[البارونة]

صباحكم سعيد
:
قدر الأمكان باحاول انزل 3 فصول أسبوعياً
تعليقكم على الفصول يسعدني جداً فـ شكراً من القلب لكم



" الفصل التاسع "



"أنا وحدي حبيبك لو قريتك في وجيه الناس
ولو وجهك ذنوبٍ، مالها في سجدتي توبه."
:




دخلت البيت الهاديء ولقت امها في الصالة : الحمدلله .. تأخرتي ياغادة
غادة بشكل متقطع : اي كان فيه حادث ..في الطريق .. وكنت اذاكر مانتبهت للجوال
ام غادة تاقف وتناظر بنتها : فيك شي كنك مرتاعة .. شايفه الحادث من قريب !؟
غادة الي كانت تكافح دموعها : اي
امها الي توقعت ان غادة تذكرت حادث ابوها : يابنتي الله يخلف على المسلمين ويعوضهم هذا حال الدنيا الله يجبر مصابهم ..
توجهت غادة لغرفتها على تمتمة امها ودعائها .. ولسريرها مباشرة وغطت راسها باللحاف كأنها تهرب من الدنيا ~

:

:

في الشركة بعد ماتأكد بنفسه ان غادة وصلت للبيت : احمد احجز لمدير فرع جده ودبي يجون للرياض نشوف حل للمشاكل الي فالفروع ..
احمد : وجانا ايميل من مدير العز القابضة باستقالة عدد كبير من الموظفين احتجاج على دوام الخميس المسائي ..
ماجد : ارسل لمدير التوظيف يحط اعلان بالتخصصات المطلوبة للوظائف الشاغرة وخل الاعلان مفصل بساعات العمل وعدد ايام الاسبوع والراتب والمميزات المالية وارفق مع الاعلان بند ساعات الدوام من وزارة العمل ..
احمد بتردد : ياطويل العمر الي استقالوا معنا من سنه وسنتين وكلهم كفاءة اقول لو تقابلهم وتفهم منهم
ماجد : هل طلبوا مقابلتي قبل الاستقالة يااحمد او رفعوا تظلم
احمد : لا
ماجد : اذن قفزنا هالخطوة ..

رجع احمد لمكتبه وهو مستغرب تصرف ماجد معه من ٧ سنين عمره ماشافه يقبل استقالة بشكل سريع خاصة وانه مايستهين برزق احد ابداً ..
:
:
: اقولك قال اجلوها بنخطب سمر ونورة ..
سمر : والله ياخالة .. ماصدق ! ياخالة ماجد حلمي من وعيت على الدنيا
ام سلطان : ابو ماجد كلم احمد سكرتيرة وعرف ان عنده نهاية الشهر سفرة لسويسرا اعتقد عمل وهو الي بيروح بنفسه لذا اعتقد انه هه بعد شهر بنتكلم
رسمي
سمر : الله يبشرك بالخير .. ياوجه الخير
ام سلطان : والله ياسمر انا ليل نهار امدحك عنده واثني عليك لين دخلتك غصب في راسه والا هو قبل قال لي مالك شغل في زواجي ..بس قدرت اجيبه لك
سمر : اجل بادور لي فستان من الآن واطلبه .. باشوف كولكشن جسميكو والا ايلي صعب
ام سلطان : يالله باسكر سلمي على امك ..وهه لاتعلمين احد تراه محرص علي .. وتراه جني لو يشم خبر احرقنا
سمر : لا لا مابيه يدري اني داريه عشان اجيكم براحتي ..
سكرت سمر من خالتها وراحت تركض لغرفة نورة
: البشارة البشارة
نورة : عسى خير
سمر : بداية الشهر الجاي سلطان وماجد بيخطبونا
نورة : ليه طايرة من الفرح ولسى ماصار شي من هنا للشهر الجاي نشوف يصير شي والا نفس كل مره كلام..!!
سمر : مجنونة تعرفين وش معنى تكونين حرم سلطان عبدالعزيز العالي واكون حرم ماجد عبدالعزيز العالي .. يعني بنكون البيست في العايلة وبنكون اخذنا اكثر ثنين مهمين في العايلة وبتحسدنا كل بنات الرياض
نورة تجلس وترجع لكتابها : انتي تصلحين لماجد انتي وياه متشابهين كلكم باردين وكلكم عندكم حب تملك فضيع ..
سمر بفرح : اخر مره قابلته كان مره لطيف معي وحتى قال لي حياك الله تتوقعين عشان مكياجي ذاك اليوم ضابط شكلي بتعامل مع ميس اللبنانية دايم ..
نورة : الحين ماجد الي من سنه مازار امي واخر مره قابلها في العيد بتتعدل علاقته معنا مستحيل ..!!
:
:
ثقل عجيب في راسها فتحت عينها لقت الدنيا ظلام وتحس بحرارة اخذت الجوال الساعة ٨ : اف نمت كل هـ الوقت ..!!
حاولت تقوم بس ماقدرت واتصلت ؛ نجد انتي تحت
: اي
غادة ؛ تقدرين تجيبين لي كوب شاهي او قهوة احس بحلقي
بردت اطراف غادة بمجرد ذكرى احداث اليوم ومسكت راسها .. وقبل لاتبدأ تفكر انفتح الباب الي دخلت منه نجد وامها
ام فيصل تمسك جبين غادة : يوه عليك حرارة
غادة : اي احس عظامي تعورني مرة نجوده هاتي الكوب ودوريلي بنادول
نجد : خلاص اذا حرارة لاتشربين الشاهي باجيب لك عصير دقايق
ام فيصل : ارتاحي اكيد من التكييف عالي
قطع كلامها نغمة جوال غادة الي ناظرت الرقم وتوترت ..ماتقدر ترد !!
امها : من الي يدق
غادة : وحده معي فالقاعة طالبه منها تخطيط
: زين ردي وانا بانزل اشوف فيصل ..
: بصوت ضعيف : الو
ماجد الي كان توه طالع من الشركة : وش فيه صوتك
غادة : وش تبغى ؟ انت قلت اذا شفتك خلاص اتركك !
ماجد : هذا لو رديتي علي يوم السبت بس خلاص طلع الموضوع من يدك .. قوليلي وش فيه صوتك
غادة : مالك شغل
ماجد بصوت حاد : غادة ، شكل عجبك الوضع وتبين نكرر الي صار اليوم
نجد الي دخلت فجأة : غدو جبت لك بنادول اكسترا مالقيت العادي وخذي العصير الشاي بيزيد حرارتك
ماجد الي سمع الحديث : انتي تعبانة
غادة ؛ اوك سهام اكلمك بعدين
ماجد : لاتسكرين !!! انتي تعبانة !!
غادة وهي تناظر نجد : اي حرارة وصداع ماقدر اركز على التخطيط يالله باي .. وسكرت
:
:
تنفس ماجد بقوة وحس بحرارة في صدره فكرة ان غادة تعبانة فكرة مُرهقه صوتها الضعيف المتردد بس يحسسه ان وده يكسر الدنيا ~
تذكر وقفتها الشامخة قدامه ووجها المرتفع بشموخ رغم اهتزاز دقنها جمالها الباهر من بشرتها المرمر وشفايفها التوت وشعرها الحرير ذكرته بفرس اصيلة ..! مجرد ماتمر صورتها على باله ترتفع حرارة جسده ونبضات قلبه ويشعر بحاجه ماسة لتأملها .. وهذا الي خلاه يفتح جهاز جواله المرتبط بالكاميرا الموجودة في الشقة كم مره شاف المقطع .. كم مره لاحظ محاولتها التراجع كم مره اعاد التفاتتها واهتزاز شعرها المربوط ونظرة عيونها الخائفة للكاميرا .. ../

:

:

حطت غادة الجوال ورجعت تحط راسها على المخدة بضعف
نجد : غدو شكلك مره تعبانة وجهك احمر خلينا نروح للمستشفى
غادة تأشر براسها لا
نجد : طيب باجيب شي تاكلينه
غادة : لا بس طفي النور بنام
نجد : اوك بس باشيك عليك لو ماخفيتي ترى بنروح الطبيب .. وطلعت وسكرت الباب ..
وفي الظلام الدامس تشعل الافكار المؤلمة قناديلها .. غادة تتخيل احداث اليوم كالمتفرج في مسرحية .. ضخامة ماجد وقوته ولامبالاته اخرست اي مشاعر كانت تعتقد انها تنمو في قلبها .. حتى ألمها لتركه اصبح في نظرها ضعف .. لو تركته اول مادرت انه ماجد العالي مالقت نفسها في هالموقف .. هدؤها امامه في الشقة كان الحل الوحيد لان مقاومته او مجادلته حتى رفع وتيرة غضبه غباء لان جرأته في توقيفها في الشارع واخذها لشقة حسسها بعدم الامان حتى في غرفتها .. مره بس !! تركت حذري من الحياة مره وحده ..! وصفعتني بقوة .. فعلاً غلطة الشاطر بألف .. مجرد تخيله امامها بملامحه الحادة الساخرة حتى رائحة عطرة القوية خلتها تحس بالخوف .. ( ندا جبين غادة وهي تتخيل قربه منها ولمسه لتعليقتها ) الذكرى خلتها تجلس وتفك السلاسيل كلها وترميها في الارض ..


:



:




:

:


دق ماجد على غادة وماردت : معقولة تعبانة مره وارسل لها رسالة مافتحتها وغير وجهة سيارته لبيتها ..
:


تحس غادة بالحركة في غرفتها .. بس الثقل في راسها يزيد تسمع كلام بس ماتفهمه .. احد يتكلم واحد يلمس جبينها ويحاول فيها تشرب ..فتحت عينها وقابلها وجه نجد الي تتكلم بس وش تقول !؟ وفيصل يحاول يقومها ورجعت غمضت عينها نغمة الجوال تتردد في راسها .. اذا مارديتي !! اذا الجوال مغلق !! انا وين !؟!

:
وقف ماجد عند اول الشارع ونزل وكالعادة مافيه سيارة عند بابهم وش متوقع ! اسعاف !! ممكن تكذب وتحاول تتهرب منه .. التفت يمين لما طلع اخوها فيصل .. كيف يفسر وجوده الان الساعة ٩ في حارتهم ..
الحارة الهادية خلت وجود ماجد ملاحظ من قبل فيصل الي ناداه : هلا والله
ماجد : هلا ماشاء الله انت بيتك هنا
فيصل : اي هذا اقلط حياك
ماجد : لاوالله مستعجل انا مريت لان فيه بيت للبيع في هالمنطقة بس مادري بالضبط وينه
فيصل ؛ اقلط حياك القهوة والمه وانا اعرف الحي زين اعلمك وين البيوت للبيع
؛
دخل ماجد وهو يحس بريحة غادة وانه قريب منها
:حياك يابو عبدالعزيز
البقا يافيصل
ودخل فيصل لامه نبي قهوة بسرعه
:

:

في احلام غادة تشعر بحرارة في جبينها والشخص الموجود يلمس اقدامها وجبينها ويكلمها لكن صوت امها الي همست بعدين نجد الي قالت ماجد العالي عندنا .. خلاها تحاول تفتح عينها وتهز راسها : لا .. لا .. ابعد عن فيصل لا .. اه يمه خلاص .. الجوال ..لا
: بسم الله عليك غادة يمه .. بسم الله عليك خذي يمه خذي اشربي مويه حرارتك ارتفعت
:

:

؛ عجلي يانجد
يعني بيشتري هنا بيت
حسب كلامه .. هاتي حطي تمر وين التمر


دخل ماجد المجلس النظيف ومرتب واثاثه قديم وجلس وهو يتخيل غادة في البيت وش تسوي الحين البيت ساكن مافيه صوت
الا صوت خطوات فيصل جاي
: يامرحبا حياك الله
البقا يافيصل
: اي قلت تبي بيت للبيع هنا
: حسب ماقالولي انه قريب منكم
: لااا شفت الاشاره الي عند بقالة الحياة بعدها يمين هناك فيه بيتين للبيع لكن هنا مافيه ابداً
ماجد : اي توقعت اني مضيع
فيصل وهو يصب القهوة : دخلتك بيتنا مكسب لنا يابو عبدالعزيز
ماجد ؛ انت مالك اخوان يافيصل
فيصل ؛ لاوالله انا وبنتين توفى الوالد قبل١٣ سنه الله يغفر له
ماجد : الله يغفر له .. ان احتجت شي هذا رقمي ( وطلع بطاقة ) ترى معزتك من معزة ريان وفهد
فيصل ؛ ماتقصر ووقف مع ماجد الي وقف واستأذن
:

:

وطلع فيصل لغرفة غادة الي وضعها سيء جداً : خلونا نوديها ..!
ام فيصل : من اليوم ترفض وبدت الحين تهذي من الحرارة .. راح الرجال
فيصل : اي كان عنده شغل هنا ../ ويجلس على طرف سريرها واستغرب ان غادة ماسكه الجوال بقوة : غدو .. غدو نروح للمستشفى تاخذين ابره !!
غادة بتمتمه : فيصل لاتروح ..!
فيصل : طيب امشي ..
غادة بدت تنتبه للموجودين : لا مايحتاج مستشفى ابي مويه .. اه راسي
ام فيصل : خذي مسكن بعد
غادة :كم الساعة ماصليت ..من العصر ..
؛


؛

أصدق الحزن
ضحكة من عيونك
وأكذب الحب ليلة في وداعك

أنا عاقل
ويغريني جنونك
أنا غارق .. ومحتاج لذراعك ..

قراءة ممتعة انتظر ردودكم بفارغ الصبر