[لامارا]

الابله بعصبيه وهي تؤشر على ساره بقرف : مو قلت لك لا تداومين وشعرك كذا ؟!
رفعت نظرها بخوف وبسرعه نزلت نظرها للارض
وتفرك يدينها من الخوف
الابله : كل يوم تيجي شكوى من الامهات !!
وش ذنب بناتهم ينعدون بسبب قذارة اهلك ؟!
مطت ساره شفتها بألم والدموع تلمع بعيونها
الابله تابعت بعصبيه : قومي اشوف
وقفت ساره باستسلام بدون اي كلمه
الابلة اشرت عند سلة الزباله : بسرعه روحي وقفي هناك اشوف
توجهت ساره بدون اعتراض
وقفت ورفعت عيونها شافت
البنات يضحكون عليها
ساره بمكابره ابتسمت وهي تتطالع بالبنات
الابله بعصبيه : على وش تضحكين يا حظي ؟!
على قذارتك ؟!
نزلت ساره نظرها للارض وهي تحس نفسها رح تنفجر بالبكاء بأي لحظه
بدأت المعلمه بالشرح
وساره تناظر الارض خايفه ترفع نظرها وتزفها المعلمه
مر الوقت وهي تحس نفسها تعبت من الوقفه
بدون شعور جلست على الارض تريح رجلينها
وسرعان ما فزت على صراخ المعلمه : وقفي
اقتربت منها المعلمه : مين سمح لك تجلسين ؟!
رفعت رأسها ساره وسرعان ما نزلته وغطت وجهها بيدينه
الابله بعد ما ضربتها كف بتوعد : يا ويلك اذا جلست !
ورجعت تكمل شرح الدرس بقلب بارد بدون الشعور بطفله
تناظر الارض بتعب وذل
وش ذنبها حتى تعاقبها الابله ؟!
وش يطلع بيدها ؟!
كيف تنظف شعرها من القمل ؟!
جدتها نظرها ضعيف ....وين تروح ؟!
ما تتحمل الوقوف اكثر ...تبغى ترمي نفسها بفراشها وتنفجر بالبكاء
ما صدقت لما رن الجرس
وبسرعه جلست على الارض لما طلعت الابله
تجمعوا البنات حولها يضحكن عليها بتعليقات مختلفه: يا حرام طلعتها المعلمه
_الابله لئيمه وقفتك
_ليه ما تنظفي شعرك علشان ما تعاقبك
_شوفي وجهك احمر مكان الكف
_ اكيد يوجعك
ردت بابتسامه مزيفه : ما يوجع عادي
_ما تعبتي من الوقفه
ردت بنفس الابتسامه : عادي احسن من الجلوس
قاطعهم دخول نفس الابله ردت السلام
وناظرت ساره واشرت لها توقف
وقفت ساره باستسلام ما باليد حيله
**
**
**
بالفسحه
عائشه والبنات قالوا لها وش صار
ناظرت ساره بقهر على حالها : تعبتي ؟!
ساره بمكابره والدموع تلمع بعيونها : لا عادي
عائشه بقهر : الله يأخذها جعلها للكسر
غبيه لو تموت ما ارد عليها
قاطعتها وحده من البنات : تضربها اذا رفضت
عائشه بقله حيله : وش رايك تهربين من المدرسة؟!
ساره هزت راسها بالرفض بصوت فيه الغصه: لا جدتي لو عرفت تزعل
تبغاني ادرس واكون من الاوائل
وقفلت على الموضوع بابتسامة طفوليه: خلاص طنشوا الموضوع
**
**
**
**
استغربت ام سعيد من لما رجعت ساره من المدرسه
وهي جالسه : وش فيك جالسه ؟!
ساره هزت راسها بالرفض : ولا شيء
زاد استغرابها بالعاده تتحرك كثير
توجهت للمطبخ وبعد دقائق طلعت وهي تعمل مفاجأة لساره : تعالي شوفي وش جبت لك !
وقفت ساره بتعب وتوجهت لجدتها وابتسمت لما شافت طبق من الحلويات
جلست عند جدتها وبلعت ريقها : هذا لنا ؟!
ام سعيد ابتسمت لها : ايه لنا اشتريته لك ؟!
ساره مو مصدقه : متأكده ؟!
خزتها ام سعيد: وبعدين معك ؟!
غمضت عيونها للحظات وهي تشعر بالسعاده
واخيرا طبق حلويات امامها

تحس نفسها بحلم واي لحظه تصحى منه
وبسرعه صارت تأكل قبل ما يختفي ويطلع حلم
والجده تناظرها بحزن وشفقه بس ما يطلع بيدها شيء .......
**
**
**
جالسه بالصاله وتكتب واجباتها ناظرت ابوها : بابا متى تروح للدوام ؟!
أبو سعود يطقطق بالجوال : ليه تسألين ؟!
عائشه رفعت حاجب : لانك كاتم على نفس نهى واسماء !
نزل الجوال وناظرها : نعم ؟!
عائشه ببراءه : ايه قالوا انك كاتم على نفسهم بجلستك !
تنرفز من كلامها : والله؟!
وليه ان شاء الله كاتم على نفسهم ؟!
رجعت تحل الواجب وتتكلم : علشان مسلسل ...وانت مانعهم يحضرون
قاطعها وهو ينادي بصوت غاضب : نهى اسماء
يا نهى يا زفته
دخلت نهى واسماء الصاله باستغراب : نعم بابا
ابو سعود بعصبيه : نعامه ترفسك انت واياها
انا كاتم على أنفسكم؟!
نهى واسماء بصوت واحد : مين قال ؟!
عائشه رفعت القلم بيدها وهي تقرص بعيونها : انا سمعتكن قلتن كذا ؟!
نهى وجهها صار احمر : كذابه
اسماء نفس حالة نهى : ايه كذابه
عائشه فتحت عيونها : والله العظيم قالوا
بالغرفه
علشان مسلسل ... قلتم عنه كذا
نهى بنكران : اول مره اسمع بهذا المسلسل ؟!
عائشه بتصميم : كذابه متابعيته
فيه واحد اسمه عمر يحب صاحبيته ويطلع معها للسوق هي ما تحبه تحب صاحبه وقال لها تتزوجه
قاطعها ابو سعود : خلاص اسكتي انت هذي السوالف تعرفينها حتى!!
وش عرفك بالحب ؟!
عائشه بطفوله : اعرفه لاني احب كونان ورح اتزوجه لما اكبر
ضرب على جبهته بصدمه من هالجيل
اذا هذي للي بالصف الثاني تقول كذا
وش يقول عن نهى واسماء!!!
وقف بغضب وقرب من نهى واسماء واعطاهم للي فيه النصيب وبتوعد : والله لو اسمع وحده فيكم
حاضره هالمسلسل الا امسح فيها الارض
عائشه باستغراب : ليه تمسح فيهم الارض عندنا
ممسحه للارض
ابو سعود بغضب: انت اسكتي ما ابغى اسمع صوتك
واذا سمعت كلام الحب هذا الا
قاطعته بضجر وهي توقف وتلم اغراضها : حتى الحب عندكم حرام
افففف
وبسرعه هربت لما شافت ابوها وقف يضربها
ابتسم و هو يسمع صراخها اكيد وقعت بيد نهى واسماء
**
**
**
**
ام عزام وهي مجهزه نفسها : يلا يا عزام تأخرت !
عزام ابتسم : خايفه جدتي تخصم عليك اذا تأخرتي ؟!
ابو عزام ناظر زوجته : اخوك خلف هنا ؟!
ام عزام هزت كتوفها : ما ادري
بس اكيد طالع للبر ؟!
وش تبغى فيه ؟!
ابو عزام : ولا شيء
طلعت ام عزام مع عزام وبعد ما حرك
ناظرته : ترى جدتك طل يوم تسألني متى تخطبون له ؟!
عزام : يا يمه الحين خليني اتخرج ويصير خير
ام عزام : بس راما بعد يومين ملكتها
قاطعها بلامبالاه : الله يوفقها
وابتسم وهو يتخيل طيف عائشه تكبر ويخطبها
بس المشكلة صغيره كثير !!
ورح يتأخر بالزواج حتى ينتظرها
و نفس الوقت ما تناسب مستواه بس ما يدري تلفت انتباهه
**
**
**
**
في اليوم الثاني
ساره وشوي تبكي : ما ابغى اروح للمدرسة!
ام سعيد بهدوء غريب : اذا ما رحت للمدرسه كيف تدخلين الجامعه ؟!،
ساره هزت راسها بالرفض : ما ابغى اروح للمدرسه
وقفت على حيلها بعد صرخة جدتها : ساره
قومي انقلعي انت ما يمشي معك الدلع
بسرعه الحين تتأخرين على المدرسه
توجهت للحمام وهي حامله كل الهموم فوق اكتافها
خايف تروح للمدرسه ...ما تبغى تكون مضحكه للبنات ...
وتتعاقب وتبقى طول الدوام عند الزباله
وكأنها شيء قذر ...
كل ما تتذكر عقاب المعلمه ونظرات البنات
تحس قلبها يوجعها
وش ذنبها ؟!
مو قادره تفكر بحل للخلاص من هالقمل
صار عندها عقده منه !
غير نظرات البنات متقززات منها !
وش تعمل بنفسها ؟!
توجهت للمدرسه وهي خايفه
رن الجرس وبالطابور كانت تناظر الارض
خايفه ترفع نظرها وتشوفها المعلمة
اصبحت بالنسبه لها رعب تخاف منها
دخلوا الصف وكانت مرتاحه لانه الحصة الاولى
كانت انجليزي
جالسه تتمنى ما تنتهي الحصه حتى ما تشوف الابله
من خوفها ما عادت تركز بدروسها الخوف مسيطر عليها
انتهت الحصة وبدأت تقضم اظافرها
الحين رح تيجي الابله هدى
غمضت عيونها وهي تشعر بمغص ببطنها
لما سمعت صوتها دخلت
الرعب للي دب بقلبها ما سمح لها تفتح عيونها
حست بخطوات المعلمه فوق رأسها
بلعت ريقها بصعوبه
وسرعان ما فتحت فمها بآه من الالم
وحطت يدها على ظهرها مكان العصا على ظهرها
الابله بقسوه معروفه عنها : وش قلت لك ؟!،
كم مره أرسلت استدعاء لاهلك حتى يجون للمدرسه !
وجوال ما عندكم انتم بأي عصر عايشين ؟!
نزلت نظرها ودموعها على وشك النزول
ماسكيتهم بالغصب
ما تبغى تبكي قدام احد ما تبغى
الابله بحده: انت ما تفهمين الكلام ؟!
اعطيني يدك أشوف
ساره رفعت نظرها بتردد وخوف وقلبها يدق طبول من عصبيه المعلمه وماسكه العصا تبغى تضربها
ساره وبصوت على وشك البكاء: اخر مره
الابله سحبت يد ساره وضربتها بالعصا
وبصرخه : ارفعي ايدك
ضربتها 5 عصي بدون رحمه او رأفه
ودفتها بقرف :،احملي مقعدك وحطيه هناك
وقفت ساره وهي زامه شفايفها حتى ما تنفجر من البكاء
وحطته جنب سله الزباله وجلست
وهي تناظر الارض
وبقلبها تردد ما ابغى ابكي ما ابغى
ماما انا شاطره ما رح ابكي
بابا انا شاطره ما رح ابكي
انا كبيره ما ابكي ما ابكي ما ابكي
وسرعان ما دفنت وجهها على الكتاب طلعت منها
شهقة غصب عنها ما قدرت تكتمها
الابله بعصبيه : ولا نفس
وناظرتها بحزم لثواني ورجعت تكمل الدرس بكل برود وقسوه
حطت يدينها الصغيره على فمها تمنع شهقاتها
تطلع غصب عنها
**
**
**
**
رجعت للبيت والدموع تلمع بعينها
من أي قلب مخلوق قلب المعلمه ؟!!
ما في قلبها رحمه لما تضرب طفله بالابتدائي ؟!
تذكرت لما ضربت نفس الابله زميلتهم لانه
مريولها عليه بقايا عصير
شديده وقاسيه لدرجه الجنون !!
متى تكمل الصف الثاني وترتاح منها ؟!
فتحت الباب بشويش وسرعان ما ابتسمت لما شافت جدتها كالعاده بالحوش هي مصدر الامان لها : السلام عليكم
ام سعيد تنظف بالحوش : وعليك السلام والرحمه
اخذت نفس ساره وتكلمت بفرح عكس الجروح للي بقلبها : يمه
قاطعتها ام سعيد بعجله : عجلي بدلي وغسلي وصلي وتعالي ساعديني جارتنا رمزيه رح تزورنا
سكتت هذي هي حياة جدتها كله جد بجد
حياتها كلها شغل بشغل ما عندها شيء ترفيه او
قاطعتها بنرفزه:،عجلي قلت لك مو تتأملين
ابتسمت على طبع جدتها وتوجهت للداخل
**
**
**
**
مجتمعين على الغداء عائشة بضيقه : بابا اطلب منك طلب ؟-
ابو سعود وهو يمسك الملعقه باستغراب : مني انا ؟!
عائشه بطفوليه: ايه انت لانك جالس بالبيت الحين لا شغل ولا مشغله وتقدر تنفذ طلبي !
ابو سعود حط اللقمه وناظرها : ما ادري على مين طالعه لسانك يبربر وقلدها بسخريه «لا شغل ولا مشغله »
الله يكفيني عينك حاسديتني على الإجازة !!
وش هالبنت هذي !!
ام سعود ابتسمت : خلينا نسمع طلبها
عائشه مدت بوزها بطفوله
ابو سعود حط يده تحت خده : وش طلبك ؟!
عائشة تذكرت موقف بالمدرسه وحولت عليه خافت تنسى : اول شيء اقول لك وش صار اليوم وبعدين الطلب
تابعت كلامها وهي تشوفه يهز راسه : اليوم تضاربت مع رنين
ابو سعود : مين رنين ؟!
ساره لوت بوزها : ابوها يدرس معك بالمدرسه
اسمه حسن
لوى بوزه ابو سعود بوزه بقرف من هالطاري: وليه تضاربتي معها ؟!
عائشه بغضب : تقول عنك انك ما تعرف تتدرس
وغبي وابوها اشطر منك
وقال ابوها المدير وانت تشتغل عنده
قهرتني وضربتها
نهى : ليه ما طنشتيها ؟!
عائشه رفعت حاجب بغرور : انت ما تتدخلين ؟!
نهى عفست ملامحها : مالت عليك
ضحك ابو سعود عليها وهو يتخيل حسن المدير
ام سعود : مو حسن هذا السائق للي يوصلكم لهنا
هز راسه ابو سعود وما زالت اثار الضحكه على ملامحه
عائشه بتفاخر : قلت لها اصلا بابا هو المدير اخذ اجازه على كيفه وضحك عليهم وقال انه مريض
وهو مثل الحصان
وقف وهو فاتح عيونه : حسبي الله
ما لقيتي الا هالبنت تقولين لها ؟!
وبعدين مع لسانك الطويل ؟!
ضرب على جبهته بقهر : هذا ابوها الفتان كل شيء ينقله للاداره
شد على اسنانه وهو يردد : لا حول ولا قوة الا بالله
ام سعود بحده لعائشه :، مو قال لك ابوك ممنوع تنقلين شيء برا البيت ؟!!
عائشة عقدت حواجبها : انا وش قلت؟!
ناظرها ابو سعود وهو رافع يدينه لو يطلع بيده كان خنقها : انت اخخخخخخ منك !
ومن لسانك !
مطت شفتها وما عجبها كلامهم ليه يناظرونها كذا ما عملت شيء
اسماء لعبت بحواجبها تحاكرها
انقهرت منها :،سدي حلقك يا
ابو سعود بغضب وهو متأكد اذا وصلت السالفه لحسن رح يعمل له مشكله مع الاداره ويملح ويبهر على كيفه : خلاص اسكتي
ما وصلنا من لسانك الا المشاكل
عائشة : طيب بعدني ما طلبت الطلب ؟!
ابو سعود يتابع اكله :،ما في طلبات
كملي الغداء وانقلعي من وجهي احسن ما اطلع حرتي فيك
ام سعود : شوف وش طلبها يمكن في مصيبه من طلبها
طالع أبو سعود عائشه وهو رافع حاجب : وش طلبك ؟!
عائشه مدت بوزها بزعل : خلاص ما ابي شيء
سديتوا نفسي عن الكلام
طالعها بنظره قويه : قولي طلبك احسن ما
قاطعته بضجر : خلاص الحين اقول
سكتت للحظات وبعدها تكلمت بهدوء : ابغاك تروح تشتكي على الابله هدى
اليوم ضربت ساره لانه فيها قمل
رفع عيونه للسماء وهو ماسك نفسه : الله يجيبك يا طول البال !
غثتيني طلب طلب طلب وبالاخير هذا طلبك ؟!
عائشه بضيق :،يعني ليه تضربها ؟ !
وبعدين القمل ربنا خلقه يعيش براس ساره
حرام وين يروح يعيش اذا طردته ساره
بس الابله راسها مصدي ومسكر مو راضيه تستوعب هالكلام !
انا رحت لها وقلت لها القمل مو وساخه بابا كان راسه مليان قمل وكان يفتخر فيه
فتح عيونه بصدمه من كلامها مين مسلط هالبنت عليه : من وين جبت هالكلام ؟!
انا راسي كله قمل؟!
عائشة غمزت له بطفوله : ضحكت عليها
علشان تعرف انه القمل شيء عادي
ام سعود بشبح ابتسامه : وش قالت لك الابله ؟!
عائشة عفست ملامحها بكره : طردتني انا وصديقتي
اسماء : مين صديقتك ؟!
عائشه بابتسامة : سحر ابنة ابو سالم
وقف عن الاكل بغضب : لو اذبحها ما احد يلومني !!
عائشة رفعت حاجب : انا وش عملت علشان تذبحني ؟ !
توجه نحوها وبسرعه هربت صرخ : تعالي يا زفته
مسكته ام سعود : هدي يا ابن الحلال
بعدها صغيره وما تفهم
ابو سعود بقهر : قهرتني هالزفته
**
**
**
**
وقفت قدام المرايه الصغيره ما تدري وش الحل
حتى تتخلص من معاناتها
مسكت شعرها مجدل طوله لنصف ظهرها
ناعم وجميل وش الفائده من جماله
وتعبت جدتها فيها
ما عندها الا تتخلص منه ما تبغى شعر
حتى البنات ما يتمسخرون عليها !!
والابله ما تضربها وتعاقبها !!
وام سعود تخليها تلعب مع عيشه !
وتريح جدتها من غسله وتمشيطه !
مسكت المقص وبدأت تقص بشكل عشوائي
تبغى تتخلص منه وترتاح
كانت تسقط خصلات شعرها على الارض بعشوائيه
بعد وقت كملت وناظرت نفسها بالمرايه
ونزلت نظرها للارض
شعرها منثور على الارض
نزلت على الارض تبغى تلمه وترجعه لشعرها
ما تدري كيف قصته كذا ؟!
لفت وجهها بخوف لما سمعت صوت جدتها على الباب :،ساره !
**
**
**
**
انتهى البارت ....انتظروني يوم الاثنين ...دمتم بخير : )