[لامارا]

#الكاتبة_نهى_الحسون
#قضية_الشمل
#البارت_اثنين_وعشرين_ج2


جلال
كلام الحجي ابو چاسب نزل على راسي مثل الصاعقة
انتبهت لمهيمن جلة صوته يريد يجاوب
رفعت راسي وانا حابس انفاسي منتظره
يعلن لحظة وفاتي
.. والله يا ابو چاسب جيتك على العين والراس
ما اكدر اردلك طلب وانا لو علية موافق واگلك من هسة گبع واخذ
بس يبقى الشرع يأكد علية اخذ شور البنية لان هي الي راح تتزوج
فلازم ارجعلها اكيد انت تعرف هذا الشي مو بيدي
ابو چاسب جاوبه وهو مصر .. هي ما دامها اختك معناها تعرف الاصول وانا متأكد ما راح تردنا وترجعنا خايبين هاي المرة
مهيمن مسح على وجهه بأحراج وكال
.. ما على الرسول الا البلاغ المبين
انا راح اكول للاهل واكيد راح اسعى بهذا الشي واحاول اقنعها
والبي خير يقدمه رب العالمين
حسيت البساط انسحب من جواي وكل الي بنيته اتهدم على راسي بلحظة. صرت احوم ما اعرف شنو اسوي
اتمنى اصيح بصوت عالي واكول اريدها ياناس هاي البنية الي
بس غصب عني لازم اكعد واسكت واتصرف حسب الاصول
بس الاصول بحاجة صبر واني منين اجيب الصبر
يعني لازم انتظر الحجي يخلص كلامه وياخذ حجاية من مهيمن
ومو بعيد حتى ياخذ منه الوعد بالموافقة
احس بروحي تريد تتسلب مني شمعنا انا اشرب من نفس هذا الكاس المر مرتين واتلوع
اجة على بالي عناد المسكين هم هيج تعذب مثلي
اكول لنفسي هاي حوبته بس ارجع اطرد افكاري
حوبته شنو اني رفضته حتى انقذه ... اخلصه من الموت ومن داعش
صرت احوم لاهي ساعة ولادة وتمر علية وتنتهي ولاهي
ضربة سجين وتتخيط هذا شعور بالالم غريب خبيث يتوغل
للگلب ويبدي يمزق بجدرانه مثل الم سادي
يتونس على اوجاعي
بين ما خلصوا كلامهم ونهض الرجال من مكانه وسلم على مهيمن
كنت انا حافر حافة المكتب بأظافري من غير ما احس على روحي
نهض وياه مهيمن وسلم عليه وبعدها ظل واكف ينتظر الرجال يطلع
ومن طلع
بعدها باوع علية وتحولت معاني وجهه للبرود
رجع كعد بمكانه ورة المكتب وسألني وهو ضايج
.. البارحة وين جنت بقيت الليل كله انتظرك ليش حضرتك ما رجعت للبيت انت حتى ما كلفت نفسك تتصل وتطمنا
ولا فاتح نقالك حتى احنا نتصل ونشوفك وين مولي
.. البارحة بتت عند صاحبي
كان عندي شغل وطولت يمه
وانا بالاساس انطيت خبر لنور وگلتلها احتمال اتأخر
ما انطيته مجال يكمل سلسلة اسئلته دخلت بالموضوع وكلت
.. مهيمن انا سمعت الحجي ابو چاسب يريد يخطب حور
.. اي رجع مرة ثانية يطلبها لابن اخوه
.. مهيمن انا اعرف مو وكته ولا هذا المكان الي ردت افتح وياك هذا الموضوع بس كلام الحجي قلب كل الموازيين عندي
.. ما افتهمت عليك شنو ربط موضوع ابو جاسب وية الموضوع الي رايدني بي
.. مو الحجي طلب ايد اختك حور
وانا جنت رايد اخطبها منك بس كنت منتظر اسافر ومن ارجع كلت اجيب ناسي واخطبها منك
اترجاك ما اريدك تزوجها لابن اخو الحجي
مهيمن عقد حواجبه متفاجيء بطلبي
كملت كلامي قبل لا تخوني قوتي
.. صحيح انا ما عندي اهل حتى اخذهم لبيتك مشاية
واخطبها لأختك كدام الناس
بس صدگني عندي ناس وربع
هيبة وفخر وينرفع بيهم الراس يجون وياي مشاية واجي لبيتك
وانا شاري اختك واريدك تشرفني بموافقتك
باوع علية مثل الي يريد يدرس كلامه قبل لا يكوله وهذا الشي زاد خوفي كعد يمسح على لحيته وهاي الحركة بالذات تعني الهدوء الذي يسبق العاصفة
زاد خوفي من نظرته الضيقة جلى صوته وكال بهدوء
.. امممم كلتلي تريدني ازوجك اختي مو ؟؟
.. اي نعم
.. تمام زين خلينا قبل لا احجي اي شي بهذا الموضوع
اريد اسألك واريدك تجاوبني بعيداً عن سالفة الخطوبة
بلعت ريگي احس بروحي وواگع بشدة
عبالك عندي امتحان وانا ما دارس
جاوبته .. كول اسأل ؟؟
.. بالله متگلي منو هذا صاحبك الي بتت عنده البارحة
شنو اسمه
عقدت حواجبي سويت روحي مستغرب سؤاله وشنو غايته من هذا السؤال
وشنو دخله بموضوع طلبي لأخته
جاوبته وانا احاول اتهرب كلش مو وكته هاي الاسئلة
.. ليش تسأل يعني واحد من جماعتي متعرفه
رفع حاجبه وكال
.. منو بيهم من جماعتك
ابو ذياب لو ابو جراس لو خاف رجعت تلتقي وية ابو طبرة
بهت لوني ودك الجرس عندي انحصرت بخانة اليك جاوبته
.. هسة عرفت شنو غايتك من هالاسئلة
ما راح اكول شي ولا راح ادافع عن نفسي
في غض النظر عن الاشخاص الي مرافقهم وسمعتهم الموزينه
اعرف هذا راح يشكل حاجز بيني وبين ارتباطي بأختك وطبعا انت حقك
بس اريدك تعرف شغلة وحدة
ثق بالله انا صحبتي وياهم الي بيها غاية وهدف اريد احققه
وكل الي جاي تشوفه گدامك مو مثلما انت متخيل
رفع حاجبه بعدم اقتناع وسألني .. بالله متگلي شنو هاي الغاية
الي تخليك تمشي وية ارذل الناس وسمعتهم الشينة على كل السان لدرجة وصل بية الحال يعيروني بيك وبجماعتك.
.. ما اكدر احجيلك اسبابي لان صعب بس
كل الي اريده منك تصبر علية وما تستعجل وتصدر حكمك بحقي
اريدك تعرف انا مستحيل افكر بيوم اتخلى عن اخلاقي ومبادئي ولا تتوقع بيوم من الايام اسوي شي يرخص من كرامتي وينزل راسك كدام الناس اطلب منك توثق بية
جاوبني مهيمن وكال بصوت مثل صليل السيف
.. لطالما انت رافض تحجي وبعدك غامض وباقي متحفظ
على تصرفاتك المحيرة والمشكلة ما عندك اي مبرر لكل هاي تصرفاتك المشبوهة فلا تترجى مني اوثق بيك ولا تتوقع راح اوافق ازوجك اختي
.. مهيمن اترجاك لمرة وحدة بحياتك ثق بية
وافهمني كلتلك انا عندي اسبابي صدگني
غصب عني الي گاعد يصير لا تظلمني
نهض من مكانه وضرب ميز المكتب
وزمخ بية بغضب
.. انطيني سبب واحد يخليني اصدكك ويشفعلك حتى اوافق عليك وما اظلمك
شلون ترضاها ازوج اختي لواحد خريج سجون كل يوم الكاه مورط روحه بمصيبة
لو يوم الزمه ببيت دعارة لو الگاه مرافقلي واحد مهربجي
ونوب اخر شي طلعت مصاحبلي عصابة مدري ارهابيين
گلي شنو الي يشفعلك من هذني كلهن
رفعت راسي وجاوبته .. ماعندي شي يشفعلي يمك غير بس
خوتنا
هدر بية وعلى صوته
.. لا جلال دير بالك تستخدم هيج شي طاهر مثل خوتنا وتخليه غطى لافعالك
خليك شريف واتقبل الرفض مثل عناد بيوم رفضته
مع العلم رفضك كان ماله مبرر حتى ما عندك سبب مقنع
على الاقل انا رفضي الك بمحله وعندي الف سبب وسبب
يدينك
ارتعد گلبي بين ظلوعي منتفض وكمت من مكاني معترض
.. مهيمن لا تغلق باب رحمة الله بوجهي ماعندي غيرك لا تردني
كلتها وانا لاؤل مرة بحياتي احس بالكسر
جاوبني
.. لا تتوقع مني اخلي ايدي بأيدك ولو جنت اخر رجال بالعالم ما ازوجك اختي
.
.................................................. ............
جلال
انا ابن الحدبا انا ابن موصل ..... الموصل
حمامة سلام تلكاني مو صل ..... ابن الجية
انا لاهلي وربعي دوم موصل ..... متواصل
واهلي وناسي تشهد علية
مهيمن
انا ابن بصرة الحيفا انا معروف ..... شخص معروف
اوكف لربعي بلا منة ولا معروف..... فضل او جميل
اخيطله جرحه للي نخاني معروف ..... (مع روف) الريافة الخياطه لاخفاء الشقوق
ولا اخلي بيوم العيبة بية
هدى سعد
.................................................. ......
كلامه وياي مثل الضربة عالراس
رفعت راسي وانا اكابر احاول اعض على جروحي ولا ابين له
شكد موجوع بهاي اللحظة بالذات
.. براحتك ابو الهمة ما راح اكدر اجبرك تزوجني اختك
لان ما بيدي شي اسوي حتى يشفعلي عندك ويحنن گلبك علية
اصلاً انا ليش مستغرب
اشو الدنيا علمتني على النوايب
ما يوم نصفت وياي دنياي ولا بيوم حنت علية
لامن جنت صغير كسرت خاطرها لأمي ولامن شبيت لكيت ابو يحتويني
هي قابل ظلت عليك حتى انتظر منك تعطف علية
عادي ادفعني عنك ولا تتقبلني لا اخ ولا نسيب اصلاً اتعودت
انا من يوم يومي اسمي جلال قربان
تعرف ليش هيج سموني ربعي وخلاني
لان امي وابوي الي هم اقرب ناس الي باعوني مثل الكبش المنذور
هيج شكلي زايد عندهم فدى ضحية مثل القربان
واني هم قررت اكون قربان لان ماكو شي يربطني بالدنيا كلها
مسحت وجهي وحسيت بحرارة جفوني
وكلت خصم الكلام
.. على العموم انا رايح عكب باجر اسافر واحتمال هاي المرة سفري يطول
وما اعرف ارجع منه لو لا
اتحرك من مكانه واهتز الجبل الي يحاول يكابر وكال بصوت ملهوف
.. جلال لحظة انتظر شنو وين تريد تسافر
درت وجهي وانطيته ظهري وانا طالع وجاوبته..
.. راح اسافر لجهنم الحمرة
سمعت صوته من وراي وهو يلعن ويسب بغضب
تركته واخذت سيارتي ورحت كعدت على الشط
ما اريد اروح للبيت وانا معصب وروحي شايطة رحت گعدت عالشط
اريد اكعد اتعاتب وياه
اريد ارمي بهمومي على جرفه بلكي اكسر خاطره
حرت المن اروح وعند منو اشكي حالي
ريم
مريت على حور بالكلية بطريق الرجعة للبيت انتبهت عليها صافنة ونظراتها تعاين كدام مبين عليها
ضايجة وعيونها ذبلانة يمكن كانت تبجي
سألتها مستغربة
.. شنو شبيج حور
ما جاوبتني شكلها بعدها بغير وادي
اتذكرت اليوم جلال مر عليها للكلية
رجعت سألتها.. شبيج ضايجة شنو اتعاركتي انتي وجلال وزعلج
دارت وجهة علية وكأنه اسم جلال كلمة السر للدخول لعالمها الي فاصلة بي
وكالت وهي تبجي .. لا بالعكس اصلاً ما طلع من الكلية الا وهو مراضيني
.. اهااا وانتي شكلج مو وجه نعمة ما متعلمة على واحد يعاملج
برقة وحنان طبعاً حقج متعودة على نعال ماما وصوت زمخة اخوج
وصلنا للبيت ولكينا بس نور موجودة لوحدها بالبيت وام مهيمن طالعة كالعادة اما تسير على بيت اخوانها او طالعة للسوك
حور تركتنا وراحت للغرفة تبدل
واني رحت اقتربت يم نور ولكيتها جاي تسوي كيك
دارت وجهة علية وكالت
.. اصبلكم غدا
جاوبتها .. والله ياريت لان كلش جوعانة
ابتسمت وكالت .. لعد يالله استعجلي حتى ناكل سوية اني هم ما متغدية جنت انتظركم
سمعت صوت تنبيه رسالة وصلتني عالواتساب
جاوبت نور وانا اطلع نقالي من جنطتي وفتحت النقال وانا اشوف الرسالة وحجيت وية نور
.. صار هسة اغير ملابسي بسرعة واج......
قطعت كلامي فجأة واتسمرت بمكاني وانا عيوني على شاشة النقال اقرة بالرسالة
كانت رسالة من جلال كاتبلي بيها
باربي اتمنى توصلين رسالتي لحور وتكليلها جلال
سوى الي عليه اليوم وطلب ايدج من اخوج مهيمن
بس مع الاسف مهيمن رفضني
كليلها اريدها تصير قوية لخاطري وتحارب ما اريدها تضعف كدامه
نفضت راسي معترضة وانا اعيد بالكلام نور انتبهت على هدوئي الغريب. اجتي اقتربت مني وسألتني
.. شنو شبيج واكفة تباوعين بالنقال مصدومة
جاوبتها وانا اعيدلها بكلام جلال
نور شهكت وكالت .. لاااا عفية لا تكوليها. شنو. ليش مهيمن يرفض جلال
جاوبتها وانا بالي مشدوه .. والله ما اعرف شنو السبب كلشي ما مفتهمة
طلعت من الواتساب عالسريع
لان ما اكتفيت برسالة جلال رحت اجريت اتصال عليه اريد افتهم
منه الموضوع كله شنو. شوكت راح طلب ايد حور
اشو احنا ما عدنا علم وليش مهيمن رفضه.
دكيت ورن عليه مرة ومرتين وبالثالثة يالله جاوبني
بصوت تعبان سألته بدون لا سلام ولا كلام
.. جلال عفية كولي فهمني شنو هاي الرسالة شبي مهيمن تخبل ليش يرفضك وانت شوكت رحتله
جاوبني جلال وصار يحجيلي كل الي دار بينه وبين مهيمن
وكعد يوصيني على حور حتى افهمها موقفه
وكمل كلامه وكال
.. ريم كوليلها جلال حارب علمودج والحرب بعدها ما انتهت
حالف ما اطلع منها الا وانا منتصر
بس اريد منها تشد حيلها وتصبر علية
وتدعمني بتمسكها بية لاتضعف وتوافق على الناس الي جايين يخطبونها
هو جان يحجي وانا ميتة من القهر عليه احس النار كامت تطلع من
صدري
ونور جانت تحوم فوك راسي وتفرك بيدها وكل شوية تسألني هَـا شنو
شيكول جلال. فهميني شبيج معصبة اشرتلها حتى تصبرلي علمود افتهم من جلال
بس مع الاسف كل الي افتهمته من الدار بينه وبين مهيمن
ما يبشر بخير
بعدها جلال سلم علية وانهى الاتصال لان عنده شغل مهم مستعجل
ونور سألتني .. هَـا شنو كال جلال
درت وجهي عليها وكلتلها كل الي كاله جلال
نور بقت مصفصفة محتارة وكالت
.. ياربي شلون مشكلة هاي ما اعرف شنو اكول
منا جلال وغموضه وسكوته المعذبني
ومنا مهيمن واسبابه وشكوكه الي محد يلومه عليها
والله حيرة. ما اعرف المن اركن و منو بيهم على حق
جاوبتها واني افكر بكلام جلال وموقف مهيمن
.. انا راح اوكف وية جلال
في غض النظر عن غموضه وتصرفاته الغريبة
بس يبقى شي واحد انا متأكدة منه ان جلال يموت بحب حور
وهالشي يشفعله ومهيمن ماله حق يعترض ويقرر من يمه
جاوبتني.. انتي صدرتي حكم مبني على الحدس
وهالشي مو كافي يعني انتي واثقة من جلال يحب حور
وعلى اساس هذا الشي تردين من مهيمن يوافق
بس نسيتي شغلة مهمة ان مهيمن ما يعرف ولا عنده علم بحب جلال وحور وضيفي فوك هذا كله
تصرفات جلال وحياته الغامضة
.. حتى لو نور هالشي مو من حق مهيمن يقرر من يمه عن حور هي بكيفها ليش هو مو قبل كم يوم كام يحجي على جلال لان رفض عناد قبل لا ياخذ رأيج
اشو هو هسة رفض بدون ما يسأل حور وسوى نفس سواية جلال
دخلت حور على صوتي اني و نور
وسألتنا وعيونها تتنقل علينا اني ونور
.. شنو شبيكم بنات جاي تتعاركون
نور باوعتلي مترددة تحجي لو لا
اني جاوبتها وكلتلها
.. حور تعالي كعدي عندي حجي وياج لازم تعرفينه
رحت عليها واخذتها من ايدها وكعدتها على كرسي ميز الطعام
وكعدت كدامها ولزمت ايدها اثنيهن مثل الي يحاول
يمدها بالطاقة او يمكن ردت اواسيها قبل لا تعرف بالصار
سحبت نفس عميق وبديت احجيلها عن كلام جلال
وية اخوها ورفض اخوها وموقفه من جلال
هنا حور من عرفت برد اخوها نهضت من مكانها منتفضة
وعيونها نار
هزت راسها برفض وكالت .. لا لا مستحيل ما اصدك
مهيمن ما يسويها ويكسر بأخوه
جاوبتها .. مع الاسف مهيمن مو بس كسر اخوه برفضه
وكسرج وياه. من غير ما يرفله جفن
حور كامت تحوم بالمطبخ وتضرب على رجليها من حركة گلبها واني راها اريد اهديها
كالت.. ولج ريم انتي ما تعرفين مهيمن شسوى
ولج هو مو بس رفض جلال هو جرم بحقه وبحقي
نور جاوبتها.. بنات ترة مهيمن معذور بالسواه
انتوا ما تعرفون شنو الموضوع
اكو مواقف صارت تدين جلال ماعندكم علم بيها وبس انا ومهيمن
نعرف بيها لان اخونا ما نكدر نحجي بيها وهاي المواقف هي الي
خلت مهيمن يرفضه صديگيني حور اذا عرفتي بالي عرفناه عن جلال راح تعذرين مهيمن واصلاً يمكن راح تفكرين الف مرة قبل لا
تحبين جلال وتوافقين عليه
حور دارت عليها معترضة ونترت بنور
واشرت على حلگها بقهر علامة السكوت
.. اشششش ولاكلمة ولج نور كلشي لا تحجين محد بيكم يعرف بجلال شنو
انتوا كلكم جاي تظلمون جلال اني اكثر وحدة بيكم
اعرف جلال
گعدت بالكاع تبجي بقلة حيلة وكالت .. صدگوني راح يجي اليوم الي تعضون ايديكم من الندم بسبب صدكم وظلمكم لجلال
ما اعرف ليش حسيت بحور تعرف شي عن جلال احنا كلنا ما عدنا
علم بي
باوعت لنور الي كانت واكفة بالمطبخ عاجزة وبنفس الوقت
شكلها مقتنعة بقرار مهيمن وهم هاي الثانية تعرف اشياء عن جلال
ما نعرفها احنا
بالله هسة هاي شحطلها وتطيب ياربي شكاعد يصير
بس انا رغم هذا الي دار والي سمعته
عندي قناعة وايمان ان حور وجلال على حق
سمعنا صوت الباب يندك
نور التفتت على باب المطبخ وكالت
.. يمكن هاي خالة زهرة اجتي لان هذا وكت جيتها
باوعت لحور نهضت من مكانها مخبوصة ومسحت دموعها
وباوعت علية
نور كالت .. انا رايحة افتح الباب
حور كلتلها .. عفية نور لا تجيبين سيرة لأمي بموضوع جلال
خلي هو مهيمن يكللها حتى ما تسألنا منين عرفنا بالموضوع وتسويها سالفة انا اعرف بأمي هي من غير كلشي تسويلي سالفة
وتدور وراي
نور جاوبتها وكالت.. لا تخافين ما راح احجي
اني كلتلها .. شنو ليش ما نكللها خليها تعرف ترة انتي وجلال ما مسوين شي غلط
بالعكس احتمال خالة زهرة تساعدكم وتوكف وياكم لان هي تحب جلال
نور راحت برة حتى تفتح الباب وكالت
.. انا رايحة افتح الباب لخالة. اجلي هالكلام لبعدين هسة مو وكته هذا الحجي
اباوع لحور اجتي علية ولزمتني من ايدي وسحبتني وراها
ودخلتني للغرفة وسدت الباب قبل لا تدخل امها وتشوفنا
حور بصوت ناصي .. ريم ما ينفع نكول لامي عن كلام جلال
اذا كانت امي راح تعرف بسالفة خطوبة جلال فلازم تسمعها من مهيمن بنفسه مو من عدنا
حتى اذا اجة مهيمن يسألني عن رأيي بالناس
الي جاي يخطبوني
بساعتها اني اكدر ارفض بكل سهولة
محد راح يشك او يربط بسبب رفضي بسالفة. جلال
حتى ما تصير مشكلة
بقيت افكر بكلام حور
اباوع عليها جانت تبجي تحجي وياي بصوت ناصي
اقتربت منها ولميتها لحظني صدك انقهرت عليها
وكلتلها .. لا تخافين مستحيل اسوي شي يأذيح
انتظرت حور تهدأ بعدها سمعنا ام مهيمن تسأل نور عن حور وعني
كلت لحور اني راح اطلع وانتي روحي غسلي وجهج وتعالي وراي
رحت دخلت للمطبخ وسلمت على ام مهيمن وهم هي الثانية وجهة مگلوب وبس تنافخ
نور باوعتلي وسألتها .. خالة شبيج سامعة شي
جاوبت نور وهي تباوع علية
.. سكتي اليوم انا شبعت بجي على ضيمي وضم امة محمد واجيت
دخلت حور وسلمت على امها وسألتها
.. شنو اسم الله ليش تبجين
.. والله يا خالة اليوم بيت جوارين اخوي وصلهم خبر استشهاد
ابنهم الشاب
يمة لو تشوفينه يصير بعمر مهيمن اسم الله على مهيمن
فرت روحي من القهر على امه ومرته وجهاله
اثاري الدنيا ما منها امان ما يعرف الواحد شوكت يومه
على الاقل هذا الشاب من مات ترك وراه واحد يخلفه ويشيل اسمه من بعده يعني ما انمحى ذكره ولا انكطع نسله
وهسة انا رجعت من بيت المرية وانا قافلة
بعد مستحيل اسكت على الي كاعد يصير
غمضت عيوني
اهوووو هسة ام مهيمن راح تربط السالفة بزواج مهيمن
اشو دارت علية وكالت
.. شوفي خالة ريم سمعيني زين ان جان حبيبك حلو لا تاكله كله
ترة انا وصل حدي انا ام حسوا بية كولوا هاي المكرودة
جزعت تريد تشوف عرس ابنها هسة ما تكليلي شنو المانعج
وكاعد تتعززين على وليدي كليلي شنهو الي تردينه وانا اسوي
بس فضينا ووافقي. ترة طك الشيب بالراس وما ظل بالعمر
شي
باوعت عليها وانا متفاجئة من هجومها يعني كلش مو وكته هالموضوع ابد. منا سالفة جلال وحور ونوب ام مهيمن كامت
تعزف عالوتر الحساس هاي هي لاصت
حور جاوبتها .. يمة هي البنية شلها غرض وانتي جاية عليها
ما ترحين لابنج وتكليله خلي يعدل نفسه
ام مهيمن عاطت بيها .. خايبة حويرة احجي عدل
لا اكوم ادير حلكج واعلمج شلون تحجين منو الي يعدل روحه هَـا ولج
بقينا اني ونور متفاجئات بكلام حور وية امها
وهاي اول مرة تسويها حتى اني ريم بذات نفسي جنت مقررة اغلس على كلام ام مهيمن هالمرة وما احجي لان وراها سالفة جلال وحور والوضع ما يتحمل اكثر بس شكلهم وشهد شاهد من اهلها
حور كملت كلامها وية امها
.. يمة انتي ليش تزعلين من كلمة الحق انا ما جذبت
اي صدك ابنج ما ينحمل اشو كاطع الماي والهوى على البنية ويريدها تجي بنفسها وتكله سمعاً وطاعة انا من ايدك هاي لأيدك هاي شتفصل انا البس وين كاعدين حتى الله ما يرضاها
هي هم بنية حالها حال البنات تريد رجال يهتم بيها
يسمعها حجاية حلوة
خلي ابنج ينزل من برجه العالي كليله كافي ترة بنات الناس مو لعبة عنده
ام مهيمن مصدومة ما مصدكة لطمت على حضنها وهي كاعدة بالكاع
.. ياااا !!! .. يااا !!!! صخام بوجهج ولج حويرة. هاي عليمن هذا الحجي كله
.. هذا الحجي على ابنج اذا تردين تزوجين اخوي فانصحج
ما تورطين بنات العالم احسنلج روحي خطبيله
وحدة خرسة طرشة طينة. لا تهش ولا تنش واهلها بايعينها. يالله تكدر تعيش وياه وهاي انا اخته وجاي اكلج بعيوب اخوي
ما حسينا الا على ام مهيمن كامت على حيلها وشالت النعال وشمرته على حور و انا ونور كمزنا من مكاناً كامت علينا خالة زهرة
صاحت بحور بصوت يرعد
.. ولج من ترحين فدوة لتراب رجلين اخوج
خايبة العوبة اشو طالعلج السان وصايرة تراددين
منو هذا الي ترديني اخطبله وحدة خرسة طرشة
نور واحت على حور دفعتها حتى تطلعها من المطبخ
نور.. حور عفية طلعي كلش مو وكتج مو جاي تشوفين امج
شلون معصبة لا يرتفع ضغطها ونبتلي
طلعت حور وصعدت فوك لان ام مهيمن كامت تعد وتصف على حور
بنص البيت
.. ولج اذا ما عدت تربيتج من جديد ما اكون زهرة
ولج العوبة بعدج ما كبرتي وما صرتي دكتورة وكمتي علينا
جا من تصيرين دكتورة شتسوين يمكن حتى سلام ما تسلمين
رحت يمها وكلتها بصوت ناصي حتى اهديها لان نور عجزت
تسكتها تعبت من وراها
كلتلها.. عفية خالة كافي مو زين عليج تعصبين عوفيها حور ما كانت تقصد شي بكلامها
دارت وجهة علية وباوعتلي وكالت .. بعد شحجي مالي عين احجي وياج اذا بتي هيج تحاجيني بعد ما اعتب على بنات الناس
ما الومج يا خالة بس انا ام ومحد جاي يحس بية
نور جاوبتها .. خالة خلي عينج بعين الكريم هو احن والطف منج
على ابنج خليها على الله
.. والنعم بالله. ما عندي غيره
جانت تحجي هالمرة بصوت واهن كسرت خاطري
شنو ذنبها عندها ولد راسه يابس مثل التيس
صار الليل ورجع مهيمن من الشغل جان كلش ضايج
واول ما دخل سأل نور
.. اكول نور اليوم جلال اجة للبيت لو لا
جاوبته وهي تباوع عليه بحذر دخيل الله هاي البنية شكد شفافة
.. لا ما اجة اليوم عالبيت
.. زين اليوم ما اتصل عليج
.. لا ما اتصل علية ليش تسأل
جاوبها وهي يجر حسرة
.. لا هيج ماكو شي
حجت وياه نور وكالت قبل لا يدخل جوة للبيت
.. مهيمن اليوم امك معصبة دير بالك مو تعصبها بالزايد
خفف عليها
.. ليش شبيها اني شمسوي بعد وهي ضايجة
.. انت من تكعد وياها وتشوفها هي راح تكلك احسن شي اعرف بنفسك
ابتسم بتعب وعافنا وراح يم امه
خطية حور بعدها معلگة فوك ما تقبل تنزل. من ورة امها
وانا ونور صفينا لوحدنا وحدة مكابلة وجه الثانية
جنا كلنا كاعدين بالهول اني كنت ادرس عندي امتحان
ونور كاعدة يمهم تكلب بنقالها تراسل بخالتها
ومهيمن جان كاعد بصف امه يسولفون
وهي ما تضيع وكت شلون تخلي هيج فرصة تفوتها
وكعدت تحجيله عن سالفة الشهيد واهله
وشكله افتهم مقصدها
گبل غير الموضوع وكال حتى يشغلها
.. اهوووو ذكرتيني صدك وينها حور
جاوبته .. اختك المگموعة ام السانين فوگ
.. افااا ليش هيج تحجين عليها
.. خلي تولي تريدني اخطبلك وحدة طينة
خرسة طرشة لا تهش ولا تنش تكلي ياالله تكدر تعيش وياك وتتحملك
عليك الله اكو وحدة تحجي على اخوها هيج
رفع راسه واجتي عينه بعيني كال
.. لا يابوي شنو اتزوج وحدة طينة حتى ما اطك واموت
هو حلات الزواج من اتزوجلي وحدة. تكعد تتناگر وياي
واتناگر وياها.
ساعة اسحلها واعلگها بالبنكة وساعة تسحلني بدلعها
ولسانها المزروف
رمشت بعيوني
هزيت شعري بغرور بحركتي المعروفة
غمض عيونه بصبر وعض شفته وكال يحجي وية امه
.. جا هي غير تكعد راحة وما تدخل بخطيتنا بهاي سوالفها والله تالي تعم على روحها
امه دارت عليه وكالت .. هي منهي الي داخلة بخطيتك
انت ويامن تحجي
باوع لأمه بسرعة وكال
.. عفية يمة لا تنسيني بالله ما تصيحولي حور
نور كامت من مكانها وراحت تصيح لحور
دقايق ودخلت حور وهي مترددة ومدنكة
منا خايفة من امها لا تكوم عليها ومنا اكيد عقلها يودي ويجيب
مهيمن شنو يريد منها
كعدت يم اخوها وام مهيمن بس شافتها كلبت عيونها وصدت بوجهة عن حور المسكينة
.. شوفي حور اريدج تسمعيني زين اليوم عم الولد الي اتقدملج قبل فترة اجاني للمحل
ام مهيمن دارت بسرعة وكدر كلام مهيمن ان يلفت كل انتباهة
سألته .. شعنده عمه جايك للمحل
جاوبها مهيمن .. اجاني يعتب علية شلون رفضنا ابن اخوه
وكال اريدها منك لا اروح ولا اجي
ووكع بركبتي وكال احنا لوما نعزكم ونودكم ما نطلبها منكم
ودار وجهه على حور وكمل كلامه
.. وانا كلتله انتظرني اخذ شور اختي هَـا شگلتي حور
جاوبته ام مهيمن بدون نقاش .. اكيد موافقة مايحتاجلها تفكير
رفع راسه وباوع لامه وكال
.. يمة خليها هي تحجي اريد اسمع الموافقة من عندها
هم يحجون واني ونور وحدة تباوع للثانية
حجيت بصوت ناصي
.. زين ما دامه هو هيج يعرف حق الله ليش ما جاب سيرة
بموضوع جلال. هو هم خطب حور
ليش ما يسألها رأيها مثل ما جاي يسألها بهذولي الناس
نور جاوبتني .. هو متأكد من سمعة هذولي الناس وشكله مقتنع بيهم
بس جلال اخوي لا ما مرتاحله ولا متأكد منه كلشي ضده
اووووووف والله گلبي يريد يتكطع على جلال هو حتى ما اجة للبيت
كامت نور من مكانها وسألتها .. هَـا وين كايمة
.. اريد اتصل على جلال اشوفه وين اراضيه ليش ما رجع للبيت
طلعت نور من الهول وانا بقيت استمع منتظرة جواب حور
كانت تستمع لكلام امها
كانت ام مهيمن تحاول تقنعها بالطيب
وتعددلها مواصفات الولد واخلاقه
واخير شي مهيمن كال .. هَـا هسة شنو كلتي
حور دنكت وجاوبته بصوت ناصي. .. مهيمن اسفة اني ما اريد اتزوج انتوا ليش تحسسوني عبالك انا حمل على گلبكم
وتردون تزوجوني وترتاحون مني
بعدها انفجرت بالبجي جانت تبجي بحرگة گلب مال وحدة محملة وكاتمة بگلبها
بحيث ام مهيمن بكبرها اتفاجئت بحالة بنتها ومهيمن
اخذها لحضنه وكال وهو يمسح بدموعها
.. ااشششششششش المن البجي ما تكليلي هسة قابل انا شايل
عليج سيف ترة محد يكدر يجبرج ولا تخافين من امي
ترة هي تحجي لمصلحتج
وصدگي وامني بالله انا لو بيدي اخليج العمر كله تعيشين بحضني وبدلالي بس هي سنة الحياة هيج ..لا بد وان يجي اليوم والبنية تتزوج
وتفتح بيت وتكون حياتها
جاوبته حور بصوت مكتوم وهي بحضنه
.. اي بس مو انا بعدني حتى ما جاي اتخيل روحي ابتعد عنكم
.. هاي هي كافي لا تبجين عمي اذا ما تردين زواج
اذن ماكو زواج وخلي ابو جاسب يروح يدورله على بنت حلال
بغير مكان
امه كالت بصوت مصدوم .. ياااا !!!! خايب صدك تحجي لو جذب
يتبع
احداث البارت القادم
نور
شنو كاعد يصير بينا ياربي
اباوع لريم تحجي بالنقال وهي معصبة
ريم .. عمو ابو سيف اتصل على عمة اسيا وسوي الي كلتلك عليها
اني جاهزة للسفر خليها تجي علية او انت تجي تاخذني
اني انتظرك


اتمنى لكم قراءة ممتعة
اختكم نهى الحسون