البارت الرابع
دخلت الحمام تاخذ لها شاور يبرد عليها بعد أول يوم دوام من وفاة أبوها وأمها ..
وجالسة تفكر بينها وبين نفسها : ياربي هاذي أول مرة راح احس ان عندي أهل .. عندي بنات عم .. طيب يمكن يستحقروني ! .. لا لا ايش هالفكرة لو يستحقروني كان ما اتصلت آ آ .. ايش اسمها ؟! .. ايه ايه فاتن .. ياربي اللحين مع معاناة حفظ الأسماء ..زهايمر استغفر الله لا اتفشل معهم بس واتخربط بأسمائهم أو أجيب لهم أسماء من راسي
طقت باب غرفة جواهر .. مرة .. مرتين .. ثلاث ... ماترد
ساره : اففففف جواهر لا تحقرين
ماسمعت رد
ساره بصوت عالي : بفتح البااااب
دخلت ماشافت جواهر في الغرفة
ساره : وين انقلعت هاذي ؟!
انتبهت لنور الحمام
توجهت له وطقت طق قوي
جواهر انفجعت : بسم الله .. شصاير هجوم الحرب العالمية الثالثة!؟!!
ساره : يلاااا الغذاء قريييب راح يجهز
جواهر : طيب طيب
ساره : عجللييي لا تطولين
جواهر : اوك
ساره : مو تفقعين مرارتي ماتنزلين!
جواهر : اووووووووه ترا هذا بيت الراحة مو بيت الازعاج .. وانقلعي خلاص خليني أكمل الشاور براحتي
ساره : ان جهزوا السفرة وانت بعدك ماتنزلين ... (توهقت)راح .. راح .. راح أكسر عليك الباب
جواهر:لا ما أقدر على ذا هولك أنا .. طيب خلاص يمديني أجهز لين تحطون السفره لاتخافين ادري عنك ماتقدرين تحطين في فمك لقمة وانا العسل مو قدامك .. يلا انقلعي خليني اغسل شعري
ساره: ذا هولك زوجك .. هههاي من مكذب عليك وقالك هالكلام .. ويلا نظفي قبيلة القمل الا براسك
ومشت قبل لا تسمع رد جواهر وطلعت من غرفتها
(تحت)
ام يوسف : وين بنت عمك ساره؟
ساره:تنظف قبيلة القمل الا براسها
ام يوسف:هاه؟!
ساره : قصدي تاخذ لها شاور شوي وبتخلص
أم يوسف: وانتِ ما تجوزين عن هالكلام مع بنت عمك
ساره : والله هي تلعب بأعصابي وتقهرني .. أجل ترضينها انا ذا هولك؟!!
مشعل انفجر ضحك : هههههههههههههههه أول مرة تقول بنت عمك شي صحيح
أم يوسف: ايش ذا ذا هولك ؟
مشعل يضحك : خالد حرااام عليك ماتعرف اسم بنتك .. الرجل الأخضر ههههههه
أم يوسف معصبة : مشيييعل .. تأدب ايش خالد مع وجهك .. والله صدق أبوكم الواحد مايعطيكم وجه أجل تحرفون اسمي من خلود لخالد ... ويلا تأدب انت وبنت عمك شنو بنتي الرجل الأخضر .. مو مالية عيونكم كل هالأنوثة
ساره مندهشة : آوب أوب أوب .. شصاير راضية علينا الغالية .. ان شاء الله دوم مو يوم
مشعل : خالد اعترفي ..ايش سوت سوير عشانك تدافعين عنها ؟!!
ساره : اووووف مشعل لاتناديني بهالأسم ينرفزني
مشعل: مو لازم يعجبك
أم يوسف : اففف لا تبدوا هواش ... لا بس اذا ساره الرجل الأخضر وهي بنتي أكيد أنا المرأه الخضراء
مشعل : ههههههههههههههههههههههه يعني مو دفاعا عن سوير دفاعا عن نفسك ههه!
ساره تفجرت جبهتها : أفا ... كذا؟ تخلين العواذل يشمتون فيني ؟!
أم يوسف : الله يهديكم بس .. ربي بلاني بطقم مستشفى مجانين عندي .. قومي بس الله يهديك قومي اصعدي شوفي بنت عمك
ساره تتصنع الحزن والألم : مابنكسر صابر لو فرصتي تمضي .. والحظ لو عاثر بصنع أنا حظي
مشعل : نشااااااااز .. تكسرين بخاطري كيف عندك أخ عنده حنجرة ذهبية مثلي (ويأشر على حنجرته) وانت صوتك يطلع من أنفك هالأفطس
ساره انقهرت : افففففف روح عني يا مغرور ..
مشت عنهم شوي ولفت له : انت انفك انف بينلوبي!
طق طق طق طق
جواهر : اففففففف وجع خلاص قريب وأخلص
ساره وهي منقهرة : ولد عمك ذا يبغاله شنق حتى الموت
جواهر : ههههههههه ليش شسوى لك ؟! .. تكفين فكينا منه واذا تبين مساعدة حاضرين
ساره : يقول عني ايه ذا هولك وانفي أفطس (وتمسك انفها تتحسسه)
جواهر انفجرت ضحك : ههههههههههههههههههههههههه هههههههههههههه لا ماصدق أول مرة ولد عمك يقول شيء صحيح في حياته
ساره : ياااا سبحان الله .. نفس كلامه عنك
جواهر سكتت شوي : مالت عليه
ساره : المهم ماعلينا اذا خلصتي انزلي اوك؟
جواهر : اوك عشان انفك الأفطس الحلو بس
ساره بقهر : اووووووه
جواهر : ههههههههههههههههههههههههه هههه
ساره طلعت من الغرفه
مشعل يناظر ساره وهي تنزل من الدرج : وينها الأميرة ديانا مو معك؟
ساره : تاخذ لها شاور
مشعل :لا هذا مو شاور تتاجر بمخدرات هاذي .. شوي وبيجهز الغذاء
صوت الباب الرئيسي ينفتح
دخل وهو لابس الابكوت والمفاتيح وجواله بيده .. نزل النظارة الشمسية من عيونه وبابسامته الي ترد الروح كالمعتاد : السلام .. شصاير عندكم ؟
ساره : ياهلا ومسهلا بدكتوري .. بطيب جروحي .. ببلسم روحي
مشعل بدون تعابير : صاروا يقولون فيك اشعار بعد
ابتسم وفسخ نظارته وعلقها في جيب الابكوت : ياهلا بأحلى أخت في الدنيا .. يا هلا بشمعة البيت .. ياهلا باللي في قلبي حطيت .. ياهلا بلي في كل ثانيه لها أنا حنيت
ساره :يااااااربي احم احم .. مو بعدين تتزوج وتقول هالكلام لزوجتك وانا تطنشني
يوسف : لا شدعوة.. انتِ لك كلام وهي لها كلام .. ما ازعل الحلوين أنا
مشعل بإستهزاء : ههه هيــهــات
ساره تسوي لمشعل مالت : تعلم مالت عليك ماغير تهاوشني في الرايحة والجاية على الي يسوى والي مايسوى
مشعل : ظفي وجهك بس .. اخر زمن ادلع بزر
ساره :بزر مخك ترا الفرق بيني وبينك سنتين بس
يوسف يقاطعهم لانه يدري لو ينتظر لبكره الصبح ماراح يخلصون هواش: وينها جواهر؟
ساره ومشعل في نفس الوقت
ساره : تنظف قبيلة القمل الا في راسها
مشعل : تتاجر بمخدرات
يوسف وهو يناظرهم وهو مستغرب ويضحك : هههههههه شفيكم على البنت؟! تهجمون عليها
مشعل : صار لها سنة ضوئية في الحمام وشوي والغذاء يجهز .. وأبوي ماراح يكون معنا على الغذاء ومايبيها تستغل هالشيء وماتنزل تتغذاء معنا
--- --
تناظر نفسها في المرآيه .. وقطرات الماي تمشي على جسمها .. شعرها البني المتوسط الطول المبلل ..وعيونها الواسعة الخضراء حولها رموشها المبلله .. خدودها الا صارت وردية من بعد الشاور الا اخذته .. كانت لابسة روب وردي سادة نص كم .. ويوصل لنص الفخذ .. أخذت المنشفة الي على كتفها وجلست تنشف شعرها
طق طق طق طق طق
رمت المنشفة على الكرسي بقهر .. ساره عجولة ماتصبر .. طول اليوم وهي بس تطق في هالباب
توجهت للباب وفتحته : اووووووووف خيييييير شصاير فجرتي راسي وانت تطـ............
فــهـــت .. تصنمت في مكانها ... الدم تجمد في عروقها .. وقلبها تخربطت دقاته صارت تحس بنبضها في راسها .. انقلبت أرضها سماها وسماها أرضها
تجمد .. ماتحرك .. تنح على شكلها الكيوت .. حاول يشيل عينه عن هالملاك الا قدامه بس ماقدر .. نبضات قلبه صارت ترقص سامري .. ماعرف كيف يتصرف .. بس اكتفى انه يناظرها
سكرت الباب بقوة بعد الفهاوة الا صابتها
وسندت ظهرها على باب غرفتها وهي تحاول تلفظ أنفاسها من الخجل
سند جبهته على باب غرفتها وطق بهدوء على بابها
: جواهر
جواهر :............................
: جواهر أنا آسف .. كان المفروض انزل عيني .. آسف لا تزعلين .. بس كنت أبي أقولك ان الغذاء جاهز
انتظر شوي ماسمع رد فـ مشى
سمعت صوت خطواته تبعد .. تنهدت وعدلت وقفتها : اففففففف والله انا غبية كيف افتح الباب بدون ما أسأل من .. ياربي كسر بخاطري تأسف وانا الي غلطت مو هو ..
وهو يتجه للطاولة الطعام وباله في عالم ثاني
تفحصه مشعل بنظره حاده شفيه ذا منقلبة علومه
جلس على الكرسي : اللحين بتنزل
مشعل : شفيك متنح ؟
يوسف رفع راسه لمشعل : هااه ؟ مين أنا ؟ .. لا أبد
مشعل رفع حاجبه وبعدم تصديق : وااضح
نزلت وهي متفشللللللللة بقوة من الي صار .. بس لازم تنزل مجبر أخاك لا بطل
بصوت كله خجل : السلام
الكل : وعليكم السلام
أم يوسف : تفضلي ان شاء الله يعجبك الأكل ونعيما
بتوتر : ايه اكيد الله ينعم عليك
تدور لها مكان تجلس فيه مستحيل .. مافيه الا ان تجلس في مكان عمها .. او تجلس جنب يوسف
مشعل لاحظ توتر جواهر .. قام من مكانه .. ومر عليها وبصوت واطي : اجلسي مكاني .. لا تذوبين !!
اشتعلت قهر وخجل في نفس الوقت .. بس حمدت ربها ان مشعل لأول مره .. يتنازل لها وتجلس مكانه
جلس جنب يوسف وهو يبتسم ابتسامه خبث
لا مفر كنت بجلس جنبه اللحين صرت قباله .. بس يلا اهون
يوسف يحاول مايناظرها .. يخاف يحسسها بخجل وماتاكل او تقوم
مسكت الملعقة وهي ترتجف .. تحس فيه نظرات تراقبها .. لمت شجاعتها ورفعت راسها تشوف مين يناظرها .. وجهت نظرها ليوسف بس مو هو الي يناظرها ..... مشعل! شيبي ذا ليش يبتسم هالابتسامة الخايسة !!
ابتسمت له بدون نفس وبابتسامه سخرية
انقهر منها ومد رجله بأطول قدر يمكن وداس على رجلها
كتمت الصرخة وبالغلط بردة فعل من حركة مشعل لا اراديا ضربت رجل يوسف
يوسف استغرب ناظرها
ناظرته بتوتر وخوف وخجل ..وعلطول نزلت عينها ..وجلست تتأمل في الأكل
ناظر مشعل .. كان يبتسم بخبث وانتصار
بصوت واطي : شصاير؟
مشعل ومازاح ناظره عن جواهر وابتسامه الخبث ما انمسحت : شصار فوق؟
يوسف بنرفزة: ايش قصدك؟
مشعل لف وجهه لجهة يوسف: قصدي واضح .. انت من نزلت وانت في مكان وبالك في مكان ثاني .. وجواهر حالتها صعبة متوترة
يوسف طنشه وقام : الحمدلله
ام يوسف : وين ؟ ما خلصت نص صحنك؟!
مشعل بإستهزاء : اكيد تفكيره مو بالأكل اللحين .. (وهو يرص على اسنانه بخبث فوق المعدل) تفكيره بشي ثانيييييي
جواهر ناظرته بإستغراب .. ايش يحس فيه هالنذل
يوسف تنهد وطنش كلامه : لا بس شبعت .. وأبي اصعد اريح شوي
مشعل : ريح ريح .. بس حاول ماتفكر كثييير بعدين ماتنام (وناظر جواهر )
يوسف يتظاهر بالبرود وهو داخله بركان بينفجر اذا ما صعد اللحين
طنش كلامه ومشى بسرعة للدرج وصعد
مشعل اخذ كاس العصير وجلس يشرب فيه .. توجهت نظراته لا اراديا لنظرات جواهر الليزر له.. وهو يشرب ..غمز لها
كانت ملانة حدها لابسة بجامتها الكت سبورت لونها أزرق وشعرها الأسود الطويل الحرير مفتوح و متناثر على المخدة وكتابها الكيمياء مرمي على حضنها زينة .. مالها خلق تذاكر وبكرة اختبارها ..
أول مافتحت أختها الباب
فاتن : ميثان ايثان بروبان بيوتان بنتان هكسان هبتان اوكتان نونان ديكان
جميلة مفجوعة : ايش تحضير الجن هذا الا تذاكريه !!
فاتن : هه تراك درستيه لما كنتِ في ثالث
جميلة فتحت خزانة ملابسها : اممممم ماذكر
فاتن عدلت جلستها : ايه ومو انتي تذاكرين بس حق الاختبار بعدها تطلعينه من مخك
جميلة : آها وبعدين شبستفيد منه اذا بقيت أذكره ؟ .. وحتى انتِ تذاكرين للورقة بس
فاتن : انقلعي زين .. مع استاذتنا البايخة .. (وتقلدها بصوت مخنوق) : يا بنات لازم تدرسون زين انا مستحيييييل مستحيييل مستحيييل اعادل درجات الطالبة الشاطرة بالكسلانة .. أنا أبدا أبدا ما اسوي كذا .. طبعا لازم مع طالق المستحيل الثلاثية تبعها
جميلة : ههههههههههه حرام عليكِ طول اليوم وانتِ تحشين فيها ضاعت كل حسناتك عليها
فاتن : شسوي قاهرتني .. أنا كفاية أكره الكيمياء وذي العفن بعد كرهتني فيه أكثر
جميلة وهي مطلعة فستان أحمر قصير لفوق الركبة ومنفوخ من عند جهة الكتف وعند الخصر حزام ذهبي : يلا هانت بقى عليكِ هالتيرم بس وتخلصين مدرسة وهم الثانوي ... هاه شرايك ألبس هذا الفستان يوم الخميس؟
فاتن تأشر بصبعها انه اوك : يب حلو ... أول مرة يصير ذوقك حِلو
جميلة تحرك شعرها : بالعكس أنا دايم ذوقي حلو .. وإنتِ ايش راح تلبسين ؟
فاتن : ولا شيء
جميلة فاتحة عيونها على آخرها : بتروحين بدون ملابس؟!!!
فاتن رمتها بالمخدة : اتقي الله انتِ مع وجهك .. يا غبية أقصد ولا شيء في بالي
جميلة : هههههههههههه .. لا تسوين لنا الداعية الى الإسلام .. وفكري ايش راح تلبسين ترا بكره الخميس
فاتن : مو شيء مهم أنا الي يناظر وجهي تعمى عينه عن ملابسي
جميلة : لا إله الا الله .. أضواء نيون هوه
فاتن : نيون هو عنصر من مجموعة الغازات النبيلة ويرمز له بـ Ne
يستخدم في اللوحات الإعلانية وأنابيب المصابيح
جميلة وهي تسوي حركة الحمدلله والشكر : الحمدلله والشكر لك يارب على نعمة العقل .. خلاص ضمنت لك الدرجة الكاملة يا دافورة .
(" في مكان ثاني ")
طلعت فستان دانتيل أبيض قصير لتحت الركبة مكمم وعند الخصر حزام جلد بني ..:شرايك ؟
ناظرته بتفحص : لا ... ما يناسب أول مرة تشوفك بهذا الفستان .. ثانيا لبستيه قبل آخر جمعة مع البنات
ببراءة : طيييب .. شرايك بذا؟حلو صح ؟
كان فستان قصير لفوق الركبة لونه موف ويتدرج من فوق غامق لين شوي شوي يفتح وفي النهاية يكون أبيض .. ستايله مثل القميص الطويل .. مكمم وفيه حزام أسود عند الخصر
ناظرتها بنص عين : ايش هالفستان البايخ ؟! أول مرة أشوفه .. متى اشتريتيه ؟ .. حده يفشل .. مدري متى راح تعرفين تشترين ملابس مثل الخلق
ببراءة : اشتريته مع فاتن الخميس الماضي .. بالعكس حلو
ناظرتها بنص عين وبملل: انتِ وفاتن كل وحدة تقول الزود عندي في الذوق المخيس... بايخ مو حلو .. نيكست
: حرااام عليكِ مو عشان اذواقتنا تختلف عن ذوقك صار ذوقنا مخيس .. بعدين لولا اختلاف الأذواق لبارت السلع
تنهدت : أقول ملاك خلصيني بلا أحكام وأمثال و رويني الباقي
ملاك : شرايك بهذا ؟ اكيد بيعجبك .. حده جنااااان
كان فستان أحمر منفوش لفوق الركبة وفي الظهر فتحة على شكل قلب
بإعجاب : وااااااااو مررره كووول يهبل .. لازم اشتري مثله
ملاك بفرح: جِد ؟! خلاص ألبسه ؟! واخيراً عحبك ذوقي
ناظرتها بطرف عين : لااا .. مو حلو حق بزران
وقامت فتحت خزانة أختها وطلعت فستان دانتيل بينك منفوش بنص كم حيران (يمكن كذا اسمه الزبدة الا يكون مثل الي طايح على الكتف) وفيه جهة الخصر حزام فضي
عطتها اياه : البسي هذا
ملاك : اووووك .. وانت ايش الي بتلبسينه ؟
فتحت الخزانة وطلعت تنورة حمراء لفوق الركبة كلها ورود مو مطبوعة لا تقدرين تتحسسينها –الشرح منتهي- وقميص أبيض كت شيفون وتحته بدي أبيض
: هذا الي بلبسه
ملاك : ههههههه تحسين أحنا متحمسين بزيادة ؟
: هههههه ايه حسيت .. من يلومنا طفشت من مقابل وجوه بنات عمك الغبااار .. ابيي تغيير ..وطلعت لنا بنت عم جديدة .. وبنفس اعمارنا ههههه
ملاك : من جد هههههه
: اقول اتركي عنك هاللعب وروحي ذاكري لك كم كلمة في هالكيمياء يمكن تفلحين
ملاك بملل: افففففف والله مالي خلقه .. أحد يحط اختبار يوم الخميس؟! شوق حبيبتي انتِ .. اختي القمر انتِ .. حلي لي واجب الانجلش .. وانا اذاكر كيمياء عشان اخلص بكير ونشاهد فلم .. ها ؟
شوق:أنا قايلة بعد هالمدح اكيد مصالح .. تحلمييييين ... محد قالك تنامين نومة أهل الكهف طول الوقت .. بعدين تصحين الليل عليكِ مليون الف شغلة تحتاج وقت
ملاك:افففف منك.. ما منك فايدة .. اتصل لفاتن اشوفها اذا حلت انقش منها
(شوق جاسم .. عمرها 23 تدرس طب اسنان...بنت أخت عبد الرحمن ..قريبة مرة لجميلة ...شعرها اسود كيرلي بطبيعته يوصل لكتفها..عيونها سوداء حادة )
(ملاك جاسم...عمرها 18 سنة في ثالث ثانوي... هي و فاتن صديقات وعلاقتهم قوية..شعرها اسود حرير قصير لنص الرقبة ..عيونها واسعة بريئة ولونها عسلي ورموشها طويلة..خدودها وردية ..وبيضاء)
(" في مجمع الراشد")
مشعل : هيييي أبو سيف .. شرايك بهذا العطر؟
فيصل قرب انفه وبعده بسرعه : افففففف .. ريحته محمضة
مشعل : لا انت في انفك شي اليوم .. هذا من أفخم العطور ياحظي
فيصل : أي من أفخم العطور وريحته مثل ريحة عرق مجموعة هنود جالسين في مكان ضيق وحر
مشعل ترك العطر : الله يقرفك .. كرهتني بالعطر
أخذ عطر وقربه من أنفه : اممم... اعرف هالريحة
فيصل غمز له : هاااه تعرف هالريحة ! هذا عطر نسائي .. اعترف مشييييعل
مشعل : والله تفكيرك منتهي مثل وجهك .. لا من جد أعرف هالريحة
فيصل مشى عنه وتوجه لعطر .. عجبته ريحته .. لف لمشعل لقاه يتحسس ذقنه جالس يفكر
فيصل: خف يا محقق كونان ..باقي لك بس نظارة وتصير هو هههههه
مشعل : ايييييييييه تذكرت .. هاذي ريحة جواهر .. طلع ذوقها مو هين .. بربري سبورت حلو
فيصل : ايوه .. وانت تتشمم في بنات الناس
مشعل يناظر فيصل بقرف: والله انت اليوم يبغالك كف يعدل مخك المنتهي صلاحيته .. اترك هالعطر الخياس الي بيدك وخلنا نروح لزارا
طلعوا من المحل .. شاف بنت تطقطق بكعب أحمر قدامه .. وعباتها من فوقها لتحتها زينة .. حرام عليها اسم عباية .. مفروض نسميها _جلابية_ ومفتوحة يبان منها الجينز المخصر على جسمها .. لابسه حجابها بإهمال .. مطلعة شعرها من وراء وقدام مصبوغ اشقر وخُصل بينك .. لابسة عدسات لونهم أزرق ومكحلة عينها كحلة زرقاء من داخل .. وكحلة سوداء خارجية مادتـها كثيير بشكل غبي .. وحاطة لها روج أحمر قروي وباين انها تبي تكبر شفايفها غصب .. وريحة عطرها وصوت ضحكها يوصل لآخر الدنيا
مشعل يناظر فيصل بخبث: شرايك؟ أرقم هاذي اتسلى بها شوي؟
فيصل : تمزح ... اكيييد .. لا تفوت عليك هالصاروخ
مشعل بقرف: صاروخ يفجر مخك .. بالعكس اصطناعية من فوقها لتحتها ..(ابتسم بنذاله) بلعب بها شوي .. متشوق اشوف نهاية العلاقة كيف بتصير
تقرب لها : يا حلوووة...
لفت له ..انصدمت...وبدلع يقرف:هااااي
مشعل : أنا اشك انك بشر..بكل هالجماال والدلال ..ما شاء الله بس .. خقة
شقت الحلق بعد هالمدح وعلطول فتحت شنطتها وطلعت ورقة مكتوب فيها رقمها وعطته اياها
مشعل منصدم من حركتها .. لهدرجة بايعة نفسها ! .. او لهدرجة ساذجة بكلمتين حلوين يلعب عليها اخذها من عندها : اكيـ...........
كــــــــــــفـــ قووووي حرررق خده ..مسكه بقوة من طرف قميصه وبنفس اليد رجعها بقوة على صدر اخوه
يوسف وفي داخله بركان : مممممششععععل ... شهالحركااات !!! ... والتفت للبنت : وانتِ ماتستحين .. (وبصرخة أقوى ) ماتخافين على نفسكِ ؟!
البنت بخوف : لا تصارخ علي كأني أصغر عيالك ولا صدقني بقول لأبوي عن الا سواه اخوك
يوسف وبعده ماسك قميص مشعل : قولي له واقوله بنتك صايعة تعصي امرك من وراك .. اذا طلعت معاك لبست عباية الراس وغطت وجهها .. (وبحدة أكبر) واذا طلعت بدونك ماتخلي انس او جن مايناظرونها لانها متزينة من فوقها لتحتها
البنت خافت وبدت دموعها تنزل : لا لا يا يوسف .. ماراح اقول شي بس انت لا تكلم ابوي تكفى .. ابوس ايدك لا تقول له
يوسف في باله – استغفر الله ما اقدر اكون قاسي اكثر من كذا , وقتك تبكين .. لا لا تستسلم لدموعها – وبنبرة قاسية : انا قلتلك الي عندي .. العين بالعين والسن بالسن .. ويلا توكلي ولا عاد اشوف وجهك ...(سكت كان بيقول المقرف بس ماقدر) ذا مرة ثانيه
مشت بسرعة قبل لا يغير رايه
لف لمشعل الي حمر خده من قوة الكف : وبعدييين معك ؟ لمتى بترقم كلمن هب ودب ؟ تدري هاذي بنت جيرانا نجود ؟.. تبي تنفضح ؟ ... ابوهها هذا يدور أي زلة علينا وانت تدري!!
فيصل تدخل حاول ينزل يد يوسف بهدوء بس يوسف شد يده اكثر :خلاص يا يوسف .. اذكر الله.. الشيء مايستدعي هالكف !
مشعل بإستهزاء ويحاول يخفي نبرة الحزن الي بداخله : هه ! .. ليش خلـــه ! ....... مو أنا كيس ملاكمة له !
يوسف ترك قميص مشعل .. ومشعل يرتبه كأن مو صاير شيء وهو في قلبه نيراان محد يطفيها
يوسف بحنية : مشعل...آســف بس والله أبي مصلحتك
مشعل بابتسامة: لاعادي ..حياك ..(ويأشر على خده المضروب) أي وقت تبي تنفس غضبك خدي تحت امرك
يوسف كسر بخاطره اخوه: مشعل تكفى لا تزعـ
مشعل تنهد بقوة كأنه يطلع كل قهره في التنهيدة : اوك فيصل ..شرايك تعزمني على باسكن ..يمكن يكون بمثابة ثلج لهالصفعة!
مشى ..
فيصل : يوسف الله يهديك ليش ضربته هنا ؟! خليت الا يسوى والي مايسوي يشوفه ينضرب كأنه بزر ؟
يوسف: افففف مدري حسيت بقهر بداخلي ... وهاذي بنت جيرانا يافيصل .. مابي اخوي يصير لبان في حلوق الا مايسووا
فيصل وهو يمشي على وراء :وبحركتك هاذي ..ضربك لمشعل هنا... ما كانت قدام الا يسوى والي مايسوى؟!
وعطاه ظهره ومشى
يوسف : استغفر الله بس .. شسويت أنا !!؟ .. ليش سويت كذا؟... لا احسن متى بيترك حركات المراهقة هاذي الي بتضيعه؟
.......
(في غرفة ساره)
ساره : أوك خلاص يعني ألبس هاللبس ؟!
جواهر وهي تشرب عصير الليمون : يب يب .. تلقين بس أنا وانتِ الي مجهزين ملابسهم من اللحين خخخخ
ساره: هههههه تتوقعين ؟! ... والله كان أتبرى من نفسي
سحبت جواهر من على سريرها .. وانسدحت عليه : يلا طفي النور واعطيني مقفاكِ
جواهر : آفا آفا آفا ... أنا كِذا تطرديني ياسارونه ؟ ..(تمثل انها تبكي بهبال) ماهيقتها منك اهئ
ساره : اقول تمثيلك مثل وجهك ..وبعدين انا الي صابرة على طرداتك لي من غرفتك يحق لي لو مرة وحدة اجرب شعور اني اطردك .. يلا الباب يوسع فيل .. ابي انام
جواهر : اولا : الباب يوسع جمل مو فيل .. ثانيا (وهي تسحب في ساره مثل البزر) أنا جووعاانه قومي معاي ننقب عن أكل ناكله
ساره : افففففف نفس الشي فيل ولا جمل المهم حيوان مثلك .. أجل تبين تقوميني من احضان سريري عشان تملين كرشتك ... اذلفي الله لا يهينك ..يلا اذلفي من غير مطرود
جواهر : افففف منك ... طيب عادي أنزل لوحدي انقب عن أكل في ثلاجتكم الوسيمة البيضاء الطويلة ؟
ساره : آآ جواهر؟ متأكدة هذا الي بيدك عصير ليمون مو شيء ثاني ؟ أنا أول مرة اشوف وحدة تتغزل في ثلاجة .. وبلا سخافة ترا البيت بيتك انزلي وخمميي أكل الدنيا .. بس يلا برا من غير مطرود
طلعت وهي تتحرطم بصوت واطي : كيف تقول برا ومن غير مطرود .. تناقض
نزلت وهي تحاول تجرأ في نفسها
دخلت المطبخ .. فتحت الثلاجة .. : اففف مافي شيء عاجبني.. ياه وحشني الطبخ ..عادي أطبخ ؟ .. ايه خلاص لازم اتعود على بيت عمي
غمضت عيونها تذكر الكلام الي قاله لها عمها ماتدري ليش بس تحسه يمدها بطاقة عجيبة : ""الانسان احيانا لازم يدوس على قلبه ويشوف مصلحته .. ممكن يكون كلامي قاسي عليك بس هالدموع والألم مابيفيدك الشيء صار ومستحيل يتصلح أو يرجع مابيرجعه لا دموع لا ألم لا اشتياق"
فتحت الخزانة يمكن تجيب لها افكار ايش تطبخ : اييووووه ... باستا معشوقة القلب
طلعت المكونات وتحس نفسها هبلة وهي ماتعرف اماكن الاشياء والشيء الواحد سنة لين ماتشوفه وفي نفس الوقت تحس نفسها حرامية محد معاها وهي تحووس في المطبخ
جواهر بإنجاز: ايوووه واخيراً جمعت كل المكوناات .. ما شاء الله شركات المقادير مثل شركات المقادير الي يشتري منهم ابوي .. (ابتسمت بحزن وتحاول تستظرف مع نفسها ) يمكن جدي كان يشتري من نفس هالشركات .
حطت الباستا على النار
وجلست تحاول تفتح الجبن : افففف شذا ذهب مو جبن مسكرينه كِذا؟!
....:يُمكن أقدر أساعدك؟
لفت بسرعة وهي مفجوعة : بــســم الـله
يوسف بحنية : آسف .. خوفتك؟
جواهر في بالها (ياربي شصاير اليوم مواقف احراج مع هالبني آدم .. آسف ها لو مشعل مات ولا قالها ) : لا عادي .. بس كنت افكر اني الوحيدة الي تحت؟
يوسف اخذ العلبة من يدها وهو يفتحها : ايه .. بس انا و مشعل (تضايق تذكر الموقف الي صار ) برا البيت
جواهر بتوتر : آها .. الحمدلله على السلامه ( اييييش !! شدخل الحمدلله على السلامة .. ياربي يبغالي بكووس)
يوسف يرجع العلبة لجواهر وهو يضحك : ههههههههههههههههه ... الله يسلمك بس تراني ماكنت مسافر
جواهر وهي متفشلة من نفسها : أدري أصلا مدري كيف طلعت .. معليش بنت عمك متنحة اليوم
يوسف : ههههههههه لا عادي .. حلوة العفوية .... امممم شقاعدة تسوين؟
جواهر ( اف اللحين بيقول عني مفجوعة على الأكل نازلة نص اللليل اسوي لي عشا) : بصراحه جوعانة وجالسه اسوي لي عشا ( غبية غبية يعني لازم تفضحين نفسك)
يوسف في داخله ( عفوية هالبنت تجنن): ههههه ... عادي أشاركك ؟
جواهر بتناحة:هااه؟
يوسف يبتسم : هل تسمح لي الأميرة جواهر بإن أشاركها في صنع الطعام ؟ هل لي أن أحظى بذلك؟
ابتسمت من قلبها لأول مرة : الأميرة جواهر تسمح للشاب النبيل يوسف بأن يصنع معها وجبة العشاء .. ولكن بشرط أن لا يحوسهااا
يوسف:هههههههههه ايش يحوسها .. شكلها الفصحة عندك منتهية
اتفشلت جواهر وهي منزلة راسها :أجل شيقولون ؟
يوسف : اممممم .. أن لا تُفسِدها
ايوه .. الباستا ايش نوعها ؟
جواهر بإنفعال : خُضااار أكيد وهل يخفى القمر (ثقل شوي ثقلللل مالت علي)
يوسف يبتسم لعفويتها : كول .. أنا بعد أحب الخضار
وهو يقطع الخضار بسررررعة خطيييرة : أحب الطبخ والي خلاني أحبه ايام الدراسه كنت أنا والشباب نتراهن على شي والي يخسر يعزم الكل على عشاء بشرط هو اللي يطبخه
جواهر ابتسمت وهي تجهز الصحون : أنا أحب الطبخ لأن أبوي كان يحبه ( هنا خفف سرعته يوسف) ... كنت لازم انا وهو كل سبت نطبخ العشاء وأمي تجلس تشاهد برنامجها المفضل .. وغالبا نسوي الباستا لان باقي الطبخات احيانا نسوي فيهم علوووم .. سكتت شوي
وبصوت مخنوق قالت : كنت أحب يوم السبت الليل بس عشان أطبخ معااه (ونزلت دمعة حارة على خدها )
يوسف يناظر جواهر ولا اراديا مسح دمعتها : جواهر لا تبكين
بصوت عاااالــــي وتــصــفــيــق : واااااااااو ..وااااو... برافـــــــــــو عليكم .. بـــرافــــــــــو
خلللص البــــــارت
توقعاتكم ياحلويــــــن ؟ *____^
مين أكثـــر شخصية عجبتكم ؟
ايش هو اكثر جزء عجبكم في البارت ؟
سلااام .. هالله هالله بالردود
|