعيلي ترة ما صارت اريد احجي وية نور جاوبتها .. نور طالعة وية ام مهيمن للسوك .. من ترجع سأليها على الحوالة اشو ماكو صارلها يومين جاوبتها .. ان شاء الله اكللها .. ومن ترحع خليها تتصل علية ضروري ..ماشي سديته من دون ما انطيها مجال بعد تكمل كلامها جلال وصلنا للموصل صارلنا ثلاث ايام اول يوم وصلنا بي جنت حاط گلبي بشيشة من خوفي على مهيمن لا ياخذونه بعيد عني وصلنا للمعسكر او لمركز تجمعهم جان قريب على النهر واشجار كثيفة هذا الي كدرت اجمعه من معلومات عن المكان الي وصلناله هذا يختلف عن مكانهم القديم الي كنت اشتغل بي وياهم انا وسلوان صرت اراقب واتمعن بكل تفاصل المكان وصلنا وصادف جان الوكت ليل ظلمة وبس اضوية المعسكر مالية المكان هو نفسه المعسكر الي كانوا يحجون عنه الضابط علي وهمام يسمونه المعسكر المجهول. تسميته اجتي من جهلهم بدواخل ومكونات هذا المعسكر ماكو ما بي اي ثغرة تخليهم يتوغلون للداخل ويبدون بفحص جميع المنافذ الي توصللهم منه للسلاح والمؤونة دخلت السيارة لداخل المعسكر اول ما اتوقفت السيارة استقبلنا واحد لابس اسود وعمامته سودة عرفوني عليه وانا سلمت عليه ،وهو سلم بكل لهفة. وامتنان دخلنا للداخل لمكتب الامير هي جانت عبارة عن غرفة ما بيها شباك لاحظت قلت النوافذ بهذا المكان الغرفة كانت مأثثة بأثاث عادي بيها انواع الاسلحة معلكة عالحايط عبالك متحف كعدنا يمه وبدأ ابو ذياب يحجيلهم عن الي صار ويانا بالطريق وكللهم عن طلبي ان يكون مهيمن عبد عندي والامير ابتسم وكال .. يتدلل جلال اعتبره صار تحت طوعك واذا كنت تريد نحقنه بأبرة تخليه يفقد السيطرة على حركته وتضعفه حتى تكدر تسيطر عليه جاوبته بخوف بس اني ابتسم بوجهه ابتسامة عريضة .. لا لا ما يحتاج انا اريده وهو بكامل قوته استمتع اكثر وانا اراقب فقدانه لاخر ذرة من قوته وكبرياءه بعدها طلعنا من يم الامير وبعدها اخذني للورشة كال هاي الورشة الي تشتغل بيها انتبهت عليهم دخلوا مهيمن للداخل جايبينه وهم معصبين عيونه و مقيدنه واخذوه كدام عيوني احس گلبي راح وياه كوة لزمت نفسي ما اروح وراهم خايف يأذونه لزمته من ايده وكلتله .. وين ماخذين عبدي الامير حكملي بي يعني لازم تبقي يمي وين مااكون هو باوع علية وعلى مهيمن الي يتلاوة بغضب وية الي مقيديه بس ميكدر يكول كلمة لان حلكه مربوط الحمدلله جان فضحنا .. ما نكدر نجازف ونبقيه يمك خاف يفتح قيوده هذا ثور هايج ودمه حامي والاشخاص الي مثل حالته يستمدون قوتهم من غضبهم ما نحزر حركته خاف ينفذ تهديده وصدك يموتك واحنا ما صدكنا نجيبك هنا شوف شلون يتلاوة وية الشباب اذا كان على القيد فانا بنفسي راح اتأكد من تحكيم اسره اريده كدامي هذا طلبي طلبته من الامير وهو وافق عليه شنو هذا العبد مدلل اني هنا وهو بغير مكان غير يبقى يمي يخدمني واذله اذا تريد ارجع اسال الامير اتاكد من طلبي هو سمع كلمة الامير راسا تراجع اخير شي وافقوا يخلونه بالورشة الي راح ابدي شغلي بيها تصير بنهاية المقر التفتت على ابو جراس .. اكولك اكد عليهم ما يسون شي هذا حصتي اريده صاغ سليم واني الي اهينه واعذبه بيدي .. لاتخاف عليه هذا جلده خشن يتحمل وداعتك هذا عنده مدة صلاحية ما تنتهي .. هو الزين حتى ياخذ وكت طويل مو راسا يموت بيدي ربطه بزاوية الورشة وطلعنا بعد ما اطمنت محد يسويله شي دخلني لغرفتي جانت بسيطة حتى هاي ما بيها شباك شنو سالفتهم وية الشبابيك يعني ماكو اي متنفس اشوف منه المكان ملينا ريحة عثة ورطوبة ابو جراس .. شوية ارتاح وبعد ساعة اجيبلك صينية العشا حتى تاكل وترتاح وان شاء الله باجر نباشر بالشغل تركني وراح كعدت بالكاع مهدود حيلي محتار شلون اخلص مهيمن واطلعه منا غمضت عيوني ورجعت راسي وسندته للخلف وانا افكر بكل الي صار بيني وبين مهيمن كنت مجبور لازم اخذه وياي ماجان كدامي خيار حتى احافظ على حياته كان لازم اخذه او يقتلونه لان عرفت هاي نيتهم من نزلوا وسلاحهم بيدهم لان اعترض طريقهم اعرف ماراح يتركونه لان مايحبون يتركون وراهم اثر يدل عليهم هم القتل يمشي بدمهم اسهل منه ماكو عدهم جنت خايف عليه ما جان بيدي غير بس اخذه وياي على الاقل اضمن هو عايش جريت حسرة مهموم. اااااه شجابك وراية مهيمن يوم ثاني كعدت من نومي ورحت راسا عالورشة حتى ما انتظرت احد ياخذني لهناك رحت عليه لكيتهم لاعبين بخلقته وجهه عبارة عن لوحة ازرق واحمر كان بعده مقيد نايم بالگاع تعبان رحت اقتربت منه اريد اجس نبضه منظره. اخذ عقلي دنكت عليه فتح عيونه بالكوة وحجة بصوت واهن .. جلال ليش جذبت عليهم وكلتلهم اخذت مني فلوس وهذا الشي ما صار ابتعدت عنه بسرعة ما جاوبته وصرت اعاين بالورشة خاف يطلع المكان مراقب وفعلا كان شكي بمحله لكيتهم ناصبين كاميرات مراقبة بزوايا الورشة بقيت جامد بمكاني بعدها رحت طلعت من الورشة ما اريد ابقى لان مهيمن راح يبقى يحجي بس بكلبي عهد انطيته لنفسي ان شاء الله احقق الهدف الي جاي علموده اخذ بثار كل العراقيين الي قتلوهم هذولة الانجاس اخذ بثار مدينتي الموصل الي هدموها وهدموا تاريخها وحضارتها اخذ بثار بيت خالي وصديقي سلوان وانضاف على القائمة اخوية مهيمن هسه من شفت وضعه وشلون ضاربي بدون رحمة ريم مر اسبوع على اختفاء مهيمن وجلال وماكو اي اخبار عنهم لحد الان والحال على ما هو عليه اقرباء ام مهيمن مالين البيت ناس تروح وناس تجي حتى اصدقاء مهيمن اجوي يتطمنون بين فترة وفترة اما عناد فبعدما راح وية الضابط للمركز يوم ثاني اجانا عناد للبيت ونظرة الاصرار والتفاؤل بعيونه وحجة وية ام مهيمن وكللها اريد مفاتيح المحل مال مهيمن والسجلات .. محل مهيمن ما يعزل راح يبقى يستمر بالشغل وانا وطالب ابن خاله حسن راح نمشي الامور لحد ما يرجعلنا بالسلامة طالب كان هذا واحد من اولاد خاله حسن حباب مهيمن مشغله وياه محاسب عالقوائم عناد اخذ على عاتقه كل يوم يجي ويجيب السجلات والقوائم ويطلب من ام مهيمن تشوفهم ويكون دائماً محمل بالمسواك ام مهيمن جاوبته.. يا خالة ليش تكلف نفسك الله يرزقك ويفتحها بوجهك جاوبها.. خالة انا ما مسوي شي هذا كله من حلال ابنج يعني حقكم وجاي تصرفون منه وعفية خالة مو تنسين تخلين وحدة من البنات تراجع القوائم والسجلات خاف اكو اخطاء او خلل بالسجلات فايتني .. خالة ان شاء الله ماكو فرق والحلال واحد .. ميخالف هذا حق الله مابي شي تتطمنون على حلالكم اتعودنا على عناد يجيبلنا كل يوم مصرف للبيت ومسواك بين فترة وفترة حتى اخو ام مهيمن حسن اجاها وكللها .. ليش خوية احنا مو موجودين يمج ليش تتقبلين تاخذين من الغريب وترفضين منا العطية جاوبته وكالت.. انا ما ماخذة من احد وحتى عناد بيوم وافقت اقبل اخذ منه كنت اعرف مسواكنا ومصرفنا مصدره من حلال ابني انت تعرف كلش زين المحل والمعمل شراكة وية بيت الحجي ابو حيدر و كثر الله خيره الرجال ما نسى اهل صاحبه وقرر يتعامل وية الوضع مثل ما مهيمن موجودوما رضى الشغل يتوقف ومن عندها اتعودنا عناد ورة ما يعزل المحل يجي ينطي السجلات والمصرف يم ام مهيمن وبذيج الايام هواي عانينا من ورة كلام الناس بدى ينتشر وصارت قصة جلال ومهيمن على كل السان والاشاعة انتشرت ان جلال ارهابي وطبعاً ما يحتاج نعرف من ورة هذا الكلام وام مهيمن عتبت على اخوها ابو سجاد كلتله خوية الحجاية طلعت من ابنك اعتب عليك شلون ترضاها تشهر بأبن اختك جاوبها وكال .. وانتي شبيج خايفة عليه وكاتلة روحج هذا مايصيرلج شي جاوبته وكالت .. الي جاي تحجون عنه يصير اخو ابني يعني احنا مثل تفال السما كل حجاية مردها علينا جانت ام مهيمن بهاي الايام مثال الام الصابرة صحيح صحتها ما تعينها بس بقت صامدة وتحاول تأدي واجبها بتجاه بيتها وحياتهم حتى اخوها حسن ما رضى على ابو سجاد وابنه وذاك الثاني زعل وطلع من البيت يكوللها خلي الارهابي يفيدج كضيتي طول عمرج تفضلين الغرب على اهلج جان يقصد بزواجها من ابو مهيمن ورفضها لاخو زوجته بعد ما تركها عمو مؤيد وبعدها تزوجت ابو حور هم واحد من منطقتهم بس مو قريبهم هاي طبعاً سالفة سمعتها كالتها ام مهيمن لمرت اخوها حسن وصادف اني كنت موجودة لكن الشي الوحيد الي رجع لوضعه الطبيعي اني وحور رجعنا للدوام بالكلية من ثالث يوم رجعنا لدوامنا من بعد ما وكفت معترضة كدام حور .. حور كافي لشوكت تبقين كاعدة تندبين حظج ومنطوية على روحج تتوقعين اذا بقيتي على هالحال مهيمن راح يرجع او تنحل الامور لازم ترجعين للدوام كان ردها بس الدموع .. مو بيدي غصب عني گلبي صاير مثل النار على اخوي وگلبي شايل هم بحمل الجبال ما اكدر ابوح بي هاي ثاني مرة حور تحجي بكلام ما مفهوم باوعت عليها وكلتلها.. حور فكري بمهيمن هو ما تعب كل هذا العمر كله ووصلتي لكلية طب حتى تهدمين كل الي بناه بلحظة ضعف وام مهيمن حجت وياها حتى تقنعها ومن بعدها رجعنا للدوام اما نور فهاي المسكينة بعدها عايشة بعالم ثاني لاتحجي ولاتشارك بأي شي عيونها تتحرك فقط من تسمع بأسم مهيمن او جلال خايفة عليها سألت صديقتي ابوها دكتور اعصاب كالت بابا يكول لازم يعرضونها على دكتور اعصاب بنت عمج تعاني من حالة نفسية اخذت على عاتقي بأول فرصة اخذها للدكتور لان حالتها صار ما ينسكت عليها خلص الدوام وطلعت لكيت السايق ينتظرني اتجهت عليه حتى اصعد بالسيارة. اجاني طالب ويانا بالقسم وسألني .. ريم اريد احجي وياج بموضوع مهم باوعت لساعتي هسة حور راح تطلع جاوبته .. اي نعم تفضل بس ياريت تستعجل لان بنت عمي تنتظرني كال .. ما راح اخذ من وقتج بس حبيت انبهج ترة اكو بعض الطلبة جاي يحجون بسالفة اولاد عمج على الاساس يشتغلون وية داعش ومن هالحجي فانتبهي منهم واذا تردين اروح وياج لعمادة الكلية حتى انطيهم الاسماء ما عندي مانع طبعاً انا بلغتج بالكلام الي سمعته لان انا مريت بنفس موقفج بس ابوي انسجن صارت تطلع الشائعات والكلام ما انزل الله به من سلطان هو يحجي وانا النار صارت تاكل بگلبي جاوبته .. ممكن تكلي منو هم جاوبني .. ادري كلش زين من انطيج الاسماء راح ترحين تتهجمين عليهم وينگلب الحق ضدج فخلي العمادة هم الي يشوفون شغلهم وياهم وانتي بنية وهذولي آفات. كل شي اتوقع منهم اتشكرت من الولد واتواعدت وياه باجر نروح اني وياه ونبلغ عنهم بعدها رحت صعدت بالسيارة وصرت اباوع بالوجوه ما اعرف صرت اشوف كل اثنين واكفين ديحجون عبالك يحجون علينا بالطريق اني وحور شافتني وكالت شبيج معصبة ما بية شي بس اعتب عالقدر الي خلة اليسوى والمايسوى يستشرف براسنا اااااخ تدرين شنو اتمنى ؟؟؟ اتمنى مهيمن وجلال يرجعون والله متحلفة بكل واحد حجة علينا واتهمنا اريد ادليهم على بيت واحد واحد بيهم واخليهم يحطون اصابعهم بعيونهم جنت احجي بقلة حيلة بس لازال الامل يتربع بگلبي ولازلت اقاتل مستحيل ارضخ مهيمن وجلال راح يرجعون واشتكيلهم على كل واحد اتجرأ. يحجي ويتبلى عليهم بس خلي يصبرولي وصلنا للبيت ونزلت من السيارة وجان اشوف سيارة واكفة يم باب بيت مهيمن وباب البيت مفتوح مريت من يمها ودخلت البيت شفت واحد كاعد بالهول ويمة جنطة عقدت حواجبي مستغربة. هذا الرجال شايفته رحت اقتربت من السيارة وسألته بأستنكار .. انت مو صابر رجل خالة نور ؟؟؟ وهذا منو وياك نترت بي بغضب .. انتو شلون تسمحون لنفسكم تدخلون للبيت وتكعدون ومابي رجال جاوبني وهو يطلع من البيت وشال بيده الجنطة وراح عالسيارة واني اباوع وراه وفتح صندوك السيارة يريد يحطها بيها عقلي كعد يحلل بسرعة هذولي شعندهم هنا جايين ودك جرس عندي ان هاي الجنطة الي طلعت من البيت تخص نور شهكت بخوف ادركت شنو غايتهم من ورة جيتهم هاي واتربعت كل شياطين العالم براسي درت وجهي على حور الي جانت واكفة تباوع بحذر عليهم .. حور بسرعة روحي لبيت خالج حسن خلي يجي لهنا كليلة اخت مهيمن يردون ياخذونها بالگوة .. بس خاف ما موجود بالبيت .. روحي صيحي لاي واحد حتى لو هذا سجاد العار هم ميخالف اهم شي يشوفون رجال ويرتدون حور سلمتني جنطتها وسجلاتها وراحت تركض وصابر جاوبني .. انت هي على شنو رحتي حشمتي الناس ترة احنا اهلها شنو قابل خاطفينها .. انا ما عندي حجي وياك. انا كلامي وية خالتها تركته ودخلت للبيت اركض سمعت ام مهيمن بالغرفة يم نور لازمة راسها وهي تتحسب وتصيح ولك يمة مهيمن وينك تعال شوف يردون ياخذون اختك من بيتك وهي مالها لاحول ولا قوة سمعت كلام ام مهيمن وزاد جناني فتحت باب الغرفة على وسعه ولكيت خالة نور جاي تلبسها شالها وجبتها عطت بيها بصوت عالي وكلت .. انت هي على وين تردين تاخذينها باوعت علية سناء وجاوبتني .. اريد اخذ بنت اختي تعيش وياي .. انتي بكل عقلج اخليج تاخذيها وتطلعين الا على جثتي جاوبتني .. وانتي منو اصلاً وين جان هذا حرصج على بنت عمج من صارلها اسبوع مريضة وكاعدة ميتة من الخوف فاقدة الكلام من ورة الضيم الي عايشة بي بس حقها تنخرس البنية اذا طلع عندها اخو ارهابي والثاني ميت عطت بيها .. انتي منين جبتي هذا الحجي جاوبتني .. صابر رجلي اجة للبصرة بعدما عجزنا نوصل لنور علمود الحوالة. ومن اجة لهنا سمع بسالفة اخوانها ورجعلي وكال لحكي بنت اختج طلعت عايشة وية ارهابيين وانتي ما تدرين جانت تحجي وياي وكملت تلبيس الشال لنور رحت هديت عليها وسحبت من بين ايدها نور الي جانت ترجف مثل السعفة وايديها قالب ثلج حطيتها وراي وصرت ادفع بخالتها لحد ما طلعتها بالطارمة هي تدفع واني ادفع جان خوف نور مصدر قوتي كانت لازمة قميصي من الظهر وانا گلبي يحوم ويترقب جية اي واحد يفزعلنا من بيت خوال مهيمن المشكلة هذا الوقت كلهم بالشغل حجيت بتهديد وتوعد .. شوفي لج انتي اخر من يحجي على الحرص لانخليني احجي سوالف زوجج .. احترمي نفسج وديري بالج تجيبين سيرة زوجي على لسانج رجلي محترم وهو الي ربى نور من جانت صغيرة ..بالله ما تكرمينا بسكوتج ترة سالفة نور وانقطاعها عن الكلام كان سببه تحرشات زوجج بيها شهكت ولطمت على صدرها .. لا تسوين روحج متفاجئة دخل صابر للبيت وهو يصيح .. لا تظلين تمسلتين بالحجي وتحجين بكلام اكبر من راسج بالقران لو رجال جان عرفت شلون الطمه على حلكه واكسر سنونه واخليه يتوب يحجي ويباوع بوجهي اتخصرت كدامه وكلت .. لا انا مو رجال انا بنية بس الساني يعادل عشر زلم يالله هسة تاخذ مرتك وتراوينة عرض اكتافك وترجع منين ما اجيت ترة راح يجون خوال مهيمن ويراونك النجوم بعز الظهر خالتها غافلتني ودارت من وراي سحبت نور من ايديها اتخبلت اجة عقلي حرت شلون اتعامل وياهم وكعت عيني على عصى الماسحة رحت عليها وانطيتها دفعة اتعثرت للخلف وجريت نور وحطيتها وراي مرة ثانية ورفعت الماسحة وصحت .. شوفوا انتي وياه اذا هسة ما اتحركتوا وطلعتوا منا بالقران اتصل على الشرطة واقدم بيكم بلاغ مالكم حق تاخذون نور وياكم انتوا مو بكيفكم نور جبيرة وهي الي تقرر سناء جاوبتني وكالت .. حبيبتي هاي هي كدامج مكالت شي ولا اعترضت من بدلتلها وجمعت غراضها كانت متقبلة الموضوع جاوبتها.. نور متكدر تحجي ولو تحجي جان شفتيها تفضل الموت ولا ترضى تروح ترجع وياج يم صابر وهسة انتي اذا تردين تاخذيها فلازم تنتظريها ترجع تحجي وتوافق بنفسها كدام الشرطة يالله يسمحولج جنت احجي والماسحة بيدي وهي وصابر واكفين بالطارمة وباب الشارع مفتوح حور دخلت وكالت .. ريم رحت لبيوت خوالي محد موجود واتصلوا عليهم وهسة هم بالطريق راح يجون .حسيت بالضعف والخوف مهما يكونون رجال اثنين وخالتها الافة واكفين كدامي واني وحدي وصابر كال ..يلة سناء ترة طولتيها جري بنت اختج دنروح سعدون مستعجل واني سمعت اسم سعدون زاد جنوني رفعت العصاية كاتاهم الي يتقرب والله اكسره بيها بهاي الاثناء الي جنت اتمنى من رب العالمين واحد من خوال مهيمن يوصل ندك الباب وجان اسمع صوت عناد الي دخل مستغرب لان الباب مفتوح هيج .. خالة خو ما صايرشي عليكم شنو هالعياط يتبع احداث البارت القادم دخلت عالورشة وجان الكة مهيمن كوة ياخذ انفاسه لاااااا ياالله دخيلك هذا منو الي مسوي بي هشكل رحت اقتربت عليه بكل برود وانا كوة لازم روحي ما اركض عليه واتطمن عليه. حركته برجلي اريد اشوفه رفع راسه بالگوة وگال بصوت مكسور .. جلال احلفك بالدم الي بينا تخليهم يقتلوني . | ||||
|
| |
|
26-09-19, 08:45 AM
| #57 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل_ج٢ #البارت_ستة_وعشرين #الكاتبة_نهى_الحسون نور كنت واكفة لاحول ولا قوة مقيدة بأغلال الخوف محبوسة بداخلي مثل اسيرة مسلوبة الارادة اريد احجي اريد اصرخ اريد اعترض اريد ادافع عن نفسي لكن احس انا مو ملك نفسي خوفي على اخواني استجواب الضابط وكلامه عن جلال ومهيمن كل هاي الاحداث اني اشوف بعيني واصرخ بداخلي واتوسللهم ان يكفون الاذية عني وعن اخوتي اريد اعترض ،ارفض ،اصيح ... روحوا طلعوا من بيتنا اخواني ما بيهم شي جلال بريء ومهيمن على قيد الحياة وراح يرجعون وينورون البيت انا هذا حالي وريم كانت يمي اغلب الاحيان ما تركتني ام مهيمن اشوفها تعبانة مريضة تمنيت اداريها اشيل وياها الحمل حور بعيونها بير اسرار اتمنى اكعد وياها واحاجيها تفتحلي كلبها عندي هواي اشياء اتمنى اسويها لكن شلون اريد اتحرر من قيودي واسري. بس لساني ثكيل مااكدر احركه واكول الي اريده اما اليوم فتحقق اسوء كابوس بحياتي وهذا اليوم الي جنت خايفة منه يختفون اخواني وتجي خالتي وصابر ياخذوني ام مهيمن حجت وحاولت وية خالتي حتى تمعنها وما تاخذني وياها ونسافر لبغداد بس خالتي مو لوحدها جاية وهذا مو بس كلامها هذا كلام صابر الخبيث والزاد الغراگان غطة بالماي حضور سعدون احس بنفسي زهگت من الدنيا وبلاويها وتركتني جسد بلا روح بين ايديهم صرت احاول استجدي كل ذرة قوة حتى لو بسيطة عندي حتى اقاومهم لان بداخلي بعد اكو شي يدفعني للمقاومة والرفض بس المشكلة ماكو اي ردة فعل من نفسي حالي مثل حال واحد يطلب القوة من واحد مشلول يكوله كوم اوكف على حيلك فجاءة وكان اشوف ريم صارت بالنسبة الي مثل حبل النجاة قوة شخصيتها ولسانها الي كان مهيمن في يوم من الايام يحسبه وقاحة صار بالنسبة الي سر الحياة ودرع يحميني اباوع عليها شلون صارت ترادد وتحجي وتهدد بخالتي وزوجها صابر القذر بديت اتشجع وصرت احاول استجمع قوتي المتبقية. من سمعت ريم تحجي عن الشرطة وتقديم بلاغ وعدم سماحهم لخالتي تاخذني الا بموافقتي شفت خالتي انخبصت ورجلها راد يتعامل بالقوة لان حس الموضوع طلع من ايده بسبب كلام ريم لكن دخول حور وكلامها عن عدم وجود خوالها وجيتهم بالطريق لان اتصلوا عليهم نظرة ريم اتغيرت للخوف رغم هي لا زالت تدعي بالقوى كدامهم صوت عناد ودخوله خلة ريم تحجي بأصرار وعلت صوتها عناد دك الباب ودخل للبيت بالطارمة وهو مستغرب ليش باب الشارع مفتوح وسأل وهو يباوع لأم مهيمن .. خالة خو ما صايرشي عليكم شنو هالعياط وام مهيمن جاوبته بصوت تعبان وكالت .. خالة عناد بالقران لو اخوها مهيمن هنا جان فناهم فني لرجل خالتها وصاحبه بس هم كالوها بمكان السبع تتمرغل الواوية شافونا مالنا والي وكاموا علينا ريم كالت .. عناد اجيت والله جابك اشرت على صابر وكملت كلامها .. عفية بالله متجي تحجيلنا وية هذا الي اتعدى على حرمة البيت وتفهمه بطريقتك الخاصة وتگله نور تبقى هنا ومتروح وياكم تخاف منكم عقد حواجبه وراحت عيونه علية وسأل ريم .. ليش شبيها نور وشنو قصة خالتها وية سؤال عناد وصلوا خوال مهيمن .. جاية تريد تاخذ بنت اختها علمود فلوسها لاحباً بيها ولا اهتمام الموضوع وما بي الفلوس هي الي جابت خالتها . لهنا فمن شافوا وضع نور وخوفها. فگاموا استغلوا حالة نور الصامتة ويردون ياخذونها يالكوة خالة زهرة شافت اخوها حسن واولاده وراحت عليه وحجتلهم الموضوع واولاده هدوا على صابر رادوا يتعاركون وياه وعناد لزمهم وكللهم عوفوه ما يسوى تسون عركة وياه هسة هو يصير حباب ويرجع منين ما اجة الخال حسن حجة وية اولاده .. بوية مو هيج الحجي خلوني انا اتفاهم وية الزلمة باوع لصابر وكله .. بختك بأخت مهيمن والا جان صار الحجي غير شكل لان سوايتك ما ينسكت عليها صابر جاوبه.. شنو هذا الحجي ترة احنا اهلها واولى بيها منكم واضنك كلش زين تعرف كلامي صحيح وخالتها اولى بيها من اي واحد بيكم ريم حجت .. اذا جان الموضوع على القرابة فأني بنت عمها اولى بيها من خالتها لان خالتها متزوجتك وانت رجال غريب ميصير تكعد وهي شابة وياك ببيت واحد وهذا بيت اخوها وضيف فوك هذا كله نور كبيرة مسؤولة نفسها ومحد يكدر يقرر عنها انت بصفتك منو جاي تقرر وتكول احنا اهلها صابر كللها.. يعني شنو قصدج انا غريب ونور مو بنتنا وما نكدر ناخذها ويانا الا نطلب اذنج عناد جاوبه .. يعني ياحباب البنية واضح قصدها تكولك انت غريب ومالك اي سلطة على نور وتكولك اعلى ما بخيلك ركبه وشتريد تسوي سوي حسن خالهم كال لصابر.. وهاي انت سمعت بأذنك بنت عمها شنو كالت اذا ميعجبك ترة الشرطة بيناتنا وهسة بلا مشاكل اخذ مرتك واتوكل على الله وارجع منين ما اجيت انا اسمعهم شنو يحجون واباوع بحيث احس بكل واحد بيهم من يحجي عبالك ديكسر بطوق الاسر ويريد يحررني سمعت خالتي نترت وكالت .. انا ماخذة وعد من اخوها الجبير كالي اذا تشوفين محد من اخوانها عايش وياها بالبيت تكدرين بذاك الوكت الج حق تاخذينها وانا ما سويت شي خارج عن الاتفاق فعلا البيت محد بي من اخوانها باوعت لأم مهيمن وكالت .. وهاي ام مهيمن وسألوها خالهم حسن التفت على اخته وسألها .. يابة صدك هالحجي صار ومهيمن منطيها كلمة لو جذب ام مهيمن جاوبته .. هو صيحيح انطاها كلمة بس هذا طبعاً بعد اذن نور يعني بكيفها هي الي تقرر اذا جانت تريد ترجع وياهم الله وياها محد يكدر يجبرها تبقى بس اذا هي عاجبها تبقى هنا ببيت اخوها فهلا بيها واذا الكاع ما شالتها نحطها على روسنا هاي اخت الغالي وانا ادري بوليدي سودة علية. ما يرضاها تروح بعيد عنه خالتي كالت .. شفت خوية يعني احنا ما سوينا شي غلط هاي احنا اجينا وردنا ناخذ بتنا وهي هم موافقة مكالت شي هي لحظة اعتراض وخوف وانصدمت بأانفجار المشاعر وهجومها علية لدرجة ردت اسيطر على اي ردة فعل بيهم مكدرت لكيت نفسي اصرخ بصوت منتفضة. وانا ارجف كلي كلمة لاااا كانت مترأسة قائمة الكلام .. لااااااااااااااااااا مستحيل اروح وياج ريم التفتت علية تباوعلي بفرح وترجع تباوع لصابر بتشفي والكل صار ينظرلي ما اهتميت .. لا لهنا وكافي ما اسمحلكم تحطموني وتستغلون ضعفي خالة صار لازم تعرفين انا مو لوحدي. ربيتيني انعم الله عليج بس. انا دفعت ضريبة تربيتكم الي ومنتكم علية لحد هذا يومي انا ادفع من روحي ومن مالي بعد ما اسكت واسمح لصابر يأذيني مستحيل اخليكم تزوجوني لسعدون انتوا متكدرون تهددوني الكل هنا موجود يردعكم عني نور المسكينه الي وحدها بالحياة وتصير خرسة من ظلمكم ماتت اني هسه عندي اهل الكلام الي حجيته استفنزف كل طاقتي كنت احجي وجسمي كله يرجف ورجلية كوة شايلتني ريم كالت .. لا نور انتي ما تحتاجينا حتى نردعهم عنج انتي فقط تحتاجين نفسج وتكدرين تصيحين بعالي صوتج وتكوليلهم مااريد اعرفكم وترفضينهم كلامج لوحده يكفي يبعدهم عنج عيوني دمعت ورجلية بادت و كعدت بالگاع وريم اجتي علية حضنتني وكالت صيري قوية نور اني محتاجتج ماريدج تروحين مثل جلال ومهيمن جاوبتها وعيوني بعيونها ودموعي تحضن دموعها .. مااروح اني لكيت الامان الي ادوره عمري كله مستحيل اضعف واتركه ............................................. نور من بعداد جيت عدكم انشد امان.... الحماية مدبنة سلام وجالغي وامان امان ... امان كلمة من اللغة العراقية القديمة تقال بالمواوايل خوان كون دوم نعيش ب امان ...... السلام نجتمع ولا نطيح يوم بهبية ريم يتيمة انا بس عشت باحضان عم تمنيت بيوم يجمعنا بيت ال عم بس الشر حاوطنا زاد علينا وعم يفاركونا واحنا نحب نظل سوية هدى سعد .................................................. ......... اباوع لصابر كام يكمز وخالتي كامت تعد وتصف علية حسن كاللهم .. وهاي كدامكم خو سمعتوا بأذنكم البنية كالت ما تريد تروح وياكم بعد اي حجة ما عندكم تحجون بيها وماكو سبب لوجودكم ريم اباوع لخال مهيمن واولادهم شلون حاديين سنونهم على صابر وكفتهم كحل عيوننا وفرحتي بنور كبيرة كدرت تطلع من حالتها وتنطق بلحظة خوف دفعتها للكلام مثلما فقدت القدرة على الكلام بلحظة خوف صار علتها هي نفسها سبب قوتها ام مهيمن دخلتهم جوة وبقت تحجي وية صابر وخالتها قبل لا يطلعون تكوللهم .. كطع الارحام موحلوة بحقكم ونور طيبة وبقوا يحجون كلمة منها وكلمة من خالتها الي بدلت كلامها وصارت انعم من السمسم من شافت البساط انسحب من جواها وصابر صار وجهه احمر يريد ينفجر انتبهت للولد عناد وطالب بعدهم واكفين بالشارع رحت بسرعة عليهم وكلتلهم .. عفية خلي هذا سعدون ينزل جنطة نور من سيارته صعدوها بالصندوك عناد باوع للسيارة وسألني .. هو هذا سعدون الي جانت نور تحجي عنه جاوبته .. اي هو هذا لان سمعت صابر يكله سعدون انتظرنا جايين هزيت ايدي وانا اتذكر كلام نور وكلت.. عشتوا ونوب يريد يزوجها لسعدون عناد .. هذا يتزوج نورعشم ابليس بالجنة.. مو يلوك لأبو حلك يتزوجها هو شايف نفسه بالمرايا لو يكلوله عليه شكد واثق من روحه عناد جان يحجي وهو يمشي بتجاه سيارة سعدون وطالب يضحك على كلامه ويمشي وراه طبطب على بنيد السيارة وكله .. انت ياحلو انزل افتح الصندوك نريد ننزل الجنطة سعدون نزل من السيارة وبيده السويج باوع لعناد وكله.. وانت شكو جاي تطالب بالجنطة منو انت عم ولد خال بنية. عناد كله .. انا لا هذا ولا ذاك انا واحد مثلك بايع روحي ادور على الطلايب دوارة واشتري المشاكل بفلوس سعدون حجة من طرف خشمه وكله اوكف انتظر خلي اتأكد بالاول طلع نقاله واتصل على صابر الي جان كاعد جوة بالبيت .. شنو اشو هذا يكلي نزل الجنطة لعد ونور ما راح تجي ويانا ؟؟ اباوع لعناد هد عليه ودفعه من صدره واخذ السويج من ايده وراح يفتح الصندوك وكله .. خايب ما تاكل تبن انت وذاك مال شنو تروح ياكم شنو هي قابل تايهتلكم لو ماكو زلم تردعكم وتحطلكم حد سعدون متفاجيء راح وراه وكله .. جيب السويج احسنلك وخليني محترمك عناد فتح الصندگ وطلع الجنطة وسلمها لطالب كله .. هاك اخذ الجنطة وديها لبت عمها طالب اخذ الجنطة من عناد ومشى وسعدون كعد يتجاوز بالحجي على عناد اشو هذا عناد زنگ سعدون من ياخة قميصه. ودفعه وحطه بصندوگ السيارة وغلقه عليه وذاك ظل يرافس ويصيح ويغلط انا جنت اضحك بأنتصار عبالك واحد صب ماي بارد على گلبي اخذت الجنطة وطلعت خالة نور وزوجها وصابر كام يباوع منا ومنا يدور على سعدون وكللهم .. شنو وين راح سعدون عناد انطاه مفتاح السيارة وكله .. ضميناه الك بالصندوگ كلنا ينتظرك هناك علما تطلع خطية باقي بالشمس جنه خروف صابر نطت عيونه واخذ السويج من عناد وركض يفتح الصندگ وخالة نور بقت مصفصفة وكالت قبل لا تروح .. هاي سويتكم مال عصابات وهمج طالب جاوبها وكال.. ديربالج خاله على ابو بيتج من العصابات احنا ناس الشر متربع براسنا واذا طكت براسنا نسويها طشار واني جاوبتها بأنتصار على فكرة العصابة راح تكطع عليج المي والكهرباء اني من ضمن العصابة راح ابدل رقم تلفون نور حتى لتحاولين تخابريها وتبقين تتوسلين وهي تدزلج فلوس راحت خالة نور وصابر وهم خاليين اليدين وتالي من بعد الكلام الي دار بين ام مهيمن ونور وخالتها فلسوا من راتب نور وعطفها عليهم لان بسوايتهم هاي دفعوا نور لنقطة اللا عودة جلال مرت علينا ثمانية اسابيع وانا اشتغل بالورشة ومهيمن كدامي انطيه الاكل اشمره اله بالكاع حتى ياكل كنت اتعامل كدام الكامرة. بطريقة حقيرة وية مهيمن. وحتى مرات انطيه كم رفسه ببطنه لكن كنت اتعمد ما اظرب غير بس جانبه الي ملامس للارض ثلثين الضربة تجي للكاع حاولت بشتى الطرق ان اموه كدام الكاميرة بحيث حتى مهيمن حس علية ان انا ما ناوي ااذيه ماكان يكدر يسألني او يحجي لان انا حرصت على ان احط لاصق على حلگه حتى امنعه من الكلام وياي كنت اشتغل بالورشة وخلصت تقريباً اريع سيارات تم تحوير محركاتهم وزرع الجهاز بيهم. وبهاي الاسابيع الي فاتت كنت اتنقل بالمعسكر وادرس كل منافذهم واشمشم اخبار واتطقس كدرت خلال الشهرين الي فاتت اجمع كمية معلومات واحفظ مخطط المعسكر كدرت اكتشف اهم منفذ لداعش هذا المنفذ يصير قريب على الحدود الجنوبية الغربية عن طريقه توصللهم الامدادات من اسلحة ومواد غذائية وسيارات حربية. يجهزوهم بالعتاد رسمت مخطط المعسكر بصورة دقيقة بالورقة السرية مكتوب بيها شفرات سرية كان بيها احداثيات جميع نقاط منافذهم واكدت بالذات عالمنفذ الحدودي الي عن طريقه يتم كلشي يعني اذا جماعتنا كدروا يسطرون على هذا المنفذ معناها راح يخسّرون داعش خمسين بالمية من مصدر قوتهم وهالشي مو هين ولا سهل كنت اطلع من المعسكر بين فترة وفترة واترك مهيمن بالورشة بدأ يسترجع صحته وانا جنت اتعمد اصب عليه زيت سيارات اسود وسخ حتى تضيع عليهم سالفة اثار التعذيب والي يشوفه راح يعتقد اني متفنن بالتعذيب جنت اصب الزيت عليه بطريقة حقيرة كدامهم مثل الشيطان بحيث ما اخلي اي مجال كدامهم للرحمة بگلبي جانت المهمة ماشية تٌـٌـمـام بالملم الا شغلة وحدة شاغلة بالي شلون اهرب اخوي منا صار لازم احسم امري وية مهيمن لان خايف لا توصللهم معلومات عن مهيمن يصير اخوي واذا عرفوا بهذا الشي معناها اقرة على مهيمن الفاتحة نفضت راسي وانا اتوسل بگلبي لله ربي لاتفجعني بأخوي ربي يسر ولا تعسر ومثل كل مرة اروح خارج المعسكر اشرف على شغل محركات السيارات بالساحة الخارجية وطبعاً كل سيارة تكمل يقوى مركزي عندهم مرات اسمع بعض الجنود المرتزقة يلقبوني بالطاووس المدلل عند الامير لان يعتبروني عنصر مهم بالنسبة الهم رجعت للمعسكر وتقريباً كدرت بهاي الشهرين انهي ثلثين المهمة كنت امشي بداخل المعسكر وانا اراجع بعقلي اهم النقاط الي كتبتها بالورقة ومثلما اتعودت اول ما ارجع اروح امر على مهيمن واتطمن عليه دخلت على الورشة وجان الكة مهيمن كوة ياخذ انفاسه والدم على الگاع شاهد على تعذيبه لاااااا ياالله دخيلك هذا منو الي مسوي بي هشكل رحت اقتربت عليه بكل برود وانا كوة لازم روحي ما اركض واتطمن عليه. حركته برجلي اريد اشوفه لگيتهم شايلين اللاصق من على حلگه رفع راسه بالگوة وگلي بصوت مكسور .. جلال احلفك بالدم الي بينا تخليهم يقتلوني ولك صرت اتمنى الموت غمضت عيوني وضربت الحايط ورحت طلعت من الورشة وانا اصيح بصوت عالي .. ابوسراااااااااج وينك ابو سراااااج اجوي ابو ذياب ووراهم هذا ابو بهاء الداعشي وياهم ابو سراج اجاني يمشي هو وكرشه حجيت .. منو هيج معذب العبد مالتي ليش ارجع من خارج المعسكر اريد احتفل بنصري الكة العبد منعول ابو طاهره زين انا بشنو افوخ گلبي واحتفل ترة هاي ثاني مرة جاي تتجاوزون علية والله اشتكيكم للامير من جبت طاري الامير ابو سراج انخبص وكلي .. لاتكبر الموضوع ترة جنا نتشاقة وياه هذاك هو عندك بعده عايش ما مات .. وشصخم بي وهو شبه عايش بالله وين اللذة من اعذبه وهو فاقد من الوجع ما راح يحس علية جنت احجي والنار تطلع من راسي من القهر اتمنى الزم ابو سراج واشوي لحمه واوكله اياه على السواه بمهيمن ابو ذياب راد يهدي الموقف وكال .. لا تضوج وتهتم نجيبلك واحد ثاني بمكانه .. ما اريد واحد ثاني انتوا تعرفون كلش زين هذا عندي وياه ثار ما ينفع تجيبلي واحد ثاني على العموم انا راح اخذه يمي بالغرفة بعد ما اوثق بأحد ما اريد احد يسلب مني حق تعذيبه وتذليله اني الامير انطانياه عبد ماله اي واحد بيكم الحق بالتصرف وياه غيري جاوبني ابو بهاء .. كل شي ولا تزعل جلولي يجرالك التريده هذا هو هسة اخلي الشباب ينقلونه للغرفة ويجهزوله مكان بالزاوية حتى تسيطر عليه والله وراحوا ونفذوا طلبي مثلما ردت ونقلوا مهيمن لغرفتي وهنا كدرت اخذ انفاسي براحة طلبت اكل الي يودونه لغرفتي ورحت انا والجماعة يم الامير خصوصا السيارتين الي سويت محركاتهم نجحت مهمتهن وفجروا بيها اماكن هدفهم من هذا التفجير مو البشر وانما اخفاء معالم المدينة واثارها بعدما اخذنا التعليمات من الامير دخلت للغرفة وقفلت الباب لكيتهم جايبين صينية الاكل وحاطيه عالميز ولكيت مهيمن مقيد بزاوية الغرفة جانت غرفتي غير مراقبة رحت عليه وركعت يمه بكل لهفة وفكيت قيوده جان ما يشيل لا ايد ولا رجل من كد التعذيب وكع راسه بحضني رفعته وانا احجي وياه وما اعرف بي يسمعني لو لا .. مهيمن اترجاك صير قوي واصبر علية جاي احاول ادورلك على منفذ تهرب منه بس اصبر علية جنت احجي وياه بيأس بعدها غسلتله وانطيته اكل وحاولت بالي اكدر عليه اداويه مر يومين وبهاي اليومين بدأ مهيمن شوية يسترجع من صحته بس بطيء يعني كدر ياكل ويمشي لكن بقيت محافظ على قيوده واللاصق على حلگه مرات يأشرلي بأيده ونظرات عيونه تحجي وياي شكله عنده هواي كلام يريد يكوله الي بس انا ما اكدر اجازف لازم اخذ احتياطاتي خاف تكون غرفتي مراقبة اجهزة سمعية مو شرط مرئية اسوي حساب لكل شي. صار شغلي الشاغل بهاي اليومين تهريب مهيمن بقيت على هالحال اريد اشتري اخوي ياناس دعيت الله ينورني ويعمي عيونهم عني وعن اخوي وهنااااك وجان اسمع اصوات صفارات الانذار بداخل المعسكر صارت ركضة الجنود بفلس طلعت من الورشة واعاين منا ومنا واسأل شنو الصار اباوع الكل داخلين بحالة انذار اباوع على القادة ابو بهاء وابو اعصار الي يكولون عنه ذابح ٣٠ واحد لذلك لقبوه بالامير لزمت ابو ذياب وسألته .. شنو صاير .. صار هجوم كاسح على معسكرنا الي موجود بالناحية الشمالية ولازم نمدهم بالقوات وهسة راح نطلع مجموعة فرق نفير عام ندعم جماعتنا هناك وانت جهز روحك الامير كال خلوا جلال قربان يجي ويانا لان هناك هواي سيارات لاحقها الدمار حتى تنظم وية الكادر نستفاد منك للتصليح جاوبته بلهفة وكلت .. صار من عيوني هسة رايح اجهز روحي واجيب غراضي واجي وياكم جنت اركض بالممر وانتبهت لبعض الجنود المرتزقة ملثمين وجهم ولابسين اسود بأسود. واجسامهم عبارة عن اسلحة طلق متفجرات جنت اركض وعقلي صار يخطط من اول لحظة سمعت بيها كلام ابو ذياب والله اجتي بوكتها والله جابها رحت دخلت للغرفة بالعجل وبدلت ملابسي بملابس سود مشابهة الهم وطلعت لمهيمن هم مثل ملابسي انا بهاي الشهرين صار عندي هواي قطع من ملابسهم المعفنة رحت ركعت على ركبتي يم مهيمن وصحيته رفع راسه وعيونه بيهم تعب وبعده جسمه وصحته ضعيفة يعني ما مسترد عافيته زين اتفاجيء بية من طلعت ورقة من جوة السرير وطويتها وغلفتها بكيس نايلون لزكت الكيس بلاصق بلاستك حتى احافظ عليها ورحت عليه ونزعته قميصه ولفيت على خصره حزام بي جيب وحطيت الورقة بي جسمه كان كله اثار تعذيب ولبسته الملابس السود شلت اللاصق من على حلكه وهو گبل سألني .. جلال بروح خالك تگلي شنو الي جاي يصير شنو جاي تسوي جاوبته لزمت راسه بكفوف ايديه وحطيت عيني بعينه وحجيت بصوت ناصي وكلتله .. اشششششش مهيمن ماعندي وكت احجي وياك كل الي اريده منك توثق بية وتسمع كلامي وتسوي الي اكولگ عليه اترجاك هز راسه بموافقة وكلي بنفس مستوى صوتي .. واثق بيك من غير ما تحجي انا شفت بعيني واتأكدت انت مجبور كاعد وياهم جاوبته بأستعجال وانا اسمع صياح الجنود .. مو وكته هذا الحجي بعدين تفتهم كلشي اتلثمت كدامه وهو سوى مثلي ولثم وجهه وبقت بس عيونه طالعة طلعت قبله وانطيته اشارة ينتظر امهدله الطريق لكيت الممر شبه خالي وكان كم واحد يركض ظهره علينا اشرتله يطلع بسرعة طلع وراي ومشينا بصورة طبيعية لكن عكس اتجاه ركضة الجنود لان الكل كان متجه للبوابة كان الوقت مغرب طلعت ومهيمن وراي وصرنا نهرول مثلهم وگلبي يريد يطلع من صدري بهاي اللحظة خايف لا يحسون علينا استغليت كل نقطة دهاء وفطنة عندي وكدرت اوصل للطرف الثاني من المعسكر يم السياج الي كان محاط بأسلاك شائكة الا زاوية صغيره على كد شخص ضعيف يعبر منها ميخالف مهيمن يدبرها ويطلع روحه منها حتى لو يتأذى وصلنا يم السياج ودرت عليه بسرعة ونزلت اللثام وهو هم نزله .. مهيمن ماعندي وكت اشرح لك شي بس لازم اهربك من هذا المكان تروح گبل على العنوان الموجود بالورقة من توصل على العنوان هناك راح يفهمونك كل شي عن الموضوع سمعنا صوت صياح الجماعة صار قريب علينا باوعتله بسرعة استعجله وشبكت ايدية مع بعض و سويتها قاعدة حتى يصعد عليها مهيمن ويتسلق السياج صارلي يومين ادرس الموقع حتى اهرب اخوي منا لان هاي الجهة الوحيدة امانة صرت اشرح لمهيمن وين يروح وبأي اتجاه يسلك جنت بعدني شابك ايدية ومدنك وكلتله .. يالله مهيمن اصعد بسرعة لايحسون علينا مهيمن بنظرة خوف گال .. جلال شلون اعوفك وانا اعرف بيك انت واگع بخطر ولك جلال گلي شنو جاي يصير جاوبته .. لك مهيمن اصعد بسرعة راح يجون واثنينة نروح بالرجلين خوية ترة الورقة العندك كلش مهمة لازم توصل للعنوان لاتضيع تعبي التعبته ترة بيدك امانة جبيرة جاوبني معترض .. لالا مستحيل اعوفك بروحك مستحيل شجاي تحجي ولك هذولي اذا لزموك ودرو بيك مهربني يذبحوك جاوبته بلهجته البصراوية ببتسامة .. اشو چني اشوف الخوف بعيونك يخوي ولك ياخوي لازم واحد بينا يطلع منا ولاتشيل همي ترة مايكدرون يسوولي شي لان حاجتهم يمي علمود اكمللهم شغلهم بس هَـا قبل لا تروح ما اوصيك باختنا دير بالك عليها وبلغها جلال يسلم عليج يالغالية خليها تدعيلي ودير بالك على روحك ياخوي وارفع راسك بية وافتخر مو انا الي ابيع ارضي لاياخوي انا عندي شرف وغيرة تكفي حتى اجازف بروحي وارخصها لاجل هاي الگاع باوع علية ولمعت عيونه ولاؤل مرة بحياتي اشوف مهيمن توگع دموعه اقترب مني وكال .. ولك اشوچنك صرت تحجي مثل حچينا وقرب راسه متلاصق يم راسي ووجوهنا متقابلة وصارت عيونة بعيوني وايده لفها على رگبتي ودموعه تنزل گلي .. ولك جلال عاين علية ياخوي اريدك توعدني تردلي سالم والله ما اسامحك اذا كسرت ظهري بيك بالك وياك تخلي وجهي فاهي بلياك انهى كلامه واخذني لحضنه وصار وداعنا بالعناق الاخوي شمني بشهكة حسيت بدموعه على رگبتي لاول مرة بحياتي اجرب دفو حضن الاخ حثيته حتى يروح .. يالله مهيمن مو تنسى الورقة العندك هاي امانة ابتعد عني وباسني من گصتي وكال .. مودع بالله يا ابن ابوي ورفعة راس اخوك رجعت شبكت ايدية وصعد على ايدية وحثيته يكمله تسلقه على اكتافي .. ولك يالله ياخوي اصعد على متني والزم السياج راح يوصلون النا حسيت على نظرات مهيمن مثل الي واكع بين اتخاذ اصعب قرار بحياته. اختار القرار وكمل الصعود على اكتافي ولزم طرف السياج وطفره بخفة صحت من ورة السياج .. مهيمن ارگض خوية ولا تلتفت لو مهما يصير اركض وبالك وياك ترجع علمودي مهيمن طفرت السياج ووگعت بساگية طين وماي تحيط بالسور سمعت صوت جلال يستعجلني وصرت اركض بسرعة وبخفة الفهد اركض وغايتي ما كانت الهرب كانت واجب مكلفني بي اخوي لكن هناااااك وجان اسمع صوت طلق قريب اتوقفت بنص الهيمة احس وصلة من گلبي تريد تنشلع على جلال شهگت شهگة خوف والم وحسرة على اخوي ربي امتحان صعب بس هاي المرة ماراح اخذل اخوي وراح اسمع كلامه واوثق بي مثل ما طلب مني وافعاله تجبرني على الثقة بي صوته يرن بأذني ( مهيمن اياني وباك تفكر ترجع الي بيدك امانة كبيرة ) استمريت بالركض هايم على وجهي وكلام جلال صرت اركض واتعثر بالتربان ودموعي عادمة الرؤية عندي اشهك بصوت عالي وصحت بصوت عالي بهتاف لرب العباد ربي احلفنك بخّوت العباس لحسين لا تفجعني باخوي يتبع | ||||
|
| |
|
26-09-19, 08:49 AM
| #58 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل_ج٢ #البارت_سبعة_وعشرين #الكاتبة_نهى_الحسون ريم مرت علينا الايام خوال مهيمن واولادهم ما قصروا ويانا خالة زهرة متعودة على حماية اخوانها ورعايتهم تكول موجديدة عليها ياما وياما احتضنوها وساعدوها ماعدا اخوها ابو سجاد وسجاد الوحيدبن ما وكفوا ويانة وكفة تبيض وجههم عند مهيمن ااااخ يامهيمن الايام جاي تركض وماكو خبر عنه ولا عن جلال وصار گلبي يوم ورة يوم يفقد الامل اباوع لحور صارت جلد على عظم تحت عيونها سواد حياتها عبارة عن دارسة نوم وتفكير والزاد تاكل شي قليل تكعد ويانا على السفرة مجاملة اما نور فهي الوحيدة الي يفرحني حالها حسستني ان الدنيا مادارت ظهرها علينا كليا ،اكو شي زين انطتنا خلال هاي الفترة عودتها لنور لحالتها الطبيعية من بعد الي صار بيها وية خالتها بدت نور بمرور الايام تسترجع قوتها لا واحسها صارت اقوى من قبل اتذكر بيوم عناد اجة سلم السجلات والقوائم لأم مهيمن حتى نراجعها وراح وندقق الحسابات رحت اخذتهم من ايد ام مهيمن وحطيتها على الميز كدام نور صادف بوقتها كانت كاعدة على ميز الطعام باوعت على السجلات ورفعت راسها تباوعلي بأستفسار .. هاي شنو .. هذني سجلات المحل مال مهيمن تخص شغله اكيد خالة ما تعرف شلون تدقق الحسابات وتراجعها واني وحور مثلما تعرفين يادوب نلحك كلية وبيت هسة اشوف اجة دورج حتى توكفين وية اخوانج بشدتهم وتساعديهم وانتي الحمدلله علوم حاسابات يعني انطي الخبزة لخبازها تكدرين تدخلين على اللاب توب مال حور وتسوين قوائم بعد هاي شغلتج ميحتاج اعلمج هزت راسها بتأكيد ..اكيد اوكف وياهم اذا مهيمن بيوم يحتاجني ما راح اقصر وياه ومن هذا اليوم صارت مسؤولية نور مراجعة القوائم بعد ماسوت برنامج على اللاب توب تنزل بي الحسابات اليومية وحتى مرات تلكة اخطاء بالحسابات وتنبه عليها ام مهيمن حتى تبلغ عناد ومرة من المرات اجة عناد وجايب وياه شيك موقع من جلال ومكتوب عليه يتم صرف المبلغ لحامله عناد فهم ام مهيمن وكللها .. خالة لكيت هاي الصك موجود بالجرارة مال مكتب مهيمن الي بالمحل ولكيت مهيمن مدون المبلغ والتاريخ وكاتب يتم صرف المبلغ على تكاليف بناء البيت جاوبته ام مهيمن بصوت واهن تعبان وكالت .. يمة سودة علية وليدي هذا خطه اي هو دومه هيج دقيق ويكتب كل شاردة وواردة كنت واكفة يمها وجاوبت .. اتوقع هذا المبلغ يخص بيت جلال انا سمعت مرة هيج كال قبل لا يسافر كال لازم اصرف مبلغ لمهيمن حتى يكمل بناء البيت وام مهيمن هزت راسها بموافقة تأكد على كلامي عناد كال.. خالة شوفي هذا الوصل بيدج والشيك موقع وجاهز وانتي كعدي وية الاهل وسأليهم واخذي رأيهم بالموضوع تردون تكملون بناء بيت جلال. لو تردون تنتظرونه بعد هاي بقت يمكم ام مهيمن كالت استشير البنات واشوف وصدك كعدت ويانا وبيومها دزت على اخوها حسن ابو مؤمل وحجتله على سالفة الصك والبناء باوع لنور وسألها .. عمي هذا حلال اخوج انتي شنو رأيج تنتظرينه يرجع وهو يكمل لو عندج رأي ثاني نور التفتت علية وسألتني .. ريم شنو نسوي هذا مبلغ ضخم مو قليل جاوبتها وانا اباوع لأم مهيمن وكلت .. بيت جلال لازم يستمر وينبني ما يتوقف مثلما شغل مهيمن استمر بغيابه اذن حتى بيت جلال يستمر للحد الي يسمح بي المبلغ المكتوب بالشيك واتوقع هذا الشي ما راح يأثر على احد لان هاي فلوسه هو شكله جلال جان مسوي حساب لكل شي حتى البناء انهيت كلامي وياهم وكملته بيني وبين نفسي بمكنون گلبي جلال مسوى حساب لكل شي الا شغلة وحدة نسى يسويلها حساب وهي احنا نسى شلون بينا من بعده من نعرف بخبر غيابه الفضيع ابو مؤمل باوع علية وگال .. والله عمي عفية عليج وكفو منج صدك مرة حوك من ظهر رجال مرات النوايب تعلمنا و تعرفنا بمعادن الناس من حولنا ونعرف بساعتها خطأنا بحقهم انا اشهد هاي البنية كفت ووفت من بعد اولاد عمها جنت اباوع عليه واعرف هو حاله حال الباقين يعتبرني بنية رعنة جاوبته .. تسلم عمو بس انا ما سويت هذا كله علمود انتظر كلمة شكر وثناء ترة هذا واجبي أتجاه اولاد عمي بس انا اعرف ليش انت مستغرب مني شلون انا اوكف هيج موقف مشرف ورة اولاد عمي اكيد جنت ماخذ علية نظرة ان اني بنية جاية من بلاد الغرب وموحمل صعاب وشدات بس احب اوضحلك عمو صحيح انا عشت برة وية عمو وتربيت بعز وخير ودلال بس مو معناها اني ما اعرف الاصول والصح من الغلط اكيد لحياتي بالخارج دور وفضل علية خلتني ادافع واحجي واطالب بكل حرية بدون قيود مثلما انتو متعودين على بناتكم يمكن انتو اعتبرتوها رعونية وقلة ادب كنت احجي وية خالهم واني اتذكر كلام مهيمن واتهامه الي بذاك اليوم من طلب مني ما أسمم افكار اخته بأخلاقي الي جبتها وياي من برة غمضت عيوني وانا اجر حسرة هسة هو وينه مهيمن عمي كل شي ما اريد بس خلي يرجلعنا بسلامة هو وجلال مهيمن بقيت اركض واهرول حوالي بالساعتين تقريباً حسيت بالتعب بدأ يتسرب لجسمي جنى علية الليل ساعة اركض وساعة امشي صرت اتعثر ما بين التلال والاشجار اتوقفت يم شجرة اسمع صوت النهر يجري وكعدت بالكاع اخذ انفاسي من التعب احس بجسمي كله مطبر اتكأت على الشجرة اريد شوية ارتاح واكمل. لكن فجاءة سمعت صوت رمي عشوائي نهضت من مكاني مفزوع صرت اشوف خيالات اشخاص يركضون ارتديت للخلف مرعوب يالله انا هسة وين شكلي ضيعت اتجاه الطريق الي وصفه الي جلال. حسيت عليهم بدوا يقتربون ما انطيت اي فرصة للتفكير راسا ذبيت روحي بالنهر وصرت اسبح وية الروج الي جان متجه عكس الاتجاه درب المعسكر الي اجيت منه صرت اسبح والروج ياخذني انقطعت انفاسي من التعب والاجهاد ما اعرف شكد مشى بية الروج بس من حسيت بطىء جريان النهر وتأكدت بقطع مسافة لا بأس بيها بعدتني عن هذولي الي ما اعرفهم منوا اصلاً بس ما دامني بالموصل اذن بالنسبة الي راح يكونون دواعش رحت سبحت صوب الجرف وبديت اطلع من النهر بس احس بحسمي ثكيل بثكل الجبل عبالك صار وزني طن كوة امشي. مشيت شوية مسافة مو بعيدة عن النهر بس صرت بين نباتات وشجر متناثر وهنا وجان اتعثر واوكع بالكاع على وجهي درت اتمددت على ظهري اباوع للسماء الي جانت تلالي بنجومها لان المنطقة الي انا بيها ظلمه هندس غمضت عيوني بتعب والاجهاد اتمكن مني. بحيث مكدرت حتى افتح عيوني او على الاقل افكر بمكاني انا وين ياترى بعدني يم داعش بمنطقة الخطر لو ابتعدت نمت وانا غير مهتم تجيني حية مدري عكرب شنو الله كاتبلي اشوفه بس توكلت على رب العالمين وتحصنت بالحي القيوم ونمت جلال راح مهيمن وسمعت صوت الرمي عدلت اللثام على وجهي وحكمته ورحت اركض بأـجاه الطرف الثاني للبوابة. اسمع الجنود يصيحون يالله استعجلوا يا شباب ترة طلقوا اشارة اعلان الرحيل كان يقصد بالاشارة هو صوت الرمي الي سمعته وصلت لوحدة من السيارات وصعدت وياهم وعلى طول الطريق انا كل فكري وبالي يم مهيمن ما اعرف هسة هو وين ، دبرها لو لا رفعت راسي للسما ادعي الله يمهد طريقه وصلنا للقاعدة الثانية والي جانت هاي نفسها الي دخلناها انا وسلوان لكيتهم مخبوصين وهواي عندهم جرحى وقتلى والهتافات والتكبير مالية الجو. حاشى لله ربي بريء منكم يذكرون اسمه بالتكبير ويرتكبون ابشع الجرائم نزلنا من السيارات وانتشرنا بالموقع واحد من الجنود المرتزقة صحته وكلتله .. اريد سلاح اشو انا الوحيد بدون سلاح على الاقل انطوني اقاتل وياكم. والله وسلمني رشاش اول مرة اشوفها بحياتي اباوع للطلقة مالت الرشاشة تخرس مو طبيعية جنت اعاين بالسلاح واتفحصه. اتذكرت شبابنا بالجيش وتجهيزاتهم شباب الحشد الشعبي الي كان عدهم التجهيز ذاتي بالعتاد يعني كل واحد بيهم اجة وجايب سلاحه من بيته جهاد اكتفائي اقارن سلاحهم وية سلاح شبابنا وشلت همهم ربي شلون بيهم رحت. ركضت بين التلال بنقاط عالية رحت وية الجنود الداعشيين كان الوقت ليل الهجوم جاي من الجيش العراقي الي كان مشكل من شباب الحشد وجنود العراق بالحقيقة الهجوم ماكان يم القاعدة وانما كان في مدينة الموصل حسيتها صارت ساحة حرب كانت هاي اول معركة بين الجيش العراقي وداعش انتبهت لنقطة كلش مهمة عرفت ان الدواعش اكثر شغلهم بالقناصين معتمدين عليهم واغلب انجازاتهم القناصين همة الي يغطوها كانوا زارعيهم بأماكن ما تخطر على بال الجني الازرك اباوع عليهم شلون يحصدون بشبابنا بالقنص وصارت مهمتي استهداف القناصين هي حرب واطلاقات نارية مالية الجو وصايرة لخة ما ينعرف رجلها من حماها قتلت واحد من القناصين. واتسللت وانا ازحف على بطني بالگاع متوجه للثاني والله وجان الكفه يحجي بالعربي الفصحى المكسرة هذا حتى جنسيته مو عربية. من الله ياخذكم. مو على اساس احنا ناقصين بلاء ورايحين يجيبلولي الاجانب. والله ياحيف شبابنا يموتون على ايد هذولي لكيته لازم جهاز لاسلكي ويحجي بالحاكية بصوت غاضب ويلعن ويسب ويهدد ويتوعد .. اننا قادمون انتظروني يا سفلة سوف اقتلكم جميعاً كما قتلتم صديقي الظاهر جماعتنا العراقيين كاتلين صاحبه وماخذين جهازه جاوبه صوت عراقي بالحاكية .. اكل تبن يا ابن الزانية اليوم انا ابن العمارة جايكم متعني وحالف الا اسويكم حطب بالنار وسويكم طشار جنت واكف خلف القناص الاجنبي ورميته بسرعة ما عندي وقت اسمع رغم كنت حاب اسمع تحشيش العراقي على هذا الحقير مرت علينا الساعات ما نعرف ليلنا من نهارنها واحنا على هالحال اني كدرت اقتل قناص بعد وبهيج كانت حصيلتي ثلاثة قناصين هذا الي كدرت عليه لان ابو ذياب قطع علية تواصلي بساحة الحرب شافني واني اريد اصعد تل عليه قناص سمعت صوته صاحني بصوت عالي .. جلاااال وين .. رايح اقضي حاجتي وارجع اقاتل ..ممنوع تواجدك هنا انت لازم تبقى بداخل المعسكر هنا خطر عليك احنا ما نريدك تقاتل انت مهمتك تصنيع وتصليح سيارات جاوبته بكل طاعة .. انا شمعرفني اشو واحد من الجنود اجة وسلمني هذا السلاح رحت نفذت الي كال عليه ابو ذياب بعد مابيها مجال وكعدت بالمعسكر وهناك اخذوني للورشة وهناك بلشت شغلي وية البقية وبأثناء ما كنت اشتغل افحص بالسياريات انتبهت اكو بعض السيارات بيهم علامات قرب الدعامية وبهاي اللحظة كدرت اتوصل لشي ان انا مو الجاسوس الوحيد الي مزروع هنا والظاهر اكو غيري موجود هنا كل واحد بينا جاي بمهمة تختلف عن غيره والادهى من هذا كله محد بينا يعرف عن الثاني شي لكن شاءت الصدف ان ارصد واحد منهم . كان يحط علامات على مجموعة سيارات كانت مركونة راجعة لداعش ويرسل اشارات مشفرة للطرف المقابل بيها معلومات عنها حتى يلزمونها للسيارات سويت نفسي ما منتبه عليه وهو كمل طريقه وطلع وانا رجعت اكمل شغلي على اتم وجه ومر يوم ونص على وصولنا بهذا المعسكر بعدها اجتي الاوامر حتى ارجع للمعسكر القديم الي كنت بي انا طول هاي المدة افكر بمهيمن وين اراضيه ياترى كدر يوصل لو لا رجعنا انا وابو جراس وابو ذياب ابو جراس متصوب برجله وابو ذياب مثل الصل ما بي شي ورجعت ويانا مجموعتين من الفرق من اصل خمسة كان بيهم بعض المصابين واول ما وصلنا للقاعدة. رحت دخلت على غرفتي وبعدها صحت بصوت عاالي حتى الفت انتباه الكل .. هاي شنو وين العبد مالتي وين اخذتوه التفتت على ابو ذياب بغضب وكلت .. لااااااا لهنا ووصل حدي وياكم ترة السالفة بعد ما ينسكت عليها انا رايح للامير اخليه يشوفلكم حل لهاي تدخلاتكم ابو ذياب ابوجارس هم متفاجئين مثلي .. شنو هذا وين اختفى اجى من ورانا جندي وكال .. من البارحة هو محتفي افتهمت من الجماعة ما حسوا على اختفاء مهيمن الا يوم ثاني تٌـٌـمــام هذا الكلام الزين عطت بي وكلت .. احجوا اكيد انتوا قتلتوه حتى تغيضوني واستغليتوا عدم وجودي هنا رحتوا تتصرفون لوحدكم كنت احجي وجايب دور المنفعل ابو جراس كلي.. ترة محد يلاشي العبد مالتك غيري بس انا وانت جاوبته .. ومنو يكول ماكو غيرك اكو هواي وجودي هنا مضايقهم ويزعجهم لاني عنصر مهم الي دور كبير هنا والامير واعدني كدامهم ان يقدم لي مكافأة على شغلي منو يكول ما الغيرة عمتهم قتلوا عبدي حتى ماعندي شي اتسلى بي واضوج كنت اباوع للوجوه واحجي بس صبرولي خلي تهدء الامور وانا حسابي وياكم يم الامير ابو اعصار مهيمن كنت اركض والدنيا ظلمة. شفت جلال لازم عصا وواكف بين الكلاب والافاعي ويضرب هذا ويهجم على ذاك كنت واكف اعاين عليه وانا عاجز كنت اصيح بصوت عالي بس صوتي ما يطلع ولا جلال يسمعه حسيت عليه اقترب مني وصار يندسني بالعصا بصدري كرر هاي الحركة اكثر من مرة لدرجة حسيت بالالم بصدري رفعت ايدي اريد ابعد العصا من مكان صدري لان كانت وخزة العصا بمكان التعذيب سمعته كال .. هذا طلع عايش مو ميت عقدت حواجبي مستغرب هذا مو صوت جلال فتحت عيوني وصار ضوة الشمس بعيني رفعت ايدي حتى اظلل عيوني واشوف انا وين وشسوي هنا لكن فجاء وكان اتذكر هروبي بالليل وجلال ووضعه المجهول كنت بعدني متمدد على ظهري باوعت لكيت رجال جبير بالعمر لازم عصا وكاعد يندسني يريد يتأكد مني عايش لو ميت سألني .. انت هييي احجي من وين لفيت علينا ما جاوبته بقيت ساكت خايف منهم ما اعرفهم هذولي النا لو علينا وية داعش لو ضدهم خايف احجي ويسلموني لداعش دار على الي يمه وكله .. هذا اكيد داعشي قذر متشوفه لابس نفس ملابسهم القذرة هم حجوا هيج وانا ماي بارد نزل على گلبي جاوبتهم بسرعة وكلت .. لا انا مو من داعش انا كنت اسير عندهم وامس هربت من معسكرهم. اتطمن من سمع لهجتي وكال .. انت من اي محافظة جاوبته.. انا من الجنوب من البصرة ابتسم بترحيب وكال.. حي الله اهل الجنوب النشامة اقترب مني شكله مبين عليه فلاح والي يمه هم شاب وجهه ابيض ضعيف بدى يفحصني وكال للفلاح .. يابا هذا مبين متعرض للتعذيب الفلاح كله.. خلي ناخذه ويانا للمرة العجوز ام ايمن هي تداويه و تهربه من الموصل بطريقتها هي دائما تساعد الجنود العراقيين وتهربهم من ايد الدواعش جنت لازلت ما اثق بيهم اجوي اخذوني هو والشاب على بيت قريب صرت اعاين على المكان اباوع كان عبارة عن بستان بي اشجار زيتون يتوسطه بيت صغير بسيط تعبان دخلوني بي وصاحوا على مرة اسمها ام ايمن دخلت واتفاجئت بيها مرة جبيرة بالعمر بس تملك قوة بنية بالعشرين داوتني وضمدت جروحي من غير ما تسألني انت منو وجاي منين يكفي عرفت بية شاب عراقي ابن بلدها واكتفت بجملة وحدة .. الله يعين گلب والدتك شنو حالها اكيد هسة گلبها مثل النار عليك من جابت طاري امي وانا هبت علية موجة حنين مثل طفل واشتاق لريحة حضن امه. ما متعود على فراگها لمعت عيوني بالدمع رغم الي شفته بذيج الايام الفاتت على ايد داعش بس ما نسيتها كانت دومها شاغلة تفكيري هي والبنات والكل كنت طول ذيج الايام افكر بأمي شلون بيهم ومن اجاهم عناد وبلغهم بالصار. وخوالي شسوو وعناد من وصل وما لكاني شسوى بذيج اللحظة ونور وحور الله يعلم شنو حالهم اكيد نور راح تتأذى على فراقنا ومن تعرف الصار وتنتكس صحتها وحور بس لاهملت دراستها وشغلها الحزن والخوف جنت اهرب من تفكيري بس الكة روحي غصب تجرني من التفكير بغيرها وترجعني افكر بيها واجتي صورة ريم واتربعت براسي وانا اتخيل دموعها بيوم الي هضمتها اكيد هسة هي سافرت للخارج والله يعلم بيها هي بأي بلد استقرت لكت عمتها هناك لو ظلت لوحدها بديرة الغرب ؟؟ شلون بيها اذا احتاجت العون هناك ومحد الها هناك اتذكر مرة كالت اتمنى ربي يوكعك بيد واحد اقوى منك يضربك ويكسر تكبرك شكل امنيتها تحققت على ايد داعش شفت الويل من كثر التعذيب اغيب عن الوعي الكة روحي ما اشيل لا ايد ولا رجل غمضت عيوني سمعت الرجال يسألني .. شلون كدرت تهرب منهم بعدت ذراعي عن عيوني وجاوبته .. كانت عندهم حالة طارئة والمعسكر كله مخبوص استغليت الفرصة وانهزمت جنت احجي وية الرجال وانا اتذكر جلال صحيح انا جنت مقيد وما اكدر احجي وية جلال واسأله من ورة اللاصق بس عقلي ما بطل تفكير ويحلل الموقف صرت مثل المخبل احجي وية روحي ااشر لجلال اريده يفهمني اريد اكله انا اعرف انت مجبور تشتغل وياهم. يتركني ويبتعد ما يرضى يحجي وياي حيرني سكوته كنت كاعد بزاوية الورشة اراقبه واتسائل مستغرب افعاله وياي المن هاي الاجهزة وليش يساعدهم اذا هو حسب ما مبين عليه يكرههم الف سؤال وسؤال يراودني بخصوص شغل جلال وموقعه وياهم وكدرت الايام تجاوبني وعرفت جلال جاي وياهم غصب عنه بس ما اعرف شلون هيج غصبوه وجبروه اكو حلقة مفقودة ومحيرتني شلون يكرههم وحاقد عليهم وشلون هو جاي وياهم برضاته يعني حسيت من خلال كلامه وياهم علاقته بيهم وطيدة وعنده مركز مهم يمهم . عقلي راح يفصل من التفكير والاجهاد ظلت الاحلام والكوابيس تطاردني طول ذيج الايام الفاتت علية ما اعرف الليل من النهار ضيعت حساب الوقت حتى اعرف صارلي شكد هناك يم داعش كان السؤال الوحيد الي احتاجله اجابة والي محيرني وشاغل بالي اذا كان جلال يكرههم وما طايقهم ليش يساعدهم ويشتغل وياهم ويسويلهم اجهزة وشكله جاي وياهم بدون ضغط منهم يعني بأرادته جاي فجأة فزيت من نومي وصحت موجوع وانا اتلمس مكان الحزام الي حفظ بيه الورقة رفعت قميصي وفتحت جيب الحزام ولكيت الورقة المحفوظة بكيس نايلون ولاصق شكله جلال جان مسوي حساب لكل شي انا متأكد هنا راح تكون الاجابة عن كل اسألتي بس خلي اوصل للعنوان المكتوب بظهر الورقة فتحتها كل شي ما افتهمت منها رسومات ومخططات واشارات ورموز غير مفهومة قلبت الورقة لگيت عنوان ورقم نقال لازم اتصل على هذا الرقم وكاتب يمه اسم علي محمد المرة سألتني .. ابني شلونك اليوم باوعت عليها مستغرب ليش انا صارلي كم يوم عندها جاوبتني .. صارلك يومين عندي لزمتك الحمى والحمدلله شكلها والدتك تدعيلك بالنجاة والسلامة .. اشكرج خالة ما اعرف شلون اجازي جميلكم .. احنا الي مانعرف شلون نجازيكم وكفتكم معانا وللموصل ضحيتوا بأرواحكم وقدمتوها فداء لهاي الارض انا مر علية شهرين كلشي ما اعرف شنو الصار من وراي الظاهر صارت معركة بين الجيش العراقي وداعش سألتها .. اريد نقال اذا تكدرين تحصلين عندي مكالمة ضرورية ومهمة لازم اجريها خايف اطلع منا ويلزموني داعش جاوبتني وكالت .. تطمن ولاتخاف انا اهربك واذا على النقال هسة اجيبلك راحت شوية اجتي وجابت وياها نقال كلش قديم بي دگم نوكيا يصير اسود صغير كالت .. بس هاي النوعية من النقالات تشتغل هنا اتشكرت منها واتصلت عالرقم المكتوب واجاني الرد كلتله بسرعة .. انا اخو جلال قربان وعندي امانة لازم اوصلها الك بسرعة قطع كلامي وكال .. كل شي لا تحجي من معلومات بس گلي انت وين وانا اجيك صرت اوصفله مكاني ويم منو كلي .. بالله متكدر تنطيني المرية احجي وياها سلمتها النقال وحجة الرجال وياها وجاوبته المرية وكالت .. لا تخاف يمة اخوك بالحفظ والصون ان شاء الله اوصله الكم بأقرب فرصة بس اتأكد من صحته انهت المكالمة وباوعت علية وكالت .. تطمن بأذن الله اطلعك منا قبل شهر اخوانك الجنود العراقيين كانوا هنا عندي وكدرت اوصلهم لبر الامان جانت المرية تحجي وبعيونها لمعة اصرار المرأة العراقية القوية ما تهاب احد نهضت من فراشي على كيفي راسي ثگيل ملفوف بشاش صايرة مثل العمامة وملابسي كانت نفسها سود وكفت على رجلية حسيت الدنيا افترت بية ورجلية خيوط مشيت اشوف نفسي كعدت اعرج اتوقع كعب رجلي ملتوي سألتني.. هَـا يوم تكدر تتحرك لو لا حتى اذا بيك مجال اليوم اخذك ما دام هاليومين مشغولين والمنفذ بساعة الظهرية يكون فارغ هزيت راسي بالموافقة .. اي خالة اكدر اتحرك واساعد نفسي بس احتاج عكازة او عصاية استند عليها وصلتني لسيارة قديمة مطعطعة نوع بيك اب ساعدني الولد الشاب حتى اصعد ورة بالخلف وجابوا علف حيوانات وغطوني بي حتى محد يكدر يشوفني وجابت اقفاص دجاج وصفتهن علية وعلى العلف ادري كل هذا حتى محد يكدر يشوفني وتبعد الشك عنها بقيت متمدد بمكاني اسمع صوت الدجاج وحسيت بالسيارة تتحرك وبدت تمشي جنت حابس انفاسي وما بقت اية ما قريتها ورة نص ساعة تقريبا وكفت السيارة وسمعت صوتها تحجي وية مجموعة اشخاص كلامهم باللغة العربية الفصحى وضحكوا عليها سألوها .. بعدج تبيعين الدجاجات تخافين من الوحش وهي تحجي بكلام غير مفهوم تكللهم اكو وحش عملاق عنده قرون ويطلع من حلكه نار وراح يخسف الارض واني اخاف على دجاجاتي .... اسمعهم يضحكون عليها يصيحون عليها عجوز الشؤم المخرفة والله عفية عليج خوش امشيتها عليهم مسوية روحها نص مخبله وبعدها امروها تحرك السيارة كانت هي الي تقود السيارة ومشت بينا السيارة حوالي ساعتين وبعدها وكفت هنا انا اعصابي اتحطمت وما ظل عقل براسي من الترقب هسة ليش اتوقفت مرة ثانية لحظات وحسيت باقفاص الدجاج بدت تنشال وانا نهضت من مكاني بخوف وجان اشوف روحي يم سيطرة عراقية كانت المرية واكفة ابتسمت بوجهي وكالت .. ابني وصلتك لبر الامان انت هنا بين اخوانك التفتت على جندي وكالت .. هاكم يمة هاي الامانة ارتد الدم بوجهي وسحبت نفس عميق وساعدوني انزل من السيارة واخذوني لداخل مكتب صغير هنا وجان اشوف ضابط نهض من مكانه وعيونه لمعت بالنصر وكال .. هلا والله بأخو البطل الملازم جلال قربان بقيت متصنم بمكاني عيوني مفتوحة على وسعها نفضت راسي هذا شنو يقصد اجة اتقدم من عندي وحضني وكال اكيد انت اخوه الجبير مهيمن الي عرقلت علينا المهمة من اثر الصدمة انسلب الكلامة مني وبقيت مصفصف اريد احد يفهمني انا بحلم لو علم شنو الي كاعد يصير الضابط ابتسم على شكلي المتفاجيء وكلي تعال اتفضل خليني افهمك الموضوع كله وصار الضابط يحجيلي عن كل الي صار وية جلال من اول ما اجوي عليه وهو بالمستشفى وطلبوا منه ورفض لحد هاي اللحظة كان الضابط يحجي وانا استمع متفاجيء بكل الي كاله معقولة كل هذا يصير بجلال فجاءة وجان اتذكرت كلام جلال عن مشكلة صديقه الي يريد يتطوع بدون علم اهله غمضت عيوني بندم وقهر كرهت روحي معقولة جلال جان يريد يحجي وياي ويصارحني بس ردة فعلي خلته يرتد اي ما تقبل غلط كان يحجي عن نفسه وجنت بنظره مثل الابو الي يخاف عليه ااااااخ وبوكتها انا زدت عليه مخاوفه من كلت انا مستحيل اخليك تروح للموت برجليك نهضت من مكاني وباوعت عالضابط وكلت .. سيدي شلون بأخوي تمت المهمة واخوي بقى هناك گلي شلون راح ترجعونه جاوبني وهو يباوع على الورقة برضى وكال .. بعدها ما انتهت المهمة انت سويت الي عليك والباقي علينا احنا نشوف شغلنا وياهم وكون الله يقدرنا نرجع اخوك سالم احنا بهاي المعلومات الي رسلها جلال راح تساعدنا بقهر داعش وانت هسة تگدر ترجع لاهلك وتنتظر جاوبته معترض .. لا ما اريد ارجع اروح وياكم ابتسم وكال .. اسف ما تكدر تروح ويانا هاي مهمة لهنا ودورك ينتهي ترة هذا شغلنا جاوبته بقلق .. زين خلوني هنا ابقى انتظره گال .. ما راح تفيدنا بشي اذا بقيت هنا واحتمال السالفة تطول يعني ما اوعدك بشي بس تگدر تاخذ رقمي وعن طريقه تگدر تطمن عن اخوك وعن التطورات الجديدة انت حتى مصاب ما راح تكدر تفيدنا او تتطوع من ضمن صفوف الجيش بس هَـا قبل لا ترجع للبصرة اريد ااكد عليك بشغلة مهمة لازم تحافظ على السرية بموضوع اخوك يعني اي كلمة تطلع منك بخصوص عمل جلال او هويته راح تشكل خطر على حياة اخوك انتفض گلبي وانا اتذكر معاناة جلال ويانة. حتى يحافظ على سره بعيد عنا كلت للضابط..يعني ما بيكم مجال تخلوني ترة جلال اخوي ما اكدر ارجع لأهلي ولأختي وهو مو وياي شكوللهم .. افضل ترجع لأهلك تطمنهم وتفهمهم الموضوع لان راح تلكة الوضع هناك مگلوب لان احنا اضطرينا ان نعلن عن جلال يشتغل عميل وية داعش سألته بأستنكار .. ليش سويتوا هيج .. بسبب تدخلكم المفاجيء انت وصديقك هو الي عرقل المهمة على جلال ولوما انت جان احنا ما احتاجينا نعلن عن جلال عميل بس بعدما انت تدخلت صار الكل يعرف بجلال يشتغل وية داعش طبعاً الخبر انتشر عن طريق صديقك عناد من كال لخوالك وبما ان الخبر وصل للشرطة صار لازم نتصرف لان اذا احنا سكتنا عن هيج شي راح يوصل لاذان داعش ويشكون بالامر. وشنو سبب تغاضينا عن جلال لذلك احنا اعلنا عنه عميل حتى نبعد عنه دائرة الشبهة واتوقع حتى يعزز موقفه بين داعش .. ااااااخ الله ياخذني على هالخوة التعبانة شكلي جنت مثل شوكة ببلعوم جلال ريم بالسيارة اني وحور راجعات للبيت كان الوقت متأخر عن وقت رجوعنا للبيت ام مهيمن حرگت النقالات بالاتصال علينا انتظرنا السايق اتأخر علينا لان كانت سيارته عطلانة وبعدها انصل علينا يعتذر وكال ما كدر يصلح سيارته لذلك ارسل سايق ثاني بمكانه وصلنا للبيت الساعة ب ٣ الظهر نزلنا من السيارة ولگينا سجاد واكف بالباب اول ما نزلت حور راح عليها ولزمها من زندها وزمخ بيها .. وين جنتي انتي وهاي متأخرات نغم بنت عمي حسن رجعت قبلكم بساعة. جاوبته حوروكالت.. وانت شكو جاي تسألني امي اتصلت علينا وكلتلها السايق سيارته عطلانة. سجاد .. هاي الحجة اذا عبرت على امج فما تعبر علية جايتني صاعدة وية رجال غريب ما نعرفه وصاعدتلي بسيارة جديدة انتي وهاي الصايعة حور نترت ايده وكالت .. احترم نفسك سجاد ولا تكعد تمسلت بالحجي اصبرلي الا اخلي امي تسود عيشتك وحور راحت تدك الباب بكل قوتها رحت عليه .. شوف انت هييييي عليمن الصايعة حجيت حجاية اكبر من راسك زمخ بية بصوت عالي .. اكلي تبن وسدي حلكج وحمدي الله وشكريه انتي مرة والا جان كصيت لسانج بالله شو اتحركي من كدامي ما شايف نسوان هيج صلفات مثلجن اخو الخاتون واولاد عمج مفقودين وانتن دايحات على حل شعرجن ودار على حور وكاللها بتهديد .. شوفي ولج حويرة سمعيني زين هذا الحجي موجه الج ما علية بهاي الدايحة. كلية بعد ماكو خلي اشوف مرة تخطي بباب البيت بالقران رجليج اكسرها هو يحجي وانا جن جناني .. بسيطة ياسجاد اذا ما اراويك هاي الصايعة شنو تكدر تسوي ما اكون بنت عم مهيمن اذا ما خليتك تبلع كلامك وياي انهيت كلامي وباوعت منا ومنا جان الشارع بي بس كم جاهل يلعب بعيد عنا ضربت ايدي بحافة الباب صرت اصرخ مثل المخبلة .. يبوووووووووووووووي .. يبوووووووووووي لحكوا علية سجاد اتهجم علية هو انخبص واتفاجيء من حركتي كلم يغلط ويسب .. بنت الكلب شكاعد تسوين الله ياخذج هو يغلط وانا ابجي واصرخ لحد ما لميت الناس وام مهيمن ونور الكل اجوي يركضون على صياحي وغلط سجاد يتبع احداث البارت القادم مهيمن واكف كدام باب بيتنا اعاين عليه والدموع تلالي بعيوني | ||||
|
| |
|
26-09-19, 08:53 AM
| #59 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_ثمانية_وعشرين_ج2 #الكاتبة_نهى_الحسون ريم سجاد كان يغلط وانا ابجي واصرخ لحد ما لميت الناس وام مهيمن ونور الكل اجوي يركضون على صياحي وغلط سجاد ام مهيمن .. ولج خالة ريمة شبيج تصرخين كولي شنو الصار ؟؟ رحت عليها وانا ابجي .. اهيء خالة ما اعرف شبي هذا المتوحش اشو نزلنا انا وحور من السيارة واجة اتهجم علية ويغلط ويسب على بابا ويكلي الدايحة الصايعة ونوب فوك هذا الغلط هد علية ونتر ايدي وانضربت بالباب هاج شوفي شوفتها معصم ايدي الاحمر وعلى اثر الصياح اجة ابوه يهوس ولحكه ورة خمس دقايق خال مهيمن حسن ابو مؤمل صاح بينا كلنا .. شنو هذا الصياح ترة عيب وكفتكم بالباب بالله شو بلاحجي زايد. فوتوا دخلوا جوة بالبيت وهناك نتفاهم مو كدام الناس ام مهيمن سمعت كلام اخوها. واجتي تدخل جوة هي وحور بس انا ما سكتت .. لا عمو ليش تطلب مني اسكت وادخل جوة. للبيت يعني فوك ما ابن اخوك اتهجم علية وسبني وسب اهلي بدون اي سبب وتريدني اسكت على سوايته وادخل هيج بكل سهولة جوة للبيت جاوبني متضايق .. عيب عمو انتي بنية وما يصير صوتكم يطلع بالشارع انا خوفاً عليكم كلتلج هيج .. يعني من ابن اخوك اتهجم علية وعلّى صوته وسب وغلط بالشارع اشو ما سوى حساب للعيب والبنية. ليش من صار الحق الي وردت احجي ادافع عن نفسي كلتوا بنية وعيب يطلع صوتج ام مهيمن .. يمة ريم استهدي بالرحمن اخوي حسن حتى ما يعرف شنو الموضوع وعيب نخليه يوكف بالشارع اخوها كمل على كلامها وكال .. عمو فوتي دخلي للبيت وحقج علية انا اطيح حظه سجاد ابتسم بأستهزاء وهز ايده كان مستهان بية همس بصوت ناصي.. مو عشم ابليس بالجنة اعتذرلها باوعت لأبو مؤمل وكلتله .. لا عمو اعذرني انا مستحيل اتنازل لسجاد وادخل للبيت هيج بكل سهولة وكأن شيئاً لم يكن مثلما ابن اخوك ما سوى حساب ولا خلة تقدير لحرمتنا واتعدى علية وغلط وسبني بالشارع كدام الناس انا هم ما ما اتحرك منا ولا ادخل للبيت قبل ما واحد منكم يحكم بيني وبينه وياخذلي حقي منه وبشرط بالشارع وكدام الناس كلها ابو سجاد زمخ بية .. ولج انتي مو بنية نسرة ما يكسر عينج شي سجاد .. بوية خليني اهد عليها واسكتها حسن نتر بي وكله .. انت اسكت ما اريد اسمعلك ولا كلمة اجوي طالب ومؤمل يسألون عن الموضوع هسة يالله سمعوا بالصار خالة زهرة حاولت وياي هي ونور حتى يخلوني ادخل للبيت وهناك جوة ينحل الموضوع بس انا عندت ويبست راسي ودكيت رجلي بأرضي وكلت .. والله ما اتحرك منا الا عمو حسن يحكم بيني وبين ابن اخوه وياخذلي حقي. لو لان ما عندنا رجال بالبيت يدافع عنا هيج سجاد يغلط بحقي ويذلني كدام الناس والله العظيم لو مهيمن وجلال موجودين جان حرموا عليه يمشي على رجليه وكصوا لسانه طالب ومؤمل كالوا.. ما عاش الي يذلكم احنا موجودين احنا مثل اخوانج ابو مؤمل باوعلي بنظرة تقدير وكال .. ما طلبتي غير حقج بس غير بالاول نعرف شنو الموضوع حور حجتلهم السالفة كلها. ومن وصلت لفقرة ضرب ايدي انا كملت عنها وكلت .. هاك عمو شوف شلون فصخ ايدي سجاد صاح .. والله العظيم جذابة تتبلى علية كلتله .. يعني تنكر كلامك وياي مو انت الي كلت علية صايعة ودايحة وسبيت بابا الله يرحمه جاوبني بدون ما يحس على نفسه .. اي صحيح سبيت وغلطت بس ما ضربتج طالب هد عليه وزنگه من ياخته وكله .. ياقليل الغيرة والناموس ولك انت صدك خنيث روح البسلك عباية واكعد بين النساوين احسنلك على هاي السواية ابو مؤمل صاح بيهم .. طالب بوية عوف ابن عمك هذا حسابه يمي بعدين التفت علية وكال .. شوفي عمي حقج علية الي صار ما ينسكت عليه هزيت راسي بموافقة وكلتله .. اي انا اعرف سواية سجاد مو هينة وما ينسكت عليها والمفروض تصير عليها كعدت عشاير وفصول بس انا بنت اصول ولخاطرك عمو ولخاطرخالة زهرة راح اسكت وارضى بحكمك. ابو سجاد زمخ بية بغيض واحتقار .. خاب شوف هاي ام العشاير وانتي شعرفج بالعشيرة مصدكة روحها هي لو بيها خير عشيرتج جان ما اجيتي كعدتي يمنا لفو زمخ بي ابو مؤمل .. عيب ابو سجاد شنو هذا الكلام هاي انت الجبير المعدل ام مهيمن بقهر جاوبته.. هي ماجاية عندك وتعيرها هي كاعدة ببيت ابن عمها والكلام الي تعيرها بي معناها تقصد بي مهيمن وهاي ثاني مرة اسمع منك هالحجي وانا مااقبل واحد يعير ابني بأهله ابو مؤمل .. خوية زهرة لا تحركين اعصابج انتي تعرفين ابو سجاد من يعصب يكوم ما يثمن كلامه باوعت لابو سجاد وكلتلهم.. لا ابو سجاد انت غلطان صحيح احنا كاعدين يمكم ومعتبرينكم مثل اهلنا بس مو معناها احنا طالعين من زرف الحايط احنا هم حالنا حالكم عدنا عشيرتنا واسمها معروف واكدر بأتصال واحد لعمو ابو سيف المحامي يروح لجبير عشيرتنا ويسولفله الموضوع. باوعت لعمو حسن وكلت .. اضنك عمو انت شيخ عشيرة وتعرف احنا منو اهلنا وشنو اصلهم ولوما عارفيهم ماانطيتوهم مرة منكم فكول لأخوك لايكعد يجرح بالكلام ويعير بينا فوك سواية ابنه يكوم يزيد الطين بلة بكلامه ابو مؤمل باوع علية وكال .. عمي ما عاب حلكج كلامج لازم يوزنونه ذهب. ويجرالج الي تردينه حقج بركبتي وهذا سجاد هسة اذا ما اجة واعتذر منج اتبرى منه سجاد كام يكمز .. والله لو تموت ما اعتذرلها حجاية منا وحجاية مناك والحلو بالموضوع انا بعدني واكفة بالباب حلفت ما ادخل للبيت الا وانا ماخذة حقي من سجاد بقى سجاد يمسلت بالحجي وية عمه حسن منا لحد ما ابوه طكت روحه منه وضربه راشدي وكال لسجاد .. دير بالك تتجاوز على عمك الجبير والله ادفنك بأرضك بدون ما يرفلي جفن يالله بالله شو فضها وروح اعتذر للخاتونة خليها تسكت وتكفنا من طلايبها سجاد رص على سنونه اجة واعتذر مني بس شنو نظرات عيونه مزقتني تمزق يمكن لو كانت النظرات تقتل جان هسة اني مطروحة بأرضي ميتة من ورة نظراته الحاقدة باوعت عليه بأنتصار وتشفي ودرت وجهي ودخلت جوة واني اتشكر من عمو ابو مؤمل لان نصفني بس قبل لا ادخل انطيت باص لخالة زهرة وكلتلها .. هَـا اي خالة صدك قبل لا انسى ترة حور بعد ما تكدر تروح للكلية عقدت حواجبها وسألتني .. ليش خالة اسم الله شنو صاير باوعت لسجاد وكلتلها .. مو سجاد خطية عصب لان اتأخرت وحلف وكللها اكسر رجلج وخلي اشوف مرة تعتب الباب وتروح للكلية هو انا كلت هيج وهي خالة زهرة صارت علينا فاندام دارت على سجاد وانزلت عليه اكس ومربع بالرزايل تركتهم ودخلت وخليت ام مهيمن تغرد لسجودي اسمعها تكله .. خاب من كون شلل لهل الحلگ الاعوج وانت منو حتى تبطلها دخلت للبيت ونور وحور دخلوا وراي نور بأعجاب.. والله لو ما عيب من الناس جان صفكتلج على هالروح القتالية الي عندج ينعل ابليسج حيرتيهم بزمانهم حور لكزتني وكالت.. هاي شنو ريم ولا عرفتج هاي من شوكت صايرة تعرفين بسوالف العشاير الي يشوفج يكول مگابلة دواوين العشاير وكاعدة جاوبتها وكلت .. من عاشر القوم اربعين يوماً وانا عاشرتكم سنتين ودخلنا بالثالثة. مو همة يردونها عشاير واصول خلاص هاي هي انا گلت اجي وياهم وين ما يردون ترة لا تنسين انا بالحقيقة هذا طبعي ما اخاف ترة انا نفسي ريم ام لسان المزروف وما حجيت ولا سويت غير الي يملي علية عقلي لاعبالهم انا بزونة مغمضة ومطفية وكل شي ما افتهم لا بالعكس انا اجيت من مكان وبلد يكون هناك الانسان عندهم اول ما ينولد يعرف حقوقه وانا هم اول ما بديت وياكم اول شي اتعلمته هو وين تكمن حقوقي بين اعرافكم وحبيت اعرف شلون احصل عليها واعرف شنو الالي وشنو العلية بس هذا كل ما في الموضوع سمعنا صوت صياح الزلم وركضنا لكينا ام مهيمن واكعة مغمي عليها واخوانها واولادهم اتعاونوا عليها ودخلوها البيت رحت ركضت جبتلها جهاز الضغط ونور راحت تجيبلها علاجها حور اخذت مني الجهاز وبدت تفحص الضغط ولكته مرتفع اخذت علاجها بالكوة ووكعت الملامة كلها على راس سجاد الي كان السبب بكل الي صار بعمته زهرة لان كام يتعدى حدوده وياهم بغياب مهيمن بالليل لكيت حور كاعدة لوحدها تبجي كانت لازمة صورة لمهيمن وصورة لجلال رحت كعدت يمها وكلتلها .. تدرين شنو اتمنى التفتت علية ومسحت دموعها كالت.. شنو تتمنين .. اتمنى انفجر وابجي مثلكم انتي ونور. احس بغصة متكومة ببلعومي ما راضية تطلع باقية تتكسر اريد ارتاح مرات الدموع نعمة تساعد البشر حتى تخفف عنه همومه بس بحالتج. هاي لا الدموع تصير نقمة جرت حسرة وكالت.. لو مهيمن هنا جان محد يتجرأ ويتجاوز علية او على امي مثلما سوى خالي ابو سجاد وسجاد ويانة جانت تحجي بحركة گلب جاوبتها وانا اكابر بالالم وكلت.. هاي وانتي كاعدة بين خوالج وهيج تحجين وتبجين مستهضمة. لعد انا شنو اكول الي كاعدة بنص ناس غربة لاناصر ولامعين واولاد عمي الي هم كل ما املك من عائلة اختفوا ومالهم خبر حمدي ربج وشكريه على النعمة الي انتي بيها عندج ام وعندج خوال واولاد خوال طيبين ما عدا خالج ابو سجاد وعائلته البقية كلهم ينرفع بيهم الراس بنات خوالج واولادهم كلهم يحبونكم مهيمن وصلت للبصرة مثل طير ورجع من الهجرة على بلاده بس كان حالي مكسور الجنح راجع للبصرة . وانا تارك وراي اخوي بنص نار العدو غصب عني رجعت الضابط ما تركني الا من ضمن وصولي للبصرة لان انا كنت ما شايل هوية ولا عندي فلوس وصلت لمنطقتنا وكلبي طار كدامي وسبقني يركض متعني لبيتنا مشتاق لشوفة الاهل والاحباب وصلت لبيتنا واكف كدام باب البيت اعاين عليه وعيوني تلالي بالدموع كان الوقت عصر جهال المنطقة مروا من يمي ينظرولي بخوف اكيد يخافون لان شكلي عبالك واحد سفاح لحيتي طويلة ووجهي مطبر كله اثار تعذيب دكيت الباب بكل لهفة وانا انتظر وجان اسمع احلى صوت بالدنيا صوت امي كلبي انتفض اسمعها تسأل بصوت واهن تعبان. .. منوو بالباب صحت بصوت عالي اريدها تسمعني .. يمة انا ابنج مهيمن ابنج كررت الكلام اكثر من مرة حتى تسمعني هو انا كلت هيج وبعدها سمعت صياح امي وانفتح الباب على وسعه وصاحت .. يمة وليدي. رجعلي يمة نظر عيني يمة من رحت فدوة لطولك خطية ماعرفت شنو تحجي من الفرحة لمتني بحضنها بكل قوتها وصارت تتلمس بوجهي وبأكتافي ممصدكة تريد تتأكد انا موجود بذات نفسي كدامها وعيونها مدمعة كالت .. يمة گلي انا صاحية لو بحلم. رفعت ايدها وبستها من ظهر الكف وباطنه وانا اطمنها .. يمة انا هنا يمج لاتبجين البنات اجوي يركضون على صوت امي ورفعت راسي وجان اشوف نور شلون شهكت متفاجئة من شافتني وركضة حور علية مثل طفلة وشافت ابوها اول مشافتني ركضت علية وطارت لحضني من العصفورة واتعلگت برگبتي تشم صدري وعيونها تدمع ممصدكة .. ابوية انت كحل عيني انت مهيمن ما جاي اصدك عيوني بستها من راسها وانتبهت لنور كانت واكفة وراها تبجي منتظرة دورها بعدت حور من حضني ورحت على نور وفتحتلها ذراعي اثنينهم هاي امانة اخوي وصاني عليها جلال كلي ديربالك على اختنا باوعت مترددة لذرعاني المفتوحة بعدها شهكت بصوت عالي مهضومة وشمرت روحها بحضني لميتها على صدري اتذكرت حال جلال بلحظة تبادلنا بالاحضان وطفرت دمعتي جانت هاي اول مرة احضنها لنور اول مرة تعرف معنى حضن الاخو شلون يصير رفعت راسها وعيونها مبللة بالدموع سألتني من بين دموعها وكالت .. مهيمن وين اخونا ؟؟؟ جمدت بمكاني جنت شايل هم لهاي اللحظة بالذات من اجيهم ويسألوني عن اخوي وينه شنو اكللهم تركته وراية بيد الذيابة واجيتكم خالي الايدين من اخوي صرت اتهرب من نظرات عيونها مالي عين اعاين بعيونها انسحبت من حضني وارتدت للخلف وهي تراقب وجهي بخوف .. شنو مهيمن كلي وينه جلال. ليش ما رجع وياك ؟؟ جاوبتها .. جلال بقى هناك يكمل شغله وگال يرجع وراية ان شاءالله نفضت راسها من الافكار المرعبة وكالت .. مهيمن عفية گلي ولا تضم علية ياشغل هذا انا سمعت بجلال راح يم داعش جانت نور تسألني وامي وحور ملتمات حولي امي تجري اتصالاتها وحور هماتين يردون يبشرون خوالي والناس برجوعي سالم من بين كل هاي الخبصة حسيت بنسمة هوى طيبة الريح مرت علية رفعت راسي ادور على صاحبته هيج حسيت بوجودها قبل لا اسمع بصوتها اتسعت عيوني من شفتها واكفة يم باب المطبخ تعاين علية عيونها جامدة. مفتوحة على وسعهن. مشاعرها مكبوتة بداخل عيونها لكيت رجلية ماخذتني يمها بدون شعور وكفت قريب عليها وحجيت من بين صدمتي وكلت .. هاي شنو ريم انتي هنا بعني ما سافرتي !!!! رفعت راسها لمستواي حتى تعاين علية ما حجت اي كلمة كان الفعل عندها ابلغ من الكلام وداهمتني بحركتها المفاجئة. شمرت روحها بحضني وحوطت جذعي بأديها الناعمة ماكان مني غيري المهة كلها على صدري بحيث احس بيها ضاعت بحضني اتمنيت اضمها جوى ظلوعي بدون حواجز حضنها كان بالنسبة الي شعور بالسلام وصدري صارلها الملاذ احس واحدنا كمل الثاني بعدها بلحظات حست على نفسها ومكان تواجدها المحرج بحضني جلت صوتها وانسحبت من بين ايدية وابتعدت عن حضني رفعت ايدها وحطت شعرها ورة اذنها مرتبكة وكالت بصوت بي رجفة بجي ودلع وكالت.. الحمد لله على سلامتك نورت البيت بجيتك امي والبنات كانوا داير ما دايري البسمة على وجوهم ما لحكت اكعد وياهم غير بس عشر دقايق ومن بعدها ما شفتهم لان خبر رجوعي للبيت طش بين الاقارب والاهل والاصدقاء وصار الباب كل شوية يندك لحد ما مليت وخليته مفتوح على وسعه خوالي واولادهم اجو للبيت وهم مامصدكين. بالخبر الا من شافوني بس بنفس الوقت انتبهت كانت بعيونهم هواي اسئلة جلال گلبي انتفض والعرگ البارد ينضح من جبهتي كنت واكف انا وابو ذياب وابو جراس ومجموعة جنود من الدواعش كدام ابو اعصار جان معصب وثاير وكل شوية يسأل ويحقق ابو عصار .. راح اتخبل شوكت صار هذا الشي كله واحنا وين جنا سألت وسويت نفسي ما اعرف عن شنو. كان يحجي .. شنو الموضوع مولاي الامير اهدي شوية وفهمنا الموضوع ابو عصار باوع علية وكلي .. شلون تطلب مني اهدي ما راح ارتاح ولا يهدالي بال الا اعرف ومنو هذا الخاين الي موجود بينا ابو ذياب جاوبه .. مولاي الامير كلنا ثقة انا وجلال وابو جراس والجنود هنا. ممكن نعرف السبب الي يخليك تشك بيناتنا خاين ابو جراس سأله .. انتوا شلون اكتشفتوا بوجود خاين بينا ابو اعصار جاوبه بغضب .. اربعة من جنودنا القناصيين لكيناهم مقتولين غدر ابو جراس كال مستغرب.. احنا هواية استشهدوا من عندنا شمعنا هذولي القناصين كلت عنهم مقتولين غدر جاوبه.. اول شي اكتشفنا الرصاصة الي تم استخراجها راجعة النا لنفس نوعية السلاح المستخدم وثاني شي تم رمي القناصين من مكان قريب ومن الخلف يعني لوكانت الاصابة من الامام جان گلنا هم الجنود العراقيين وكعوا على اسلحتنا واستخدموها ضدنا تصير مرات هاي الحالة من يقتلون جنودنا ويسلبوهم الاوغاد بس ما دام تم الرمي من الخلف ومن مسافة قريبة اذن القاتل منا وبينا وموجود بيناتنا يتنقل مثل الحية ولا بد وان يجي اليوم ويوكع بيدي هم يحجون وانا گلبي يرتعد الله ياخذهم الشياطين يملكون عقول تحفر الصخر ما الوم جماعتنا بالاستخبارات على كل الحيل والدهاء الي يستخدمونه بالمهمات اثاري يعرفون بعدوهم خطير وذكي ما يستهان بي الله يستر منهم على شنو ناوين منا ورايح لازم اخذ احتياطاتي واخفف لعب اكيد بالايام الجاية راح اخضع لعدة اختبارات يمتحنونا بيها حتى يوكعون على الخاين الموجود بينهم مهيمن خلص الوقت وانا استقبل الناس واتلگاهم حتى بالكوة كدرت افرغ نفسي واسبح بدون ما ازين لحيتي وجابولي للبيت مضمد الوالدة ماكدرت تعالجني تكول مالي عين ولا كلب اشوف جرحك واتحمل اشوف وجعك كعد يعالجني وضمد رجلية مؤقتاً وكال اتوقع هذا التواء بالقدم لازم تروح لمجبرجي يطكها الك بقيت اعرج عليها وطالب كال باجر يصبح الصبح واخذك الهم حتى يسووها بالرغم من الخبصة والهوسة والناس الي تجي وتروح على بيتنا بس لازال عقلي يفكر بطريقة حتى يوصلني لجلال بس كل الي احتاجه شوية وقت استرجع صحتي ومن عندها راح اتصرف لحظات وجان اسمع صوت عناد يسألهم عني ما مصدك شافني وركض علية بكل لهفة ممصدك برجوعي الا من شافني واخذني لحظنه ودموعه نزلت على اكتافي سألني بصوت مكتوم وكال .. شلونه صاحبي البطل طمني عنه ؟؟ جاوبته .. ولك عناد صاحبك طلع ذيب عنده واجب مقدس صاحب مهمة عناد حاوبني وكال.. كفو منه والله كعدنا انا وياه لوحدنا بالاستقبال بس كان طالب ومؤمل موجودين كاعدين برة بالباب يرحون ويرجعون علية سألته.. شصار بيك من وصلت وما لگيتني گال .. وروح كرار اجيت اتخبل عقلي وكف ردت اكمل طريقي واروح وراكم بس الي لزمني لگيت سيارتك مفتحة ابوابها واثار الدم مالية المكان حسيت السالفة طلعت من ايدي ما بيها مجال اسكت وانا صار لازم انطي خبر لأهلك وابلغ عن اختفائك بساعتها ما جنت اعرف انت ميت لو عايش جان عناد يحجي واتذكرت مراقبتنا لجلال وحشريتنا وعرقلتنا اله وكلتله .. تتذكر عناد شلون جان جلال يعصب من يعر ف بينا كاعدين نراقبه اثاري طلعنا لاعبين طوبة بالمسكين وكل المصايب الي صارت وية جلال من جوة راسنا خطية كان بكل مهمة يريد ينجزها يلگانا كدامه سابقينه مثل الطناطلة نجي ونخرب عليه الاول والتالي جاوبني عناد بأبتسامة حزن وكال.. خطية صدك مسكين الله بلاه بلوة بأخ وصاحب مثل الثيران يجون وينطحون بدون ما يفتهمون شنو الموضوع لا رحمناه. ولا خلينا رحمة الله تنزل عليه فوك ضيمه حاصرناه .. بالقران لو بعد الف سنة ما اصدك ولايجي على بالي جلال اخوي يصير ضابط زين شلون وليش وشوكت صار كل هذا من ورانا شغلة توكف العقل يعني لو ما الضابط علي كعد وياي وفهمني بنفسه عن كل شي صار وية جلال وشلون اتطوع بالاستخبارات جان جذبت الخبر وما صدگت .. انا هم مثلك جنت مصدوم بالعرفته عن جلال سألته بصوت ناصي .. بس ما كلتلي شلون عرفت بسالفة جلال .. جاوبني وهو يبتسم .. لو تدري شلون عرفت جان وكف عقلك مثلي بس تعرف شنو ما راح اكلك خليها مفاجئة اريدك تتفاجيء مثلي بعدها عناد سألني .. تعال احجيلي من اخذوك منا شسويت وين اخذوك وشنو هاي اثار التعذيب صرت احجي لعناد عن كل الصار وياي وشلون جلال جان مبتلي على عمره محتار وين يضمني عنهم جان يحاول بكل الطرق ما يخليهم يوصلوني بس هم شياطين يستغلون عدم وجوده ويجون علية يراوني النجوم بعز الظهر جنت احجي لعناد شلون جلال هربني من المعسكر وگلبي وية كل كلمة ينزف غمضت عيوني وكلت .. تدري عناد اول مرة بحياتي اكون هيج خايف على حياة احد ما تعرف گلبي شلون صاير هسة بهاي اللحظة انا كاعد الف حسبة تجي على بالي شلون بجلال وشنو كاعد يسوي بهاي اللحظة لزموه لو بعده والرمي الي سمعته بذيج المغربية عليمن عليه لو على غيره .. اشو جني اشوف بعيونك نية هَـا مهيمن على شنو ناوي باوعت لرجلية المضمدة ضايج من ضعفي وجاوبته .. بس خلي اتشافى ويصير خير نور عودة مهيمن للبيت بشارة خير وامان وزاد الامل بگلبي عن قرب رجعة اخوية جلال وتتكحل عيني بشوفته مثل مالله خلاني اشوف اخوية مهيمن صارله اسبوع من رجع صحيح هو رجع النا سالم بس بقى باله وتفكيره بعيد عنا من يوم الي رجع ما شفناه غير بس يومين بقى بالبيت يخضع للعلاج على ايد الممرض يجي للبيت يداويه وخالة زهرة ما تحملت هي هم صارت تشارك بعلاجه لان خطية كان متعرض للتعذيب كلما نسأله على جلال يتهرب من عدنا وينخطف لونه. لاحظت على مهيمن كان كلش قليل الكلام ويانا ومن رجع لليوم ما اكل بالبيت غير بس هذني اليومين كلما يطلع امه تسأله وين رايح ام مهيمن جانت بعدها متخوفة ولحد الان ما تكدر تتجاوز فكرة فقدان مهيمن مرات يروح يكعد بديوان خاله حسن ابو مؤمل يدز عليه لان امه اتصلت على اخوها وسولفتله على وضع ابنها الي ما عاجبها مرتين رجع للبيت متعارك بالسوك بسبب سالفة جلال وكلام الناس عنه على هو عميل وية داعش ويشتغل وياهم هذا السبب الي خلة مهيمن ينگلب وحش وامه داعيه عليه الي يفكر او يحاول يلمح عن سالفة جلال من بعيد او من قريب اما ريم فهاي كانت عالم ثاني لحالها هواي اشوفها كاعدة تفكر اول ما يوصل مهيمن عيونها تترصده وتبقى تعاين عليه لكن مو ريم الي اعرفها قبل الي كانت تنتهز الفرص حتى تقترب من مهيمن لا هاي الي جاي اشوفها كدامي غير عن ذيج ريم صحيح فرحانة برجوع مهيمن بالسلامة بس كانت محوطة نفسها بحاجز عازلها حتى عنا احنا اندك الجرس وكان الوقت الساعة ب ٩ بالليل كان مهيمن دخل وسلم علينا كنا اني والبنات وخالة زهرة كلنا كاعدين امه سالته .. شنو يمة وين جنت اشو صايرين ما نشوفك هم كول هاي امي خطية خلي اكعد يمها شوية مشتاقة لشوفتي باسها من راسها وكعد يمها اباوع عليه بدت صحته تتحسن من بعد اسبوع علاجات بدا يشفى جاوب امه وكال.. يمة حقج علية عذريني جنت اكمل الشغل الي جان متراكم طول هاي الفترة الي غبتها وقبل شوية جنت كاعد بديوان بيت خالي حسن جنا نحجي ونسولف تعرفين شلون مشتاق لكعدتهم وسوالفهم وكمل كلامه .. وفاجئوني بسوالف بنت عمي وبطولاتها جان يحجي ويباوع على ريم وعيونه تلمع بفخر .. كل يوم تفاجئيني بيج ريم ما اعرف شلون اشكر وكفتج وية امي والبنات يكفي انتي ما سافرتي وتركتيهم وراج هالشي لوحده يكفي من رجعت اكتشفت بيج هواي اشياء متغيرة جاوبته ريم .. على فكرة مهيمن انا ما سويت شي ولا اتغيرت ترة هي نفسها تصرفاتي الي كانت ما تعجبك ولا كنت مقتنع بيها قبل هي نفسها الي اتصدت لكلام الناس وحطت حد لكل واحد يتجرأ يتجاوز علينا او يستغل عدم وجودكم انت وجلال بالبيت انا نفسي ريم ما اتغيرت بس الظاهر انت الي اتغيرت وصرت تشوف الناس بغير نظرة مهيمن هاي ثاني مرة اخطأ بحكمي على شخص الاول جلال وهسة ريم اثنينهم اتهمتهم باللا مبالاة استهانيت بيهم وبشخصياتهم الغريبة حكمت على جلال وريم بالطيش وعدم المسؤولية لكن الزمن ثبتلي خطأ نظرتي و حكمي بحقهم لكن اكتشافي اجة بوقت كلش متأخر الفترة الي عشتها وية جلال بين داعش خلتني اشوف العالم بعيون جلال هواي اشياء بداخلي جلال بمواقفه غير كل مفاهيمي وثبتلي العالم مرات يدور بالعكس مو مثلما احنا متوقعين اما ريم بتصرفاتها وموقفها ثبتت لي ان الحياة متلونة مو مثلما انا كنت اشوفها لو ابيض لو اسود كنت اعاين عليها وادورعلى لهفتها واللمعة الي كنت اشوفها دائما بعيونها بس اشو هسة ماكو ما شفت لا لهفتها ولا لمعة عيونها شكلي سلبت منها احلى شي عندها وكسرتها بلحظة غضب اعمى نهضت من مكاني احس بروحي اختنكت بالزايد فوك ما انا مختنگ نظرات عيونها الجامدة نغزت گلبي ريم انتظرت الامور تستقر ومهيمن يوكف على حيله اتمنيت اسمع خبر عن جلال حتى يطمني بس شكلي ما راح الحك اشوفه مر شهر على وصول مهيمن بس الغريب بالامر مهيمن صرنا ما نشوفه نهائياً الي افتهمته من كلام حور تكول .. مهيمن ما اعرف وين يروح هو حتى حلاله عايفه بيد طالب. وطلع طول ذيج الايام ما يروح للمحل مثلما كايل لامي تصرفات مهيمن حيرتنا. حتى امي انتبهت عليه سألتها .. لعد وين يروح كل هاي المدة .. ما اعرف بس شكله طالب وهذا صاحبه عناد يعرفون بمكانه .. لاتخافين ماكو شي بس اتوقع كل ما في الموضوع مهيمن نفسيته تعبانة ترة الي شافه على ايد داعش من تعذيب مو قليل وضيفي عليها كلها هو ترك اخوه وراه اكيد هذا الشي جاي ياكل بگلبه يتبع البارت القادم نور .. ريم هاي ليش تحضرين جنطتج شنو قررتي تسافرين | ||||
|
| |
|
29-09-19, 06:51 AM
| #60 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_تسعة_وعشرين_ج2 #الكاتبة_نهى_الحسون مهيمن منين اجيب الصبر ياناس وانا عايف اخوية بوسط الذيابة امشي بالشارع مفزوع عمري وحياتي ما خايف على بشر مثل خوفي على جلال مر شهر من رجعت من الموصل وطول هذا الشهر اتواصل وية الضابط علي وهو يطمني عن احوال جلال و تقدمه بالمهمة بس اشو قبل اسبوعين انقطعت اخبار جلال وباقين العناصر المزروعة هناك عنهم وماعاد يوصللهم اي خبر منهم وانا صارلي اسبوعين احوم اعصابي تلفت من التفكير عمري ما انسى نظرات الفزع بعيونه وهو يهربني كان بعيونه كلام بس الوقت ظالم ما ينتظر كان لازم سيفه وواكف فوك راسنا مثل الجلاد قبل شوية اتصل علية الضابط علي وبلغني بأخر الاخبار عن جلال كال .. الدواعش لازمين واحد من عناصر الاستخبارات المزروعين هناك وما نعرف منو بيهم الي كدروا يكتسفونه داعش ونفذوا بي حكم الاعدام . لااا ياربي دخيلك لاتفجعني بأخوية بعدنا ما لحگنا نتبادل احضان الخوة الحقيقية واحدنا يفتح صدره للثاني واحد يسمع الثاني بثقة بدون ماتحوم براسنا الشكوك احس بروحي فرت هاربة مني من كثر الرعب الي حسيت بي جاوبت الضابط بصوت يهدر وكلت .. انا لهنا وحدي والقلق ياكلني ، بعد ما ضل صبر عندي انا جاي للموصل بعد مستحيل ابقى انتظر هنا وانا ما اعرف اخوي عايش لو ميت اترجاكم تشوفولي مكان يمكم براحتكم تردوني الزم واجب حراسات تردون تنزلوني حماية تردون اروح اقاتل بالجبهات اي شي تردونه انا مستعد اهم شي اجي لعندكم وابقى قريب يمكم واتطقس واسمع بأذني عن اخبار جلال ماكو غير هذا الحل اسافر باسرع وقت للموصل لان والله اذا ابقى هنا اطك واموت من التفكير بمصير اخوي جنت احجي وانا افور من الغيض والقهر رفعت راسي للسما. وبگلبي ادعيله ربي اعمي عيونهم عن جلال انهيت الاتصال وية الضابط بعدما اتفق وياية انتظر منه اتصال لترتيب اموري حتى انضم وياهم هناك بالموصل رجعت للبيت والدنيا طالعة من عيني حسبة تجيبني وحسبة توديني لكيت طالب ابن خالي واكف بالباب ينتظرني بس شافني كال .. ما تكلي شنو سالفتك صاير مثل كاسبر ما نشوفك الا بالصدفة شجاك حتى شغلك ما عدت تشتغل مثل الاول. عايفه براسي جاوبته محتار شجاوبه وانا سر اخوي ياكل بروحي جاوبته .. تصدك لو اكلك ادية ما جاي تاخذ عالشغل وعقلي مدوهن وفكري كله يم اخوي .. والله حقك ومعذور بس ما يصر هيج الى متى تبقى عايف شغلك وما اعرف تروح وين ما وين والله حتى عمتي زهرة احتاريت شجاوبها من تسألني عنك ولك حجج العالم كلها خلصت بعد ما عندي كذبة اقنع بيها امك وأسد بمكانك من يسالوني على الاقل گلي انت وين جاي تروح بهاي الايام جاوبته .. خلي يصير الي ببالي عود بوكتها انت راح تعرف او...... جنت احجي وية طالب بالباب وجان اشوف سجاد جاي يتمشى بالشارع بدون ما ينتبه علية قطعت كلامي وية طالب ورحت على العار استغليت غفلته والله متحلف بي حلفة كون اخلي يمشي ويتلفت على سوايته بغيابي وية اهل بيتي هديت عليه. ولزمته من ياخته من الخلف دار علية متفاجيء بوجودي .. دتعااااال غير اجيت بوكتك والله جابك خليني اطلع ضيم كلبي بيك وين ولك تريد تختل مني لو تروح بأخر الدنيا لا بد ويجي يوم وتوكع بين ادية عبالك راح انسى سوايتك لو اعديها الك طالب اجة علية ولزم ايدي يريد يخلصه من جوة ايدي .. مهيمن صلي على النبي عوفه ابوية طيحلك حظه وبنت عمك ما قصرت وياه مسحت بي الكاع كلش كافي عليه الاهانة ووكفته كدام الناس وخلته يعتذرلها ما انطيت مجال لطالب يكمل كلامه .. كل هذا الي صار بي وگلبي ما فايخ بعدني احس بنار تشتعل بي انطيته لطمة على وجهه وكلتله .. ولك. انت كلك خلك مرة شلون تتجرأ وتتعدى على اهل بيتي بغيابي وتغلط على تاج راسك اختي وبنت عمي سجاد.. اوكف مهيمن بس انطيني فرصة افهمك والله انا عصبت عليهن من باب الحرص جنت خايف على حور زمخت بي .. تاكل تبن اياني وياك تجيب سيرة اختي على السانك والله افنيك واخلي ذكرك على كل السان يرافقه لعنة نهيت كلامي بضربة على حلكة اتكوم بالكاع مثل الحضينة اجة مؤمل وية طالب وخلصوا سجاد مني وانا بعدني احس بگلبي بعده ماطفت ناره فرغت كل قهري بي اخذوا سجاد دفع لبيتهم اخذوا من كدامي اسمعه يكللهم بس خلوني احجي وياه وافهمه صحت بصوت عالي حتى يسمعني .. دير بالك تخليني اشوف ركعة وجهك والله اخربط جهرتك الزفرة نور كاعدة بالبيت ريم غيرتلي الشريحة حتى خالتي ما تتصل علية بس نسيت انا بعدني مفعلة الواتس اب على الشريحة القديمة اسيل صديقتي دائماً. تراسلني بالواتساب وكم وحدة من صديقاتي القديمات ورغد هم تراسلني بين فترة وفترة عليه انطيتهم رقمي الجديد خالتي كامت تدخل عالواتساب وتراسلني وبعدها غيرت حتى رقم الوتساب بس فاجئتني اسيل من اتصلت علية اليوم وتگولي خالتج اتصلت علية تتوسل وطلبت مني احجي وياج حتى اقنعج ترجعين تصرفين لهم راتبهم الشهري جاوبت اسيل .. حبيبتي اسيل خالتي ما كلتلج انا ليش قطعت الراتب الشهري عليهم جاوبتني.. لا والله ما كالت ليش بس كسرت خاطري وهي تبجي مبين عليها بأمس الحاجة لهاي الفلوس .. لعد ليش ما سوت حساب بيوم اجتي واتهجمت على بيت اخوية وكعدت تتهم اخواني بالباطل صرت اسولف لأسيل عن كل الي سوته خالتي بية هي وزوجها صابر من اجوي للبصرة اسيل جاوبتني .. عزة بعينهم والله الهم عين ويطالبون بيج هذولي من كل عقلهم يحجون .. لج اسيل مو بس هيج واستغلوا حالتي ووضعي الضعيف واتهموا اهل مهيمن بحالتي النفسية وانا تعرفين ب حالتي كله من ورة صابر .. اي ادري بيج والله بعدني كنت جاي احجي وية اسيل وجان اسمع صوت مهيمن المعصب وخالة زهرة تهدي بي اترخصت من اسيل وسديت النقال ورحت عليهم اريد اعرف شصاير رحت لكيتهم بالهول خالة زهرة لازمة مهيمن .. يمة عيب من خوالك انا مو فهمتك وكلتلك يمة. خوالك طيحوا حضه وبنت عمك واختك اخذن حقهن وزيادة مهيمن جاوبها .. انعم الله على ريم بيوم ساگت عليه وما عبرتها وخلتها تمر بدون ماتاخذ حقها وحق حور لان لو يبقى الموضوع عليج وعلى اختي جان بلعتيها وسكتي وهذا الخنيث يبقى يستسبع عليكم امه جاوبته .. عفو عليك شنو يمة شنو شايفني قليلة شر لو مدمغة وما عندي السان واسكتله جاوبها.. لايمة ادري بيج مو فقيرة. بس اعرفج كلش زين تدورين خواطر وهواية تسوين حساب لخالي ابو سجاد حتى ما تخربين العلاقة وية اخوج حقج ما الومج هذا اخوج وتتنازلين له بس انا ما مجبور اسويلهم حساب الما يحترمني ويحترم اهل بيتي ويتجاوز عليهم وانا غايب احطة جوى حذائي بدون ما يرفلي جفن في غض النظر منو الي يكون اذا هذا الخنيث ابن خالي الي مني وبية هيج يسوي يعني بعد ليش اعتب على خالتها لنور ورجلها الاعوج بيوم اتهجموا عليكم بالبيت تدرين يمة شصار بية من رجعت وسمعت بالصار بيكم بخلافي حسيت مثل الي فرهدوا حلاله احس بروحي مغدور والله ما اسامحهم ولا اعديها الهم وكلبي راح يبقى محمل عليهم طول ما انا عايش غمضت عيوني مقهورة على حال مهيمن احس بي يحجي معترض مثل المغبون على الي صار بينا من بعده انسحبت من يمهم من غير ما يحسون علية ريم استغليت خروج خالتي ونور للسوك ونوم حور وصعدت فوك حتى اجيب جنطي الي خازنتهم فوك بالطابق الثاني رحت بهدوء اريد اجهز اغراضي من غير ما الفت انتباه احد خصوصاً نور لان ادري بيها اذا عرفت بسالفة سفري ما راح تتركني بحال سبيلي وانا هم يالله لازم اجهز جنطي فكلت اجهزهم بهدوء ومن يحين موعد السفرو بوقتها راح اخبر نور ما يكون كدامها وقت او مجال تحاول وياي اغير رأيي لذلك البارحة من شفت مهيمن رجع للبيت وهو معصب نار لان متعارك وية سجاد عرفت بلحظتها مهيمن رجع لوضعه الطبيعي وبدأ يستقر بحياته. كنت منتظرة اموره تتحسن ويستقر وبعدها ابلش بأجراء السفر اتصلت على عمو ابو سيف وشرحتله الموضوع كان عنده علم برجوع مهيمن بالسلامة ما كال شي غير بس كلمة تعبر عن اسفه .. حرامات كنت اتمنى تحققين وصية المرحوم عمج وتبقون كلكم سوية بس الظاهر القدر دائما له الكلمة الاخيرة بعدها اتفقت وياه على ترتيب اموري من مستندات واوراق نقل وكلي يحتاج كم يوم الى ان اخلص كل هاي المتعلقات الخاصة بكليتج وحصتج وغيرها من الامور لذلك انا قررت ارتب شغلاتي من هسة لان عندي كومة غراض يحتاجلها كعدة جنت احاول افكر بأي شي حتى لو كان بسيط اهم شي يكون يشغلني عن التفكير بمهيمن وبسفري كان المخزن بي هواي غراض تخص البيت ومن ضمنها جنطي الي حطوها هنا صرت اتوغل بين الاغراض واسحب منا واجر منا وجان الكة مجموعة الجنط الخاصة بية جانوا البنات مسفطاتهم على شكل برج وحدة فوك الثانية تذكرت جلال يوم وصلت وية جنطي كان يضحك ويكول عليهم قطار ونرسمت ابتسامة حزن عريضة على وجهي شفت على الجنط حاولت اصير شاطرة ورحت سحبت خامس وحدة كلت اسحب من النص وحدة وحدة حتى ما يوكعون بعدني ما لحكت اسحب وما اشوف الا مجموعة الجنط واكعة فوك راسي الحمدلله كانت فارغة بس وحدة منهم ضربتني بكصتي احس راسي كام يفتر والدنية ظلمت بعيني ونفسي انكتم من ورة تل الجنط الي وكع على علية وبعد ما اعرف وراها شصار بالضبط بس كل الي حسيت عليه بعدين اني متمدد على ظهري بين الجنط وايدين خشنة تضرب على خدي حتى توعيني وماي ينرش على وجهي مغرك ملابسي عبالك مطلعيني غركانة من المسبح فتحت عيوني وجان اشوف وجه مهيمن كلش قريب على وجهي علامات القلق مرسومة على وجهه ولازم بيده طاسة ماي انيت بصوت واهن .. ااااي راسي سألني.. شنو جنتي تسوين بالمخزن مثل الحرامية ؟؟ جاوبته واني اتحسس راسي .. جنت ادور على جنط....... جنت احجي واني اتلمس براسي حسيت اكو ورمة بكصتي قطعت كلامي وشهكت بخوف .. هاااااي شنو انتقلت نظراته لكصتي وكال .. هاي طلعتلج عنجورة الظاهر الجنطة واكعة على كصتج سألته مرعوبة واني بعدني متمدد على ظهري .. ششنو عنجورة لا عفية لاتكولها يعني وجهي تشوه وراح يطلعلي كرون ابتسم ورجعت عيونه تعاين اوجهي يتمعن بتفاصيله جاوبني .. لاتخافين حلوة اصلاً صرتي جنج غزالة صغيرة وجاي ينمو گرنها رمشت بعيوني مستغربة كلامه هسة هذا شنو اعتبره ذم لو اطراء رفع ايده يتلمسه وسألني .. تأذيج ؟؟ هزيت راسي بدون صوت (اي ) انتهبت لوضعنا كنا كلش متقاربين من بعضنا وعيونه كانت تسرح وتمرح على معاني وجهي عبالك يريد يرسم لوحة ما اعرف ليش گلبي نسى يخفق بصورة صحيحة وضاع عليه انتظام نبضاته سألني .. تحتاجين اخذج لدكتور انتبهت عليه يحجي وياي بصوت هامس باوعت منا ومنا وسألته بنفس مستوى صوته الهامس اقلده .. انت ليش دتحجي وياي بصوت ماصي وتهمسلي عبالك بلحظة حميمية انا كلت هيج وما اشوف الا مهيمن طفر من مكانه منتبه على روحه ووكعت علية طاسة الماي البارد وشهكت متفاجئة وهو يلعن .. الله يلعن بليسج شنو من السان عندج الماي وكع علية عدلت كعدتي وكبل رفعت مقدمة بجامتي من على صدري بصورة تلقائية والي لطشت علية لان تبللت وشفته هو انتبه على حركة ايدي وظل صافن على المكان واني حسيت بالاحراج صحت بي ..هيييي لك هاي شسويت سبحتني نهضت من مكاني دايخة واتعثرت بخطواتي هو گبل سندني وجاوبني .. حمدي ربج وشكري ما شمرتج من فوك من ورة السانج المزروف جاوبته .. لسان مزروف احسن من عقل شاطح .. شنو قصدج بكلمة شاطح ليش مو انتي الي كلتي لحظة حميمية بالله رحمة لاهلج ما ترجمين شنو معناها بقاموسج زاد توتري من قربه علية وسؤاله دفعته من صدره وانا ابتعد عنه رفعت حاجبي .. ترة واضحة ميحتاجلها علم تركته ورحت اخذتلي جنطتين كانوا فارغات اما البقية منضودات بالغراض والحمد لله هو ظل واكف بمكانه بالمخزن ونزلت بيهم جوة اتفحص البيت هدوء شكلها حور بعدها نايمة دخلت للغرفة وبلشت اصفط بغراضي واني عقلي راح يم مهيمن طول هاي الفترة الفاتت كنت اراقب تصرفات مهيمن كان موجود يمنا جسد بلا روح انتبهت عليه بأخر ايام صار ما يتواجد بالبيت ويرجع بنهاية اليوم كانت تصرفاته كلش غامضة ما اعرف بشنو يفكر وشنو ناوي يسوي ولا اريد اعرف اهم شي عندي هو سالم وما بي شي اما حياته خططه مستقبله اني مالي دخل بيهم ولا اريد افكر بي كنت كلما التقي بي بالصدفة تتلاكة عيوني بعيونه الاحظ بعيونه كلام احس بي يريد يتقرب لي ويحجي وياية بس اكو حاجز يمنعه يقترب مني كنت اصفط بملابسي بالجنطة ودخلت نور للغرفة واول ما دخلت باوعت لجنطتي ولغراضي وسألتني وهي مصدومة .. ريم هاي شنًو جاي تحضرين جنطتج لاتكولين قررتي تسافرين جاوبتها .. اي نعم صار لازم اسافر هاي هي مهيمن ورجع بالسلامةً وان شاء الله جلال لاحگه ويرجعلكم بعد ماعندي عذر لبقائي هنا .. لج ريم شلون نهون عليج تعوفينا وتسافرين .. عفية نور لا تحجين هيج وتكملين علية ترة انا كوة لازمة نفسي من غير كل شي گلبي خلصان وشايلة هم لفراكم كلش صعبة علية اعوفكم واروح ما اعرف شلون راح اكدر اتعود على حياتي بدونكم .. ريم انتي اذا تحبينا مامجبورة تسافرين .. للاسف مهيمن ما بقالي سبب حتى اتمسك بي وابقى حرگ كل الجسور بيني وبينكم وماخلى خط رجعة صدمني بفكرته الي ماخذها عني ترة صعبة واحد يجيج ويكولج لاتسممين افكار اختي بسوالفج الي جايبتهن من الخارج يعني بين قوسين لاتخربين اخلاق اختي باخلاقج التعسة .. بكل ضني وقوع مهيمن بيد داعش خلاج تتراجعين بقرار السفر وتبقين يمنا .. لا نور ما كو شي اتغير بس كل ما بالموضوع ان مسألة سفري تأجلت مو انلغت وهسة بعدما مهيمن رجع بالسلامة واستقرت اموره بعد وجودي هنا صار ماله داعي ولا تنسين ترة انا لو لا الصار بجلال ومهيمن جان هسة انا مسافرة للخارج ومستقرة بشقة صغيرة لوحدي وية اسيا اباوع لنور كامت تحوم فوك راسي احتارت شلون تقنعني اغير رأيي .. زين انتي مو تكولين احب مهيمن يعني معقولة هذا الحب الموجود بكلبج ما يشفعله ويخليج تسامحينه على كلام كاله بلحظة غضب ترة الواحد منا بساعة العصبية كل شي يبدر منه .. انا صحيح احبه واعرف اليحب لازم يسامح محبوبه بس للاسف اخوج اصلا طلع ما معترف بحبي اله ويتصوره مجرد حب ابوي بسبب شبهه بعمو مؤيد اوك ما اكذب انا صحيح احبه لان يشبه عمو حبيت حرصه علية حبيت الامان الي يحيطني بي مثل عمو بس رجفة گلبي ولهفتي لقربه ووكلبي الي ينتفض من بمر طاريه. كل هاي الامور بعيدة كل البعد عن حٍٍِْــًبٌٍـــِٓېٍٓ لعمو مؤيد حٍٍِْــًبٌٍـــِٓېٍٓ اله لهفة بعشگ ماله علاقة بحب عمو بس مع الاسف مهيمن استهان بحبي واستخدمه ضدي ترة الحب يصبح مكروه اذا صار. بي مذلة واهانة للحبيب اكثر من هيج بعد ما اكدر اتنازل كنت احجي وكلبي ينعصر الف مرة وانا اشوف دموع نور الي نزلت بقلة حيلة وبعدما عجزت تغيري رأيي اقتربت مني وحضتني وكالت بمحاولة اخيرة .. ريم تتذكرين مرة من كلتيلي وعدت عمو حتى اسعى بلم شمل اولاده واقربهم لبعضهم .. اي صحيح قطعت وعد بس ... قاطعت كلامي وكالت .. لعد وينه وعدج ليش بسرعة تردين تتخلين عنا وتعلنين الانسحاب من اول هبت ريح غمضت عيوني متهربة من الاجابة وكفت عاجزة كدام سؤالها دموعي لالت بعيوني وجاوبتها وانا ادور بعيد عنها .. تكدرين تكولين وعدي جان امنية اتمنيت احققها بس مع الاسف ليس كلما يتمنى المرء يدركه اترجاج نور لو تحبيني كوليلي روحي لان هالشي من مصلحة مهيمن ومصلحتي خلي هو يتحرر ويرتاح من مسؤولية ريم وانا بنفس الوقت اتعلم اشوف حياتي بنفسي ولوحدي كانت الكلمات جافة وهي تطلع من بين شفايفي ليش هي اكو حياة بدونهم مهيمن اتصل علية خالي حسن وطلب مني احضر بالديوان يمه الظاهر مجتمعين هو وخوالي اكيد السالفة بيها خالي ابو سجاد وابنه العار وانا بالطريق جنت رايح مشي ما اخذت سيارتي لان مضيف خالي حسن يصير بنفس بيته عازل من بيته مساحة ومسوي بيها ديوان خاص بس لكعدات العشاير والفصول ومرات يجتمعون الشيوخ عنده دك نقالي وكان المتصل حيدر صديقي رديت عليه .. الو هلا حيدر گواك الله .. گوى الله حيلك بعدها فاجئني بسؤاله .. اكلك مهيمن صاحبك المخبل يمك ؟؟؟ جاوبته مستغرب.. منو قصدك على عناد؟؟ جاوبني بستعجال .. اي هو عناد ماكو غيره مخبل بالعشيرة .. شنو شبي عناد ؟؟ .. مثل الثور الهايج اتعارك وية امي وابوية لان يردون يزوجونه بنت خالي وهو معند وراكب راسه ما يريد يتزوج بعد انت تعرف بصاحبك من عهد وفاة كرار اخوي الله يرحمه وهو رافض شي اسمه زواج عبالك يعاقب روحه وامي وابوي صار شغلهم الشاغل يردون يزوجونه ويفرحون بي كلام حيدر حسسني بالذنب اتجاه عناد واهله مااعرف ليش حسيت احنا السبب ورة تأخير قسمة عناد لان الاستاذ حظه العاثر اول ما راد يتزوج وكع اختياره على اختنا طلب ايدها من عدنا مرتين بالاولى انا عرضتله ورفضته خليته يدعم وبالمرة الثانية جلال رفضه و طفشه وخلى الرجال يكره شي اسمه زواج عمي حقه طلعت روحه وصارت بي خوفة من سالفة الزواج ماكو رجال يقبلها على نفسه مرتين ينرفض من نفس البنية ونوب خطية اهله عبالهم متعقد ما يريد يتزوج بسبب وفاة اخوه جليت صوتي وجاوبت .. انطوه مجال لاتضغطون عليه هسة هو وين الاستاذ ؟؟ جاوبني حيدر .. ما اعرف وينه هو انا ليش اتصلت عليك وسألتك عنه لان من اتعارك وية الاهل اخذ غراضه وهويته وطلع من البيت معصب وهسة احنا صارلنة ست ساعات نتصل على نقاله ما يرد علينا كلت اكيد هسة الكاه يمك او اعرف اخباره منك .. لا والله ما اجاني ولا اتصل علية اليوم كله وهاي مو من عوايده يخلص اليوم وما يجي يمي .. بالله رحمة على اهلك ما تتصل عليه وتشوفه النا وين ولى لان حضرته ما يرد علية .. هسة اتصل واشوفه وين راح انهيت المكالمة من حيدر وطلعت رقم عناد بالنقال وصرت اتصل عليه وما رد مرة مرتين بالاخير اجاني صوته يكطع الشبكة كلمة اسمعها وعشر لا .. الو عناد تسمعني .. اي .. اي. اسمعك .. متكولي انت وين يا اخي اهلك حاركين الدنيا عليك جاوبني .. خلهم هم دومهم حارگين الدنيا على عناد .. گلي انت وين. خلي اطمنهم جاوبني .. مهيمن انا بالطريق مسافر للموصل جمدت بمكاني مفزوع .. ولك عنيد خايب صدك تحجي لو تجذب .. اي والله هسة انا بالطريق اوصل شاحنة مجهزة بالمساعدات هناك للموصل وجاي امشي وية رتل شاحنات وكم سيارة عسكرية للحماية والله الحافظ جان يحجيها بكل بساطة هزيت راسي وابتسمت وكلتله.. والله العظيم احلف عليك انت مخبل تجي وتذب روحك بالنار بدون مقدمات عايف امك كلبها عليك مثل النار جاوبني.. يا اخي اذا بقت السالفة ورة امي تاليتي تلكاني كاعد بالبيت الف كبة وياها خليها ترتاح هي والحجي ماعندهم سالفة غير عناد شوكت يتزوج والله كون تسمعهم من يحجون عن معاناتهم وية زواجي يحسسونك كأن قضايا العالم متوقفة كلها على زواج عناد ابوي اكله سكرك لا تاكل حلى مو زين عليك يكلي سكري كله من وراك انت الي ترفع السكر عندي مو الحلى امي اكوللها خففي شوية وزنج. السمن مو زين عليج تكولي كله من وراك ومن ورة قهرك تعرفني من انقهر واضوج اظل اكل ومن هيج سمنت مسويني حايط انصيص اتخيل ابن حيدر استلم النتيجة وطلع راسب اشو الكل داروا علية وصاحوا كله من وراك الولد رسب لو متزوج وملتهي وية مريتك جان ماكعدت وية ابن اخوك تلعب وياه بلي ومسويله واهس على اللعب ويعوف دراسته بالله هاي شحطلها وتطيب .. والله حاس بيك عندي من هذا النموذج بس اخذها بالعيني والاغاني .. خاب شوف مهيمن شيحجي ولك هاي امي مو ياهو الجان انت شايف امي من تسوي علية صولة الفرسان بنص البيت وتشحن ابوية والله متأكد من تسمعها راح تكول حرامات هاي المرية مكانها بهذا البيت المفروض يحطوها عضو بارز بمجلس النواب وروح المرحوم ما اطلع عناد وابن ابوية اذا مو يوم ثاني تلكاها معزلة المجلس بليلة ظلمة وتخلي طشارهم ماله والي ..الله يحفظها الك بس سفرك للموصل مو حل لمشاكلك هذا عقاب لامك ولابوك تريد تروح للموت جر حسرة وكال .. مهيمن كلي شلون ما اروح بطريق الموت وانا كل يوم اشوف بعيون امي وابوية نظرات عتاب ولوم غير منطوق ما يكدرون يحجونه كدامي انا متأكد بينهم وبين نفسهم يحملوني مسؤولية موت كرار واليوم امي زل السانها وحجت بهفوة وكالت .. مو كافي انت اخوك الصغير راحت فرحتنا بي ليش تبخل علينا نفرح بزواجك تعرف مهيمن شصار بية من سمعت هذا الكلام اتمنيت كون انا بمكان كرار ميت بذيج اللحظة ولا سامع منها هاي الحجاية احس گلبي ينزف مثل مطعون بخنجر خليني اروح للموصل هناك بلكي تلوحني طلقة الرحمة وارتاح من عذاب الضمير اصعب مرض يوكع بي البشر هو عذاب الضمير مرض يشبه السرطان اثاره الندم بس ماله علاج ولاxxxx يشفي جان عناد يحجي معاناته وضيمه .. الله يساعدك وحقك بس على الاقل رد على اتصالاتهم .. ما رديت عليهم جنت محتاج ابتعد عنهم ما اريد ارد على اتصالاتهم خاف اسمعهم كلام يخشن خاطرهم وانا اعرف روحي لساني دومه يسبقني .. شلون حجي هذا بابا ما يصير لازم تنطي علم لاهلك .. اكيد انطيهم خبر بس كلت من اوصل للموصل اتصل عليهم واطمنهم حتى احطهم امام الامر الواقع وما يعارضون على سفرتي .. ولك انت شلون بيك يعني تبقى هيج راسك يابس شورك من راسك انا منا عقلي مشغول بجلال تجي انت تزيدها بسوالفك والله عقلي من وراكم راح يطلب لجوء ويهج مني .. لاتخاف علية ما يصير بية شي انت سامعلك بشر يموت مرتين گلبي انمرد عليه هذا عناد اذا هاج بي الحنين لاخو يكعد يلوم بروحه .. بالله شو بلا حجي ماصخ طلعت اضرب من امي هي هم هواي تنعي حظها مثلك غيرت الكلام واتفقنا من يوصل للموصل ينطيني علم انهيت المكالمة وانتبهت لروحي بعدني واكف بالشارع والله ياعناد كلمن ضيمه شكل هذا يحس بالندم لان خسر اخوه وانا الندم ياكل بروحي خايف لا اخسر اخوي بسبب استهانتي بي دك نقالي وجان المتصل طالب ابن خالي يسألني .. يا اخي وين صرت اشو اتأخرت عمامي وابوي ينتظرونك .. هذا انا اجيت يمكم بالباب دخلت عليهم بالديوان وسلمت ولكيت خوالي واولادهم كلهم موجودين. حتى سجاد وابو موجودين رحت كعدت يم خالي حسن صحت الله بالخير ردوا .. الله بالخير وهلة باوع علية خالي وربت على رجلي وكال .. شنو هذا الخبر الي سمعناه .. وشنو هو الي سمعتوه ؟؟ .. سمعنا ناوي تسافر للموصل هناك شنو الموضوع .. ماكو موضوع يعني كل امة محمد اتطوعوا وراحوا يحاربون بالموصل وانت اثنين من ولدك منتصر ومنتظر اتطوعوا قبل شهرين ومنتظرين يردون يسافرون .. افتهم بس انت سالفتك تختلف ما تكدر تتطوع .. ليش بوية شناقصني ايد رجل .. لا بس انت ما عندك احد يخلفك بأهل بيتك من بعدك بس ولدي اتطوعوا عندهم من يلزم البيت من وراهم انا وطالب ومؤمل ماجد باوعتله بتفكير وجاوبته .. الله موجود ما يترك عبده انا عايفهم برعاية الله خالي جاوبني .. والنعم بالله بس يابعد خالك هذا مو حجي ربك انطاك عقل حتى تعرف تتصرف بي انا اعرف خالي حسن وين يريد يوصل بهاي اسألته وانا بقيت مصر اجاريه .. شبيدي عليهم هذا حظهم وهاي قسمتهم خالي جاوبني وكال .. لا بيدك عليهم ما دامك انت هيج معند وراكب راسك ومصمم الا تسافر للموصل زين شنو رأيك تزوج اختك حور لسجاد ابن خالك وهو ميت حتى يتزوجها واليوم اجاني هو وابوه وطلبوها مني ووكعوا بركبتي حتى احجي وياك بسالفة حور هم انت تأمن على اهل بيتك وهم هو ابن خالك اولى من الغريب وعينه عليهم ويدير باله على البيت مو احسن ما تصير مثل سالفة اختك نور بيوم اجة هذا الملعون رجل خالتها وخالتها يردون ياخذونها علمود حلالها وهي البنية لا حول ولا قوة ما لكت احد يشفعلها غيرنا احنا وصاحبك الله يرضى عليه كمل كلامه وهو يباوع علية بأهتمام .. هَـا هسة شنو كلت موافق حتى نقراً الفاتحة جاوبت خالي وانا رافع راسي بكل فخر وكلتله بصوت عالي اريد الكل يسمعني من احجي .. خالي انا اعذرني يعز علية ارد طلبك بس اختي حور مخطوبة عقد حواجبه مستغرب وسجاد كمز من مكانه وسألني .. المن مخطوبة وشوكت انخطبت اشو محد عنده علم بهاي السالفة عاينت لسجاد بكل برود وكلت .. حور مخطوبة لاخوية جلال قربان. خالي كلي .. معقولة انت مهيمن تكول هيج حجي شلون انطاك گلبك تفرط بأختك لهيج واحد عار على الزلم .. ما اسمح لاي واحد يجيب طاري اخوي بالشينة ما دامه هو ما موجود يدافع عن نفسه اذن محد اله حق يكعد يتفلسف جنت احجي وكوة لازم روحي لا احجي بسر اخوية وساعتها عرفت شلون جان شعور جلال بيوم كلنا درنا عليه وصرنا ضده وندينه بأفعاله انا هسة مجرد سمع وانا اعرف بأخوية بطل اتمنيت اكوم اخنك سجاد وادوسه جوى رجلية بس ما علينا لا بد ويجي اليوم ويظهر ضوة الحق سجاد نطت عيونه وصاح .. تريد تزوج اختك. لواحد زايعته الدنيا ويشتغل وية الدواعش. صدك انت مخبل مو عاقل عاد انا هنا رايدها من الله على الله هديت عليه وزنكته .. خاب دتعال ماكو واحد زايعته الدنيا مثلك يتبع احداث البارت القادم نور گلبي انتفض وعيوني راحت على مهيمن متفاجئة من سؤاله مهيمن .. هَـا هسة شنو رأيج اي لو لا | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
3Likes
العرض العادي
