[البارونة]

صباحكم جميل ..
صعب اوصف لكم سعادتي بتفاعلكم وردودكم ..
ممتنة لكم جداً تحليلاتكم وافكاركم ..
هذا الفصل نزلته بدري هدية لحماسكم ويوم الخميس بـ إذن الله فصل جديد ..
صعب أحدد الأيام لكن بيكون أسبوعيا 3 فصول كما وعدت ..



" الفصل الحادي عشر "

:

وَٱنْتَبَهْنَا بَعْدَمَا زَالَ ٱلرَّحِيقْ
وأَفَقْنَا لَيْتَ أنَّا لَا نُفِيقْ
يَقْظَةٌ طَاحَتْ بِأَحْلَامِ ٱلْكَرَى
وَتَوَلَّى ٱللَّيْلُ وَٱللَّيْلُ صَدِيقْ
وَإِذَا ٱلنُّورُ نَذِيرٌ طَالِعٌ
وَإِذَا ٱلْفَجْرُ مُطِلٌّ كَٱلْحَرِيقْ
وَإِذَا ٱلدُّنْيَا كَمَا نَعْرِفُهَا
وَإِذَا ٱلْأَحْبَابُ كُلٌ فِي طَرِيقْ


:


:


جربي زين اليوم
روان : مجنون انت شيشة مره وحده !!
نواف : ماتخرب البشرة يالياي انتي بالعكس تخلي الشفة وردية ..!
روان : على اساس شفايفك وردية
نواف : ماعليك من لونها زين .. ( وبغمزة ) عليك من طعمها ..!!
روان : ليه حقتك ريحتها غير
نواف : اخترت لك عنب ابيض وانا تفاحتين ..!
..وبدت روان تجرب وتضحك على محاولاتها .. بمساعدة نواف وهم جالسين في سطح شقة مزين بالشجر الصناعي والكراسي الخيزران ..!!
:

:

غادة : وين بيروح فيصل ..!
ام فيصل : معزوم عند فهد وريان عندهم عشاء
نجد : من الظهر نتكلم مانتي معنا ابد ..
غادة : احس بـ صداع ونادت فيصل ..: قلبي معك فلوس
فيصل : يطلع الي في جيبه : اي معي ٥٠
غادة : لحظة باجيب زيادة وتروح تركض مع الدرج
فيصل يضحك : هيي لاتجيبين ترى العشاء مجاني الي معي يكفي ..!!
نجد بضحكه: خلها تجيبها وعطنيها ..
:


:



ماجد : طيب ووش انتهيتوا عليه
سلطان : شريت نصيب خالي بـ ١٠ مليون
ماجد يضحك : !! ماتستشير انت ماتعرف تكلم تشوف قيمة الشركة في السوق ..!
سلطان بهدوء : ربطت قيمتها بقيمتك وقلت اكيد هذا سعرها ..
ماجد : ووش بتسوي في الاثاث الي بيجي بعد ٢١ يوم
سلطان : بنعرضه في معارض سمو للاثاث هذا صديق ويبيع نفس النوعية وله ٢٠٪؜ من الربح
ماجد يرفع حاجبه بـ إعجاب : برافو عليك ..
والي اخذه خالك في حسابه ..؟
سلطان : صدقه ، لروح خالتي صيته لانها تحب اخوها عبداللطيف وعاملته مثل الأم ..!
ماجد وقف يخفي تأثره بكلام سلطان : انا باروح معزوم عند فهد .. الاحد تعال نخلص اوراق الشركة وجيب خالك معك
سلطان يأشر على خشمه ( كناية عن الطاعة ) : ابشر يالشريك ..!

:

:


طلعت غادة غرفتها مع اتصال ماجد ..
آلو
: مساء الخير
غادة الي تستغرب تقلب صوته مع مزاجه : اهلاً
ماجد : بتطلعين مكان
غادة : لا
ماجد : طبعاً مايحتاج اقول اذا طلعتي قوليلي
غادة : اوك
ماجد : وش تسوين
غادة : اكلمك مُرغمه

ماجد بضحكة : يالله سولفي علي لين اوصل بيت فهد
غادة : ماعندي سواليف ...
ماجد : من صاحبة السيارة الي رحتي معها ؟
غادة : صديقتي
ماجد : ريم او مها
غادة الي ماعاد تسأل هذا الشخص عن مصدر معلوماته : وحده منهم
ماجد : قلت لك , معك ماحب الاختصار والردود ابو كلمة وكلمتين طيب ،!! عموماً لاتنامين لين اكلمك الليلة اوك
غادة : اوك
:
سكرت غادة ونزلت تحت كانت تحضر العشاء لامها واختها وتفكر انها رغم خوفها من ماجد ماتقدر ترضخ له .. ماتقدر تكون سلسة معه تخاف تزيد متطلباته لازم تبين عدم رضاها لين يمل ..!!
وفكرت في المقطع .. من؟ ممكن يساعدها فيه ؟كيف تخليه يمسحه !؟ مجرد تخيلها ان المقطع ينتشر سبب رعب في داخلها ..
: وش العشاء
غادة : سويت شوربة وصينية دجاج
نجد تجلس على الطاولة : غادة اليوم قالت لي مرام شيء
غادة وبالها مشغول : وش ؟!
نجد : امها تبي تزورنا تقول انها تبي تخطبك لخالها
غادة : وفري عليهم المشوار وقولي لا !!
نجد : خالها جميل مره وضابط
غادة تجلس : وين شفتيه !؟
نجد : مره جاي ياخذها من المدرسة
مدت غادة يدها ومسكت يد اختها : نجد حبيبتي اسمعي الي باقوله لك .. مافيه احد جميل وقبيح من برا اذا الانسان من داخل سيء لو وجهه ملائكي .. حبيبتي لاتثقين في احد ولا تصدقين احد ولاتسوين شيء غلط ترى ممكن غلط واحد يوديك للتهلكة .. عمرك ماتتركين حذرك من الناس ومن الصدف عمرك مايصير لك موقف ماتقولينه لي عمرك ماتكون عندك مشكلة لو تافهه ماتقولينها لي عمرك ماتستسلمين لأحد وتخلينه يفرض عليك شيء دائماً دائماً خلي( لا )هي كلمتك لكل شي ماتبينه .. وعمرك ماتطيعين هوى نفسك في حاجة غلط.
نجد : غدو لو اكتب نصايحك لي من كنت في التمهيدي اعتقد بتصكين لقمان وابنه عشرة صفر ..!!
غادة : ماعلينا قوليلي اخبار المدرسة ..!
بدت نجد تسرد احداث الاسبوع مشاكل تافهه واسماء كثيرة اروى ومرام وحنان وتخيلي قصت شعرها .. وتوقعت انها بتجيب درجه كاملة و .. المعلمة هزأتها عشان حاطه على شنطتها شعار الهلال وتخيلي بكت لان الحمام تقفل عليها ومشاكل كثيرة لو تعرف نجد الي تفكر فيه غادة اعتبرت مشاكلها مع صديقاتها .. من اجمل اليوميات ~
:

:


في مجلس فهد ..
فهد بتحفظ : مبروك مع اني توقعت اني اول من يدري بس ماعليه دامك عزمت على الزواج ياماجد الله يجعله مبارك
ماجد بعقدة حاجب : زواج !؟
فهد : ولد لاتكون بتخبي بعد اليوم الاهل قالوا لي انك خطبت بنت ابراهيم
ماجد بصدق : ماخطبت احد يافهد والكلام اذا وانا اخوك ماجاك مني لاتصدقه وان خطبت انت اول من بيدري ~
كان فيصل الي جالس جنب ريان مذهول من كمية الاحاديث عن المال والصفقات والسفر عالم ثاني ومهما سمع ماتوقع ان فيه احد ممكن يعامل المية الف معاملة المية ريال .. كان الكلام في المجلس كلام كبار اقتصاد وسياسة واعمال وصفقات رغم معرفته ان ريان واهله مرتاحين مادياً نوعاً ما لكن واضح انه من معارفهم جاور السعيد تسعد ../
:

:

بعد العشاء اتصل فيصل على اوبر ( شركة اجرة ) وارسل لهم اللوكيشن ../
كان ماجد يراقب فيصل الشاب الثابت وهو يقوم مقام الرجال من ناحية الردود والكلام
فيصل : كثر الله خيرك يابو تركي انا استأذن
ماجد : انا بعد بيت عامر يابو تركي
وطلع فيصل وماجد
ماجد : انا رايح لشرق الرياض اوصلك
فيصل : لا يعطيك العافية
ماجد اصر : يارجال خاويني بدال ماتروح لحالك وانا لحالي والطريق واحد
فيصل وهو يناظر السيارة الي طلب واقفه : واعدت اوبر ومقدر ارده
ماجد : اركب وانا احاسبه واجيك
فيصل بشكل قاطع : والله ماتدفع هلله انا احاسبه واجي ..
ابتسم ماجد وفكر تصرف مثالي من اخو غادة ..
:

:

في الهاتف


ريم : لو الوقت بدري جيتك وغصب خليتك تتكلمين ..!
غادة : مافيه شي اقولك ريمو لعبت معه صدفة وعرف يعني صدفة له وحظ سيء له ..
ريم : يعني انا فهمت البنات انه يعرف اخوك عن طريق اخو صديقة بس ولو ابي توضيح
غادة : مافيه توضيح .. عرف انا مين وانتهينا
ريم : بتستمرين معه ..!
غادة : لا !
:

:

سمر : وش رايك في هذا والا البينك !؟
نورة : سمر انزلي شوي للواقع وخلينا في المهم
سمر : وش المهم !؟
نورة : انتي عارفه انا احب سلطان و..
سمر : وسلطان يموت عليك
نورة : كيف اتأكد !؟ عمره ماقال شي يعني بس نظرات وابتسامات بس عنده مجال يكلمني وعمره ماكلمني .. انا خايفه ان تأخيرهم انه مايبيني ،!!
سمر : مجنونة انتي .. يبيك مايبيك اذا خطبك تمسكي فيه بإيدينك واسنانك !!! بعدين تذكرين روان هي الي قالت للعنود ان سلطان هو الي طلب نوره
:
:

رجعت روان البيت نزلت من السيارة وهي تكلم صديقتها
قابلها ابوها : وين كنتي ؟
روان : كنت عند صديقاتي اليوم البريثداي لامول
ابو ماجد : وامك وين ؟!
روان : مدري يمكن عند خالتي سعاد ..!
اي صح صح انا سمعتها اليوم بتروح مع الجوهرة صديقتها ..
ابو ماجد : وش الريحه الي فيك ؟
روان : يوووه تخيل محتفلين في مقهى وفيه شيشة قرفنا مره عشان كذا طلعنا بدري
ابو ماجد : روحي مري اخوانك الصغار شوفيهم تقول الناني ماناموا الا الآن
تمر من جنبه حتى تتعداه وهي تمد لسانها رفض للأمر
:
:
:
يالله انزلي معي ابوي موب فيه
مشاعل : مستحيه من امك
مها : يابنت عادي عارفه اننا رايحين للسوق تعالي خليني اقيس واوريك ..!
مشاعل : لا باروح للبيت الوقت تأخر انتي قيسي وصوري لنا سناب الي موب مره نرجعه بكره
مها : زين خلي السواق ينزل الاكياس كلها لاينسى شي
مشاعل : اوك يالله
مها : وخلينا بكره نطلع غدو وريم معنا غصب
مشاعل : اي بيطلعون

:


:


نجد تقف : يالله يجنن الفيلم
غادة ؛ حزين مره
نجد : يالله بنام بس قبل لاأنام اسعديني بكلمة .. بكره بنروح مكان ( وتضم يدينها في رجاء )
غادة : اي بنروح للسوق
نجد : يييس بس لايكون مع صديقاتك
غادة : اي
نجد : لاااا مابي امشي وراكم
غادة : روحي معي انتي وفيصل وهو يمشي معك وانا اروح للبنات ،، لازم نشري فساتين لزواج مها الجمعة الجاية مايمدينا لان الاحد اختباراتك والي بعدها الزواج
نجد ؛ انا عادي احضر بفستان الملكة اغير تسريحتي وبس
غادة : لا بنشري كلنا فساتين اصلاً الإجازة جايه وبيكون فيه مناسبات ..
وفي هـ الأثناء دق جوالها وطلعت : الو
هنا سمعت صوت فيصل وهو يسولف بـ حماس : ياولد كنت ابي طيار بس وييين فهد مايجي اهله الا مره مرتين فالاسبوع
صوت ماجد الرزين : كل الوظائف الي فيها دخل كويس ومكانة اجتماعية تاخذ من الوقت عندك الدكتور والضابط والطيار يبيلك تحدد من الآن وش تبي
دخلت غادة غرفتها وبدون ماتفتح النور جلست تحت في الأرض ظهرها للكنب ومكانها تسقط عليه اضاءة الشارع من الشباك في ظلام الغرفة
فيصل : ودي بطيار بس صعب احس لازم واحد ماوراه شي
ماجد : وانت وش وراك ؟
فيصل بنبرة رجولية اكبر من عمره : امي وخواتي مالهم الا انا والا اتمنى اكون طيار
ماجد : انت اكبرهم
فيصل : لا اكبر مني وحده واصغر مني وحده بس انا اذا كبرت بكون المسؤول عنهم
نزلت دمعة غاده وهي تسمع فيصل يتكلم مع شخص غيرهم بأحلامه كان صوته في الحديث متلهف وكأنه ينتظر الشخص الي يكون له أذن بس غلطت يافيصل اخترت الشخص الخطأ ..!!!
:
سمعت تمتمة الوداع والشكر ووقفت وناظرت مع الشباك لتقف السيارة الفارهه وينزل منها فيصل مبتسم وفخور ويأشر بيده ..
مازال الجوال على أذنها
:
ماجد وهو يناظر الشباك : الو
غادة : الف مره قلت لك ابعد عن فيصل
ماجد : كنت ابيك تسمعين احلامه ، اي وحده غرفتك !؟
غادة : ماجد اتركنا الله يخليك ..! امسح المقطع واعتبر مسحه ستر لبنت ماضرتك ..! ذنبها انها بس تعرفت عليك بشكل خطأ ..!
ماجد : المقطع ماراح ينمسح بالعكس بعد السوالف مع اخوك عرفت وش ممكن يسوي المقطع في شخصيته وثقته بنفسه .. بيدمره ياغادة !!
غادة بضعف : تكفى إلا فيصل ..
ماجد : افتحي شباك غرفتك باشوف اي وحده ..!
مدت غادة يدها وفتحت الشباك وسكرته
ماجد بابتسامه ؛ تدرين ياغادة وش اتمنى الحين !! اني معك !!
جلست غادة مكانها في الظلام وتحت اضاءة الشارع وبنبرة حزينه : قلت لي مره ياماجد لو احتجتي شيء قوليلي ..!!
ماجد : وش محتاجه ؟
غادة بنفس النبرة : احتاج تتركني .. احتاج ارجع لنفسي وحياتي ..انا مش من عالمك والا اقدر اجاريك ولا حتى ارضي شخص مثلك ..
ماجد : انا بعد احتاج .. تبقين معي .. وانا تعودت اقدم حاجتي على حاجة غيري .. خليك قريبة من الجوال اذا وصلت البيت باكلمك ..!!
سكرت غادة الجوال .. وبگت ..!!
:
"
حرك ماجد سيارته في شوارع الرياض تتعاقب الانوار امام ناظره لتكون سلسلة ~ يحس بألم من صوت غادة الضعيف ..!! ونبرتها الحزينة .. ضعف غادة هزمه .. ماجد بجبروته وماله واعماله لوهله حسد فيصل الطفل لحصوله على حب غادة .. واهتمام غادة .. وابتسامة غادة .. وخوف غادة عليه
بس فيصل اخوها وآخر علاقة يتمنى تربطه مع غادة هي الأخوة ..
رفع في صوت الراديو ليشغل سمعه وبالتالي ذهنه
وتعالت نبرة كاظم الساهر الشجيه :
"
أحبيني بلا عقد .. وضيعي في خطوط يدي
أحبيني لأسبوع لأيام لساعات .. فلست أنا الذي يهتم بالأبد
أحبيني أحبيني ..
تعالي واسقطي مطرا .. على عطشى وصحراى
وذوبي في فمي كالشمع .. وانعجني بأجزائي


أحبيني بطهري أو بأخطاءي
وغطيني ايا سقفا من الأزهار .. يا غابات حناءي
أنا رجلا بلا قدرا .. فكوني أنتي لي قدري.. ""
:
زفر ماجد هذي مشكلة غادة لو بس حبتني عيشتها ملكة ليش ماحبتني ليش حاولت تتركني وليش قاومتني ..!!!!

:


:

دخل ماجد البيت من المدخل الرئيسي ..
وسمع اصوات ابوه وخالته كالعادة جدال عند قوانين البيت الي ماحد يعرفها او حتى ينفذها ~
وبدون مقدمات : سمعت اني خاطب !؟
ام سلطان بذهول : كيف ؟
ماجد : اليوم الكل يباركلي !! ممكن اعرف من خطب لي !!
ابو ماجد : خلاص كلامنا ذاك اليوم رسمي واعتبرناه خطبة ..!!
ماجد : كلامي كان غير قابل للنشر ، والآن اعتبروه مُلغى
مضاوي بخوف : لااا ياماجد لا يُمه ..
ماجد : لا اسمعك تقولين لي يمة فاهمه
مضاوي : ماعليه بس فشله ياماجد انا قلت لسمر والبنت طارت من الفرح .. حرام نكسر خاطرها~
ماجد : مشكلتكم ، اخطبوها لسلطان
ابو ماجد : كلامنا ماراح ينثني ياماجد وسمر ونوره بنروح بكره نخطبهم
ماجد : اخطبهم وزوجهم في احلامك انا ماراح اخذها لو تنطبق السماء على الارض
مضاوي بغضب : من بتاخذ ؟
ماجد ؛ مالكم شغل !!!
مضاوي : اي وحده بتدخل هـ البيت على انها زوجتك ياماجد غير سمر بـ أطين عيشتها ../
ماجد : اي وحده بتدخل هـ البيت على انها زوجتي بتصير راعية البيت فاهمه ؟../
مضاوي : تكبر قد ماتقدر ياماجد لكن مصيرك وحيد بتعيش وحيد وتموت وحيد مثل صيته رغم كل الي حولها ،، اخذت حياة امك تماماً ماراح تكتب لك حياة طبيعية وانت كذا
ماجد الي ابداً مانصدم من حقد خالته : لو كل شي مكتوب على شخصياتنا ماكتب تكونين ام ..!!
وطلع لغرفته غاضب جداً..
رمى شماغه وفكر يدخل يتسبح قبل لايكلم غادة بكمية الغضب الي داخله لانها اكيد بترعبها ~
:
:
مازالت غادة جالسه مكانها كأنها سجينة ..
انا خذلت نفسي ~ وأجرمت فيها .. بس كل شي طلع من يدي ماكان فيه انذار او خط رجعة قفزت للمنزلق على طول ~ ولا أعرف طريق امان ابداً
معقولة ماجد جاد في العلاقة المشوهه الي بيجبرني عليها ..
كيف شخص بمكانته وانشغاله يلتفت لي ويشغل نفسه بي ../ كيف اصلاً انهي الموضوع معقولة يبيني عشيقة .. انا ماعرف عن حياته شيء معقولة يجبرني ..!!
:
فزت مرعوبة من اهتزاز جوالها في حضنها ~

:
انتظر ماجد الرد وجلس في شرفة جناحه بتيشيرت اسود وبنطلون اسود وبدون مايحس بالبرد : الو
مازال يغلي من داخل :مانمتي ؟
غادة : لا
ماجد : وش تسوين ؟
غادة الي تبي تذكره بالله : اصلي
ماجد بسخرية : تدعين علي ياغادة ؟
غادة بألم : ادعي لنفسي ولأهلي عندي من الاحتياجات والامنيات الي تخليني مافكر ادعي على أحد
ماجد وهو يتأمل الفراغ : محتاج تشمليني معهم ،
غادة ترد عليه كلماته : اليوم تعلمت ابدي حاجاتي على حاجات الغير ..
ماجد : كنت عارف اني باشوهك ..
غادة : انت ذبحتني ياماجد
ماجد : لو قلت لك ماقدر اتركك تصدقيني ..
غادة : لا ، محد يموت من فراق احد ، لو كان صحيح كان متنا بعد ابوي كان عمري ١٠ سنوات وفيصل ٤ ونجد سنتين ..!! وعشنا بعده ..
ماجد بدا صدره يضيق اول مره تتكلم غادة عن ابوها : الموت فراق اضطراري بس انا مش مضطر اتركك وانتي حيه ترزقين
غادة بحزن وسخرية : كذا تخليني اتمنى الموت !!
ماجد : انا فعلاً باخليك تتمنين الموت لو حسيت انك تخونيني والا بتتركيني ..!!
غادة : ليه تحس ان الجميع يخونك او بيخونك او بيسبب لك الألم ليه ماتكون انت الي تسبب للي حولك الألم
ماجد : لاتستذكين علي ياغادة ، لاتخليني اضطر اضر الي حولك
غادة : لا ، اسحب كلامي ..
ماجد : بتروحين بكرة مكان ؟
: السوق
: اي سوق
: مدري لسى
ماجد : باحوّل لك مبلغ على حسابك الي في الرجحي لأني لقيت حسابك في الرياض قديم ..
غادة : ماحتاج شي شكراً
ماجد بحده : لا , تحتاجين ..!
غادة : ماراح اصرفها انت عارف
ماجد : بتصرفينها وبتطلبين غيرها وباحوّل لك غيرها وبتاخذين مني كل شي تبينه ..
غادة : ماراح تشتريني بفلوسك ياماجد
ماجد بضحكه ؛ انا اخذتك مجاناً ياغادة
حس ماجد براحه لأنه يحس ان غادة تحت سيطرته .. رغم كرهه للضعف في صوتها ~
طال الصمت ماردت غادة كان بس يسمع تنفسها ~
ماجد : غادة
غادة ؛ نعم
ماجد : قولي عيون غادة
صمتت وكرر : قولي عيون غادة
بلعت غادة ريقها وناظرت في الظلام : عيون غادة
ماجد : قولي انا لك ياماجد ..!!
وبعد صمتها رفع صوته : قولي انا لك ياماجد ..
لكن الجواب كان سماعها تبكي .. بصوت مكتوم ..
وقف ماجد فجأة حتى سقط جواله الثاني من حضنه وبدون مايهتم : لاتبكين !
الأمر الي زاد من حدة بكاء غادة ..! وماجد يكرر : لاتبكين
:



:


أَعْطِنِي حُرِّيَّتِي أَطْلِقْ يَدَيَّا
إِنَّنِي أَعْطَيْتُ مَا ٱسْتَبْقَيْتُ شَيَّا
آهِ مِنْ قَيْدِكَ أَدْمَى مِعْصَمِي
لِمَ أُبْقِيهِ وَمَا أَبْقَى عَلَيَّا
مَع ٱحْتِفَاظِي بِعُهُودٍ لَمْ تَصُنْهَا
وَإِلاَمَ ٱلْأَسْرُ وَٱلدُّنْيَا لَدَيَّا

:


:

قراءة ممتعة ..